TLAMACHTIJLI 10
Tiknekiskej toapolaktiskej tla tiktlasojtlaj Jehová
“¿Tlenon nechtsakuilia maninoapolakti?” (HECH. 8:36, TNM).
TLAKUIKAJLI 37 Niktekichiuilis Jehová ika noyojlo
TLEN TIKITASKEJ *
1, 2. Itech tlen kijtoua Hechos 8:27-31, 35-38, ¿tleka onoapolakti se tlakatl akin ualeuaya Etiopía?
¿TIKNEKISKIA timoapolaktis niman timochiuas inomachtijkauj Cristo? Miyekej yonoapolaktijkej pampa kitlasojtlaj Jehová niman kitlasojkamatij tlen yokichiuj inpampa. Matitlajtokan itech se tlakatl akin ijkon okichiuj, yejua tekitiya itech se siuatl akin tekiuajtiya Etiopía.
2 Ijkuak yejuin tlakatl okitak ipan iTlajtol toTajtsin ika nonekiya noapolaktis, yejua nimantsin ijkon okichiuj (xpoua Hechos 8:27-31; Hechos 8:35-38, TNM). * ¿Tleka ijkon okichiuj? Kuajli nesi ika kipatiojkaitaya iTlajtol toTajtsin, pampa ijkuak “in tlakatl nokuepaya para ichan ipan icarreta”, yejua nomachtijtiaya “on amamoxtli de on tiotlajtojketl Isaías”. Niman, ijkuak Felipe okinojnots, yejuin tlakatl melak okitlasojkamat tlen Jesús okichiujka ipampa. Noijki tikmatij ika yejua ikitlasojtlaya Jehová pampa kemach oyajka Jerusalén okiueyichiuato Jehová. Nesi ika yejuin tlakatl yokikaujka ireligión niman aman ikiueyichiuaya toTajtsin imiuan tokniuan akin onenkej ipan kachtopa siglo. Kema, pampa yejua kitlasojtlaya Jehová, onoapolakti niman onochiuj inomachtijkauj Cristo (Mat. 28:19, TNM).
3. ¿Tleka sekimej xkinekij noapolaktiskej? (Xkita recuadro “ ¿Kenon tikpiya moyojlo?”).
3 Tla tiktlasojtla Jehová, uelis kichiuas xmoapolakti. San ika, tla tejua melak tiktlasojtla okseki tlemach, uelis mitstsakuilis maka xmoapolakti. Kanaj tejua melak tikintlasojtla mochanejkauan niman moamigos akin xkitekichiuiliaj Jehová, niman kanaj tiknemilia ika xok mitstlasojtlaskej tla timoapolaktia (Mat. 10:37). Noso kanaj tikuelita tikchiuas seki tlemach tlen tikmati ika toTajtsin xkuelita niman kanaj xueli tijkajkaua (Sal. 97:10). Kanaj tikilnamiki ika desde ijkuak tikonetl katka melak kualtsin tipanouaya imiuan mochanejkauan ijkuak nenkinpanoltiayaj iluimej tlen ualeuaj itech tlaneltokijli tlen xmelauak. Ika yejon, kanaj ouijtika tikita xok tikinpanoltis yejuin iluimej tlen toTajtsin xkinuelita (1 Cor. 10:20, 21). Yejua ika, aman noneki timotlajtoltis: “¿Akinon noso tlenon más niktlasojtlas?”.
AKIN NONEKI MÁS TIKTLASOJTLAS
4. ¿Tlenon noneki mitsyolmapeuas xmoapolakti?
4 Ijkuak xtimomachtiaya imiuan iteixpantijkauan Jehová, kanaj itikpatiojkaitaya Biblia niman kanaj itiktlasojtlaya Jesús. Niman, aman ika imiuan timomachtia kanaj melak tikuelita imiuan timosentlalis. San ika, yejon tlen tikmachilia, kanaj xkichiuas xmosentemaka itech Jehová niman xmoapolakti. Aman tej, ¿tlenon noneki mitsyolmapeuas xmoapolakti? Tla melak tiktlasojtla toTajtsin. Niman ijkuak más tiktlasojtlas toTajtsin xijkon ken okseki tlemach, xitlaj nion xakaj uelis mitstsakuilis xtekichiuili. Kema, yejon tlasojtlalistli xsan mitspaleuis xmoapolakti, noijki mitspaleuis nochipa xtekichiuili toTajtsin Jehová.
5. ¿Tlenon tikitaskej ipan yejuin tlamachtijli?
5 Jesús techijlia: “Xtlajsojtla moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Mar. 12:30). ¿Tlenon mitspaleuis xtlasojtla niman xtlakaita Jehová ijkon ken techijlia Jesús? Noneki titlanemilis itech kenon yejua techititia ika techtlasojtla (1 Juan 4:19). Ipan yejuin tlamachtijli, tikitaskej tlenon uelis tikchiuas niman ijkon más tiktlasojtlas Jehová.
6. Ken kijtoua Romanos 1:20, ¿kenon uelis más tikixmatis Jehová?
6 Xkita tlen okichijchiuj Jehová niman ijkon más tikixmatis (xpoua Romanos 1:20; Apoc. 4:11). Xnemili kenon toTajtsin okinchijchiuj xochimej niman yolkamej niman xkita kenijki yejon techititia ika yejua melak tlamachilise. Xmomachti más itech kenon titlachijchiujtin (Sal. 139:14). Noijki xnemili kech kojtilistli okitlali toTajtsin ijtik tonaltsintli, niman xkilnamiki ika yejuin san se sitlalin itech nochi sitlalimej tlen okinchijchiuj toTajtsin (Is. 40:26). * Ijkuak ijkon tikchiuas, más tiktlakaitas toTajtsin. Niman tla tikasikamati ika Jehová melak tlamachilise niman kojtik, yejon mitspaleuis iuan xmouika. Yejua ika, noneki xkixmati Jehová pampa ijkon uelis tiktlasojtlas ika nochi moyojlo.
7. Tla tikneki tiktlasojtlas Jehová ika nochi moyojlo, ¿tlenon noneki kuajli tikneltokas?
7 Noneki melak kuajli xneltoka ika Jehová kineki mitspaleuis. ¿Xmás tikneltoka ika toTajtsin, akin okichijchiuj iluikak niman tlaltikpaktli, yemelak mitsixmati niman melak mitstlasojtla? Tla ijkon tiknemilia, xkilnamiki ika Jehová “xuejka nemi cada se de tejuamej” (Hech. 17:26-28). ToTajtsin kita tlen onka ipan toyojlo, niman mitsijlia ika, tla tejua tiktejtemoua, yejua mitspaleuis xkixmati (1 Crón. 28:9). Kema, tejua timomachtijtika Biblia pampa toTajtsin okichiuj xmonisiui itech, ken kijtoua Juan 6:44. Tla más kuajli tikasikamatstiuj tlen Jehová yokichiuj mopampa, más tiktlasojtlatias.
8. ¿Kenon uelis tikteititis ika tiktlasojkamati itlasojtlalis Jehová?
8 Uelis tikteititis ika tiktlasojkamati itlasojtlalis Jehová tla tikchiuilia teoyotl. Melak tiktlasojtlas tla tikijlia nochi tlen mitsajmana niman tla tiktlasojkamachilia nochi tlen kichiua mopampa. Niman ijkuak tikitas kenon yejua mitsnankilia, más kuajli iuan timouikas (Sal. 116:1). Xtiometlamatis ika toTajtsin mitsasikamati. Aman tej, tla tikneki más kuajli timouikas iuan Jehová, noneki tikasikamatis kenon tlanemilia niman tlenon mitstlajtlanilia xchiua. Ika yejon, noneki nochipa xmomachti Biblia, iTlajtol toTajtsin.
Tla tiknekij touikaskej iuan Jehová niman tikasikamatiskej tlenon kineki matikchiuakan, noneki tomachtiskej Biblia. (Xkita párrafo 9). *
9. ¿Kenon uelis tikteititis ika tikpatiojkaita Biblia?
9 Xpatiojkaita iTlajtol toTajtsin. San Biblia mitspaleuis xmati nochi tlen melauak itech Jehová niman tlen kineki kichiuas mopampa. ¿Kenon uelis tikteititis ika tikpatiojkaita? Tla mojmostla tikamapoua, tla timomachtia achto mitsonmachtiskej itech Biblia niman tla tikchiua tlen tiueltiuj (Sal. 119:97, 99; Juan 17:17). ¿Mojmostla tikamapoua moBiblia?
10. ¿Tleka tikijtouaj ika Biblia tlamantik itech okseki amoxtin?
10 Biblia tlamantik itech okseki amoxtin. ¿Tleka ijkon tikijtouaj? San se matikteneuakan. Tikmatstokej ika Biblia tlajtoua itech Jesús, san ika, tlen ompa ijkuiliujtika itech, okijkuilojkej akin yemelak okitakej Jesús. San yejuin amoxtli uelis kuajli mitsititis tlen yemelak okichiuj Jesús mopampa. Ijkuak tikasikamatis tlen Jesús okichiuj niman okijto, melak tiknekis iuan timouikas.
11. ¿Tlenon mitspaleuis más xtlasojtla Jehová?
11 Xtlasojtla Jesús. Tla ijkon tikchiua, más tiktlasojtlas Jehová. Ijkin panoua pampa Jesús kuajli techititia kenon iTaj (Juan 14:9). Kuakon, ijkuak más tiuelis itech Jesús, más kuajli tikixmatis Jehová niman más tiktlasojtlas. San xkonnemili kenon Jesús melak kimikneliaya akin xakaj kintlasojtlaya, ken akin xkipiayaj tomin, akin kualouayaj niman akin xkojtikej katkaj. Noijki xtlanemili itech tlen Jesús mitsijlia, niman xkita kenon melak kuajli tinemis tla tiktlakamati (Mat. 5:1-11; 7:24-27).
12. ¿Tlenon uelis panos tla más timomachtia itech Jesús?
12 Melak tiktlasojtlas Jesús tla titlanemilia itech tlen okichiuj mopampa. Yejua okitemakak inemilis niman ijkon Jehová uelis techtlapopoluis (Mat. 20:28). Tla tikasikamati ika Jesús onotemakak mopampa, uelis kichiuas xmoyolkuepa niman xchiua tlen noneki niman ijkon Jehová mamitstlapopolui (Hech. 3:19, 20; 1 Juan 1:9). Niman, tla melak tikintlasojtla Jehová niman Jesús, melak tiknekis timouikas imiuan akin nemij ipan ikalpan Jehová.
13. ¿Tlenon yokichiuj Jehová mopampa?
13 Xkintlasojtla akin nemij ipan ikalpan Jehová. Kanaj mochanejkauan niman moamigos akin xkitekichiuiliaj Jehová xkasikamatij tleka tikneki timosentemakas itech toTajtsin, kanaj hasta mitstlauelitaj. San ika, Jehová mitspaleuis, yejua kichiuas xkimixmati miyekej tokniuan, akin yeskej ken mochanejkauan. Tla tejua tinemi nisiuj intech yejuamej, tikitas ika mitstlasojtlaskej niman mitspaleuiskej (Mar. 10:29, 30; Heb. 10:24, 25). Kanaj ajsis tonajli ijkuak mochanejkauan noijki kinekiskej kitlakamatiskej niman kitekichiuiliskej Jehová (1 Ped. 2:12).
14. Ijkon ken kijtoua 1 Juan 5:3, ¿tejua kenon yotikitak ika itlanauatiluan Jehová melak tepaleuijkej?
14 Xkinpatiojkaita niman xkintlakamati itlanauatiluan Jehová. Ijkuak xtikixmatiya Jehová, tejua kanaj tikchiuaya san tlen tejua tiknekiya, san ika, aman yotikasikamat ika itlanauatiluan toTajtsin melak tepaleuijkej (Sal. 1:1-3; xpoua 1 Juan 5:3). Xtlanemili itech tlen Biblia kimijlia teueuentsitsinuan, tesiuauan, tajtin niman tekoneuan (Efes. 5:22–6:4). ¿Yotikitak ika más kuajli tinemi imiuan mochanejkauan pampa tikintlakamati yejuin tlanauatiltin? ¿Yomitspaleuijkej itlanauatiluan toTajtsin xkintlapejpeni akinon imiuan timouikas niman aman tikchiua tlen kuajli? ¿Aman más tiyolpaki? (Prov. 13:20; 1 Cor. 15:33). Kuajli tikmatij ika otikijto “kema”.
15. ¿Tlenon uelis tikchiuas tla xtikmati kenon tikintlakamatis itlanauatiluan Jehová?
15 Kanaj kemantika xtikmati kenon tikintlakamatis itlanauatiluan Jehová. Yejua ika, Jehová kitekitiltia ikalpan niman ijkon mitsinmakas amatlajkuiloltin tlen kisaj itech Biblia, niman yejon mitspaleuiskej xmati tlenon kuajli niman tlenon xkuajli (Heb. 5:13, 14). Ijkuak tikinamapouas yejuin amatlajkuiloltin, tikitas ika itlanauatiluan Jehová melak mitspaleuiskej maski san tlenon tikixnamikis, niman kuajli tikmatstokej ika melak tiknekis tinemis ipan ikalpan Jehová.
16. ¿Kenon Jehová kintlajpiya nochimej itekipanojkauan?
16 Xtlasojtla niman xpaleui ikalpan Jehová. Jehová yokintlali tlanechikoltin niman ijkon ompa manemikan nochimej itekipanojkauan, noijki yokitekitlali Jesús yejua makinyekana (Efes. 1:22; 5:23). Niman Jesús yokintlapejpeni sekimej tokniuan akin tlapejpeniltin niman ijkon makiyekanakan tekitl tlen yejua kineki manochiua. Yejuin tokniuan, akin Jesús kintokayotia ken tekitketl “yolmelauak niman tlamachilise”, melak kuajli kichiuaj intekiyo: mitspaleuiyaj xmouika iuan Jehová niman nochipa xtekichiuili (Mat. 24:45-47). ¿Kenon kichiuaj? Kintlaliaj tokniuan tlayekankej ipan tlanechikojli niman ijkon mamitstlajpiyakan (Is. 32:1, 2; Heb. 13:17; 1 Ped. 5:2, 3). Tokniuan tlayekankej kinekij mitspaleuiskej, mitsyolseuiskej, niman kinekij mitsititiskej kenon uelis más kuajli timouikas iuan Jehová. Niman tlen melak ueyi kijtosneki, yejuamej noijki mitspaleuiskej xkinmachti oksekimej itech Jehová (Efes. 4:11-13).
17. Ken kijtoua Romanos 10:10, 13, 14, ¿tleka tikinnojnotsaj oksekimej itech Jehová?
17 Xkinpaleui oksekimej makitlasojtlakan Jehová. Jesús okinnauati inomachtijkauan makinpaleuikan oksekimej makixmatikan Jehová (Mat. 28:19, 20, TNM). Yakaj ueliskia ijkon kichiuas san pampa ijkon kinauatiaj. San ika, tla tejua más tiktlasojtlatiuj Jehová, timomachilis ken apóstol Pedro niman apóstol Juan, akin okijtokej: “Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hech. 4:20). Onka miyek tlemach tlen uelis mitsyolpaktis, san ika, más mitsyolpaktis tla tikinpaleuiya oksekimej makitlasojtlakan Jehová. San xkonnemili kenon oyolpak Felipe ijkuak okipaleui se etíope makasikamati iTlajtol toTajtsin niman manoapolakti. Ijkuak tikchiuas ken Felipe niman titenojnotsas ijkon ken otechnauati Jesús, tikteititis ika tikneki timochiuas se iteixpantijkauj Jehová (xpoua Romanos 10:10, 13, 14). Ijkuakon, kanaj noijki tikijtos ken etíope: “¿Tlenon nechtsakuilia maninoapolakti?” (Hech. 8:36, TNM).
18. ¿Tlenon tikitaskej ipan okse tlamachtijli?
18 Ijkuak tikijtos timoapolaktis, tiktlapejpenijtos itlaj tlen melak ueyi kijtosneki. Yejua ika, noneki kuajli tikasikamatis tlenon kijtosneki timoapolaktis. Aman tej, ¿tlenon noneki tikmatis itech apolaktilistli? ¿Tlenon noneki tikchiuas achto timoapolaktis? ¿Niman tlenon noneki tikchiuas tla yotimoapolakti? Nochi yejuin tikitaskej ipan okse tlamachtijli.
TLAKUIKAJLI 2 Motoka Jehová
^ párr. 5 Sekimej akin kitlasojtlaj Jehová notlajtoltiaj tla iuelis noapolaktiskej niman ijkon nochiuaskej iteixpantijkauan Jehová. Tla tejua noijki ijkon timotlajtoltia, yejuin tlamachtijli mitsilnamiktis tlenon uelis tikchiuas niman ijkon uelis timoapolaktis.
^ párr. 2 Hechos 8:35-38: “35 Felipe opeuj tlajtoua, niman opeujtia ika yejuin tlajkuilojli, okinojnots itech kuajli tlajtoltin itech Jesús. 36 Aman ijkuak yayaj ipan ojtli, oajsikej kampa onkatka atl, niman yejon eunuco okijto: ‘¡Xkita! Nikan onka atl; ¿tlenon nechtsakuilia maninoapolakti?’. 37 38 Ijkuakon otlanauati makiteltikan carreta, niman Felipe niman on eunuco okalajkej kampa onkatka atl. Kuakon, Felipe okiapolakti”.
^ párr. 6 Tla tikneki tikmatis okseki itech kenon Jehová melak kualtsin otlachijchiuj, uelis tikimitas yejuin videos Tlen yokichijchiuj toTajtsin kiteititia iueyilis: Tlauijli niman tlapaltin niman Tlen amoxtli Job techmachtia itech melajkayotl: Tlen panoua ipan tlaltikpaktli.
^ párr. 61 TLEN NESI IPAN TLAIXKOPINAJLI: Se tokniuj siuatl tlakoujtinemi niman kimaka se tratado se ichpochtli akin tlanemaka.
