1, 2. a) ¿Tlenon panoua ijkuak yakaj noapolaktia? b) ¿Tlenon tikitaskej ipan yejuin tlamachtijli?

 ¿KEMANTIKA yotikimitaka sekimej akin noapolaktiskej ipan ueyi tlanechikojli? Yejuamej chikauak tenankiliaj ijkuak tokniuj akin kipanoltia tlamachtijli kinchiuilia ome tlajtoltilistin. Inchanejkauan niman inamigos melak yolpakij. Niman ijkuak akin noapolaktiaj uajkisaj ijtik atl, tikitaj kenon melak yolpakij, niman tijkakij kenon nochimej akin ompa nemij nomatlaxkalouaj. Nochi semanas melak miyekej nosentemakaj itech Jehová niman noapolaktiaj. Ijkon kiteititiaj ika aman yejuamej iiteixpantijkauan Jehová.

² Tla tiknemilijtika timoapolaktis, kijtosneki ika melak titlasojti ipan yejuin xkuajli tlaltikpaktli pampa tiktejtemojtika Jehová (Sal. 14:1, 2). Yejuin tlamachtijli onochijchiuj para mamitspaleui maski tla itiueyi noso xitiueyi. Nikan tikitaskej yeyi tlemach tlen mitspaleuis más xneki xtekichiuili Jehová. Niman akin yotoapolaktijkej noijki techpaleuis yejuin tlamachtijli para más matiknekikan nochipa tiktekichiuiliskej Jehová.

3. ¿Tleka akin tiktekichiuiliaj Jehová tiktlasojtlaj tlen melauak niman tlen melajki? (Salmo 119:128, 163).

³ Jehová okinnauati itekipanojkauan makitlasojtlakan tlen melauak (Zac. 8:19). Niman Jesús okimijli inomachtijkauan makichiuakan tlen melajki (Mat. 5:6). Yejon kijtosneki ika noneki tiknektoskej tikchiuaskej tlen kuajli niman tlen chipauak ixpan toTajtsin. ¿Tejua tiktlasojtla tlen melauak niman tlen melajki? Tikmatstokej ika kema. Ika yejon, xtikuelita nochi tlen xkuajli onka ipan yejuin tlaltikpaktli nion xtikuelita kenon sekimej tekajkayauaj (xpoua Salmo 119:128, 163).  Akin tekajkayauaj kichiuaj ken Satanás, akin kiyekana yejuin tlaltikpaktli (Juan 8:44; 12:31). Satanás kineki kitsojkuilotis itoka Jehová. Desde xochitlalpan Edén, Satanás yokuajtlajtolchijchiuilijtiaj toTajtsin, kijtoua ika yejua xkuajli techyekana, techkajkayaua niman xkineki matiyolpakikan (Gén. 3:1, 4, 5). Ika yejon, miyekej xkuajli tlanemiliaj itech Jehová. Niman Satanás uelis kichiuas ika tlaltikpakchanejkej akin xkinekij kitlasojtlaskej tlen melauak makichiuakan tlen xkuajli (Rom. 1:25-31).

4. ¿Kenon yokiteititi Jehová ika yejua “toTajtsin itech tlen melauak”? (Noijki xkita tlaixkopinajli).

⁴ Jehová “toTajtsin itech tlen melauak”, niman akin kitlasojtlaj kinmachtia tlen melauak (Sal. 31:5). Ijkon kinmixtlapoua para Satanás maka makinkajkayaua. Noijki, Jehová kinmachtia itekipanojkauan makijtokan tlen melauak niman makichiuakan tlen melajki, niman yejon kichiua kuajli manomachilikan niman mayolseujtokan (Prov. 13:5, 6). ¿Tejua ijkon otikitak ijkuak opeuj timomachtia Biblia? Yotiuel ika san Jehová uelis mitsyekanas niman ika noijki san yejua uelis kinyekanas tlaltikpakchanejkej (Sal. 77:13). Ika yejon, tejua tikneki tikintlakamatis itlanauatiluan Jehová (Mat. 6:33). Niman noijki tikneki tikteijlis tlen melauak, tikneki tikteititis ika nochi tlen Satanás yokijto itech toTajtsin xmelauak. ¿Niman kenon uelis tikchiuas nochi yejuin?

5. ¿Tlenon uelis tikchiuas niman ijkon tikteijlis tlen melauak niman tlen melajki?

⁵ Tejua uelis tikteititis ika xtikneltoka tlen Satanás kijtoua niman ika tikneki tikijtos tlen melauak. Noijki, uelis tikteititis ika tikneki mamitsyekana Jehová niman ika tikneki tiktlakamatis. Tla tikneki tikteititis yejuin, noneki tikchiuilis se teoyotl Jehová kampa tikijlis ika nochipa tiktekichiuilis. Sakin, noneki timoapolaktis niman ijkon teixpan tikteititis ika itech yotimosentemakak. Kuajli xmatsto ika tla tiktlasojtla tlen melauak niman tlen melajki, mitspaleuis xneki timoapolaktis.

6. Ken kijtoua Salmo 45:4, ¿tleka tiktlasojtlaj Jesucristo?

⁶ ¿Tleka tiktlasojtla Jesucristo? Biblia techijlia tleka uelis tiktlasojtlaskej. San matikteneuakan tlen kijtoua Salmo 45:4 (xpoua). Ompa kijtoua ika Jesús kimanauiya “on tlen melauak, on tlen melajki niman on tlen yolyemanki”. Kuakon, tikasikamatij ika tejua tiktlasojtla Jesús pampa noijki tiktlasojtla tlen melauak niman tlen melajki, ijkon ken yejua.  Xkonnemili kenon Jesús ika yolchikaualistli okiteijli tlen melauak niman tlen melajki (Juan 18:37). San ika ¿kenon Jesús okiteititi ika yolyemanki katka?

7. ¿Tlenon más tikuelita ijkuak tikita kenon Jesús melak yolyemanki?

⁷ Tlen kijtoua Jesús niman tlen kichiua, kiteititia ika yejua yolyemanki. Jesús nochipa kiueyiteneua iTaj, niman xkeman kineki ika oksekimej yejua makiueyiteneuakan (Mar. 10:17, 18; Juan 5:19). ¿Kenon timomachilia ijkuak tikita ika Jesús melak yolyemanki? ¿Xmelak ika noijki tikneki tiktlasojtlas iKoneuj toTajtsin niman tikchiuas ken yejua? Kema. ¿Niman tikmatstok tleka Jesús melak yolyemanki? Pampa Jehová yolyemanki, niman Jesús kitlasojtla iTaj niman kichiua ijkon ken yejua (Sal. 18:35; Heb. 1:3). ¿Xmelak ika yejuin kichiua más xnisiui Jesús?

8. ¿Tleka melak tiyolpakij ika Jesús toTekiuaj?

⁸ Melak tiyolpakij ika Jesús yejua toTekiuaj pampa san yejua kinamiki matechyekana. Jehová kuajli okimajmachti niman okitekitlali para matechyekana (Is. 50:4, 5). Noijki matitlanemilikan itech kenon Jesús sajnoye yotechtlasojtlak (Juan 13:1). Jesús toTekiuaj, ika yejon, kinamiki matiktlasojtlakan. Yejua okijto ika tlaltikpakchanejkej akin yemelak kitlasojtlaj, akin yejua kimita ken iamigos, kintlakamatij itlanauatiluan. Ijkuak ijkon kichiuaj, kiteititiaj ika kitlasojtlaj (Juan 14:15; 15:14, 15). ¡San xkonnemili, tejuamej uelis kuajli touikaskej iuan iKonetsin Jehová!

9. ¿Tleka tikijtouaj ika ijkuak toapolaktiaj tikchiuaj seki tlemach tlen Jesús noijki okichiuj ijkuak onoapolakti?

⁹ Jesús okinnauati inomachtijkauan manoapolaktikan (Mat. 28:19, 20). San ika, xsan okinnauati, yejua noijki onoapolakti. Ijkuak Jesús onoapolakti, xokichiuj seki tlemach tlen tejuamej kema noneki tikchiuaskej ijkuak toapolaktiskej (xkita recuadro “ Tlen Jesús okichiuj ijkuak onoapolakti niman tlen kichiuaj inomachtijkauan ijkuak noapolaktiaj”). San ika, kema onka seki tlemach tlen san noijki tikchiuaj. Ijkuak Jesús onoapolakti, okiteititi ika nochipa kichiuaskia tlen iTaj kineki (Heb. 10:7). Ijkuak toapolaktiaj, noijki tikteititiaj ika yotosentemakakej itech Jehová niman ika xok tikchiuaskej tlen tejuamej tiknekij, yej tikchiuaskej tlen Jehová kineki. Ijkon tikchiuaj ken toTemachtijkauj Jesús.

10. ¿Tleka tiktlasojtla Jesús, niman tlenon noneki tikchiuas pampa tiktlasojtla?

¹⁰ Tejua tikneltoka ika Jesús isenteKonetsin Jehová niman ika yejua Tekiuaj akin toTajtsin yokitlapejpeni matechyekana. Tikmatstok ika Jesús yolyemanki niman kichiua ijkon ken iTaj. Yotiuel ika okintlakualti akin xtlaj kipiayaj tlen kikuaskej, okinyolseui akin najmantoyaj niman hasta okinpajti akin kualouayaj (Mat. 14:14-21). Noijki yotikitak ika yejua kiyekantika tlanechikojli ipan yejuin tonaltin (Mat. 23:10). Niman tikmatstok ika kichiuas miyek tlen kualtsin ika tlayekapan pampa yejua Tekiuaj itech iTekiuajyo toTajtsin. ¿Kenon uelis tikititis Jesús ika tiktlasojtla? Tla tikchiua ijkon ken yejua (Juan 14:21). Ika yejon, kachtopa noneki timosentemakas itech Jehová niman timoapolaktis, ijkon ken yejua okichiuj.

11. ¿Tleka noneki toapolaktiskej?

¹¹ ¿Tleka noijki noneki toapolaktiskej? Para tikmatiskej, matikilnamikikan katlejua tlanauatijli okijto Jesús ika más noneki tiktlakamatiskej. Yejua okijto: “Xtlajsojtla moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Mar. 12:30). ¿Tejua tiktlasojtla Jehová ijkon ken Jesús okijto?

12. ¿Tleka tiktlasojtla Jehová? (Noijki xkita tlaixkopinajli).

¹² Tejuamej tiktlasojtlaj Jehová pampa itech  ualeua nochi nemilistli niman noijki itech ualeua “nochi kuajli tetlayokolijli yejuan tikseliaj” (Sal. 36:9; Sant. 1:17). Nochi tlen kuajli tikpiyaj ualeua itech Jehová, akin kuelita kitemakas tlen kuajli niman akin melak techtlasojtla.

13. ¿Tlenon melak kualtsin otechtlayokoli Jehová, niman tleka tikijtouaj ika melak kualtsin?

¹³ Jehová okitekauili ika isenteKonetsin manotemaka topampa, yejon se kualtsin tetlayokolijli. ¿Tleka ijkon tikijtouaj? Matiknemilikan kenon Jehová niman Jesús melak notlasojtlaj. Jesús okijto: “NoTajtsin nechtlajsojtla” niman “Nejua niktlajsojtla noTajtsin” (Juan 10:17; 14:31). Melak miyek xiuitl san sekan onenkej ne iluikak niman yejon okichiuj más kuajli manouikakan (Prov. 8:22, 23, 30). Aman xkonnemili kenon Jehová melak onoyolkoko ijkuak okitekauili makitlajyouiltikan niman makimiktikan iKoneuj. San ika, Jehová melak mitstlasojtla niman noijki kintlasojtla nochimej tlaltikpakchanejkej, ika yejon, okitemakak itlasojkaKonetsin niman ijkon tejua niman oksekimej uelis ninnemiskej nochipa (Juan 3:16; Gál. 2:20). ¿Xmelak ika yejuin kichiua más matiktlasojtlakan toTajtsin?

14. ¿Tlenon melak kuajli noneki tiktlapejpeniskej?

¹⁴ Tejua más yotikixmat Jehová, ika yejon, más yopeuj tiktlasojtla. Niman tikmatstokej ika tikneki más kuajli iuan timouikas aman  niman ika tlayekapan, niman kema uelis ijkon tikchiuas. Jehová kineki xyolpakti (Prov. 23:15, 16). Niman uelis tikyolpaktis ika tlen tikijtoua niman noijki ika tlen tikchiua. Tlen tiktlapejpenis tikchiuas ipan monemilis kiteititis tla yemelak tiktlasojtla Jehová (1 Juan 5:3). Melak kuajli tla tiktlapejpenia tikyolpaktis Jehová.

15. ¿Kenon uelis tikteititis ika tiktlasojtla Jehová?

¹⁵ ¿Kenon uelis tikteititis ika tiktlasojtla Jehová? Kachtopa, noneki tikchiuilis se teoyotl kampa tikijlis ika san yejua itech timosentemaka (Sal. 40:8). Sakin, noneki timoapolaktis niman ijkon teixpan tikteititis ika itech yotimosentemakak. Ken otikijtokej ijkuak ouajpeuj yejuin tlamachtijli, ijkuak timoapolaktis melak tiyolpakis niman noijki yolpakiskej tokniuan niman mochanejkauan akin ompa nemij. Niman yejon tonajli melak ueyi kijtosneki pampa ijkuakon nochi nopatla. Desde ijkuakon xok sa no tejua timoyolpaktis, aman tikyolpaktis Jehová (Rom. 14:8; 1 Ped. 4:1, 2). Tikmatstokej ika uelis ouijtika tikitas tiknemilis tla timoapolaktis, san ika, xmatsto ika tla timoapolaktia, melak mitspaleuis xyolpaki. Matikitakan tleka.

16. Ijkon ken kijtoua Salmo 41:12, ¿kenon kinteochiuas Jehová akin kitekichiuiliaj?

¹⁶ San Jehová yejua akin más kuelita kitemakas tlen kipiya. Jehová nochipa mitsmakas más, xijkon ken tlen tejua tikmaka (Mar. 10:29, 30). Maski tinemij ipan itlamiyan tonaltin, Jehová kichiuas ika moyojlo xnemi. Ijkuak timoapolaktis, xsan ompa nochi ontlamis pampa ijkuakon peuas tiktekichiuilis toTajtsin Jehová niman uelis nochipa ijkon tikchiuas. Más tiktlasojtlatias Jehová niman, ijkon ken yejua, nochipa tinemis (xpoua Salmo 41:12).

17. ¿Tlenon xkipiya Jehová tlen tejua kema uelis tikmakas?

¹⁷ Ijkuak timosentemakas niman timoapolaktis, tejua uelis tikmakas Jehová itlaj tlen melak patioj. Jehová yomitsmakak nochi tlen kualtsin tikpiya niman yejua okichiuj mapano nochi tlen kualtsin mopan yonochiuj. Niman tejua uelis tikmakas Jehová, akin okichijchiuj iluikak niman tlaltikpaktli, itlaj tlen yejua xkipiya.  Tla tejua itech timelajkanemi niman nochipa tiktekichiuilia, kentla tiktlayokolijtoskia itlaj tlen yejua xkipiya (Job 1:8; 41:11; Prov. 27:11). Melak kuajli tla ijkon tikchiua ipan monemilis. Xkilnamiki ika tla timoapolaktia, tikteititijtoskia ika tiktlasojtla Jehová.

18. ¿Tlenon uelis timotlajtoltis?

¹⁸ Kuakon, ¿timoapolaktis? Yejon san tejua uelis tikijtos. Melak mitspaleuis tla timotlajtoltia: “¿Iuelis ninoapolaktis?” (Hech. 8:36). Ipan yejuin tlamachtijli, otikitak tleka melak kuajli tla timoapolaktia. Kachtopa, pampa tiktlasojtla tlen melauak niman tlen melajki. Xmotlajtolti: “¿Sa niknektika nikitas ijkuak nochimej kijtoskej tlen melauak niman kichiuaskej tlen kuajli?”. Ika ome, pampa tiktlasojtla Jesucristo. Xmotlajtolti: “¿Nikneki ika iKoneuj toTajtsin manechyekana niman nikneki nikchiuas ken yejua?”. Niman ika yeyi niman tlen más ueyi kijtosneki, pampa tiktlasojtla Jehová. Xmotlajtolti: “¿Nikneki niktekichiuilis Jehová niman ijkon nikyolpaktis?”. Tla otitlanankili ika kema, ¿tleka xtimoapolaktia? ¿Tlenon mitsteltia? (Hech. 16:33).

19. ¿Tleka noneki timoapolaktis niman xtiometlamatis? Xkijto se neskayotl (Juan 4:34).

¹⁹ ¿Ok xtikmati tla timoapolaktis? Xtlanemili itech tlen Jesús okijto (xpoua Juan 4:34). Jesús okijto ika ijkuak kichiuaya tlen iTajtsin kineki, kentla tlakuaskia. ¿Tleka? Pampa ijkuak titlakuaj, kipaleuiya totlalnakayo. Jesús kimatstoya ika nochi tlen Jehová techtlajtlanilia, techpaleuiya. Jehová xtechtlajtlanilia matikchiuakan itlaj tlen uelis techijtlakos. Kuakon, ¿mitstlajtlanilia Jehová xmoapolakti? Kema (Hech. 2:38). Kuajli xmatsto ika tla timoapolaktia, melak mitspaleuis. Tla mitsmakaskiaj itlaj tlen melak uelik, ¿xmelak ika nimantsin tijkuaskia? Kuakon, xmoapolakti niman maka xometlamati.

20. ¿Tlenon tikitaskej ipan okse tlamachtijli?

²⁰ ¿Tleka sekimej xnoapolaktiaj? Pampa kanaj kimachiliaj ika ok kinpoloua para noapolaktiskej. Timosentemakas itech Jehová niman timoapolaktis melak ueyi kijtosneki. Ika yejon, kuajli xnemili niman xmokojtili para uelis timoapolaktis. San ika, tla tejua tikneki timoapolaktis, ¿tlenon mitspaleuis para uelis ijkon tikchiuas? Yejon tikitaskej ipan okse tlamachtijli.