1. ¿Tleka melak noneki matikitakan tlen tiknemiliaj?

 TLEN tikchiuaj kiteititia tlenon tiknemiliaj. Ika yejon, maski tla kemach noso youejkauj ika otoapolaktijkej, noneki nochipa tiknemiliskej tlen kuajli para tikyolpaktiskej Jehová. Tla san nochipa tiknemilijtokej tlen tejuamej tiknekij, uelis tikijtoskej noso tikchiuaskej tlen toTajtsin xkuelita (Efes. 4:17-19). San ika, tla nochipa tiknemiliaj tlen kuajli, tikijtoskej niman tikchiuaskej tlen Jehová kuelita (Gál. 5:16).

2. ¿Tlenon tiknankiliskej ipan yejuin tlamachtijli?

² Ken otikitakej ipan okse tlamachtijli, pampa titlajtlakolejkej uelis tiknemiliskej tlen xkuajli. San ika, uelis tokojtiliskej para xtikchiuaskej tlen xkuajli tiknemiliaj. ¿Tlenon noneki tikchiuaskej achto toapolaktiskej? Noneki tijkajkauaskej tlen xkuajli tiknemiliaj niman tlen xkuajli tikchiuaj. San ika, noijki noneki tokojtiliskej totlaliliskej “yenkuik nemilistli” para nochipa uelis tikyolpaktiskej Jehová (Col. 3:10). Ipan yejuin tlamachtijli tiknankiliskej  yejuin: ¿tlenon kijtosneki “yenkuik nemilistli”?, ¿kenon uelis tikpiyaskej? niman ¿tlenon noneki tikchiuaskej para nochipa tikpiyaskej?

3. a) ¿Tlenon kichiua akin kipiya “yenkuik nemilistli”? b) ¿Kenon tikchiuaj ijkon ken kijtoua Gálatas 5:22, 23?

³ Akin kipiya “yenkuik nemilistli” tlanemilia niman kichiua ken Jehová. ¿Niman tlenon más kichiua akin kipiya “yenkuik nemilistli”? Kinokauilia makiyekana espíritu santo ipan tlen kinemilia niman tlen kichiua (xpoua Gálatas 5:22, 23). Kitlasojtla Jehová niman kintlasojtla itekipanojkauan Jehová (Mat. 22:36-39). Yolpaki maski kixnamiktika tlen ouijtika (Sant. 1:2-4). Yolseujki (Mat. 5:9). Teijyouiya niman kinpaleuiya oksekimej (Col. 3:13). Kichiua tlen kuajli (Luc. 6:35). Kiteititia ika tlaneltoka itech Jehová (Sant. 2:18). Xnimantsin kualani ijkuak kipepeualtiaj (Tito 3:2). Niman ueli san iselti noteltia (1 Cor. 9:25, 27).

4. ¿Tleka noneki tikchiuaskej nochi tlen kijtoua Gálatas 5:22, 23, niman okseki tlaxeloltin?

⁴ Tla tiknekij tikpiyaskej “yenkuik nemilistli” noneki tikchiuaskej tlen kijtoua Gálatas 5:22, 23 niman tlen kijtouaj okseki tlaxeloltin. * Tlen nikan noteneua xken on tlakentin tlen mojmostla tikinpatlaj, ka, yejuin noneki nochipa tikinpiyaskej. ¿Tleka ijkon tikijtouaj? Pampa tla melauak titetlasojtlaj uelis titeijyouiskej niman tiknektoskej titepaleuiskej. Niman tla tiknekij tikchiuaskej tlen kuajli, xnoneki nimantsin tikualaniskej niman noneki san toselti toteltiskej.

5. Ken kijtoua 1 Corintios 2:16, ¿tlenon noneki tikchiuaskej niman tleka noneki tomachtiskej itech Jesús?

⁵ (Xpoua 1 Corintios 2:16). Tla tiknekij tikpiyaskej “yenkuik nemilistli”, noneki tiknemiliskej tlen Cristo kinemilia niman tikchiuaskej ijkon ken yejua okichiuj. Jesús kiteititia ika kuajli noyekana ika iespíritu santo toTajtsin niman kichiua nochi tlen itaj kichiua (Heb. 1:3). Ijkuak más titlanemiliskej ken Jesús tlanemilia, más  uelis tikchiuaskej ken yejua kichiua (Filip. 2:5).

6. ¿Tlenon noneki tikilnamikiskej ijkuak tikyejyekoskej topatlaskej?

⁶ Kanaj tejua tiknemilia: “¡Nejua xuelis nikchiuas ijkon ken Jesús pampa yejua xtlajtlakole!”. Tla tejua ijkon timomachilia, xkilnamiki yejuin: kachtopa, ika Jehová omitschijchiuj ijkon ken yejua niman ken Jesús, kuakon kema uelis tikchiuas seki tlen yejuamej kichiuaj (Gén. 1:26). Ika ome, xkilnamiki ika iespíritu santo toTajtsin melak kojtik niman mitspaleuis xchiua tlen nion xtiknemiliaya. Ika yeyi, xkilnamiki ika Jehová kimatstika ika tejua timopopoloua. Maka xkilkaua ika Jehová kinmakas 1,000 xiuitl akin nemiskej ipan xochitlalpan niman ijkon kinpopolouilis intlajtlakol (Apoc. 20:1-3). Aman Jehová san kineki matokojtilikan matopatlakan niman matikneltokakan ika yejua techpaleuis.

7. ¿Tlenon tikitaskej aman?

⁷ Amantsin tikitaskej naui tlemach tlen techpaleuis matikchiuakan ijkon ken Jesús. Noijki tikitaskej tlen techpaleuis matikitakan tla itlaj noneki tikpatlaskej.

8. ¿Kenon okiteititi Jesús ika melak tetlasojtla?

⁸ Jesús okiteititi ika kitlasojtla Jehová niman ika techtlasojtla (Juan 14:31; 15:13). Ijkuak nemiya ipan tlaltikpaktli nochimej okintlasojtlak niman okimikneli, hasta akin kitlauelitayaj. Noijki okiteititi ika tetlasojtla ijkuak okiteijli tlen kichiuas itekiuajyo toTajtsin (Luc. 4:43, 44). Niman más okiteititi ika kitlasojtla toTajtsin niman ika techtlasojtla ijkuak okinokauili makimiktikan topampa. Pampa ijkon okichiuj, tinochimej uelis tikpiyaskej se nemilistli tlen xkeman tlamis.

9. ¿Kenon uelis tikteititiskej ika titetlasojtlaj ijkon ken Jesús?

⁹ Otosentemakakej itech Jehová niman otoapolaktijkej pampa tiktlasojtlaj. Ika yejon, nochimej matikintlasojtlakan ijkon ken Jesús okichiuj. Ipan 1 Juan 4:20, apóstol Juan okijto: “Tla yakaj kijtoua: ‘Nejua niktlajsojtla Dios’, pero kitlauelita ikniuj, yejua kijtoua on tlen xmelauak, pampa tla se xkitlajsojtla ikniu yejuan kita, no xkitlajsojtla Dios yejuan xkita”. Matotlajtoltikan: “¿Yemelak nikintlasojtla oksekimej? ¿Nikimiknelia oksekimej maski nechtlauelitaj? ¿Nikxeloua tiempo niman tlen nikpiya para nikinnojnotsas oksekimej itech Jehová? ¿Nikinnojnotsa oksekimej maski xnechkakisnekij noso nechtlaueltokaj? ¿Uelis más nitenojnotsas?” (Efes. 5:15, 16).

10. ¿Tlenon kichiuaya Jesús para maka maonia tlauejli?

¹⁰ Jesús xnimantsin kualaniya niman xtetlakuepiltiaya. Niman xsan yejon, yejua teuan noyolseuiaya niman kinyolchikauaya oksekimej noijki ijkon makichiuakan. Noijki okimijli ika tla kinekiyaj ika Jehová makinselili inuen, nonekiya noyolseuiskej imiuan imikniuan (Mat. 5:9, 23, 24). Niman ijkuak iapóstoles opeujkej nokamauisokij “de on akinon más ueyixtias”, okimijli maka sa ijkon makichiuakan (Luc. 9:46-48; 22:24-27).

11. ¿Tlenon uelis tikchiuaskej para maka maonia tlauejli?

¹¹ Tla xtiknekij maonia tlauejli, tejuamej noneki tokojtiliskej toyolseuiskej iuan akin yotokualanijkej niman tikinyolchikauaskej oksekimej tokniuan noijki ijkon makichiuakan (Filip. 4:2, 3; Sant. 3:17, 18).  Uelis totlajtoltiskej: “¿Tlenon niknektika nikchiuas para ninoyolseuis iuan nokniuj? ¿San niktlauelitstok akin onechyolkoko? ¿Nikchia ika tokniuj yejua akin kachtopa manechtlajtlanili maniktlapopolui? ¿Noso nejua kachtopa niktlajtlanilia manechtlapopolui? Ijkuak noneki, ¿nikimijlia oksekimej para noijki manoyolseuikan?”.

12. ¿Kenon okiteititi Jesús ika kinekiya tepaleuis?

¹² Jesús miyekej okinpaleui (Mat. 11:28-30). Yejua nochipa okiteititi ika tetlasojtlaya niman teasikamatiya. Ijkuak se siuatsintli akin ualeuaya Fenicia okitlajtlanili makipajti ichpoch, yejua xokitlauelnots. Maski kachtopa xokichiuj tlen kitlajtlaniliaya, sakin kema okipajti ichpoch pampa okitak ika yemelak tlaneltokaya (Mat. 15:22-28). San ika, kemantika Jesús noijki chikauak tenotsaya. San matikonteneuakan ijkuak teixpan okajuak Pedro pampa okijlika maka makitlakamati Jehová (Mar. 8:32, 33). Jesús xokajuak Pedro para kipinaujtis, yejua kinekiya kimasikamachiltis ika nonekiya nochipa kipaleuiskej makitlakamati Jehová. Kanaj Pedro opinauj, san ika, okipaleui tlen okijli Jesús.

13. ¿Tlenon noneki tikchiuaskej tla yemelak tiknekij titepaleuiskej?

¹³ Tla kemantika tiknekij yakaj tikpaleuiskej, noneki tikmelajkaijliskej tlen xkuajli kichiujtika. San ika, ijkuak titepaleuiskej, matikchiuakan ijkon ken Jesús niman matiktekitiltikan Biblia. Matikteititikan ika titetlasojtlaj niman kuajli matikmatstokan ika akin tikmelajkatlaliskej kichiuas tlen tikijliaj pampa kitlasojtla Jehová niman pampa techtlasojtla. Matotlajtoltikan: “Ijkuak yakaj akin niktlasojtla kichiujtika itlaj tlen xkuajli, ¿niknektika nikpaleuis?, ¿kenijki nikpaleuiya?, ¿nikititia ika niktlasojtla, noso chikauak niknotsa? niman, ¿tleka nikmelajkatlalia: pampa iuan yoninokualani, noso pampa yemelak nikneki nikpaleuis?”.

14. ¿Kenon Jesús okichiuj tlen kuajli?

¹⁴ Jesús nochipa kichiua tlen kuajli pampa kitlasojtla iTaj niman xkichiua san para oksekimej makiueyiteneuakan. Akin kichiua tlen kuajli, nochipa kita kenon kinpaleuis oksekimej. Ika yejon, ijkon ken Jesús, xsan noneki tikmatiskej tlen kuajli, noijki noneki tikchiuaskej. San ika, matotlajpiyakan pampa sekimej kichiuaj tlen kuajli san para makinueyikaitakan. Ijkon tikijtouaj pampa Jesús okinteneuj sekimej akin kinpaleuiayaj akin xtlaj kinopiliayaj san para makimitakan. Akin ijkon kichiuayaj xkiyolpaktiayaj Jehová (Mat. 6:1-4).

15. ¿Kenon uelis yemelak tikchiuaskej tlen kuajli?

¹⁵ San uelis yemelak tikchiuaskej tlen kuajli tla ika nochi toyojlo tikinpaleuiyaj oksekimej niman tla xtoueyimatij. Matotlajtoltikan: “Tla inikmati tlen kuajli, ¿ijkon inikchiujtok? ¿Niman tleka ijkon nikchiua?”.

16. ¿Tlenon noneki nochipa tikchiuaskej, niman tleka?

¹⁶ Maka matiknemilikan ika pampa yotoapolaktijkej xok noneki itlaj tikchiuaskej pampa itikpiyaj “yenkuik nemilistli”, ka, yejuin yeskia kentla se kualtsin tlakentli tlen nochipa tiktlajpiyaj. Ika yejon, nochipa noneki tikteititiskej ika toyekanaj ika iespíritu santo toTajtsin. ¿Tleka? Pampa ijkuak tokojtiliaj tikchiuaskej tlen Jehová  kuelita, yejua techpaleuiya ika iespíritu santo. Ijkon panoua pampa Jehová nochipa tekichiujtok niman iespíritu santo nochipa tekititok (Gén. 1:2). Kuakon, noneki tikchiuaskej tlen yotomachtijkej. Santiago okijkuilo: “Miktikaj itlaneltok sen tlakatl tla xkichiua tlajtlamach tlen kuajli” (Sant. 2:26). Noijki ijkon panoua tla xtikinteititiaj okseki kualneskayomej.

17. ¿Tlenon noneki tikchiuaskej tla kemantika titeyolkokouaj?

¹⁷ ¡Maka xmosiaujkaua! Hasta akin melak youejkaujkej ika onoapolaktijkej ouijtika kitaj kichiuaskej tlen kijtoua Gálatas 5:22, 23. San matikonnemilikan yejuin: ¿Tlenon tikchiuaskiaj tla se totlaken tlen melak tikuelitaj siyotomi? ¿Xmelak ika tikyektlaliskiaj niman xnimantsin tiktlajkaliskiaj? Niman tla yotikyektlalijkej, más tikmaluiyaj. Noijki ijkon, tla kemantika yakaj xkuajli otiknotskej, otikyolkokojkej noso xotikititijkej ika tiktlasojtlaj ijkon ken tejuamej tiknekiskiaj, maka matosiaujkauakan, nimantsin matiktlajtlanilikan matechtlapopolui niman ijkon uelis nochipa iuan touikaskej. Niman matokojtilikan maka oksejpa titeyolkokoskej.

18. ¿Tlenon uelis kuajli tikmatstoskej?

¹⁸ ¡Melak tiktlasojkamatij pampa Jesús techititia kenon uelis tikchiuaskej ken Jehová! Uelis tikteititiskej ika tikpiyaj “yenkuik nemilistli” tla tokojtiliaj titlanemiliskej ijkon ken Jesús tlanemilia. Ipan yejuin tlamachtijli otikitakej naui tlemach tlen yejua okiteititi. San ika, uelis tomachtiskej itech okseki kualneskayomej niman tikitaskej tla tikinteititijtokej. Uelis okseki tikitas ipan Tlen kinpaleuiya ika nomachtiaj iteixpantijkauan Jehová, kampa kijtoua “Innemilis akin kichiuaj ken Cristo” sakin “Kualneskayomej itech espíritu santo”. Kuajli matikmatstokan ika tla tokojtiliaj nochipa tikpiyaskej “yenkuik nemilistli”, Jehová techpaleuis.