1, 2. ¿Tlenon kualtsin panoua ijkuak yakaj noapolaktia?

 ¡MELAK tiyolpakij ijkuak se noapolaktia pampa kalaki ipan ikalpan Jehová! Akin noapolaktiaj peuaj más kuajli nouikaj iuan Jehová, niman kitaj ika melauak nochiua tlen okijto salmista David: “Sanoyej kipiyaj paktli on yejuan tejua yotikintlapejpenij para ma chantitij mochan” (Sal. 65:4).

² Jehová xsan akinon kikauilia makalaki ipan ikalpan. Ijkon ken otikitakej ipan tlamachtijli tlen youajpanok, Jehová san nonisiuiya intech akin kinekij iuan nouikaskej (Sant. 4:8). Ijkuak se nosentemaka itech Jehová niman noapolaktia, peua melak kuajli iuan nouika. Niman Jehová ijkin kimijlia: “Nikuajtoyauas nemopan se tlateochiualistli hasta ijkuak xok itlaj tlasojtis” (Mal. 3:​10, TNM; Jer. 17:​7, 8).

3. ¿Tlenon noneki tikchiuaskej akin yotosentemakakej niman yotoapolaktijkej? (Eclesiastés 5:​4, 5).

³ Ijkuak toapolaktiaj, itipeuaj tiktekichiuiliaj Jehová. Tinochimej akin tikchiuaj ken Cristo tiknekij tikchiuaskej tlen otikijtokej ijkuak otosentemakakej, maski kemantika ueliskia tikimixnamikiskej tlatlatalistin noso tlaueltin tlen ueliskia kichiuas maka matimelajkanemikan (xpoua Eclesiastés 5:​4, 5). Noijki noneki tikchiuaskej ijkon ken Jesús niman tiktlakamatiskej  tlen otechnauati (Mat. 28:​19, 20; 1 Ped. 2:21). Ipan yejuin tlamachtijli, tikitaskej tlenon techpaleuis ijkon matikchiuakan.

NOCHIPA XCHIUA KEN JESÚS MASKI KEMANTIKA ITLAJ TIKIXNAMIKIS

4. ¿Tlenon okijtosnek Jesús ijkuak okimijli inomachtijkauan: “Ma nemi listo para tlajyouis mojmostla”? (Lucas 9:23).

⁴ Maka xnemili ika pampa yotimoapolakti xok keman tikinpiyas tlaueltin. Jesús ijkin okimijli inomachtijkauan: “Ma nemi listo para tlajyouis mojmostla” (xpoua Lucas 9:23). ¿Kijtojtoya Jesús ika inomachtijkauan nochipa tlajyouijtoskiaj? Ka, yejua okijtosnek ika maski kinseliskiaj tlateochiualistin, kemantika noijki tlajyouiskiaj (2 Tim. 3:12).

5. Ijkon ken okijto Jesús, ¿tlen tlateochiualistin tikinselis tla tiktekichiuilia Jehová?

⁵ Kanaj mochanejkauan omitstlauelitakej noso kanaj otijkauj seki tlemach pampa otiknek más tiktekichiuilis Jehová (Mat. 6:33). Tla ijkon otikchiuj, xmatsto ika Jehová kuajli kilnamiktok nochi tlen otikchiuj ipampa (Heb. 6:10). Tejua kanaj yotikitak ika melauak nochiua yejuin tlajtoltin tlen Jesús okimijto: “San akinon yejuan kikauas ichan, ikniuan, itataj, inanaj, isiuau, ikoneuan, noso itlaluan, san nopampa niman ipampa on kuajli tlajtojli yejuan kiteijlia ken Dios temakixtia, kiselis aman ipan in tlaltikpaktli se ciento más de on tlen kikaua. Kiselis se ciento más kaltin, ikniuan, inanajuan, ikoneuan niman itlaluan. Pero no kiselis tlauejli niman tlajtlamach ika kitlajyouiltiskej. Niman ipan on okse nemilistli yejuan uajlau, kiselis nemilistli yejuan para nochipa” (Mar. 10:​29, 30). Tikmatij ika miyek yotijkauj para más tiktekichiuilis Jehová, san ika, noijki tikmatstokej ika yejua más yomitsteochiuj (Sal. 37:4).

6. ¿Tleka ok nonekis timoxijxikos iuan “on xkuajli eleuilistli” sakin ika yotimoapolakti?

⁶ Sakin ika yotimoapolakti, ok nonekis timoxijxikos iuan “on xkuajli eleuilistli” pampa titlajtlakole (1 Juan 2:16). Kanaj kemantika timomachilis ken apóstol Pablo, akin okijto: “Ipan noyojlo nikuelita itlanauatil Dios. Pero ipan notlalnakayo nikmati ika onkaj in okse tlanauatijli yejuan no kineki nechnauatis. Yejua in tlanauatijli de tlajtlakojli kitlauelixnamiki on itlanauatil Dios yejuan noyojlo kuelita. Yejua in tlanauatijli de tlajtlakojli yejuan onkaj ipan notlalnakayo, nechpiya ken nitsakutikaj” (Rom. 7:​22, 23). Kanaj kemantika titlauelmiki pampa noneki timoxijxikos iuan on tlen xkuajli tikileuiya. Tla tikilnamiki tlen otikijli Jehová ijkuak otimosentemakak, mitspaleuis xxiko tlatlatalistin. ¿Tleka ijkon tikijtouaj?

7. ¿Tleka tla yotosentemakakej itech Jehová xok ouijtika tikitaskej timelajkanemiskej?

⁷ Ijkuak yakaj nosentemaka itech Jehová, kikaua nochi on tlen más kitlasojtla. Yejuin kijtosneki ika xok kichiua tlen kileuiya itlalnakayo noso okseki tlen toTajtsin xkuelita (Mat. 16:24). Kuakon, ijkuak itlaj tikixnamikiskej, xok yolik tiknemilijtoskej tlenon tikchiuaskej pampa tejuamej itikmatstokej ika noneki timelajkanemiskej itech Jehová. Ijkuak otoapolaktijkej, otikijtojkej ika xtikchiuaskej okseki tlemach tlen Jehová xkuelita. Ijkon ken Job, maski matikixnamikikan tlen ouijtika, matikijtokan: “Nejua xitlaj nikchiua tlen xkuajli” (Job 27:5).

8. ¿Tleka techpaleuis matikxikokan tlatlatalistin tla titlanemiliaj itech tlen otikijtojkej ijkuak otosentemakakej?

⁸ Tla titlanemiliaj itech tlen otikijlijkej Jehová ijkuak otosentemakakej, techpaleuis matikxikokan tlatlatalistin. San matikteneuakan yejuin: ¿tejua tikixuetskiliskia yakaj akin yononamikti? ¡Ka, yejon xtikchiuaskia! Tejua  tikmatstika ika yejon xkuajli niman yotikijli Jehová ika xkeman tikchiuas tlen xkuelita. Tla xtijkauilia ika se xkuajli eleuilistli mapeua manoskalti ipan moyojlo, sakin xnonekis iuan timoxijxikos. Xok oksejpa tias ipan “iminojui on xkuajkualtin tlakamej” (Prov. 4:​14, 15).

9. ¿Tleka tla titlanemiliaj itech tlen otikijlijkej Jehová ijkuak otosentemakakej techpaleuis matiktlakamatikan?

⁹ Matikteneuakan okse tlen ueliskia panos. Tejuamej yotikijlijkej Jehová ika nochipa kachtopa yejua tiktlakamatiskej. Kuakon, ¿tlenon tikchiuaskiaj tla techtekiuiltiaj se tekitl tlen xtechkauilis matiakan tlanechikoltin? Xnoneki tiknemiliskej, tejuamej itikmatstokej ika xnoneki tikseliskej. Melak xkuajli yeskia tla tikseliaj yejon tekitl niman sakin peuaj tiknemiliaj kenon kachtopa tiktlakamatiskej Jehová. Matikmapeuakan nochi tlen xkuelita Jehová pampa tiknekij tikyolpaktiskej, ijkon ken Jesús okichiuj (Mat. 4:10; Juan 8:29).

10. ¿Kenon techpaleuis Jehová matikchiuakan ijkon ken Jesús sakin ika yotoapolaktijkej?

¹⁰ Tejuamej tikteititiskej ika nochipa tiknektokej tikchiuaskej ijkon ken Jesús tla titlaxikouaj ijkuak itlaj tikixnamikiskej noso ijkuak tikinpiyaskej tlatlatalistin. Niman kuajli tikmatstokej ika Jehová techpaleuis matitlaxikokan. Biblia kijtoua: “Dios yolmelajki, niman mechpaleuis para on tlayouilistli niman tetlatlatalistli maka nemopan uajlas yejuan sanoyej temojtij yejuan nemejuamej xuelis nenkixikoskej. Yej ijkuak nenkipiyaskej tlayouilistli niman tetlatlatalistli, Dios mechmakas sen ojtli kampaka uelis nenkitlalkauiskej, niman ijki uelis nenkixikoskej” (1 Cor. 10:13).

TLENON MITSPALEUIS NOCHIPA XCHIUA KEN JESÚS

11. ¿Kenon uelis tikchiuas ijkon ken Jesús? (Noijki xkita tlaixkopinajli).

¹¹ Jesús okitekichiuili Jehová ika nochi iyojlo. Noijki, nochipa kinotsaya, niman yejon  okichiuj más itech manonisiui (Luc. 6:12). Tejua noijki uelis tikchiuas ijkon ken Jesús sakin ika yotimoapolakti. Xchiua tlen mamitspaleui más xnisiui Jehová. Biblia kijtoua: “Ma tikejeuakan nochi on tlen kuajli ye tikpiyaj” (Filip. 3:16). Kemantika tijkakis kenon sekimej tokniuan más chikauak kitekichiuiliaj Jehová. Sekimej yoyajkej ipan Tlamachtijli tlen kiseliaj Akin Tenojnotsaj itech iTekiuajyo toTajtsin noso sekimej yotlapaleuitoj kampa xmás nemij tokniuan. ¿Tejua noijki uelis ijkon tikchiuas? Tla kema, ¡ijkon xchiua! Itekipanojkauan toTajtsin nochipa kitejtemouiliaj kenon más chikauak tenojnotsaskej (Hech. 16:9). San ika, tla amantsin tejua xtiueli ijkon tikchiua, maka xnemili ika xtlaj tikchiujtika. Xkilnamiki ika más noneki matitlaxikokan, niman tejua ijkon tikchiujtika (Mat. 10:22). Noijki, maka xkilkaua ika Jehová melak yolpaki ika tikchiua tlen tiueli para tiktekichiuilis, niman yejuin mitspaleuis xchiua ijkon ken Jesús sakin ika yotimoapolakti (Sal. 26:1).

12, 13. ¿Tlenon uelis tikchiuas tla tikita ika xok más tiyolpaki? (1 Corintios 9:​16, 17; noijki xkita recuadro “ Nochipa xmotlalojto”).

¹² Ijkuak tikchiua teoyotl, ¿xok tikijtoua tlen kisa ipan moyojlo? ¿Xok mitsyolpaktia titenojnotsas noso tikamapouas moBiblia ijkon ken yeuejkaui? Tla yotimoapolakti niman ijkin mopan nochiujtok, maka xnemili ika Jehová xok mitsmakatika iespíritu santo. Kemantika uelis ijkon topan nochiuas pampa titlajtlakolejkej. San ika, uelis titlanemilis itech tlen okichiuj apóstol Pablo. Yejua melak nokojtiliaya kichiuas ijkon ken Jesús maski kemantika kitekiyomakaya kichiuas tlen kuajli (xpoua 1 Corintios 9:​16, 17). Yejua okijto: “Pero xnikchiua pampa nejua oniktlapejpenij. Yej san nikchiua pampa Dios onechnauatij”.  Tlen Pablo okijto, techititia ika yejua nochipa onokojtili tenojnotsas maski kemantika xkuajli nomachiliaya.

¹³ Maka xkauili mamitsyekana tlen tikmachilia. Xmokojtili nochipa xchiua tlen kuajli maski kemantika xmás tiknekis. Tla nochipa ijkon tikchiua, melak kuajli timomachilis. Niman tla nochipa tikchiua tlen mitspaleuis machikaui motlaneltok, uelis tikchiuas ijkon ken Jesús sakin ika yotimoapolakti. Noijki, tlen tikchiuas melak kinyolchikauas tokniuan ipan motlanechikol (1 Tes. 5:11).

“SANO NEMEJUAMEJ KUAJLI XMIXTLALOKAN”

14. ¿Tlenon noneki tikitas, niman tleka? (2 Corintios 13:5).

¹⁴ Sakin ika yotimoapolakti, melak kuajli tla kemantika tikita tlenon tikchiujtika (xpoua 2 Corintios 13:5). Uelis tikitas tla mojmostla tikchiua teoyotl, tla timomachtia Biblia, tla tiauj tlanechikoltin noso tla tontenojnotsa. Xkita kenon uelis más kuajli tikchiuas nochi yejuin. Noijki xmotlajtolti: “¿Ueli niktetomilia tlen kijtoua Biblia? ¿Tlenon uelis nikchiuas niman ijkon más niyolpakis ijkuak nitenojnotsas? Ijkuak nikchiua teoyotl, ¿nikijlia Jehová ken nikuelitaskia manechpaleui niman nikteititia ika itech nitlaneltoka? ¿Ninokojtilia niman ijkon xninopolouilis nion se tlanechikojli? ¿Tlenon uelis nikchiuas para más kuajli nitlakaktos ipan tlanechikojli niman más kualtsin nitlanankilis?”.

15, 16. ¿Tlenon mitsmachtia tlen ipan onochiuj Robert?

¹⁵ ¿Tleka melak kuajli tla kemantika tikitaj tlen uelis kichiuas matitlajtlakokan? Matikitakan tlen ipan onochiuj tokniuj Robert. Yejua kijtoua: “Ijkuak nikpiaya 20 xiuitl, se ichpochtli akin iuan nitekitiya onechijli iuan maniuiya ichan niman ijkon ueliskia san toselti ompa tinemiskiaj. Xmás niknekiya nikijlis tleka xniknekiya nias niman san tlemach ika ninotlatlamiyaya, san ika, sakin onikijli tleka xiuan niaskia”. Melak kuajli tlen okichiuj Robert pampa xiuan oyaj yejon ichpochtli. San ika, sakin okinemili ika ueliskia kichiuas ijkon ken José. Yejua kijtoua: “José nimantsin okijli isiuauj Potifar ika xiuan notekaskia, san ika, nejua xnimantsin ijkon onikchiuj (Gén. 39:​7-9). Xoniknemili tla ouijtika nikitaskia nikijlis ika ka. Tlen opanok, onechpaleui manikita ika más nonekiya ninouikas iuan Jehová”.

¹⁶ Matikonnemilikan ika otikxiko se tlatlatalistli. San ika ¿tleka xtikchiua ijkon ken Robert? Xmotlajtolti: “¿Melak oniuejkauj para nikijtos ika xnikchiuas tlen xkuajli?”. Tla otikitak ika itlaj xmás kuajli tikchiujtok, maka  xmajmana, yej xnemili ika melak kuajli ika otikitak tlen uelis tikyektlalis. Xkijli Jehová tlen tikneki tikpatlas niman xchiua tlen mamitspaleui nimantsin xtlakamati (Sal. 139:​23, 24).

17. ¿Tlenon panoua tla timelajkanemij ijkon ken Robert?

¹⁷ Más matikitakan tlen ipan opanok Robert. Yejua kijtoua: “Ijkuak onikijli yejon ichpochtli ika xiuan niaskia, yejua onechijli ‘Otitlaxiko’. Oniktlajtolti tleka ijkon okijto. Yejua onechijli ika se iamigo akin iteixpantijkauj Jehová katka okijli ika nochimej telpokamej akin iteixpantijkauan Jehová kuelitaj kichiuaskej tlen xkuajli, niman ijkuak yakaj kimijlia makichiuakan itlaj tlen xkuajli, yejuamej nion xokpa kinemiliaj kichiuaskej. Kuakon, yejon ichpochtli okijli iamigo ika nechtlatlataskia. ¡Melak niyolpaki ika xoniktsojkuiloti itoka Jehová!”.

18. ¿Tlenon tiknektok tikchiuas sakin ika yotimoapolakti? (Noijki xkita recuadro “ Ome tlamachtiltin tlen mitspaleuiskej”).

¹⁸ Ijkuak timosentemaka itech Jehová niman timoapolaktia, tikteititia ika tikneki tikchipauas itoka maski san tlenon mapano. Niman kuajli xmatsto ika Jehová nochi kitstika tlen mopan nochiua niman kita kenon titlaxikoua ijkuak mitstlatlataj. Yejua mitsteochiuas pampa kita kenon timokojtilia timelajkanemis. Kuajli xmatsto ika yejua mitsmakas iespíritu santo niman ijkon uelis tikchiuas tlen kuajli (Luc. 11:​11-13). Jehová mitspaleuis xchiua ijkon ken Jesús sakin ika yotimoapolakti.