¿Tleka se tlakatl akin más ken kitaya Noemí okijto ika tla nonamiktiaya iuan Rut kixpoloskia iherencia? (Rut 4:1, 6).

Tla yeuejkaui mikiya se tlakatl akin yononamiktijka niman xokinpix ikoneuan, ¿akinon kinkuiskia itlaluan? ¿Popoliuiskia itoka ifamilia? Nochi yejuin nonankiliaya ipan Tlanauatijli tlen okimakakej Moisés.

Tla se tlakatl mikiya niman kinpiaya itlaluan, se ikniuj noso se akin más ken kitaya ueliskia kinokauiliskia itlaluan yejon tlakatl. Noso tla se tlakatl xok kipiaya tlen ika nopanoltiskia niman kinnemakaya itlaluan, ikniuj noso yakaj akin más ken kitaya ueliskia yejua kinkouiliskia niman ijkon itlaluan xkinkuiskia okse familia (Lev. 25:23-28; Núm. 27:8-11).

Niman tla se tlakatl mikiya, ¿tlenon nochiuaya para xpopoliuis itoka ifamilia? Ikniuj mijkatsintli nonamiktiaya iuan siuakaualtsintli niman ijkon iuan kipiyas se ikoneuj para xpopoliuis itoka on tlakatl akin omik. Noijki, yejuin konetl ika nokauaya itlaluan. Yejuin tlen nochiuaya noijki kipaleuiaya siuakaualtsintli (Deut. 25:5-7; Mat. 22:23-28).

Matitlanemilikan itech Noemí. Yejua ononamikti iuan Elimélec niman okinpix omemej ikoneuan tlakamej. San ika, ijkuak iueuentsin niman ikoneuan omijkej, xok nemiya se tlakatl akin ueliskia kitlajpiyas (Rut 1:1-5). Ijkuak Noemí onokuep Judá, okijli isiuamon Rut makijliti Boaz, se akin ken kitaya Elimélec, makinkouili itlaluan (Rut 2:1, 19, 20; 3:1-4). San ika, Boaz kimatstoya ika nemiya okse tlakatl akin más ken kitaya Noemí, niman yejuin tlakatl yejua akin kachtopa kinamikiya kijtos tla kinkouaskia itlaluan Elimélec (Rut 3:9, 12, 13).

Yejon tlakatl akin más ken kitaya Elimélec kema kinektoya kinkouas yejon tlaltin (Rut 4:1-4). Yejua kimatstoya ika kitlaxtlauaskia miyek tomin, san ika, noijki kimatstoya ika Noemí yolamajtsintiajka niman ika xok ueliskia kipiyas se ikoneuj akin ueliskia ika nokauas itlaluan Elimélec. Kuakon, yejon tlaltin yejua ika nokauaskia. Nesiya ika xsan kinenpoloskia itomintsin.

San ika, ijkuak yejuin tlakatl okimat ika nonekiya nonamiktis iuan Rut, yejua xok okinek kinkouas tlaltin. Okijto: “Nejua xnikneki nikouas on tlajli pampa uelis niknejnelos iminherencia nokoneuan” (Rut 4:5, 6). ¿Tleka xok okinek kinkouas yejon tlaltin?

Tla yejon tlakatl noso yakaj okse akin ken kitaya Noemí nonamiktiaya iuan Rut niman kipiayaj se inkoneuj, yejon konetl kiseliskia itlaluan Elimélec. ¿Kenon yejuin tlakatl ueliskia kinejnelos “iminherencia” ikoneuan noso kixpolos iherencia? Biblia xtlaj kijtoua, san ika, matikitakan tlenon ueliskia panos.

• Kachtopa, kanaj okinemili ika san kinenpoloskia itomin pampa itlaluan Elimélec kinkuiskia ikoneuj tlen kipiyaskia iuan Rut niman xyejua kinkuiskia.

• Ika ome, nonekiya kinmakas Noemí niman Rut tlen ika nopanoltiskej.

• Ika yeyi, tla yejuin tlakatl kinpiaya más ikoneuan iuan Rut, yejuin kokonej nonekiya kinnoxelouiliskej tlaltin iuan ikoneuan yejuin tlakatl.

• Ika naui, tla yejuin tlakatl xkinpiyaskia oksekimej ikoneuan, ikoneuj tlen kipiyaskia iuan Rut kinseliskia itlaluan niman itlaluan Elimélec. Kuakon, ijkuak yejua mikiskia, itlaluan kiseliskia se konetl akin kixmatiskiaj ken ichanejkauj Elimélec niman xken yejua ikoneuj. Yejuin tlakatl xokinek kinejnelos iherencia niman iherencia Elimélec para kipaleuis Noemí. Okikauili Boaz yejua makinkoua itlaluan Elimélec. Niman Boaz ijkon okichiuj pampa xkinekiya mapopoliui itokayo mijkatsintli (Rut 4:10).

Tikitaj kuakon ika yejuin tlakatl xkinekiya okse itech manokaua itlaluan nion xkinekiya mapopoliui itoka. Kuajli nesi ika yejuin tlakatl san itech tlanemiliaya, san ika, xtlaj ika otepaleui tlen okichiuj pampa itokayo opopoliuj niman aman xok yakaj kilnamiki. Noijki xokiseli se tlateochiualistli tlen Boaz kema okiseli: Boaz onochiuj iuejkachanejkauj Mesías. Teajman ika yejuin tlakatl xkuajli tlen ipan onochiuj pampa san itech otlanemili niman xokinek tepaleuis (Mat. 1:5; Luc. 3:23, 32).