1, 2. ¿Tlenon noneki tikchiuas tla tikneki timoapolaktis?

 IPAN makuijli xiuitl tlen youajpanokej, ipantsin se millón tlaltikpakchanejkej onoapolaktijkej ken iteixpantijkauan Jehová. Miyekej okixmatkej Jehová ijkuak kokonej katkaj, ijkon ken Timoteo (2 Tim. 3:​14, 15). Oksekimej okixmatkej Jehová ijkuak iuejueyimej katkaj noso sekimej okixmatkej ijkuak youeuentsintiakaj. Ijkon ipan opanok se siuatsintli akin nomachtiaya Biblia imiuan iteixpantijkauan Jehová, yejua onoapolakti ijkuak kipiaya 97 xiuitl.

² ¿Mitsmachtijtokej Biblia? ¿Noso motajuan iteixpantijkauan Jehová niman mitsmachtijtokej? Tla kema, kanaj tiknemilijtok timoapolaktis. ¡Niman yejon melak kuajli! San ika ¿tlenon noneki tikchiuas tla tikneki timoapolaktis? Noneki timosentemakas itech Jehová. Ipan yejuin tlamachtijli tikitaskej tlenon kijtosneki timosentemakas. Noijki tikitaskej tleka xnoneki mitsmojtis timosentemakas niman timoapolaktis.

¿TLENON KIJTOSNEKI TIMOSENTEMAKAS?

3. ¿Akinomej nosentemakayaj itech Jehová yeuejkaui?

³ Ijkuak Biblia kiteneua ika yakaj onosentemakak, kijtosneki ika yejua xeliujtoya niman ijkon ueliskia kichiuas se tekitl  para toTajtsin. Kalpan Israel yonosentemakaka itech Jehová. San ika, sekimej israelitas nosentemakayaj para más chikauak kitekichiuiliskej. Matikonteneuakan Aarón. Jehová okitlapejpeni Aarón para yejua maueyi teopixki. Ipan ikuatlaken, kipiaya se placa tlachijchiujtli ika oro tlen kiteititiaya ika yejua yonosentemakaka pampa kichiuaya se tekitl para Jehová (Lev. 8:9). Nazareos noijki nosentemakayaj itech Jehová. Tlajtojli nazareo ualeua itech tlajtojli ika hebreo nazír, tlen kijtosneki “akin xeliujtika” noso “akin yonosentemakak”. Ipan Tlanauatijli tlen okimakakej Moisés, kijtouaya ika nonekiya kintlakamatiskej seki tlanauatiltin (Núm. 6:​2-8).

4. a) ¿Tlenon kijtosneki timosentemakas ipan yejuin tonaltin? b) ¿Tlenon kichiua yakaj akin “kelkaua nochi on tlen más kitlajsojtla”? (Noijki xkita tlaixkopinajli).

⁴ ¿Tlenon kijtosneki timosentemakas ipan yejuin tonaltin? Kijtosneki tiktlapejpenis timochiuas inomachtijkauj Jesús niman nochipa tikchiuas tlen Jehová kineki. Jesús okijto: “Tla yakaj kineki nouan yas, ma kelkaua nochi on tlen más kitlajsojtla” (Mat. 16:24). Ika tlajtojli griego “ma kelkaua nochi on tlen más kitlasojtla” uelis noijki notlajtolkuepas ken “xok kichiuas tlen itlalnakayo kileuiya”. Ijkuak timosentemakas itech Jehová, xok nonekis tikchiuas tlen yejua xkuelita (2 Cor. 5:​14, 15). Yejuin kijtosneki ika xnoneki tikchiuas “tlen xkuajli kileuiya [mo]tlalnakayo”, ken auilnemilistli (Gál. 5:​19-21; 1 Cor. 6:18). ¿Ouijtika tikchiuas yejuin? Ka, xouijtika tikitas tla tiktlasojtla Jehová niman tla tikmatstok ika melak mitspaleuiya ijkuak tiktlakamati (Sal. 119:97; Is. 48:​17, 18). Se tokniuj akin itoka Nicholas kijtoua: “Ueliskia tikitaskej ika itlanauatiluan Jehová yeskiaj ken tepostin tlen onka cárcel, kanaj tiknemiliskej ika xtechkauiliaj matikchiuakan tlen tiknekij, noso ueliskia tikitaskej ika itlanauatiluan  Jehová techtlajpiyaj ijkon ken techtlajpiyaj tepostin tlen ika kintsakuaj leones ipan zoológico para maka techkuaskej”.

5. a) ¿Kenijki yakaj nosentemaka itech Jehová? b) ¿Tleka xsan noijki timosentemakas niman timoapolaktis? (Noijki xkimita tlaixkopinaltin).

⁵ ¿Kenijki yakaj nosentemaka itech Jehová? Ijkuak san iselti kichiuilia teoyotl Jehová niman kijlia ika nochipa san yejua kitekichiuilis niman ika nochipa kichiuas tlen yejua kineki. Kema, yejua kijlijtok Jehová ika nochipa kitlasojtlas ika nochi iyojlo, ialma, itlamachilis niman ichikaualis (Mar. 12:30). Ijkuak timosentemakas, xakaj mitsitas pampa san moselti tinemis ijkuak tikijlis Jehová ika tikneki itech timosentemakas. San ika, ijkuak timoapolaktis, miyekej mitsitaskej para ijkon makimatikan ika tejua yotimosentemakak. Niman xnoneki tikauilmatis tlen tikijlis Jehová ijkuak itech timosentemakas. Noijki xkilnamiki ika nonekis tikchiuas tlen tikijlis Jehová, niman yejua noijki kichia ijkon xchiua (Ecl. 5:​4, 5).

¿TLENON MITSPALEUIS XMOSENTEMAKA ITECH JEHOVÁ?

6. ¿Tlenon mitspaleuis xmosentemaka itech Jehová?

⁶ Tla tiktlasojtla Jehová, tiknektos itech timosentemakas. Niman yejuin tlasojtlalistli tlen tikmachilia xsan panos, pampa ijkuak más tikixmatstias Jehová niman ijkuak más tikpiyas “tlamatkilistli [noso tlamachilistli] niman kajsikamatilistli”, yejuin tlasojtlalistli más ueyixtias (Col. 1:9). Ijkuak opeuj timomachtia Biblia, otikasikamat ika 1) Jehová melauak nemi, 2) Jehová okichijchiuj Biblia ika iespíritu santo niman 3) yejua kitekitiltia ikalpan para kichiuas tlen yejua kineki.

7. ¿Tlenon ikichiujtok akin inosentemakas itech Jehová?

 ⁷ Yakaj uelis nosentemakas itech Jehová tla ikimatstok tlen temachtia Biblia, tla ikintlakamatstok iTlanauatiluan toTajtsin niman tla yopeuj tenojnotsa (Mat. 28:​19, 20). Noijki noneki melak kitlasojtlas Jehová niman kinektos san yejua kitekichiuilis ika nochi iyojlo. ¿Tejua ijkon itikchiujtika? Tla melak tiktlasojtla Jehová, tejua xtimosentemakas niman xtimoapolaktis san pampa tikneki tikyolpaktis akin mitsmachtijtika Biblia. Niman, tla titelpochtli, xtimosentemakas niman xtimoapolaktis san pampa moamigos ijkon ikichiujtokej noso pampa tikneki tikinyolpaktis motajuan.

8. ¿Tleka tla tiktlasojkamati nochi tlen Jehová yokichiuj mopampa mitspaleuis xneki itech xmosentemaka? (Salmo 116:​12-14).

⁸ Tla titlanemilia itech nochi tlen Jehová yokichiuj mopampa, melak tiktlasojkamatis, niman yejon kichiuas xneki itech xmosentemaka (xpoua Salmo 116:​12-14). Biblia kijtoua ika “nochi on tetlayokolijli ualeua itech toTajtsin” (Sant. 1:17). Jehová otechtlayokoli itlaj tlen melak patioj: iKoneuj Jesús. Jesús omik mopampa, ika yejon, aman tejua ueli timouika iuan toTajtsin niman uelis nochipa tinemis (1 Juan 4:​9, 10, 19). Tla tikneki tiktlasojkamachilis Jehová nochi tlen yokichiuj mopampa niman pampa melak mitstlasojtla, uelis itech timosentemakas (Deut. 16:17; 2 Cor. 5:15). Yejon tlen kijtoua libro ¡Nochipa uelis tiyolpakis!, ipan tlamachtijli 46, punto 4, kampa noijki uajnesi se video tlen uejkaui yeyi minuto niman itoka Tlen uelis tiktlayokoliskej toTajtsin.

¿IUELIS TIMOSENTEMAKAS NIMAN TIMOAPOLAKTIS?

9. ¿Tleka san tejuamej noneki tikitaskej kemanon uelis tosentemakaskej itech Jehová?

⁹ Kanaj tikmachilia ika mitspoloua para timosentemakas niman timoapolaktis. Kanaj noneki más timopatlas para tiktlakamatis Jehová. Noso kanaj tikneki más tiempo para más tikchikauas motlaneltok (Col. 2:​6, 7). Xkilnamiki ika xnochimej akin nomachtijtokej Biblia xpeuaj san noijki kitlasojtlaj Jehová. Niman ika telpokamej xnoneki san noijki xiuitl kipiyaskej para uelis noapolaktiskej. Kuakon, xchikaujto motlaneltok niman xkita kemanon uelis timosentemakas niman timoapolaktis, niman maka xsan xkitsto tlen oksekimej kichiuaj (Gál. 6:​4, 5).

10. ¿Tlenon uelis tikchiuas tla tikita ika ok mitspoloua para timosentemakas niman timoapolaktis? (Noijki xkita recuadro “ Tla motajuan iteixpantijkauan Jehová”).

¹⁰ Tla tikita ika ok mitspoloua para timosentemakas itech Jehová, maka xmosiaujkaua. Xtlajtlanili Jehová mamitspaleui xchiua tlen noneki niman ijkon uelis itech timosentemakas (Filip. 2:13; 3:16). Kuajli xmatsto ika Jehová kinnankilis moteoyouan (1 Juan 5:14).

TLEKA SEKIMEJ XNOSENTEMAKAJ NIMAN NOAPOLAKTIAJ

11. ¿Kenijki techpaleuis Jehová matimelajkanemikan?

¹¹ Nemij sekimej akin iuelis nosentemakaskej niman noapolaktiskej, san ika, xkichiuaj. ¿Tleka? Kanaj kinmojtia tla okichiujkej se ueyi tlajtlakojli niman makinkixtikan itech tlanechikojli. Tla tejua ijkon timomachilia, xkilnamiki ika Biblia kijtoua ika Jehová mechpaleuis “para nenueliskej nenkitlakaitaskej niman nenkipaktiskej” niman ijkon “nenueliskej nenkichiuaskej nochi tlajtlamach tlen kuajli” (Col. 1:10). Kuajli xmatsto ika Jehová mitspaleuis xchiua tlen kuajli ijkon ken miyekej yokinpaleui (1 Cor. 10:13). Jehová kinpaleuiya itekipanojkauan mamelajkanemikan niman maka makisakan itech ikalpan.

12. ¿Tlenon techpaleuis maka matikchiuakan se ueyi tlajtlakojli?

¹² Tinochimej tiknekij tikchiuaskej tlen  xkuajli pampa titlajtlakolejkej (Sant. 1:14). San ika, san tejua uelis tikijtos tla tikchiuas noso xtikchiuas tlen xkuajli tikileuiya. Miyekej kijtouaj ika xuelis san toselti toteltiskej, san ika, yejon xmelauak. Tejuamej uelis tikmajmachtiskej totlamachilis maka makinemili tlen xkuajli. ¿Niman tlenon techpaleuis? Tla mojmostla tiknotsaj Jehová, tla nochipa san toselti tomachtiaj, tla tiauej tlanechikoltin niman tla titenojnotsaj. Tla nochipa tikchiuaj yejuin, uelis tikchiuaskej tlen otikijlijkej Jehová ijkuak itech otosentemakakej. Maka xkilkaua ika xsan moselti tinemi, Jehová mouan nemi (Gál. 5:16).

13. ¿Tlenon tiuelij itech José?

¹³ Tla tiknekij timelajkanemiskej itech Jehová, noneki tiknemilijtiaskej tlenon tikchiuaskej ijkuak techtlatlataskej. Biblia kinteneua sekimej itekipanojkauan Jehová akin ijkon okichiujkej, niman yejuamej noijki tlajtlakolejkej katkaj ijkon ken tejuamej. Matikteneuakan José. Isiuauj Potifar melak kichiualtiaya para iuan manoteka, san ika, José yokinemilijka kenijki kinankiliskia. Biblia kijtoua ika José xkinekiya iuan notekas niman kijliaya: “¿Tline nikchiuas mouan on tlen sanoyej xkuajli mouan, niman ijkon nitlajtlakos itech Dios?” (Gén. 39:​8-10). Kuajli nesi ika José ikimatstoya tlenon kichiuas achto ika isiuauj Potifar kitlatlataskia. Niman ijkuak okitlatlatak, ouel okijto ika xkichiuas tlen xkuajli.

14. ¿Tlenon techpaleuis maka matikchiuakan tlen Jehová kitlauelita?

¹⁴ ¿Kenijki uelis timelajkanemiskej ijkon ken José? Tla desde aman tiknemiliaj tlenon tikchiuaskej ijkuak techtlatlataskej. Noneki tiueliskej nimantsin tikijtoskej ika xtikchiuaskej tlen Jehová kitlauelita (Sal. 97:10; 119:165). Tla ijkin tikchiuaj, techpaleuis maka matitlajtlakokan; niman ijkuak itlaj tikixnamikiskej, itikmatiskej tlenon tikchiuaskej.

15. ¿Kenijki uelis tikteititis ika melauak tiktejtemoua Jehová? (Hebreos 11:6).

¹⁵ Kanaj itikmatstok ika yotiknexti tlen melauak niman tikneki nochipa tiktekichiuilis Jehová ika nochi moyojlo. San ika ¿onka itlaj tlen mitsteltia xmosentemaka niman xmoapolakti? Tla kema, xchiua ijkon ken tekiuaj David, yejua ijkin okitlajtlanili Jehová: “Ay Dios, xnechixtlalo niman xkita noyojlo; xnechtlatlata niman xkita notlamachilis.  Xkita tla niau ipan on ojtli yejuan xkuajli, niman xnechyekana ipan on kuajli ojtli yejuan nechmakas nemilistli para nochipa” (Sal. 139:​23, 24). Tejua uelis tikteititis ika melauak tiktejtemoua Jehová tla timokojtilia tikchiuas tlen mamitspaleui xmosentemaka niman xmoapolakti. Niman Biblia kijtoua ika Jehová kinteochiua akin ijkon kichiuaj (xpoua Hebreos 11:6).

NOCHIPA MATINEMIKAN NISIUJ ITECH JEHOVÁ

16, 17. ¿Kenijki Jehová okinuajuikak ipan ikalpan ikoneuan iteixpantijkauan Jehová? (Juan 6:44).

¹⁶ Jesús okijto ika Jehová yejua akin otechuajuikak ipan ikalpan pampa otechitili itlaj tlen kualtsin (xpoua Juan 6:44). ¡Yejon melak techyolchikaua! Jehová kijtoua ika tejuamej tiitlatkiuan noso tiiyaxkauan (Deut. 7:6). ¡Kema, tejua tiitlatki Jehová!

¹⁷ Telpochtli, tla motajuan mitsmachtijtokej itech Biblia, kanaj tiknemilia ika yejuamej mitsuikaj ipan ikalpan Jehová niman ika xJehová omitstlapejpeni para xnemi ipan ikalpan. San ika, xkita tlen kijtoua Biblia: “Xnisiuikan Dios niman yejua mechnisiuis” (Sant. 4:8; 1 Crón. 28:9). Yejuin kijtosneki ika tla tejua timonisiuiya itech Jehová, yejua noijki mitsnisiuis. Nochimej akin nemij ipan ikalpan Jehová yejua akin yokinuajuikak, hasta tejua, maski motajuan iteixpantijkauan Jehová. Kuakon, xnisiui Jehová niman yejua kichiuas ijkon ken yokijto ipan Santiago 4:8 (noijki xkita 2 Tesalonicenses 2: 13).

18. ¿Tlenon tikitaskej ipan okse tlamachtijli? (Salmo 40:8).

¹⁸ Ijkuak Jesús onoapolakti, okijli iTaj ika kichiuaskia nochi tlen yejua kitlajtlaniliskia (xpoua Salmo 40:8; Heb. 10:7). Ijkuak tejua timosentemakas itech Jehová niman timoapolaktis, tikchiujtos ijkon ken Jesús. Ipan okse tlamachtijli, tikitaskej kenijki uelis timelajkanemis itech Jehová tla yotimoapolakti.