Kanaj yejon uelis totlajtoltiskej tla san totoka tikpouaj 2 Samuel 21:7-9. San ika, Biblia kijtoua ika nemiyaj omemej tlakamej akin intoka katka Mefibóset. Niman uelis miyek techmachtis tla kuajli tikitaj nochi tlen opanok.

Tekiuaj Saúl okinpix chikomemej itelpokauan niman omemej iichpokauan. Akin yenkuiyotl itoka katka Jonatán. Sakin, iuan Rizpá okipix se ikoneuj akin okitokayotijkej Mefibóset. Niman Jonatán okipix se ikoneuj akin noijki okitokayoti Mefibóset. Kuakon, Saúl kipiaya se ikoneuj niman se ixuiuj akin intoka katka Mefibóset.

Tekiuaj Saúl opeuj kintlauelita gabaonitas akin chantiyaj kampa nemiyaj israelitas niman okiyejyeko kinmiktis. Niman nesi ika sekimej kema okinmikti. ¡Melak xkuajli tlen okichiuj tekiuaj Saúl! ¿Tleka? Pampa ipan itonaluan Josué, israelitas okimijlikaj gabaonitas ika xkeman kinchiuiliskiaj tlen xkuajli (Jos. 9:3-27).

Kuajli tikitaj ika Saúl xokitlakaitak tlen israelitas okimijlikaj gabaonitas, pampa yejua niman ifamilia okinmiktijkej gabaonitas (2 Sam. 21:1). Ijkuak David opeuj tekiuajti, gabaonitas akin xokinmiktijkej okijlitoj David nochi tlen opanok. Pampa David kinekiya ika Jehová oksejpa makinteochiua israelitas, okintlajtolti gabaonitas tlenon ueliskia kichiuas inpampa. Yejuamej xokitlajtlankej tomin, yejuamej okitlajtlankej chikomemej ikoneuan Saúl para kinmiktiskej (Núm. 35:30, 31). David okichiuj tlen okijlikej (2 Sam. 21:2-6).

Ijkuakon, Saúl niman Jonatán yomijkaj. San ika, itelpoch Jonatán, Mefibóset, ok yoltoya. Yejua xueliya nejnemiya pampa ijkuak pitentsin katka onokoko. Yejua xteuan otlaixnamikito ijkuak iabuelo okinmikti gabaonitas. Niman David yokijlika Jonatán ika nochipa kintlajpiyaskia ichanejkauan (1 Sam. 18:1; 20:42). Biblia kijtoua tlen okichiuj David: “Pero Mefi-boset, ikoneu Jonatán, ixuiu Saúl, xokinmakak, ipampa on tlajtolmakalistli ika itokatsin Dios yejuan okichijka iuan Jonatán” (2 Sam. 21:7).

David okichiuj tlen okijlikej gabaonitas. Okinmakak omemej ikoneuan Saúl, se de yejua Mefibóset niman makuiltin ixuiuan Saúl (2 Sam. 21:8, 9). Tlen okichiuj David okinpaleui israelitas maka sa matlajyouikan niman oksejpa makinteochiua toTajtsin.

Yejuin techititia ika tla yejon omemej ikoneuan niman makuiltin ixuiuan Saúl xteuan temiktiskiaj, Jehová xkitekauiliskia makinmiktikan. Pampa tlanauatijli kijtouaya: “On tatajtin xuelis kinmiktiskej ipampa on tlen xkuajli okichijkej inkoneuan, nion on tekoneuan xuelis kinmiktiskej ipampa on tlen xkuajli okichijkej intajuan. Yej cada se mikis ipampa itlajtlakol” (Deut. 24:16). Kuajli nesi ika yejuamej otlapaleuijkej ijkuak Saúl okinmikti gabaonitas. Ika yejon, okinmiktijkej.

¿Tlenon techmachtia nochi yejuin? Tla tikchiuaj itlaj tlen xkuajli, xnoneki totlajtlamiskej ika oksekimej otechnauatijkej noso tikintlajtlakoltiskej oksekimej. Tinochimej matikchiuakan yejuin: “Kuajli xkita kanon ticholojtias, niman ijkon xkaman tiuetsis” (Prov. 4:24-27; Efes. 5:15).