1, 2. ¿Kenon uelis tikyolpaktiskej Jehová ijkuak tikueyichiuaj?

 KANAJ tiknemiliaj ika tikueyichiuaj toTajtsin ijkuak itech toueyikatsajtsiliaj niman tikijliaj nochi tlen tikmachiliaj. Noso ijkuak tomachtiaj Biblia imiuan tochanejkauan.

² Uelis tikyolpaktiskej Jehová ijkuak tikueyichiuaj tla tikchiuaj tlen yejua kuelita niman tla tikteititiaj ika tiktlasojtlaj niman tiktlakaitaj. Niman tejuamej tiknekij kuajli tikueyichiuaskej Jehová pampa melak tiktlasojtlaj niman tikmatij ika san yejua kinamiki matikueyichiuakan.

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli tikitaskej kenon kuelitaya Jehová makiueyichiuakan niman kenon kineki matikueyichiuakan ipan yejuin tonaltin. Noijki tikitaskej kenon melak teyolpakti tla tikueyichiuaj Jehová ken yejua kuelita.  Ika yejon, ijkuak tomachtijtiaskej matikitakan kenon uelis más kuajli tikueyichiuaskej.

4. ¿Kenon itekipanojkauan Jehová okiteititijkej ika kitlasojtlayaj niman kitlakaitayaj?

⁴ Abel, Noé, Abrahán niman Job kiteititiayaj ika kitlakaitayaj niman kitlasojtlayaj Jehová pampa kitlakamatiyaj, kiuentlaliliayaj niman itech tlaneltokayaj. Maski Biblia xkijtoua kenon yejon tlakamej kiueyichiuayaj Jehová, tikmatstokej ika yejuamej kiyolpaktiayaj pampa kiteititiayaj ika kitlakaitayaj. Sakin, Jehová okinmakak israelitas seki tlanauatiltin kampa kijtouayaj kenon nonekiya kiueyichiuaskej.

5. ¿Kenon opeuj kiueyichiuaj Jehová sakin ika omik niman oyoliuj Jesús?

⁵ Sakin ika omik niman oyoliuj Jesús, Jehová okijli ikalpan ika xok nonekiya kitlakamatis tlanauatiltin tlen okinmakaka Moisés (Rom. 10:4). Aman, itekipanojkauan nonekiya kitlakamatiskej “itlanauatil Cristo” (Gál. 6:2). Xok nonekiya kintsontekontlaliskej tlanauatiltin, aman san nonekiya kichiuaskej tlen Jesús otemachti niman tlen okichiuj. Aman, itekipanojkauan Jehová noijki nokojtiliaj kichiuaskej ken Cristo niman ijkon kiyolpaktiskej Jehová (Mat. 11:29).

6. ¿Kenon uelis techpaleuis yejuin tlamachtijli?

⁶ Ijkuak tikitstias kenon tikueyichiua Jehová, xmotlajtolti: “¿Kuajli ken nikueyichiujtok? ¿Uelis más kuajli nikueyichiuas?”. Melak kuajli tla tikita ika yompa ken tikueyichiujtok Jehová, san ika, noijki noneki tiktlajtlanilis mamitspaleui más kuajli xkueyichiua.

7. ¿Kenon nomachilia Jehová ijkuak tikchiuiliaj teoyotl ika nochi toyojlo?

⁷ Tikueyichiuaj Jehová ijkuak tikchiuiliaj teoyotl. Ijkuak tlauentlaliayaj ipan tabernáculo, niman sakin ipan ikal Jehová, melak tlaajuiyayaya niman yejon melak kiyolpaktiaya Jehová. Niman Biblia kijtoua ika yejon tlen ajuiyak yeskia kentla toteoyouan (Sal. 141:2). Noijki ijkon, Jehová kuelita ijkuak tejuamej tikchiuiliaj teoyotl ika nochi toyojlo, maski xmiyek tlen tikijliaj (Prov. 15:8; Deut. 33:10). Onka miyek tlen kiteititia ika Jehová kema kuelita ijkuak tejuamej tikijliaj ika tiktlasojtlaj niman ika tiktlasojkamatij tlen kichiua. Niman yejua kineki matikijlikan tlenon tiknekij niman tlenon techajmana. Ika yejon, ijkuak tikchiuaskej teoyotl, kuajli matiknemilikan tlenon tikijliskej Jehová. Tla ijkon tikchiuaj, tikyolpaktiskej.

8. ¿Kenon tikueyichiuaj toTajtsin?

⁸ Tikueyichiuaj Jehová ijkuak titenojnotsaj (Sal. 34:1). Tejuamej tikueyichiuaj Jehová ijkuak tikteijliaj nochi tlen kualtsin kichiua niman ijkuak tikteijliaj ika tiktlasojkamatij nochi tlen yotechmakak. Tla tikxelouaj tiempo para titlanemiliskej itech nochi tlen Jehová yotechmakak, techpaleuis más kuajli matikueyichiuakan. Ijkuak titenojnotsaj, kentla tikmakatoskiaj Jehová se uentli (Heb. 13:15). Ijkon ken ijkuak tikchiuaj teoyotl, tla tiknekij kuajli tikueyichiuaskej Jehová, noneki kuajli tiknemiliskej tlenon tikijtoskej ijkuak  tontenojnotsaskej. Kuakon, nochipa ika toyojlo matitenojnotsakan.

9. a) Ijkon ken israelitas, ¿kenon techpaleuiyaj tlanechikoltin? b) ¿Tejua kenon mitspaleuiyaj tlanechikoltin?

⁹ Tikueyichiuaj Jehová ijkuak tiauej tlanechikoltin. Yeuejkaui, Jehová ijkin okimijli israelitas: “Nochimej on yejuan tlakamej noneki yaskej ixpan toTEKO Dios yexpa ipan se xipan, ne kampa yejua kitlapejpenis” (Deut. 16:16). Ijkuak yejuamej konueyichiuayaj Jehová, kinkaujteuayaj inkaluan niman intlaluan. San ika, Jehová okimijli: “Ijkuak nenuajlaskej nixpan nejua nemoTEKO Dios yexpa ipan se xipan, xakaj uelis kinoyaxkatis nemotlal” (Éx. 34:24). Ijkuak israelitas kinkaujteuayaj inkaluan niman intlaluan, kiteititiayaj ika tlaneltokayaj itech Jehová. Ipan yejon iluimej, yejuamej más kuajli kasikamatiyaj itlanauatil toTajtsin, tlanemiliayaj itech nochi tlen Jehová kinmakayaj niman noyolchikauayaj imiuan oksekimej itekipanojkauan Jehová (Deut. 16:15). Tejuamej noijki noneki tikxeloskej tiempo niman ijkon tiaskej tlanechikoltin. Noijki noneki kuajli matomachtikan para titlanankiliskej. Tla ijkon tikchiuaj, tikyolpaktiskej Jehová.

10. ¿Tleka tikuikatiliaj Jehová?

¹⁰ Tikueyichiuaj Jehová ijkuak tikuikatiliaj (Sal. 28:7). Ijkuak israelitas kiueyichiuayaj Jehová noijki kikuikatiliayaj. Biblia kijtoua ika David okintlapejpeni 288 levitas para manokuikatikan ipan ikal toTajtsin (1 Crón. 25:1, 6-8). Ipan yejuin tonaltin, noijki tikititiaj Jehová ika tiktlasojtlaj ijkuak tikuikatiliaj. Niman maka matiknemilikan ika xuelis ijkon tikueyichiuaskej san pampa xmás kualtsin tokuikatiaj. San matikonnemilikan yejuin: ijkuak titlajtouaj, miyekpa topopolouaj, maski ijkon xtiknemiliaj ika xok titlajtoskej ipan tlanechikojli noso nion xok titenojnotsaskej (Sant. 3:2). Kuakon, nochipa matikuikatilikan Jehová maski xmás kualtsin ken tokuikatiaj.

11. Ken kijtoua Salmo 48:13, ¿tleka noneki tikxeloskej tiempo para tomachtiskej Biblia imiuan tochanejkauan?

¹¹ Tikueyichiuaj Jehová ijkuak tomachtiaj iTlajtol niman ijkuak tikinmachtiaj tokoneuan. Israelitas noseuiayaj nochi sábados pampa ijkuakon nomachtiayaj niman kitayaj kenon más kuajli nouikaskej iuan Jehová (Éx. 31:16, 17). Israelitas noijki kinmachtiayaj inkoneuan niman kimijliayaj kenon Jehová yokinteochiujka. Tejuamej noijki tikueyichiuaj Jehová ijkuak tikxelouaj tiempo niman ijkon tikamapouaskej niman tomachtiskej Biblia. Niman ijkuak ijkon tikchiuaj, más kuajli touikaj iuan Jehová (Sal. 73:28). Noijki, tla tejuamej kuajli tikinmachtiaj tokoneuan, yejuamej noijki uelis kuajli nouikaskej iuan Jehová (xpoua Salmo 48:13).

12. ¿Kenon onomachili Jehová ijkuak okichijchiujkej tabernáculo, niman tlenon techmachtia yejon?

¹² Tikueyichiuaj Jehová ijkuak tikinchijchiuaj niman tikinyektlaliaj Kaltin kampa tikueyichiuaj. Biblia kijtoua ika Jehová melak okitlasojkaitak ken okichijchiujkej tabernáculo (Éx. 36:1, 4). Aman, Jehová noijki kitlasojkaita ijkuak nochijchiuaj Kaltin kampa tikueyichiuaj. Melak tikintlasojkamachiliaj tokniuan akin chikauak tekitij kampa kinchijchiuaj yejuin kaltin. Maski yejuamej chikauak tekitij noijki kixelouaj tiempo para tenojnotsaskej. Sekimej  hasta kinekij nochiuaskej precursores. Tlayekankej kiteititiaj ika tlapaleuiyaj ipan yejuin tekitl ijkuak kinkauiliaj yejuin tokniuan manochiuakan precursores. San ika, tinochimej titlapaleuiyaj ipan yejuin tekitl ijkuak titlachipauaj ipan Kaltin kampa tikueyichiuaj Jehová.

13. ¿Tlenon tikteititiaj ijkuak tiktemakaj totomintsin?

¹³ Tikueyichiuaj Jehová ijkuak tiktemakaj totomintsin. Israelitas okimijlikej: “Xakaj san ma pijpilkatias ijkuak yaskej ixpan toTEKO” (Deut. 16:16). Israelitas nochipa itlaj kitkiyaj ijkuak konueyichiuayaj Jehová. Ijkon kititiayaj ika kitlasojkamatiyaj nochi tlen yejua kinmakayaj. Ijkuak tejuamej tiktemakaj totomintsin ika nochi toyojlo, tikteititiaj ika tiktlasojtlaj Jehová niman ika tiktlasojkamatij nochi tlen techmaka ikalpan. Apóstol Pablo okijto: “Tla sen tlakatl ikan nochi iyojlo kitemaka kech yejua ueli kitemaka, Dios kiselilia on uentomin. Yejua tej, xueli kitlajtlanilia tlen sen xkipiya” (2 Cor. 8:4, 12). Kuakon, matiktemakakan san kech tiuelij. Tla ijkon tikchiuaj, melak tikyolpaktiskej Jehová (Mar. 12:42-44; 2 Cor. 9:7).

14. Ken kijtoua Proverbios 19:17, ¿tlenon kinemilia Jehová ijkuak tikinpaleuiyaj tokniuan?

¹⁴ Tikueyichiuaj Jehová ijkuak tikinpaleuiyaj tokniuan. Jehová okimijli israelitas ika melak kinteochiuaskia tla kinpaleuiayaj oksekimej (Deut. 15:7, 10). Jehová kita kentla itlaj tiktlayokolijtoskiaj ijkuak tikinpaleuiyaj tokniuan (xpoua Proverbios 19:17). Biblia kijtoua ika ijkuak Pablo tsauktoya, tokniuan akin chantiyaj Filipos itlaj okitlayokolitoj, niman yejua okijto ika yejon tetlayokolijli yeskia ken “sen uentli, yejuan Dios kiselia, niman kipaktia” (Filip. 4:18). Matotlajtoltikan: “¿Nemi yakaj ipan notlanechikol akin uelis nikpaleuis?”. Matikilnamikikan ika tikueyichiuaj Jehová ijkuak tiktekitiltiaj totiempo, tochikaualis niman nochi tlen tikpiyaj niman ijkon tikinpaleuiskej oksekimej (Sant. 1:27). Niman ijkuak ijkon tikchiuaj melak tikyolpaktiaj.

15. ¿Tleka ika nochi toyojlo tikueyichiuaj Jehová?

¹⁵ Noneki tikxeloskej tiempo niman tikchiuaskej nochi tlen noneki para ijkon tikueyichiuaskej Jehová ken yejua kuelita. San ika, nochi yejuin ika nochi toyojlo tikchiuaj (1 Juan 5:3). ¿Tleka? Pampa melak tiktlasojtlaj. Matikonnemilikan tlen kichiua se konetl ijkuak kineki itlaj kitlayokolis itaj. Yejua kanaj uejkaui kichijchiua se tlaixkopinajli, san ika, xnosiaujkaua niman ika nochi iyojlo kichijchiua pampa san konnemilia kenon yolpakis itaj ijkuak kimakas yejon tlaixkopinajli. Noijki ijkon, pampa tiknekij tikyolpaktiskej Jehová, ika nochi toyojlo tiktekitiltiaj totiempo niman tokojtilis niman ijkon tikueyichiuaskej.

16. Ken kijtoua Hebreos 6:10, ¿kenon nomachilia Jehová ijkuak tiktekichiuilia ika nochi moyojlo?

¹⁶ Tajtin melak kintlasojtlaj inkoneuan niman kuajli kimixmatstokej. Ika yejon, ijkuak inkoneuan kimijliaj ika itlaj kintlayokoliskej, kimatstokej ika xsan no yejua tetlayokolijli kiseliskej. Noijki ijkon, Jehová melak kuajli techixmatstok. Kanaj tejua más ueli tiktekichiuilia Jehová xijkon ken moamigos. Noso kanaj xmás miyek ueli tikchiua pampa itiueyi, tikualo noso tikpiya  okseki tekitl. San ika, maka xmajmana (Gál. 6:4). Tla ika nochi moyojlo tiktekichiuilia Jehová, tikyolpaktis niman yejua xkeman kilkauas tlen tejua tikchiua (xpoua Hebreos 6:10). Jehová hasta kimati tlenon tikuelitaskia tikchiuas niman yejua kineki xyolpaki ijkuak tiktekichiuilia.

17. a) ¿Tlenon uelis tikchiuaskej tla ouijtika tikitaj tomachtiskej Biblia noso titenojnotsaskej? b) ¿Yomitspaleui tlen uajlauj ipan recuadro “ Kenon uelis más tiyolpakiskej”?

¹⁷ ¿Tlenon uelis tikchiuaskej tla ouijtika tikitaj tomachtiskej Biblia noso titenojnotsaskej? Más matikxelokan tiempo para tikchiuaskej nochi yejuin. Tla ijkon tikchiuaj, más techpaleuis niman más xouijtika tikitaskej tikchiuaskej. Yejuin yeskia kentla tikchiuaskiaj ejercicio noso tomajmachtiskiaj titlatsotsonaskej. Tla san kemantika tikchiuaj ejercicio, xmás techpaleuis. Noso tla san kemantika titlatsotsonaj, xnimantsin tiueliskej. San ika, tla mojmostla tikchiuaj, tikitaskej kenon techpaleuiya ejercicio noso tikitaskej kenon más tiueltiuej titlatsotsonaj. Sakin, kanaj hasta xok tiknekiskej tijkajkauaskej. Kuakon, mojmostla matikueyichiuakan Jehová.

18. ¿Tlenon noneki mojmostla tikchiuaskej niman tlenon panos tla ijkon tikchiuaj?

¹⁸ Noneki mojmostla kuajli matikueyichiuakan Jehová. Tla ijkon tikchiuaj, tiyolpakiskej, ika toyojlo tinemiskej niman uelis nochipa tikueyichiuaskej (Prov. 10:22). Ika toyojlo tinemij pampa tikmatij ika Jehová techpaleuiya ijkuak tikixnamikij tlen ouijtika (Is. 41:9, 10). Kuakon, uelis melak tiyolpakiskej ijkuak tikueyichiuaskej Jehová akin kinamiki kiselis “ueyilistli, tetlakaitalistli, niman poder” (Apoc. 4:11).