1, 2. ¿Akinomej uelis kipaleuiskej akin kemach nomachtijtika Biblia manoapolakti?

SE TOKNIUJ siuatl, akin itoka Amy niman chanti Fiyi, kijtoua: “Melak nikuelitaya tlen nechmachtiayaj itech Biblia. Maski nikmatstoya ika melauak tlen nechititijtoyaj, xnikchiuaya tlen nechmachtijtoyaj. San ika, sakin, opeuj ninosentlalia imiuan tokniuan niman yejon onechpaleui maninoapolakti”. Tlen ipan onochiuj Amy techititia ika, tla tinochimej tikchiuaj tlen kuajli ipampa akin kemach nomachtijtika Biblia, tikpaleuiskej más makichikaua itlaneltokil niman manoapolakti.

² Tinochimej akin tinemij ipan tlanechikojli uelis tikinpaleuiskej oksekimej niman ijkon makitekichiuilikan toTajtsin (Efes. 4:16). Se precursora, akin itoka Leilani niman chanti Vanuatu, kijtoua: “Miyekej kijtouanij: ‘Nochimej akin nemij ipan se kalpan kipaleuiyaj se konetl kuajli manoskalti’. Niknemilia ika noijki ijkon panoua ipan tlanechikojli. Tinochimej noneki tikpaleuiskej akin kemach nomachtijtika Biblia niman ijkon makitekichiuili Jehová”. Para kuajli manoskalti se konetl, noneki ika ichanejkauan, iamigos niman akin kimachtiaj ipan escuela makiyolchikauakan niman makijlikan tlenon kuajli niman tlenon xkuajli. Noijki ijkon, tla tiknekij ika yakaj akin kemach nomachtijtika Biblia machikaui itlaneltokil niman manoapolakti, tinochimej akin tinemij ipan tlanechikojli noneki tikpaleuiskej, tikyolchikauaskej  niman tikititiskej ika tikchiuaj tlen titemachtiaj (Prov. 15:22).

3. ¿Tlenon tiuelij itech tlen kijtoua tokniuj Ana, Dorín niman Leilani?

³ ¿Tleka noneki tipakiskej tla tikitaj ika tokniuan kinekij kipaleuiskej akin tikmachtiaj? Se precursora especial, akin itoka Ana niman nemi Moldavia, kijtoua: “Akin kemach nomachtijtika Biblia, melak noneki makipaleuikan. Yejuin se ueyi tekitl, ika yejon, toselti xuelis tikchiuaskej. Kipiya ika tikinkauiliskej oksekimej tokniuan noijki makipaleuikan”. Se tokniuj precursor especial, akin itoka Dorín niman noijki nemi Moldavia, kijtoua: “Kemantika, tokniuan kijtouaj itlaj tlen ajsi ipan iyojlo akin nikmachtia, kijliaj itlaj tlen nejua xkeman niknemiliskia”. Tokniuj Leilani noijki kijtoua tleka noneki tikinkauiliskej oksekimej makipaleuikan akin tikmachtiaj, yejua kijtoua: “Ijkuak yakaj akin nomachtijtika Biblia kita ika akin tinemij ipan tlanechikojli tiktlasojtlaj niman tiknekij tikpaleuiskej, yejua kuajli kasikamati ika tejuamej melauak tinemij ipan ikalpan Jehová” (Juan 13:35).

4. ¿Tlenon tikitaskej ipan yejuin tlamachtijli?

⁴ Aman, kanaj totlajtoltiaj: “¿Kenon uelis nikpaleuis akin kemach kimachtijtokej itech Biblia?”. Ipan yejuin tlamachtijli, tikitaskej tlenon uelis tikchiuaskej ijkuak teuan tontemachtiskej niman ijkuak yakaj akin kimachtiaj itech Biblia peua yauj tlanechikoltin. Noijki, tikitaskej tlenon uelis kichiuaskej tlayekankej niman ijkon kinpaleuiskej manoapolaktikan akin kemach nomachtijtokej.

5. ¿Tlenon noneki tikilnamiktoskej ijkuak teuan tontemachtiskej?

⁵ Nochimej akin temachtiaj itech Biblia kipiyaj se ueyi tekitl: yejuamej akin noneki kinpaleuiskej innomachtijkauan kuajli makasikamatikan tlen Biblia temachtia. Tla kemantika se tokniuj techijlia iuan matitemachtitij, noneki tikilnamiktoskej ika tikuikaj para tikpaleuiskej (Ecl. 4:9, 10). ¿Kenon uelis titepaleuiskej?

6. ¿Kenon uelis tikchiuaskej ken kijtoua Proverbios 20:18 ijkuak yakaj techijlis iuan matitemachtitij?

⁶ Kuajli matomachtikan. Kachtopa, matiktlajtoltikan tokniuj tlenon kixnamiktika akin kimachtia (xpoua Proverbios 20:18). Uelis tiktlajtoltiskej ipan katlejua tlamachtijli kimachtis niman tlenon kasikamachiltisneki. Noijki, uelis tiktlajtoltiskej tla onka itlaj tlen xnoneki tikijliskej noso tikchiuaskej niman kenon uelis tikpaleuiskej inomachtijkauj más makitlasojtla Jehová. Melauak, tokniuj kanaj xtechijlis nochi tlen kimati itech inomachtijkauj. San ika, tlen techijlis, uelis techpaleuis matikyolchikauakan inomachtijkauj. Ijkon kichiua se misionera akin itoka Joy. Yejua kijtoua: “Ijkuak se tokniuj iuan nontemachtia, niktlajtlajtouilia itech nonomachtijkauj. Yejon kipaleuiya tokniuj makasikamati kenon uelis kipaleuis akin nikmachtia”.

7. ¿Tleka melak noneki matomachtikan achto teuan tontemachtiskej?

 ⁷ Ijkuak teuan tontemachtiskej, melak kuajli tla tejuamej kachtopa tomachtiaj (Esd. 7:10). Dorín, akin otikteneujkej ipan párrafo 3, kijtoua: “Melak niktlasojkamati ijkuak tokniuj akin nouan ontemachtia noijki kita amatlajkuilojli tlen ipan nitemachtis, pampa ijkon ueli kiyolchikaua akin nikmachtia”. Tla ijkon tikchiuaj, akin nomachtijtokej Biblia kitaskej ika tejuamej kuajli tomachtiaj achto tikominmachtiskej. Tla kemantika tikitaj ika xuelis nochi tomachtiskej tlen ipan temachtis tokniuj, uelis san tomachtiskej tlen más ueyi kijtosneki itech yejon tlamachtijli.

8. ¿Tlenon techpaleuis kuajli matikchiuakan teoyotl ijkuak teuan tontemachtiskej?

⁸ Teoyotl melak tepaleui ijkuak titemachtiaj, ika yejon, ijkuak techijlis tokniuj akin iuan tontemachtiaj tejuamej matikchiuakan teoyotl, kuajli matiknemilikan tlenon tikijtoskej (Sal. 141:2). Hanae se tokniuj akin ualeua Japón, kijtoua: “Ok nikimilnamiki iteoyouan se tokniuj akin kuajuikaya akin nechmachtiaya. Ipan iteoyouan kakistiya ika kuajli nouikaya iuan Jehová. Nejua noijki ijkon niknekiya nikchiuas. Niman, tokniuj nochipa nechtokayotiaya ijkuak kichiuaya teoyotl. Yejon kichiuaya kuajli maninomachili”.

9. Ken kijtoua Santiago 1:19, ¿tlenon uelis tikchiuaskej ijkuak se tokniuj temachtijtos?

⁹ Matikpaleuikan tokniuj akin temachtia. Se tokniuj precursora especial, akin itoka Omamuyovbi niman chanti Nigeria, kijtoua: “Ijkuak se tokniuj temachtijtos, noneki san titlakaktoskej niman xsajnoye titlajtoskej. Tla ijkon tikchiuaj, tikteititijtoskej ika tikasikamatij ika tokniuj noneki kiyekanas yejon tlamachtijli”. Kuakon, ¿kemanon noneki titlajtoskej niman tlenon noneki tikijtoskej? (Prov. 25:11). Noneki kuajli tijkakiskej tokniuj akin temachtijtika niman akin kimachtijtokej (xpoua Santiago 1:19). Tla ijkon tikchiuaj, melak titepaleuiskej. Noijki, xnoneki sajnoye titlajtoskej niman xnoneki tiktlajtolkotonaskej tokniuj akin temachtijtika. San ika, kema uelis itlaj tikijliskej noso itlaj tiktlajtoltiskej akin kimachtijtokej niman ijkon kuajli makasikamati tlen kititijtokej. Maka matiknemilikan ika xuelis tikpaleuiskej. Uelis tikpaleuiskej makichikaua itlaneltokil tla tejuamej tikijliaj tlen kuajli kichiua niman tla tikititiaj ika yemelak tiknekij tikpaleuiskej.

10. ¿Tlenon panos tla tikijliaj akin kimachtijtokej tlen topan yonochiuj?

¹⁰ Matikijlikan akin kimachtijtokej tlen topan yonochiuj. Uelis tikijliskej akin kimachtijtokej kenon tejuamej opeuj tomachtiaj Biblia, tlenon yotechpaleui matikxikokan tlen ouijtika niman kenon yotechpaleui Jehová (Sal. 78:4, 7). Tlen tikijlis uelis kipaleuis machikaui itlaneltokil, makineki manoapolakti niman hasta uelis kipaleuis makixiko tlen ouijtika (1 Ped. 5:9). Se precursor, akin itoka Gabriel niman chanti Brasil, kijtoua: “Ijkuak kemach ninomachtijtoya  Biblia, tokniuan nechijliayaj tlen inpan yonochiujka. Yejon onechpaleui manikita ika Jehová kimatstika tlenon topan nochiua. Tla yejuamej ouel otlaxikojkej, nejua noijki uelis nitlaxikos”.

11, 12. ¿Tleka melak noneki kuajli matikinselikan akin kemach yauej ipan tlanechikojli?

¹¹ Akin nomachtijtika Biblia uelis chikauis itlaneltokil niman uelis noapolaktis tla nochipa yauj tlanechikoltin (Heb. 10:24, 25). Miyekej peua yauej tlanechikoltin pampa akin kinmachtia kimijlia mauiyan. Aman tej, tejuamej noijki uelis tikinyolchikauaskej nochipa touan manosentlalikan. ¿Kenon uelis tikyolchikauaskej akin kemach yauj tlanechikoltin?

¹² Kuajli matikselikan ipan tlanechikojli (Rom. 15:7). Tla kuajli tikseliaj akin kemach yauj tlanechikojli, nochipa kinekis yas. Matiktlajpalokan, matikpaleuikan makimixmati oksekimej tokniuan niman matikchiuakan kuajli manomachili. Matiknisiuikan niman iuan matitlajtlajtokan pampa kanaj akin kimachtia xiajsi noso kichiujtika okse tekitl. Kuajli matijkakikan niman matikititikan ika tiknekij tikpaleuiskej. ¿Tlenon panos tla ijkon tikchiuaj? Matikitakan tlen okijto tokniuj Dimitri, akin kemach onoapolakti niman akin aman itlapaleuijketl ipan tlanechikojli. Yejua kijtoua: “Ijkuak kemach oniaj ipan se tlanechikojli, melak ninomojtiaya niman san kiyauak oninokauj. San ika, se tokniuj onechitak niman onechkalakti. Ijkuak onikalak, melak onimojkatlachix pampa miyekej onechtlajpalojkej. Melak kuajli ken onechselijkej hasta niknekiya ika mojmostla manopanoltikan tlanechikoltin. Melak kuajli oninomachili ipan yejon tonajli”.

13. ¿Tlenon panos tla tikchiuaj tlen kuajli?

¹³ Matikchiuakan tlen kuajli. Tla tejuamej tikchiuaj tlen kuajli, akin kemach nomachtijtika kitas ika tejuamej yemelak tiktekichiuiliaj toTajtsin (Mat. 5:16). Se precursor, akin itoka Vitali niman chanti Moldavia, kijtoua: “Ijkuak onikitak kenon chantiyaj iteixpantijkauan Jehová, kenon tlanemiliayaj niman tlenon kichiuayaj, onikasikamat ika yejuamej nemij ipan religión tlen melauak”.

14. ¿Tlenon panos tla tejuamej tikchiuaj tlen kijtoua Biblia?

¹⁴ Tla se akin nomachtia Biblia kineki noapolaktis, noneki kichiuas tlen yokititijkej. Kemantika yejuin ouijtika. San ika, ijkuak yejua kitas kenon techpaleuiya tlen kijtoua Biblia, yejua noijki kinekis kichiuas tlen ueltiuj (1 Cor. 11:1). Matikitakan tlenon ipan onochiuj Hanae akin otikteneujkej ipan párrafo 8. Yejua kijtoua: “Nikitaya ika tokniuan kichiuayaj tlen nechmachtiayaj ipan Biblia. Nikitaya kenon teyolchikauaj, tetlapopoluiyaj, tetlasojtlaj niman kenon kuajli tlajtouaj intech oksekimej. Nejua niknekiya nikchiuas ijkon ken yejuamej”.

15. Itech tlen kijtoua Proverbios 27:17, ¿tlenon panos tla tejuamej imiuan touikaj akin kemach yauej tlanechikoltin?

 ¹⁵ Kuajli matouikakan imiuan akin nomachtijtokej. Ijkuak se akin nomachtijtika yauj tlanechikoltin, matikititikan ika tiknekij tikpaleuiskej (Filip. 2:4). Tla tiknekij más tikixmatiskej, matiktlajtoltikan kenon nemij ichanejkauan, ipan tlenon tekiti niman kenon kipaleuijtika tlen ueltika ipan Biblia. San ika, maka matiktlajtoltikan itlaj tlen uelis kipinaujtis. Noijki uelis tikijliskej ika melak kuajli ika yejua yopeuj nopatla. Tla tejuamej ijkon tikchiuaj, yejua kinekis touan nouikas niman uelis tikpaleuiskej makichikaua itlaneltokil niman manoapolakti (xpoua Proverbios 27:17). Hanae, akin aman iprecursora regular, kijtoua: “Ijkuak opeuj niauj tlanechikoltin, opeuj más kuajli ninouika imiuan tokniuan. Niman yejon onechpaleui maka maniknopolouili nion se tlanechikojli. Maski kemantika melak nisiaujtoya, nochipa niaya. Pampa opeuj kuajli ninouika imiuan tokniuan, yejon onechpaleui maka ok maninouika imiuan akin xkitekichiuiliaj Jehová. Niman pampa niknekiya más ninouikas iuan Jehová niman imiuan tokniuan, oninoapolakti”.

16. ¿Tlenon okseki uelis tikchiuaskej niman ijkon akin kemach nomachtijtika Biblia kuajli manomachili ipan tlanechikojli?

¹⁶ Ijkuak tikitaskej ika akin nomachtijtika Biblia peua más kitlasojtla Jehová, matikititikan ika tiktlasojtlaj ijkon ken se tokniuj. Kanaj uelis tiknotsaskej tochan (Heb. 13:2). Se tokniuj tlakatl, akin itoka Denís niman tlapaleuijtika ne Moldavia, kijtoua: “Ijkuak nejua iuan nosiuauj kemach tomachtijtoyaj Biblia, sekimej tokniuan technotsayaj inchan. Melak techyolchikauaya ijkuak techijliayaj kenon Jehová yokinpaleui. Yejon otechpaleui matiknekikan matiktekichiuilikan Jehová. Otikasikamatkej ika toTajtsin nochipa techpaleuiskia matiyolpakikan”. Ijkuak se akin nomachtijtika Biblia peua tenojnotsa, uelis tikijliskej touan matenojnotsati. Se tokniuj, akin itoka Diego niman ualeua Brasil, kijtoua: “Ijkuak opeuj nitenojnotsa, miyekej tokniuan nechijliayaj imiuan manitenojnotsati. Yejon onechpaleui kuajli manikimixmati tokniuan, más kuajli manitenojnotsa niman más maniktlasojtla Jehová niman Jesús”.

17. ¿Kenon tlayekankej uelis kinpaleuiskej akin nomachtijtokej Biblia?

¹⁷ Makixelokan tiempo niman ijkon kimixmatiskej akin nomachtijtokej Biblia. Tlayekankej, tla nenkimititiaj ika nenkintlasojtlaj niman ika nenkinekij nenkinpaleuiskej akin nomachtijtokej Biblia, yejuamej kinekiskej noapolaktiskej. ¿Uelis imiuan titlajtlatos ijkuak yaskej tlanechikojli? Tla tejua tikintokayotia ijkuak tlanankiliaj, yejuamej kitaskej ika yemelak tikneki tikinpaleuis. ¿Uelis tikxelos tiempo niman ijkon tikuikas se tokniuj ijkuak konmachtis se inomachtijkauj? Tla ijkon tikchiua, melak kipaleuis  akin nomachtijtika Biblia. Se tokniuj precursora, akin itoka Jackie niman chanti Nigeria, kijtoua: “Miyekej akin nikinmachtia melak mojkatlachiaj ijkuak nikimijlia ika akin iuan onikinmachtito se tlayekanketl. Se akin nikmachtia, onechijli: ‘Akin tlayekana ipan noreligión xkeman ijkon kichiuaskia. Yejua san yauj kampa kipiyaj miyek tomin niman ijkuak kitlaxtlauiliaj’”. Aman inomachtijkauj yejuin tokniuj yauj tlanechikoltin.

18. ¿Kenon tlayekankej uelis kichiuaskej tlen kijtoua 1 Pedro 5:2?

¹⁸ Makinmachtikan niman makinyolchikauakan tokniuan akin temachtiaj. Tlayekankej, nemejuamej noneki nenkinpaleuiskej tokniuan kuajli matenojnotsakan niman kuajli matemachtikan (xpoua 1 Pedro 5:2). Tla sekimej tokniuan nomojtiaj mechijliskej imiuan xtemachtitij, kuakon, nemejuamej xkimijlikan ika nenkuelitaskiaj imiuan nemontemachtiskej. Jackie, akin kemach otikonteneujkej, kijtoua: “Tlayekankej nechtlajtoltiaj inpampa akin nikinmachtia Biblia. Ijkuak xnikmati kenon nikinpaleuis akin nikinmachtijtika Biblia, tlayekankej nechijliaj tlen uelis nikchiuas”. Tokniuan tlayekankej uelis kinyolchikauaskej tokniuan akin temachtijtokej (1 Tes. 5:11). Jackie noijki kijtoua: “Melak kuajli ninomachilia ijkuak tokniuan tlayekankej nechyolchikauaj niman ijkuak nechijliaj ika kitlasojkamatij tlen nikchiua. Tlen nechijliaj melak nechyolseselia, ijkon ken se vaso ika atl mitsseselis ijkuak melak tona. Ijkuak nechyolchikauaj, nechpaleuiya más ika noyojlo manitemachti” (Prov. 25:25).

19. ¿Tlenon uelis tikchiuaskej tinochimej akin tinemij ipan tlanechikojli?

¹⁹ Maski amantsin xakaj tikmachtijtokej itech Biblia, uelis tikinpaleuiskej innomachtijkauan oksekimej tokniuan más makitlasojtlakan Jehová. Ijkuak teuan tontemachtiskej, kuajli matiknemilikan tlen tikijtoskej niman maka sajnoye matitlajtokan. Tla se akin nomachtia Biblia yauj tlanechikojli, kuajli iuan matonojnotsakan niman matikititikan ika tokojtiliaj tikchiuaskej tlen kijtoua Biblia. Tlayekankej uelis kinpaleuiskej akin nomachtijtokej Biblia tla imiuan tlajtlajtouaj. Noijki, uelis kinpaleuiskej tokniuan akin temachtiaj tla kimititiaj kenon más kuajli kichiuaskej intekiyo. ¡Melak teyolpakti ijkuak tikitaj kenon tikpaleuiyaj se akin nomachtia Biblia más makitlasojtla Jehová niman makitekichiuili!