1. Itech tlen kijtoua Mateo 24:9, ¿tleka xtimojkatlachiaj ijkuak techtlauelitaj?

JEHOVÁ otexchijchiuj para matitetlasojtlakan niman para matechtlasojtlakan. Ika yejon, ijkuak yakaj techtlauelita, toyolkokouaj niman tomojtiaj. Georgina, se tokniuj akin chanti Europa, kijtoua: “Ijkuak nikpiaya 14 xiuitl, nonan opeuj nechtlauelita pampa niktekichiuiliaya Jehová. Melak xkuajli ninomachiliaya niman ninotlajtoltiaya tla xkuajli tlen nikchiujtoya”. * Niman se tokniuj, akin itoka Danilo, kijtoua: “Ijkuak soldados onechuijuisojkej, ijkuak onechuijuikaltijkej niman ijkuak onechijlikej ika más nechtlajyouiltiskiaj pampa niiteixpantijkauj Jehová, melak oninomojti”. Xtechmojkatlachialtia ika techtlauelitaj pampa Jesús yokijtoka ika ijkon texchiuiliskiaj (xpoua Mateo 24:9).

2, 3. ¿Tleka techtlauelitaj akin xkitekichiuiliaj Jehová?

² Akin xkitekichiuiliaj Jehová techtlauelitaj pampa, ijkon ken Jesús, tejuamej xtikchiuaj tlen yejuamej kichiuaj (Juan 15:17-19). Ika yejon, maski tikintlakaitaj tekiuajkej, xtokalaktiaj ipan política, xtiktlajpalouaj bandera nion xtokuikatiaj himno nacional. Tejuamej san Jehová tikueyichiuaj. Maski Satanás niman akin kipaleuiyaj xkitlakaitaj toTajtsin, tejuamej tokojtiliaj tikteijliskej ika san Jehová kinamiki matlayekana (Gén. 3:1-5, 15). Tejuamej tikteijliaj ika san iTekiuajyo toTajtsin tlayektlalis ipan yejuin tlaltikpaktli niman ika sa achijtsin poliui para kinpopolos  akin xkuajkualtin (Dan. 2:44; Apoc. 19:19-21). Yejuin kinyolpaktia akin kinekij kitlakamatiskej toTajtsin, san ika, akin xkuajkualtin, xkinyolpaktia (Sal. 37:10, 11).

³ Akin xkitekichiuiliaj toTajtsin noijki techtlauelitaj pampa tiktlakamatij tlen Jehová technauatia. Yejuamej kijtouaj ika xtlajtlakojli tlen Jehová kijtoua ika tlajtlakojli. Ika yejon, yejuamej auilnemij niman kichiuaj ijkon ken kichiuayaj akin chantiyaj Sodoma niman Gomorra (Jud. 7). Miyekej techpijpinaujtiaj pampa tikchiuaj ijkon ken kijtoua Biblia niman pampa xtikchiuaj ijkon ken yejuamej (1 Ped. 4:3, 4).

4. ¿Tlenon techpaleuis matitlaxikokan ijkuak techtlauelitaskej?

⁴ ¿Tlenon techpaleuis matitlaxikokan ijkuak techtlauelitaskej niman techuijuikaltiskej? Noneki kuajli tikneltokaskej ika Jehová techpaleuis. Biblia kijtoua ika totlaneltokil yeskia kentla se escudo tlen techpaleuiya matikxikokan nochi tlen Satanás texchiuilia (Efes. 6:16). San ika, xsan noneki titlaneltokaskej itech Jehová, noijki noneki tiktlasojtlaskej, niman noijki tikintlasojtlaskej oksekimej. ¿Tleka? Pampa akin tetlasojtla “xsan kuajkualani” niman “kixikoua nochi tlajtlamach tlen xkuajli” (1 Cor. 13:4-7, 13). Aman matikitakan tleka tikijtouaj ika tla tiktlasojtlaj Jehová, tla tikintlasojtlaj tokniuan niman tla tikintlasojtlaj akin techtlauelitaj techpaleuis matitlaxikokan ijkuak techtlauelitaskej.

5. ¿Tleka Jesús ouel otlaxiko?

⁵ Achto ika kimiktiskiaj Jesús yejua okimijli inomachtijkauan: “Nikchiuas on tlen noTajtsin onechnauatij para in tlaltikpaktlakamej kimatiskej ika nejua niktlajsojtla noTajtsin” (Juan 14:31). Jesús melak kitlasojtlaya Jehová, ika yejon, ouel otlaxiko ijkuak okixnamik tlen ouijtika. Tla tejuamej melak tiktlasojtlaj Jehová, noijki uelis titlaxikoskej.

6. Itech tlen kijtoua Romanos 5:3-5, ¿kenon tomachiliaj ijkuak oksekimej techtlauelitaj?

⁶ Itekipanojkauan toTajtsin nochipa yotlaxikojkej pampa kitlasojtlaj Jehová. Ijkuak sekimej tlayekankej judíos okimijlikej apóstoles ika maka sa matenojnotsakan, yejuamej okimijlikej: “Kitocaroua achtoj tiktlakamatiskej Dios xken nemejuamej yejuan san nentlakamej” (Hech. 5:29; 1 Juan 5:3). Apóstoles ouel okitlakamatkej toTajtsin pampa kitlasojtlayaj. Ipan yejuin tonaltin miyekej tokniuan kintlaueltokaj. San ika, yejuamej ueli tlaxikouaj pampa noijki kitlasojtlaj Jehová. Ijkuak techtlauelitaj, xtajmanaj, yej tiyolpakij (Hech. 5:41; xpoua Romanos 5:3-5).

7. ¿Tlenon noneki tikchiuaskej ijkuak techtlauelitaskej tochanejkauan?

⁷ Melak xkuajli tomachiliaj ijkuak tochanejkauan techtlauelitaj. Ijkuak tochanejkauan kitaj ika yopeuj tiktekichiuiliaj Jehová, sekimej kanaj kinemiliaj ika yotechkajkayaujkej noso ika yotitlamachilispoliujkej (uelis tikitas Marcos 3:21). Sekimej hasta kanaj texchiuiliaj tlen xkuajli. San ika, nochi yejuin xtechmojkatlachialtia pampa Jesús okijto: “Se kipiyas itlauelikniu sano ifamilia” (Mat. 10:36). Maski sekimej techtlauelitaskej, tejuamej xtikintlauelitaskej. Ijkuak tejuamej más tiktlasojtlaj Jehová, noijki más tikintlasojtlaj oksekimej (Mat. 22:37-39). San ika, maski melak tikintlasojtlaj tochanejkauan, tejuamej más tiknekij tiktlakamatiskej tlen techijlia Jehová.

8, 9. ¿Tlenon okipaleui Georgina makixiko nochi tlen kixnamiktoya?

⁸ Georgina, akin otikteneujkej ipan párrafo 1, omelajkanen maski inan okitlajyouilti. Yejua kijtoua: “Nejua iuan nonan san sekan opeuj tomachtiaj imiuan iteixpantijkauan Jehová. Ijkuak yopanoka chikuasen metstli ika tomachtiaj, nejua oniknek nias tlanechikoltin,  san ika, nonan xonechkauili. Sakin onikmat ika nonojnotsaya imiuan akin kixnamikij ikalpan toTajtsin, yejua ika, opeuj nechixnamiki. Noijki, nechuijuikaltiaya, nechtsontijtilanaya, nechkechmimiktiaya niman nechintlajkaliliaya noamatlajkuiloluan. Ijkuak onikajxilti 15 xiuitl, oninoapolakti. San ika, pampa yejua xkinekiya maniktekichiuili Jehová, onechkauato ipan se kajli kampa kinpaleuiayaj telpokamej niman ichpokamej akin kinkuiyaj drogas niman kichiuayaj tlen xkuajli. Melak onechyolkoko nochi yejuin pampa nejua kema niktlasojtlaya nonan”.

⁹ ¿Tlenon okipaleui Georgina makixiko nochi tlen kixnamiktoya? Yejua kijtoua: “Ijkuak nonan opeuj nechtlauelita, nejua kemach yonitlanka ika nikpoua nochi noBiblia. Kuajli yonikitaka ika, tlen ninomachtijtoya, yejon tlen melauak niman nikmachiliaya ika más nisiuj ninemiya itech Jehová. Miyekpa niknotsaya niman yejua nechkakiya. Ijkuak ninemiya ipan kajli kampa onechkauato nonan, se tokniuj siuatl onechijli maniuiya ichan, niman ompa san sekan tomachtiayaj Biblia. Ijkuak nikixnamiktoya tlen ouijtika, tokniuan melak onechyolchikaujkej niman onikimitak kentla nochanejkauan yeskiaj. Kuajli onikitak ika Jehová más kojtik xijkon ken akin techtlauelitaj”.

10. ¿Tlenon kuajli tikmatstokej?

¹⁰ Apóstol Pablo okijto ika “xonkaj itlaj nion xakaj uelis techxelos itech itetlajsojtlalis Dios” (Rom. 8:38, 39). Maski kemantika titlajyouiskej, uelis kuajli tikmatstoskej ika Jehová nochipa touan nemis, ika techyolseuis niman ika techkojtilis. Ijkon ken otikitakej itech tokniuj Georgina, Jehová noijki techpaleuis intechkopa tokniuan.

11. ¿Tlenon opanok pampa inomachtijkauan Jesús okitlakamatkej tlen yejua okimijli ipan Juan 15:12, 13?

¹¹ Ijkuak ikimiktiskiaj, Jesús okimijli inomachtijkauan ika nonekiya nochipa notlasojtlaskej (xpoua Juan 15:12, 13). Yejua ijkon okimijli pampa kimatstoya ika yejon kinpaleuiskia san sekan manemikan niman matlaxikokan ijkuak kintlauelitaskiaj. Matitlanemilikan intech tokniuan de Tesalónica. Ijkuak okintlaueltokakej, yejuamej nochipa onotlasojtlakej niman otlaxikojkej (1 Tes. 1:3, 6, 7). Pablo okimijli ika nonekiya más notlasojtlaskej (1 Tes. 4:9, 10). Yejua kimatstoya ika, tla más notlasojtlayaj, yejuamej ueliskiaj kinyolseuiskiaj akin najmanayaj niman ueliskiaj kinpaleuiskiaj akin kixnamiktoyaj tlen ouijtika (1 Tes.  5:14). Tokniuan okichiujkej tlen Pablo okintlajtlanili, ika yejon, sakin okimijli: “On tetlajsojtlalistli yejuan cada se nenkipiyaj inuan oksekimej más ueyixtiu” (2 Tes. 1:3-5). Pampa yejuamej kintlasojtlayaj imikniuan, ouel otlaxikojkej ijkuak okixnamijkej tlen ouijtika niman ijkuak okintlaueltokakej.

12. ¿Kenon onoititijkej sekimej tokniuan ika notlasojtlayaj ijkuak panotoya se guerra?

¹² Matikitakan tlenon ipan onochiuj Danilo, akin otikteneujkaj ipan párrafo 1. Ijkuak ipan ipaís panotoya se guerra, yejua iuan isiuauj nochipa yayaj tlanechikoltin, nokojtiliayaj tenojnotsaskej niman kinmakayaj oksekimej tokniuan tlen ueliskia kikuaskej. Se tonajli, sekimej soldados okalakitoj ichan Danilo. Yejua kijtoua: “Onechijlikej maka sa maniktekichiuili toTajtsin. Pampa xoniknek, onechuijuisojkej niman onechijlikej ika nechmotlaskiaj ika pistola. San ika, san nokuatipan otlamotlakej. Sakin, onechijlikej ika oksejpa uajlaskiaj niman kuajnajnauiltiskiaj nosiuauj. Tokniuan nimantsin otechpaleuijkej. Yejuamej otechtitlankej ipan okse kalpan. Xkeman nikilkauas kenon melak otechtlasojtlakej tokniuan. Ijkuak otajsikej ipan kalpan kampa otechontitlankej, tokniuan otechmakakej tlakuajli, otechpaleuijkej matiknextikan se tekitl niman se kajli kampa tichantiskiaj. Ipampa yejuin, tejuamej noijki ouel otikinpaleuijkej sekimej tokniuan akin ouajcholojteujkej de inkalpan ipampa se guerra”. Yejuin techititia ika, tla tejuamej tikinpaleuiyaj tokniuan ijkuak kintlauelitaj, yejuamej uelis tlaxikoskej.

13. ¿Kenon techpaleuiya espíritu santo nochipa matiktekichiuilikan Jehová ijkuak techtlauelitaj?

¹³ Jesús okijto ika noneki tikintlasojtlaskej akin techtlauelitaj (Mat. 5:44, 45). Kanaj kemantika ouijtika tikitaj tikintlasojtlaskej akin techtlauelitaj, san ika, ika iespíritu santo toTajtsin, kema uelis tikintlasojtlaskej. Iespíritu santo toTajtsin techpaleuis matitetlasojtlakan, matiteijyouikan, matitepaleuikan ika nochi toyojlo, matiyolyemankej niman matiuelikan san toselti matoteltikan (Gál. 5:22, 23). Nochi yejuin techpaleuis matitlaxikokan ijkuak techtlauelitaskej. Miyekej akin techtlauelitayaj aman xok techtlauelitaj pampa kanaj insiuauj, inueuentsin, inkoneuj noso akin ompa ika nisiuj chanti okimititijkej ika kintlasojtlaj. Sekimej hasta noijki yopeuj nomachtiaj Biblia. Yejua ika, tla ouijtika tikitaj tikintlasojtlaskej akin techtlauelitaj, matiktlajtlanilikan  toTajtsin matechmaka iespíritu santo (Luc. 11:13). Maka matikilkauakan ika más kuajli tla nochipa tikchiuaj tlen toTajtsin techijlia (Prov. 3:5-7).

14, 15. ¿Kenon se tokniuj okipaleui tlen kijtoua Romanos 12:17-21 makitlasojtla iueuentsin ijkuak kitlajyouiltiaya?

¹⁴ Matikitakan tlenon ipan onochiuj se tokniuj akin itoka Yasmín. Ijkuak Yasmín onochiuj iteixpantijkauj Jehová, iueuentsin okinemili ika yokikajkayaujkaj niman xkinekiya makitekichiuili toTajtsin. Iueuentsin kiuijuikaltiaya niman okintlajtlanili ichanejkauan, se tlakatl akin tlayekanaya ipan ireligión niman se nauajli para san tlemach makijlikan niman makiteijlikan ika yejua kixelojtoya ifamilia. Iueuentsin hasta okinuijuikaltito tokniuan ipan tlanechikojli. Yasmín chokaya pampa iueuentsin melak xkuajli tlen kichiuiliaya.

¹⁵ Tokniuan ipan tlanechikojli melak okiyolseuijkej niman okiyolchikaujkej. Tlayekankej okijlikej ika melak kipaleuiskia tla kichiuaya tlen kijtoua Romanos 12:17-21 (xpoua). Yasmín kijtoua: “Ouijtika onikitak niktlakamatis tlen kijtoua Biblia. San ika, oniktlajtlanili Jehová manechpaleui. Ijkuak noueuentsin kitsojkuilyotiaya ipiso cocina pampa kinekiya nechkualanis, nejua nitlachipauaya. Ijkuak nechuijuikaltiaya, nejua ninokojtiliaya xnikualanis. Niman ijkuak kualouaya, nejua niktlajpiaya”.

16, 17. ¿Tlenon tiueli itech tokniuj Yasmín?

¹⁶ Yasmín kijtoua ika pampa nokojtilia kitlasojtlas iueuentsin, melak yokipaleui. Yejua kijtoua: “Aman más notech tlaneltoka pampa kimati ika nejua xnitlakajkayaua, niman xok kualani ijkuak niknojnotsa itech toTajtsin. Noijki, aman más ika toyojlo tinemij, hasta nechijlia nochipa maniuiya tlanechikoltin. Nikchia ika se tonajli noijki manochiua iteixpantijkauj Jehová niman ijkon san sekan tiktekichiuiliskej”.

¹⁷ Tlen ipan onochiuj Yasmín techititia ika, tla titetlasojtlaj, uelis titeijyouiskej niman uelis tikxikoskej tlen xkuajli (1 Cor. 13:4, 7). Melauak, ijkuak techtlauelitaj, toyolkokouaj, san ika, ijkuak titetlasojtlaj, tikinpaleuiyaj oksekimej manopatlakan. Noijki, ijkuak titetlasojtlaj, tikyolpaktiaj Jehová. Maski miyekej techtlauelitaskej, tejuamej uelis nochipa tiyolpakiskej. Aman matikitakan tlenon techpaleuis matiyolpakikan.

18. ¿Tleka tiyolpakij ijkuak techtlauelitaj?

¹⁸ Jesús okijto ika tejuamej tiyolpakij ijkuak techtlauelitaj (Luc. 6:22). Yemelak, tejuamej  xtikuelitaj matechtlauelitakan. Kuakon, ¿tleka tiyolpakij ijkuak techtlauelitaj? Kachtopa, pampa ijkuak titlaxikouaj, tikyolpaktiaj toTajtsin (1 Ped. 4:13, 14). Ika ome, totlaneltokil más chikaui (1 Ped. 1:7). Niman ika yeyi, pampa tikseliskej se nemilistli tlen xkeman tlamis (Rom. 2:6, 7).

19. ¿Tleka apóstoles yolpakiyaj maski okinuijuitejkej?

¹⁹ Sakin ika oyoliuj Jesús, inomachtijkauan melak oyolpakej ijkon ken yejua yokimijlika. Maski okinuijuitejkej niman okinnauatijkej maka sa matenojnotsakan, yejuamej yolpakiyaj “pampa Dios okinkauilij okimpijpinauijkej pampa kineltokayaj Jesús” (Hech. 5:40-42). Yejuamej xokinmakaskej intlauelikniuan pampa más kitlasojtlayaj Jesús. Niman okiteititijkej ika kitlasojtlaj Jesús pampa xokikajkaujkej ika tenojnotsaj. Ipan yejuin tonaltin, miyekej tokniuan noijki yolmelajkanemij itech toTajtsin maski kixnamiktokej tlen ouijtika. Yejuamej kimatstokej ika Jehová xkilkauas ken kitekichiuilijtokej (Heb. 6:10).

20. ¿Tlenon tikitaskej ipan okse tlamachtijli?

²⁰ Pampa Satanás ok tlayekantok ipan yejuin tlaltikpaktli, tejuamej ok techtlauelitaskej (Juan 15:19). San ika, maka matomojtikan. Ken tikitaskej ipan okse tlamachtijli, Jehová nochipa kinyolchikauas niman kintlajpiyas itekipanojkauan (2 Tes. 3:3). ¿Niman tlenon noneki tikchiuaskej aman? Matiktlasojtlakan Jehová, matikintlasojtlakan tokniuan niman noijki matikintlasojtlakan akin techtlauelitaj. Tla ijkon tikchiuaj, kuajli touikaskej imiuan oksekimej, más chikaujtos totlaneltokil, san Jehová tikueyichiuaskej niman tikteititiskej ika ueli titlaxikouaj ijkuak techtlauelitaj pampa titetlasojtlaj.