1. ¿Tlenon kachtopa noneki kichiuas akin kineki kichijchiuas se kajli?

XKONNEMILI ika se tlakatl kineki kichijchiuas se kajli niman kuajli yokitak kenijki yes. San ika ¿kuajli yeskia tla niman konkoujtiuetsi tlen ika kichijchiuas? Ka. Kachtopa noneki kichiuas itlaj tlen melak ueyi kijtosneki. ¿Tlenon? Noneki kitas kech tomin kipojpolos ika kichijchiuas yejon kajli, ijkon kitas tla kajxilis itomin. ¿Xmelak ika yejuin kipaleuis makitlamilti yejon kajli?

2. Ken kijtoua Lucas 14:27-30, ¿tlenon noneki kuajli tikasikamatis achto timoapolaktis?

² Kanaj tiktlasojtla Jehová niman tiktlasojkamachilia tlen yokichiuj mopampa, ika yejon, kanaj tikneki timoapolaktis. Tla yejon tikneki tikchiuas, noneki kuajli titlanemilis, ijkon ken yejon tlakatl akin kineki kichijchiuas se kajli. ¿Tleka ijkon tikijtouaj? Xtlanemili itech tlen okijto Jesús ipan Lucas 14:27-30 (xpoua). Jesús okijto ika akin kineki nochiuas inomachtijkauj, noneki kinektos kipojpolos tlen noneki, kema, nonekis kikauas tlen kuelita niman kixikos miyek tlemach (Luc. 9:23-26; 12:51-53). Kuakon, achto timoapolaktis, noneki kuajli tikasikamatis tlenon kijtosneki timochiuas inomachtijkauj Cristo. Yejon mitspaleuis kuajli xtekichiuili toTajtsin sakin ika yotimoapolakti.

3. ¿Itech tlenon titlajtoskej ipan yejuin tlamachtijli?

³ Aman ika yotikasikamat tlenon noneki kichiuas akin kineki noapolaktis, kanaj timotlajtoltia: “¿Kuajli yes tla ninoapolaktia?”. ¡Kema! Pampa tla timoapolaktia, tikselis miyek tlateochiualistin aman niman ika tlayekapan. Ipan yejuin tlamachtijli, titlajtoskej itech apolaktilistli, niman yejuin mitspaleuis xkita tla iuelis timoapolaktis.

4. a) ¿Tlenon kijtosneki timosentemakas? b) ¿Tlenon kijtosneki ijkuak yakaj “kelkaua nochi on tlen más kitlasojtla”, ken kijtoua Mateo 16:24?

⁴ ¿Tlenon kijtosneki timosentemakas? Yejuin itlaj tlen noneki tikchiuas tla tikneki timoapolaktis. Timosentemakas kijtosneki tikchiuilis se teoyotl Jehová ika nochi moyojlo kampa tikijlis ika tikmaktilia monemilis. Ijkuak yakaj nosentemaka itech Jehová, “kelkaua nochi on tlen más kitlasojtla” (xpoua Mateo 16:24). Desde yejon tonajli, Jehová kinoyaxkatia yejon tlaltikpakchane (Rom. 14:8). Ijkuak yakaj nosentemaka, kijlia Jehová ika ipan yejon tonajli ika tlayekapan san yejua kiyolpaktis pampa yejon tlen más ueyi kijtosneki ipan inemilis. ToTajtsin Jehová xtexchiualtia itech matosentemakakan, san ika, tla tosentemakaj, kichia matikchiuakan tlen tikijtouaj (Sal. 116:12, 14).

5. ¿Tleka xsan noijki kijtosneki timosentemakas niman timoapolaktis?

⁵ ¿Tleka xsan noijki kijtosneki timosentemakas niman timoapolaktis? Timosentemakas yejon itlaj tlen san moselti tikchiuas niman san tejua tikmatstos iuan Jehová. San ika, timoapolaktis yejon itlaj tlen tikchiuas imixpan oksekimej, ken ipan se ueyi tlanechikojli. Ijkuak timoapolaktis, tikimititis oksekimej ika yotimosentemakak itech Jehová * niman ika tiktlasojtla “ikan nochi moyojlo, ikan nochi moalma, ikan nochi motlamachilis, niman ikan nochi mochikaualis”. Noijki tikteititis ika yotikijto nochipa tiktekichiuilis toTajtsin (Mar. 12:30).

6, 7. Ken kijtoua 1 Pedro 3:21, ¿tleka melak noneki matoapolaktikan?

⁶ ¿Melak noneki matoapolaktikan? Akajli tlen okichijchiuj Noé kiteititiaya ika yejua melak tlaneltokaya itech Jehová. Aman tej, tla tejua timoapolaktia, kuajli tikteititis ika yotimosentemakak itech Jehová (1 Ped. 3:18-20, TNM). San ika ¿yemelak noneki toapolaktiskej? Kema, niman Pedro okijto tleka (xpoua 1 Pedro 3:21, TNM). * Kachtopa, yejua okijto: “Apolaktilistli [...] mechmakixtijtika”. Kema, apolaktilistli uelis techmakixtis tla tikteititiaj ika titlaneltokaj itech Jesús niman tla tikteititiaj ika tikneltokaj ika yejua omikiko topampa, ika oyoliuj niman oyaj iluikak, niman noijki ika aman yejua nemi “iyekmakopa Dios” (1 Ped. 3:22).

⁷ Ika ome, apolaktilistli kichiua matikpiyakan “se kuajli tlamachilistli”. Ijkuak tosentemakaj itech toTajtsin niman toapolaktiaj, peua iuan touikaj. Pampa yotoyolkuepkej niman tikneltokaj ika Jesús okitemakak inemilis topampa, toTajtsin techtlapopoluiya. Ika yejon, uelis kuajli tomachiliskej pampa ixpan toTajtsin tikpiyaj se “kuajli tlamachilistli”.

8. ¿Tlenon noneki mitsyolmapeuas xmoapolakti?

⁸ ¿Tlenon noneki mitsyolmapeuas xmoapolakti? Tejua melak kuajli yotimomachti Biblia, ika yejon, miyek yotiuel itech Jehová: yotiuel kenon yejua niman yotikasikamat tleka kichiua seki tlemach. Nochi yejuin yoajsik ipan moyojlo niman aman melak tiktlasojtla Jehová, yejon tlasojtlalistli tlen tikmachilia noneki mitsyolmapeuas xmoapolakti.

9. ¿Tlenon kijtosneki timoapolaktis “ipampa itoka toTajtsin niman ipampa teKoneuj niman ipampa espíritu santo”?

⁹ Tlen yotiuel ipan Biblia niman tlen aman tikneltoka, noijki mitsyolmapeuas xmoapolakti. Xkilnamiki tlen okijto Jesús ijkuak otechnauati matitenojnotsakan (xpoua Mateo 28:19,  20, TNM). * Jesús okijto ika akin noapolaktiaj noneki noapolaktiskej “ipampa itoka toTajtsin niman ipampa teKoneuj niman ipampa espíritu santo”. Yejuin kijtosneki ika noneki tikneltokas tlen kijtoua Biblia itech Jehová, itech iKonetsin, Jesús, niman itech espíritu santo. Yejuin tlen temachtia Biblia kipiya kojtilistli niman uelis ajsis hasta ipan moyojlo (Heb. 4:12). Matikitakan seki tlen yotiuel ipan Biblia.

10, 11. ¿Tlenon yotikasikamat niman yotikneltokak itech toTajtsin?

¹⁰ ¿Tikilnamiki ijkuak otikasikamat miyek tlemach itech toTajtsin? Yejua itoka Jehová, yejua akin Ueyixtika “ipan nochi in tlaltikpaktli” niman san yejua “melauak Dios” (Éx. 6:3; Sal. 83:18; Jer. 10:10). Yejua toTlachijchiujkauj niman san yejua ueli temakixtia (Sal. 3:8; 36:9). Yokichiuj nochi tlen noneki niman ijkon techmakixtis itech tlajtlakojli niman mikilistli, niman noijki yotechijli ika uelis tikseliskej se nemilistli tlen xkeman tlamis (Juan 17:3). Ijkuak timosentemakas niman timoapolaktis, tikimititis miyekej ika tiiteixpantijkauj Jehová (Is. 43:10-12). Noijki tiktekichiuilis toTajtsin Jehová imiuan miyekej tokniuan akin kiueyichiuaj niman melak yolpakij kiteijliskej itoka (Sal. 86:12).

¹¹ Se ueyi tlateochiualistli tikasikamatis tlen temachtia Biblia itech toTajtsin. Ijkuak kuajli tikneltokas yejuin, melak tiknekis timosentemakas itech Jehová niman timoapolaktis.

12, 13. ¿Tlenon yotikasikamat niman yotikneltokak itech Jesús?

¹² ¿Kenon otimomachili ijkuak otikasikamat miyek tlemach itech Jesús? Jesús yejua ika ome akin más ueyixtika ne iluikak niman ipan tlaltikpaktli. Yejua okinek kitemakas inemilis topampa. Ijkuak yemelak tikteititiaj ika tikneltokaj ika yejua otechmakixti, toTajtsin uelis techtlapopoluis niman uelis iuan touikaskej, noijki uelis tikpiyaskej “nemilistli para nochipa” (Juan 3:16). Jesús noijki toUeyi Teopixkauj. Kineki matechpaleui tlen okichiuj topampa, niman noijki kineki techpaleuis kuajli matouikakan iuan toTajtsin (Heb. 4:15; 7:24, 25). Yejua Tekiuaj itech iTekiuajyo toTajtsin, yejua ika, Jehová kitekitiltis niman ijkon kichipauas itoka, kipopolos nochi tlen xkuajli niman nochipa techteochiuas ipan se xochitlalpan tlen onias ika tlayekapan (Mat. 6:9, 10; Apoc. 11:15). Jesús noijki melak kuajli otechititi kenon tiktekichiuiliskej Jehová (1 Ped. 2:21). Yejua nochipa okichiuj tlen toTajtsin kinekiya, niman tejuamej noijki noneki ijkon tikchiuaskej (Juan 4:34).

¹³ Ijkuak tikneltokas tlen Biblia temachtia itech Jesús, iKoneuj Jehová, melak tiktlasojtlas. Yejon tlasojtlalistli mitsyolmapeuas xmaktili monemilis toTajtsin, ijkon ken Jesús okichiuj. Kuakon, melak tiknekis timosentemakas itech Jehová niman timoapolaktis.

14, 15. ¿Tlenon yotikasikamat niman yotikneltokak itech espíritu santo?

¹⁴ ¿Tlenon otiknemili ijkuak otikasikamat tlen melauak itech espíritu santo? Espíritu santo kijtosneki ikojtilis Jehová, niman yejuin xijkon ken Jehová, Jesús niman iluikaktekitkej. Jehová okikuik iespíritu niman ijkon okichiuj ika sekimej tlakamej makijkuilokan Biblia. Espíritu santo noijki techpaleuiya matikasikamatikan niman matikchiuakan tlen tomachtiaj ipan iTlajtol toTajtsin (Juan 14:26; 2 Ped. 1:21). ToTajtsin kikui iespíritu santo niman ijkon techkojtilis (2 Cor. 4:7). Espíritu santo techpaleuiya kuajli matitenojnotsakan, maka matikchiuakan tlen kiyolkokos  Jehová, maka melak matajmanakan niman matitlaxikokan ijkuak titlajyouiyaj. Noijki techpaleuiya matikinpiyakan kualneskayomej tlen nesij ipan Gálatas 5:22. ToTajtsin ika iyojlo kinmaka espíritu santo akin itech tlaneltokaj niman akin kitlajtlaniliaj (Luc. 11:13).

¹⁵ Melak techyolpaktia tikmatiskej ika akin kiueyichiuaj Jehová uelis kuajli kimatstoskej ika espíritu santo kinpaleuis kuajli makitekichiuilikan toTajtsin. Ijkuak kuajli tikasikamatis tlen melauak itech espíritu santo, melak tiknekis timosentemakas itech Jehová niman timoapolaktis.

16. ¿Tlenon yotikitakej ipan yejuin tlamachtijli?

¹⁶ Timosentemakas itech toTajtsin niman timoapolaktis melak ueyi kijtosneki. Ken yotikitakej, nonekis tikchiuas noso tijkauas seki tlemach, san ika, melak miyek tikselis xijkon ken tlen tijkauas. Apolaktilistli uelis mitsmakixtis niman kichiuas xpiya se kuajli tlamachilistli ixpan toTajtsin. Aman tej, yejon tlasojtlalistli tlen tikmachilia ipampa Jehová noneki mitsyolmapeuas xmoapolakti. Noijki noneki kuajli tikneltokas tlen yotikasikamat itech toTajtsin, itech Jesús niman itech espíritu santo. Aman ika yotikitak tlen noneki tikchiuas, xmotlajtolti: “¿Iuelis ninoapolaktis?”.

17. ¿Tlenon noneki tikchiuas achto timoapolaktis?

¹⁷ Tla tikita ika iuelis timoapolaktis, kuakon, kanaj yotikchiuj tlen noneki niman ijkon kuajli timouikas iuan Jehová. * Pampa mojmostla timomachtia Biblia, melak miyek yotiuel itech Jehová niman Jesús. Aman melak tikneltoka tlen Biblia temachtia (Heb. 11:6). Kuajli tikmatstika ika Jehová kichiuas nochi tlen yokitlali ipan Biblia niman ika uelis timakisas itech tlajtlakojli niman mikilistli tla tikneltoka ika Jesús okitemakak inemilis topampa. Yotimoyolkuep itech tlen xkuajli tikchiuaya, kema, melak timoyolkokoua ipampa tlen tikchiuaya niman yotiktlajtlanili Jehová mamitstlapopolui. Yotimopatlak niman xok tikchiua tlen achto tikchiuaya, aman san tikchiua tlen kiyolpaktia Jehová (Hech. 3:19). Noijki, tiknektika tikinnojnotsas oksekimej itech tlen aman tikneltoka. Yotikchiuj tlen noneki niman ijkon uelis titenojnotsas iuan tlanechikojli maski xtimoapolaktia (Mat. 24:14). Jehová melak yolpaki pampa yotikchiuj nochi yejuin tlen yotikteneujkej (Prov. 27:11).

18. ¿Tlenon más noneki tikchiuas tla tikneki timoapolaktis?

¹⁸ Achto timoapolaktis, noneki tikchiuas okseki tlemach. Ken yotikitakej, noneki timosentemakas itech toTajtsin, yejuin kijtosneki tikchiuilis se teoyotl Jehová ika nochi moyojlo kampa tikijlis ika tikmaktilia monemilis (1 Ped. 4:2). Sakin noneki tikijlis tokniuj akin kixeloua tekitl itech tlayekankej ika tikneki timoapolaktis. Yejua kintlajtlanilis sekimej tlayekankej  mouan matlajtokan. San ika, maka xmomojti, yejuin tokniuan kuajli mitsixmatij niman mitstlasojtlaj. Yejuamej mouan kitaskej tlen yotiuel itech Biblia. Yejon kinpaleuis makitakan tla kuajli yotikasikamat tlen uajlauj ipan Biblia niman tla tikmatstika ika melak ueyi kijtosneki timosentemakas itech toTajtsin niman timoapolaktis. Tla kitaj ika kema, yejuamej mitsijliskej ika uelis timoapolaktis ipan se ueyi tlanechikojli.

19, 20. ¿Tlenon noneki tikchiuas tla yotimoapolakti, niman tlenon mitspaleuis ijkon xchiua?

¹⁹ ¿Tlenon noneki tikchiuas tla yotimoapolakti? * Xkilnamiki ika otikijli Jehová ika itech timosentemaka, niman yejua kichia xchiua ijkon ken otikijli. Yejua ika, sakin ika yotimoapolakti, nonekis kuajli timoyekanas niman ijkon tikteititis ika yotimosentemakak itech Jehová. ¿Tlenon mitspaleuis ijkon xchiua?

²⁰ Nisiuj xnemi itech tlanechikojli. Ijkuak timoapolaktis, titeuan yes ipan ikalpan Jehová (1 Ped. 2:17). Akin nemij ipan tlanechikojli yeskej ken mochanejkauan. Tla nochipa tiauj tlanechikoltin, melak kuajli imiuan timouikas. Mojmostla xpoua Biblia niman xtlanemili itech (Sal. 1:1, 2). Yejuin kijtosneki ika tla itlaj yotikamapouj, sakin noneki tikxelos tiempo niman ijkon itech titlanemilis. Ijkon, nochi tlen tikamapouas, ajsis ipan moyojlo. Noijki noneki tikchiuas itlaj tlen kijtoua Biblia, kampa kijtoua: “Nochipa xchiuakan oración” (1 Tes. 5:17). Tla ijkon tikchiua, más timonisiuis itech Jehová. Noijki, kachtopa xtejtemo iTekiuajyo toTajtsin (Mat. 6:33, TNM). ¿Kenijki uelis tikchiuas? Tla melak tikpatiojkaita titenojnotsas. Tla nochipa titenojnotsa, chikaujtos motlaneltokil niman hasta uelis tikinpaleuis oksekimej mamakisakan (1 Tim. 4:16).

21. ¿Tlenon kualtsin mopan nochiuas tla timoapolaktia?

²¹ Ijkuak tikijtos timosentemakas itech Jehová niman timoapolaktis, tiktlapejpenijtos itlaj tlen melak ueyi kijtosnekis ipan monemilis. Melauak ika nonekis tikchiuas noso tijkauas seki tlemach, san ika, melak miyek tikselis xijkon ken tlen tijkauas. Maski titlajyouis “achijtsin nikan ipan in tlaltikpaktli”, nochi yejon tlen tikijyouis san panos (2 Cor. 4:17). Tla timoapolaktia, melak tipakis ipan yejuin tonaltin niman noijki tikpiyas “on yejuan melauak nemilistli” ika tlayekapan (1 Tim. 6:19). Ika yejon, kuajli xnemili, xchiuili teoyotl Jehová niman xmotlajtolti: “¿Iuelis ninoapolaktis?”.