1. ¿Tlenon techmachtia Eclesiastés 3:1, 7?

SEKIMEJ melak titlajtlajtojkej, niman sekimej xmás titlajtlajtojkej. Ken kijtoua tlaxelojli kampa onokixti yejuin tlamachtijli, onka kemanon titlajtoskej niman kemanon xnoneki titlajtoskej (xpoua Eclesiastés 3:1, 7). Maski ijkon, kemantika tiknekiskiaj ika sekimej tokniuan más matlajtokan niman ika oksekimej maka melak matlajtokan.

2. ¿Akinon kinamiki matechijli kemanon niman kenon noneki titlajtoskej?

² ToTajtsin okichiuj matiuelikan matitlajtokan (Éx. 4:10, 11; Apoc. 4:11). Ipan iTlajtol, yejua techijlia kenon kinamiki titlajtoskej. Ipan yejuin tlamachtijli, tikitaskej tlenon okichiujkej sekimej tlaltikpakchanejkej akin noteneuaj ipan Biblia, yejon techpaleuis matikmatikan kemanon noneki titlajtoskej niman kemanon xnoneki. Noijki tikitaskej kenon kineki Jehová matitlajtokan. Kachtopa matikitakan kemanon noneki titlajtoskej.

3. Itech tlen kijtoua Romanos 10:14, ¿kemanon noneki titlajtoskej itech Jehová niman itech iTekiuajyo?

³ Nochipa noneki titlajtoskej itech Jehová niman itech iTekiuajyo (Mat. 24:14; xpoua Romanos 10:14). Tla ijkon tikchiuaj, tikchiujtoskej ken Jesús okichiuj. Ijkuak ouajlaka ipan yejuin tlaltikpaktli, yejua okiteititi tlen melauak itech iTajtsin (Juan 18:37). Aman tej, noijki noneki kuajli tikitaskej kenon titlajtouaj. Yejua ika, ijkuak tikinnojnotsaskej oksekimej itech Jehová, noneki tikchiuaskej ika “yolyemanilistli niman tetlakaitalistli”, noijki noneki titlanemiliskej itech tlen yejuamej kimachiliaj niman tlen kineltokaj (1 Ped. 3:15, 16). Ijkon xsan tikinnojnotsaskej,  noijki itlaj tikinmachtiskej niman kanaj ajsis ipan inyojlo tlen tikimijliskej.

4. Itech tlen kijtoua Proverbios 9:9, ¿kenon uelis kinpaleuis oksekimej tlen tikimijliaj?

⁴ Ijkuak tokniuan tlayekankej kitaj ika se tokniuj tlakatl noso siuatl itlaj ipan nochiujtika, tokniuan tlayekankej iuan tlajtouaj. Yejuamej noneki kuajli kitaskej kemanon iuan tlajtoskej, kanaj kampa yejon tokniuj xpijpinauis. Tokniuan tlayekankej nochipa nokojtiliaj tetlakaitaskej niman xtepijpinaujtiskej ijkuak yakaj kinonotsaj. San ika, kema kilnamiktiaj tlen kijtoua Biblia tlen kipaleuis makichiua tlen kuajli (xpoua Proverbios 9:9). ¿Tleka melak noneki matoyolchikauakan titlajtoskej ijkuak nonekis? Matitlajtokan intech omemej tlaltikpakchanejkej akin yeuejkaui onenkej. Kachtopa titlajtoskej itech se tlakatl akin nonekiya kinmelajkatlalis ikoneuan, niman sakin titlajtoskej itech se siuatl akin ononek tlajtos iuan se tlakatl akin tekiuajtiskia.

5. ¿Tlenon xkuajli okichiuj ueyi teopixki Elí?

⁵ Ueyi teopixki Elí kinpiaya omemej ikoneuan akin melak kintlasojtlaya. San ika, yejuamej nion xkitlakaitayaj Jehová. Yejuamej kipiayaj se ueyi tekitl ipan tabernáculo pampa teopixkej katkaj. San ika, xkichiuayaj intekiyo ken kinamikiya pampa san “kajauilmatiyaj on uentli” tlen israelitas kimakayaj Jehová niman melak auilnemiyaj (1 Sam. 2:12-17, 22). Tlanauatijli tlen okimakakej Moisés kijtouaya ika akin ijkon kichiuaya, nonekiya kimiktiskej. San ika, Elí kinkauiliaya ikoneuan makichiuakan tlen xkuajli. San okinyemankanojnots niman okinkauili ok manemikan ken teopixkej ipan tabernáculo (Deut. 21:18-21). ¿Okuelitak Jehová tlen okichiuj Elí? Jehová okijli yejuin ueyi teopixki: “¿Tline más tikintlajsojtla mokoneuan xken nejua[?]”. Ika yejon, Jehová okijto ika kinmiktiskia yejon omemej tlakamej akin melak xkuajkualtin katkaj (1 Sam. 2:29, 34).

6. ¿Tlenon tiuelij itech tlen xkuajli okichiuj Elí?

⁶ ¿Tlenon tiuelij itech tlen xkuajli okichiuj Elí? Tla tikmatij ika se toamigo noso se tochanejkauj yokichiuj itlaj tlen xkuelita Jehová, noneki iuan titlajtoskej niman tikilnamiktiskej tlen kijtoua iTlajtol toTajtsin. Sakin noneki kuajli tikitaskej tla kipaleuijtokej tokniuan akin toTajtsin yokintekitlali (Sant. 5:14). Xkeman tiknekij tiyeskej ken Elí, xtiknekij más tiktlasojtlaskej toamigo noso tochanejkauj xijkon ken Jehová. Noneki toyolchikauaskej niman ijkon titlajtoskej iuan akin noneki noyektlalis. Tla ijkon tikchiuaj, nochi kuajli onkisas.  Matikitakan kenon se siuatl israelita, akin itoka katka Abigaíl, xokichiuj ijkon ken Elí.

7. ¿Tleka Abigaíl otlajto iuan David?

⁷ Iueuentsin Abigaíl itoka katka Nabal. Yejuin tlakatl kipiaya miyek tomin niman miyek itlaluan. Ijkuak David niman itekipanojkauan kicholouilijtinemiyaj tekiuaj Saúl, onenkej seki tonaltin imiuan itlakeualuan Nabal niman okinpaleuijkej maka yakaj kimichtekis iborregos Nabal. ¿Okitlasojkamat Nabal tlen okichiujkej ipampa? Ka. Pampa ijkuak David okitlajtlanili Nabal makinmaka itekipanojkauan seki atl niman seki tlakuajli, Nabal melak okualan, okintlauelnankili niman okinuijuikalti (1 Sam. 25:5-8, 10-12, 14). Kuakon David okijto ika kinmiktiskia nochimej akin nemiyaj ichan Nabal (1 Sam. 25:13, 22). ¿Tlenon ueliskia nochiuas niman ijkon maka mapano yejon? Abigaíl okasikamat ika nonekiya tlajtos. Maski David niman on 400 tlakamej uajlayaj ika iminespadas, uajkualantiayaj niman melak uajlapismiktiayaj, Abigaíl onoyolchikauj niman okinnamikito. Kema, yejua otlajtoto iuan David.

8. ¿Tlenon tiuelij itech tlen okichiuj Abigaíl?

⁸ Ijkuak Abigaíl otlajto iuan David, okinots ika yolchikaualistli niman tetlakaitalistli, niman noijki okitlaneltokilti. Maski Abigaíl xyejua akin okipeualtijka yejon tlauejli, okitlajtlanili David makitlapopolui. Abigaíl okineltokak ika Jehová kipaleuiskia niman okiteneuj tlen kuajli kichiuaya David (1 Sam. 25:24, 26, 28, 33, 34). Ijkon ken Abigaíl, tejuamej noijki noneki toyolchikauaskej niman ijkon titlajtoskej iuan akin tikitaj ika kineki kichiuas tlen xkuajli (Sal. 141:5). Noneki titetlakaitaskej, san ika, noijki noneki timelajkatlajtoskej. Ijkuak ika tlasojtlalistli tikijliaj yakaj kanon noneki noyektlalis, tikititiaj ika iuan touikaj (Prov. 27:17).

9, 10. ¿Tlenon noneki kilnamikiskej tlayekankej ijkuak yakaj kijliskej kanon noneki noyektlalis?

⁹ Tlayekankej melak noneki manoyolchikauakan  niman ijkon tlajtoskej imiuan akin kichiuaj tlen xkinamiki (Gál. 6:1). Tokniuan tlayekankej yolyemankej niman kimatstokej ika, pampa noijki tlajtlakolejkej, kanaj ajsis se tonajli ijkuak noijki nonekis yakaj makimijli kanon noneki noyektlaliskej. San ika, yejon xkinteltia maka makinmelajkatlalikan akin noneki noyektlaliskej (2 Tim. 4:2; Tito 1:9). Ijkuak yakaj kijliaj kampa noneki noyektlalis, nokojtiliaj kuajli kimachtiskej niman xnosiaujkauaj. Pampa kintlasojtlaj tokniuan, kinekij kinpaleuiskej (Prov. 13:24). San ika, onka itlaj tlen melak kinekij kichiuaskej: kiueyichiuaskej Jehová. Yejua ika, kiteititiaj tlenon kineki Jehová niman kitlajpiyaj tlanechikojli (Hech. 20:28).

¹⁰ Yotikasikamatkej kemanon noneki titlajtoskej. Aman matikitakan kemanon xnoneki titlajtoskej.

11. ¿Itech tlenon otlajto Santiago, niman tleka melak kuajli ika okiteneuj yejon?

¹¹ Kemantika xtiuelij toteltiaj niman san totoka titlajtojtiuetsij. Santiago, se itekipanojkauj Jehová akin okijkuilo Biblia, okiteneuj itlaj niman ijkon kiteititis ika yejuin yemelak. Yejua okijto: “Pero tla yakaj ikan inenepil nochipa san kijtoua tlen kuajli, yejua melauak de nochi kuajli tlakatl, niman ueli kuajli kimandaroua nochi itlalnakayo. Ijkuak tikintlaliliaj teposkualijli [noso freno] ipan inkamak on caballos para techtlakamatij, tiuelij tikinuikaj kampa tiknekij” (Sant. 3:2, 3). Tla tiauej ipan se caballo niman tiktentilanaj, tocaballo kimatis kanon ika yas niman hasta uelis tikteltiskej. San ika, tla xkuajli tikyekanaj, tocaballo san totoka notlalojtikisas niman uelis nokokos noso tejuamej tokokoskej. Noijki ijkon, tla xtoteltiaj niman san totoka titlajtojtiuetsij, uelis panos tlen xkuajli. Matikitakan kemanon noneki toteltiskej niman xtitlajtoskej.

12. ¿Kemanon noneki toteltiskej niman xtitlajtoskej?

 ¹² ¿Tlenon tikchiuaskej tla tikixmatij se tokniuj akin kimati itlaj tlen xnochimej noneki kimatiskej? Kanaj tikixmatij yakaj akin chanti kampa tokniuan xkinkauiliaj makiueyichiuakan Jehová. ¿Kuajli yeskia tla tikijliaj matechijli kenon kiueyichiuaj Jehová ipan yejon kalpan? Yemelak ika tiknekij tikasikamatiskej yejon pampa tikintlasojtlaj tokniuan niman tiknekij tikmatiskej kenon nemij. Noijki tikuelitaskiaj tikinteneuaskej ipan toteoyouan. San ika, yejuin itlaj tlen xnoneki tikmatiskej, ika yejon, noneki toteltiskej niman xtiktlajtoltiskej yejon. Tla tikchiualtiaj matechijli, tikteititijtoskiaj ika xtiktlasojtlaj yejon tokniuj nion tokniuan akin ompa chantij. Tla techijliaj tlen xnoneki tikmatiskej, uelis panos tlen melak xkuajli. Noijki, nion se tokniuj akin chanti kampa xkinkauiliaj makiueyichiuakan Jehová, xkiteijliskia kenon tenojnotsaj ompa niman kenon kitekichiuiliaj toTajtsin.

13. Ken kijtoua Proverbios 11:13, ¿tlenon noneki kichiuaskej tlayekankej, niman tleka?

¹³ Tokniuan tlayekankej melak noneki makichiuakan tlen kijtoua Proverbios 11:13 (xpoua). Yejuamej kitlakamatij yejuin tlaxelojli ijkuak xkiteijlitinemij tlen oksekimej xnoneki kimatiskej. Tlayekankej akin yononamiktijkej kanaj más ouijtika kitaskej kichiuaskej yejuin. ¿Tleka ijkon tikijtouaj? Pampa nochimej akin yononamiktijkej kuajli nemij ijkuak nonojnotsaj niman ijkuak kinoijliaj tlen kinemiliaj, tlen kimachiliaj niman tlen kinmajmana. San ika, tokniuan tlayekankej kimatstokej ika xkipiya ika kiteijliskej tlen tokniuan kimijliaj niman tlen oksekimej xnoneki kimatiskej. Tla kiteijliaj, tokniuan xok intech tlaneltokaskej niman xok kintlakaitaskej. Tlayekankej xuelis kiteijlitinemiskej tlen xmelauak (1 Tim. 3:8). Kema, yejuamej xkipiya ika tekajkayauaskej nion tetejteneuaskej. Tla se tlayekanketl kitlasojtla isiuatsin, xkijlis tlen xnoneki kimatis.

14. ¿Kenon se tokniuj siuatl uelis kipaleuis iueuentsin akin tlayekanketl makitlakaitakan?

¹⁴ Se tokniuj siuatl uelis kipaleuis iueuentsin akin tlayekanketl nochipa makitlakaitakan. ¿Kenon? Tla xkichiualtia makijli tlen yejua nion oksekimej xnoneki kimatiskej. Tla ijkon kichiua, xsan kipaleuiya iueuentsin, noijki kiteititia ika kintlakaita tokniuan akin itech tlaneltokaj iueuentsin. San ika, tlen más ueyi kijtosneki, kiyolpaktia Jehová pampa kichiua ika tokniuan ipan tlanechikojli kuajli manouikakan niman kuajli manemikan (Rom. 14:19).

15. ¿Kenon okitak Jehová tlen okichiujkej yeyimej tlakamej akin okitatoj Job, niman tleka ijkon okitak?

¹⁵ Amoxtli Job techititia kemanon titlajtoskej niman tlenon tikijtoskej. Sakin ika Job okixnamik tlen melak xkuajli, nauimej tlakamej okiyolseuitoj niman iuan ononojnotsatoj. San ika, yejuamej ouejkaujkej ika xitlaj kijtouayaj. San ika, tlen sakin okijtokej Elifaz, Bildad niman Zofar kuajli techasikamachiltia ika yejuamej nion xkinemilijtoyaj kenon kipaleuiskej Job. Yejuamej san kinemilijtoyaj kenon kititiskej Job ika okichiujka tlen xkuajli. Seki tlen kijtouayaj melauak katka, san ika, okijtokej miyek tlemach tlen xmelauak itech Job niman itech Jehová. Noijki, okichikajkanotskej Job niman okijlikej ika kichiuaya tlen xkuajli (Job 32:1-3). ¿Kenon okitak Jehová tlen okichiujkej yejon yeyimej tlakamej? Yejua xokuelitak niman melak okikualanijkej. Okijto ika yejuin tlakamej xkipiayaj intlamachilis niman okinnauati makitlajtlanilikan Job makichiua teoyotl inpampa (Job 42:7-9).

16. ¿Tlenon tiuelij itech tlen xkuajli okichiujkej Elifaz, Bildad niman Zofar?

¹⁶ ¿Tlenon tiuelij itech tlen xkuajli okichiujkej Elifaz, Bildad niman Zofar? Kachtopa, ika  xnoneki tiknemiliskej tlen xkuajli intech tokniuan (Mat. 7:1-5). Yej noneki kuajli tikinkakiskej achto itlaj tikijtoskej. San ijkon tiueliskej tikasikamatiskej tlen inpan nochiujtika (1 Ped. 3:8). Ika ome, ijkuak itlaj tikijtoskej, noneki kuajli tikitaskej ika tlen tikijtoskej mamelauak niman maka mateyolkoko (Efes. 4:25). Niman, ika yeyi, Jehová kineki matitlajtokan ken kinamiki.

17. ¿Tlenon tiuelij itech Elihú?

¹⁷ On okse tlakatl akin noijki okitato Job itoka katka Elihú. Yejua katka se iuejkakoneuj Abrahán. Elihú san tlakaktoya chika Job niman on oksekimej tlakamej tlajtouayaj. Tikitaj ika kuajli tlakaktoya pampa san kualtsin okinots Job, san ika, kema okimelajkaijli tlen kipaleuiskia kuajli matlanemili (Job 33:1, 6, 17). Elihú melak kinekiya san manoueyiteneua Jehová, xkinekiya yejua makiueyiteneuakan noso yakaj okse (Job 32:21, 22; 37:23, 24). Tlen okichiuj techititia ika kemantika xnoneki titlajtoskej, san noneki titlakaktoskej (Sant. 1:19). Noijki tiuelij ika ijkuak yakaj tikijliskej kampa nonekis noyektlalis, noneki tikitaskej manoueyiteneua Jehová niman maka tejuamej matechueyiteneuakan.

18. ¿Kenon tikteititiaj ika tiktlasojkamatij ika tiuelij titlajtouaj?

¹⁸ Jehová okichiuj matiuelikan matitlajtokan, niman tiktlasojkamatij yejuin tla tikchiuaj tlen yejua yokitlali ipan Biblia itech kemanon noneki titlajtoskej niman tlenon tikijtoskej. Jehová okichiuj ika tekiuaj Salomón makijkuilo yejuin: “Ken manzanas tlachijchiujtin ika oro tlen kikualnextiaj ika plata, ijkon se tlajtojli tlen noijtoua ijkuak noneki” (Prov. 25:11, TNM). Tla kuajli tijkakij akin technojnotsa niman kuajli tiknemiliaj tlenon tikijtoskej, totlajtoluan yeskej ken manzanas tlachijchiujtin ika oro, kema, melak kualtsitsintin yeskej niman melak tepaleuiskej. Tla ijkon tikchiuaj, maski tla melak titlajtlajtojkej noso xmás titlajtlajtojkej, tikinyolchikauaskej oksekimej niman noijki tikyolpaktiskej toTajtsin Jehová (Prov. 23:15; Efes. 4:29). San ijkin melak kuajli tikteititiskej ika tiktlasojkamatij ika tiuelij titlajtouaj.