1. ¿Tleka sekimej tokniuan ouijtika kimachiliaj nomachtiskej?

AMAN melak ouijtika tikpiyas tlen ika timopanoltis. Miyekej tokniuan tekitij nochi tonajli niman ijkon kinmakaskej inchanejkauan tlen kikuaskej niman tlen ika notlakentiskej. Oksekimej melak uejkauij niman ijkon ajsiskej kampa tekitij niman nokuepaskej inchan. Niman seki tekitl tlen kichiuaj tokniuan melak tesiauiti. Ijkuak tlami tonajli, yejuin tokniuan melak siaujtokej niman ouijtika kimachiliaj nomachtiskej.

2. ¿Tejua kemanon timomachtia?

² Maka keman matikilkauakan ika tinochimej kipiya ika tomachtiskej iTlajtol toTajtsin niman amatlajkuiloltin, san ika, kipiya ika tomachtiskej ken kinamiki. San uelis kuajli touikaskej iuan Jehová niman tikpiyaskej nemilistli tlen xkeman tlamis tla kuajli tomachtiaj (1 Tim. 4:15, 16). Sekimej tokniuan mojmostla saniman nokuiteuaj niman ijkon nomachtiskej, pampa ijkuakon inpan inchan xakaj najnauati niman xtlaj kakisti, niman más kuajli tlanemiliaj pampa yonoseuijkej. Oksekimej nomachtiaj ika tlayoua, kitaj kanon ika inyojlo uelis nomachtiskej niman tlanemiliskej.

3, 4. ¿Tlenon yonopatlak itech amatlajkuiloltin tlen techinmaka ikalpan toTajtsin, niman tleka?

³ Tikasikamatij ika noneki tomachtiskej. San ika ¿tlenon kipiya ika tomachtiskej? Kanaj tikitaj ika miyek onka tlen tikpouaskej, niman tikmachiliaj ouijtika tikpouaskej nochi tlen techmaka ikalpan toTajtsin. Sekimej kema uelij kichiuaj, san ika, miyekej tokniuan kimachiliaj ouijtika. Grupo akin Tlayekana ipan nochi tlanechikoltin kimatstika yejuin, ika yejon, okijto ika xok kinkixtis miyek amatlajkuiloltin niman xok miyek kitlejkoltis ipan Internet.

 ⁴ Matikitakan yejuin, xok nochijchiua Anuario de los testigos de Jehová, pampa uelis tiknextiskej tlen kualtsin inpan yonochiuj tokniuan ipan jw.org^®, niman ipan tlen kisa nochi metstin ipan JW Broadcasting^®. Noijki, aman ipan se xiuitl san kisaj yeyi revistas Amatl Tekakistilijketl tlen tiktemakaj, niman noijki san yeyi revistas ¡Xtlachiakan! Yejuin tlen onopatlak xkijtosneki ika aman uelis tikchiuaskej okseki tlemach, yejuin kijtosneki ika noneki kuajli matikitakan “on tlen más kuajli” (Filip. 1:10). Aman matikitakan tlenon kachtopa kipiya ika tomachtiskej niman tlenon techpaleuis kuajli matomachtikan Biblia.

5, 6. ¿Tlenon kipiya ika kuajli tomachtiskej?

⁵ ¿Tlenon kachtopa kipiya ika tomachtiskej? Noneki mojmostla tomachtiskej iTlajtol toTajtsin. Aman, xok más ueyak tlen tikpouaj nochi semanas itech Biblia ipan tlanechikojli. Yejon kichiua matikpiyakan más tiempo niman ijkon titlanemiliskej niman okseki tomachtiskej. Xsan noneki tikpouaskej tlaxeloltin tlen ompa nestokej, noneki tijkauiliskej ika iTlajtol toTajtsin maajsi ipan toyojlo niman matechpaleui más matiknisiuikan Jehová (Sal. 19:14).

⁶ ¿Tlenon okseki noneki kuajli tomachtiskej? Kipiya ika tomachtiskej tlamachtijli tlen noita ipan Amatl Tekakistilijketl, ipan Tlamachtijli itech Biblia iuan tlanechikojli niman noijki tlen noita ipan tlanechikojli tlen nochiua itlajkotian semana. Noijki kipiya ika tikpouaskej nochi revistas Amatl Tekakistilijketl niman ¡Xtlachiakan!

7. ¿Kipiya ika tajmanaskej tla xnochi tiuelij tikitaj noso tikpouaj tlen onka ipan página tlen tikpiyaj ipan Internet niman ipan JW Broadcasting?

⁷ San ika, yakaj ueliskia kijtos: “Xnochi niueli nikita noso nikpoua tlen onka ipan página tlen tikpiyaj ipan Internet niman ipan JW Broadcasting. Melak miyek...”. Matitlanemilikan itech yejuin: ipan se restaurante kinemakaj miyek tlakuajli tlen melak uelik. Akin ompa yauej xueliskej nochi kikuaskej, san seki kitlapejpeniskej. Noijki ijkon, maka matajmanakan tla xtiuelij nochi tikpouaj noso tikitaj tlen notlejkoltia ipan Internet. San matikchiuakan tlen tiueliskej. ¿Tlenon kijtosneki tomachtiskej, niman tlenon techpaleuis kuajli matomachtikan?

8. a) ¿Kenon uelis tomachtiskej Amatl Tekakistilijketl? b) ¿Kenon mitspaleuis tla ijkon tikchiua?

⁸ Tomachtiskej xsan kijtosneki tikpouaskej tlen ompa kijtoua niman tiktlapalyotiskej tlanankilistli. Kijtosneki kuajli tikpouaskej niman ijkon itlaj matiuelikan. Matikitakan kenon uelis tikchiuaskej yejuin ijkuak tomachtiskej Amatl Tekakistilijketl. Kachtopa, matikpouakan kampa techijlia tlen tikitaskej ipan yejon tlamachtijli, yejuin uajnesi ijkuak peua tlamachtijli. Sakin, matikitakan kenon itoka tlamachtijli, noijki subtítulos niman tlajtoltilistin tlen nesij ijkuak tlami tlamachtijli. Aman yolik matikpoujtiakan tlamachtijli niman melak kuajli matikitakan tlen ompa kijtoua. Matikitakan tlenon kijtoua oración temática, kijtosneki tlajtoltin tlen ika peuaj párrafos. Yejuin tlajtoltin techijliaj itech tlenon tlajtos párrafo. Ijkuak tikpoujtiaskej tlamachtijli, matiknemilikan kenon notlajtolnamikij párrafos iuan subtítulos, niman matikitakan kenon nochi yejon techpaleuiya matikasikamatikan tlamachtijli. Matikijkuilokan tlajtoltin tlen xtikimasikamatij niman okseki tlen sakin tiknekiskej kuajli tomachtiskej.

9. a) ¿Tleka noneki kuajli matikimitakan textos tlen onka ipan Biblia ijkuak tomachtiskej revista Amatl Tekakistilijketl, niman kenon uelis tikchiuaskej? b) Ken kijtoua Salmo 1:2, ¿tlenon noijki kipiya ika tikchiuaskej ijkuak tikinpouaskej textos?

 ⁹ Ijkuak tomachtiaj revista Amatl Tekakistilijketl kentla tomachtijtoskiaj Biblia. Ika yejon, noneki matikimitakan textos tlen ompa uajnestiuej, niman melak kuajli tla tikimitaj textos tlen nopouaskej ipan tlanechikojli. Kuajli matikitakan kenon tlajtoltin tlen uajlauej ipan textos kuajli kipaleuiya tlen noijtoua ipan párrafo. Noijki, matitlanemilikan itech textos niman matiknemilikan kenon uelis tikchiuaskej ipan tonemilis (xpoua Salmo 1:2).

10. Ken kijtoua Hebreos 5:14, ¿tleka ijkuak tatajtin nomachtiskej imiuan inchanejkauan noneki makimititikan inkoneuan kenon nomachtiskej niman kitejtemoskej tlen xkasikamatij?

¹⁰ Tikasikamatij ika tatajtin kinekij ika inkoneuan makuelitakan ijkuak nomachtiaj ken familia. San ika, maski noneki ika tatajtin nochipa makimatikan tlenon nomachtiskej imiuan inchanejkauan, xnoneki ika nochi semanas makinemilikan kichiuaskej itlaj tlen ouijtika niman melak ueyi. Yemelak ika ueliskej kitaskej tlen kisa nochi metstin ipan JW Broadcasting noso kichiuaskej okse itlaj, ken kichijchiuaskej akajli kampa Noé omakis. San ika, noijki noneki ika tatajtin makinmachtikan inkoneuan kenon nomachtiskej. Kokonej kipiya ika ueliskej kenon nomachtiskej amatlajkuiloltin tlen noitas ipan tlanechikojli noso kenon kitejtemoskej itlaj tlen okixnamijkej ipan escuela (xpoua Hebreos 5:14). Tla kokonej nomachtiaj inchan, kinpaleuis kuajli matlakaktokan ipan tlanechikoltin niman ipan uejueyimej tlanechikoltin, kampa xnochipa noteititia se video. Xkita kech xiuitl kipiyaj mokoneuan niman kenon yejuamej, yejon mitspaleuis xkita kech uelis tiuejkauis imiuan timomachtis.

11. ¿Tleka noneki matikimititikan akin tikinmachtiaj itech Biblia kenon kuajli nomachtiskej Biblia?

¹¹ Akin tikinmachtiaj itech Biblia noijki noneki makimatikan kenon nomachtiskej. Tiyolpakij ika yejuamej peuaj kitlapalyotiaj tlanankilistin ijkuak nomachtiaj amatlajkuiloltin tlen ika tikinmachtiaj noso tlen tijkuij ipan totlanechikoluan. San ika, noneki matikimititikan kenon kuajli nomachtiskej niman kenon kitejtemoskej tlen xkasikamatij ijkuak san yejuamej nomachtiskej. Ijkon ijkuak kixnamikiskej se tlauejli, xnimantsin notlaloskej intech tokniuan, yejuamej kimatiskej kenon kitejtemoskej ipan toamatlajkuiloluan.

12. ¿Tleka tomachtiaj?

¹² Tla xtikuelitaj tomachtiskej, kanaj tiknemiliaj ika xuelis tiyolpakiskej ijkuak tomachtiskej. San ika, kema tiueliskej. Matipeuakan san ika achijtsin niman ika yolik más matiuejkaujtiakan. Matikasikamatikan tleka tomachtiaj. Tomachtiaj pampa tiknekij melak kuajli touikaskej iuan toTajtsin. San ika, noijki tomachtiaj pampa yejon techpaleuiya matiknankilikan itlaj tlen yakaj otechtlajtolti niman noijki pampa uelis tiknextiskej tlen kichiuas matikyektlalikan itlaj tlen tikixnamiktokej.

13. a) ¿Tlenon uelis kichiuas se telpochtli niman ijkon kiteijlis tleka kineltoka itlaj? b) ¿Kenon uelis tikchiuaskej tlen kijtoua Colosenses 4:6?

¹³ Matikonnemilikan tlen ipan nochiua se telpochtli. Nochimej akin imiuan nomachtia nokuikatiaj himno nacional, san ika, yejua ka. Yejua kuelitaskia kiteijlis tlen Biblia kijtoua itech yejon, san ika, kimachilia ika ouijtika niman ika xuelis kichiuas. Kuakon, noneki kuajli nomachtis. Kimatstika tleka kipiya ika nomachtis. Pampa yejon kipaleuis melak kuajli makasikamati ika xkipiya ika nouikas ken “tlaltikpaktlakamej” niman yejua más kuajli kiteijlis tlen kineltoka itech Biblia (Juan 17:16; 1 Ped. 3:15). Kachtopa, kipiya ika notlajtoltis tleka akin imiuan nomachtia kijtouaj ika se noneki nokuikatis himno nacional. Sakin, noneki kitas tlenon kijtouaj toamatlajkuiloluan. Yejuin telpochtli kitas ika xouijtika kiteijlis tlen kineltoka. Miyekej kinemiliaj ika noneki nokuikatiskej himno nacional san pampa yakaj akin yejuamej kitlakaitaj ijkon yokimijli makichiuakan. San ika, ijkuak telpochtli kuajli nomachtia, kimati kenon kinankilis akin yemelak kineki kasikamatis seki tlemach (xpoua Colosenses 4:6).

14-16. a) ¿Tlenon uelis tikchiuaskej niman ijkon kuajli tikixmatiskej se amoxtli itech Biblia tlen xkuajli tikixmatij? b) ¿Kenon textos tlen uajnestiuej ipan Biblia techpaleuiyaj más kuajli matikasikamatikan amoxtli Amós? (Noijki xkita recuadro “ Kuajli matikimixmatikan akin Biblia kinteneua”).

¹⁴ Matiknemilikan ika ipan se tlanechikojli tomachtiskej se amoxtli pitentsin tlen kipiya teotlajtoltin, kanaj tomachtiskej se tlen xkuajli tikixmatij. Kuakon, kachtopa noneki tiktlaliskej ipan toyojlo ika tiknekij kuajli tikixmatiskej tlen kijtoua yejon amoxtli. ¿Kenon uelis tikchiuaskej yejon?

¹⁵ Kachtopa matotlajtoltikan tlenon tikmatij itech akin okijkuilo yejon amoxtli: akinon katka, kanon chantiya niman ipan tlenon tekitiya. Nochi yejuin techpaleuis matikasikamatikan tleka okikuik seki tlajtoltin noso tleka okintekitilti seki neskayomej. Ijkuak tomachtiskej yejon amoxtli matiktejtemokan tlajtoltin tlen matechpaleui matikasikamatikan kenon katka akin okijkuilo amoxtli.

¹⁶ Sakin, matiktejtemokan kemanon onoijkuilo yejon amoxtli. Melak techpaleuis “Tabla de los libros de la Biblia” tlen onka ipan Traducción del Nuevo Mundo de las Santas Escrituras. Noijki uelis tikitaskej sección 3 itech amatlajkuilojli Tlen tepaleuiya timomachtis iTlajtol toTajtsin, ompa uelis tiknextiskej se tabla kampa uajnesij intoka teotlajtokej niman tekiuajkej. Tla amoxtli tlen tikpouaj kipiya teotlajtoltin, melak techpaleuis tla tiktejtemouaj tlenon panotoya ijkuak onoijkuilo yejon amoxtli. Uelis tiktejtemoskej tleka teotlajtoketl otechikajkanots, tlenon kinekiya kipatlas niman akinomej noijki ijkuakon onenkej. Tla tiknekij melak kuajli tikasikamatiskej, kanaj nonekis tomachtiskej okseki amoxtin itech Biblia. Se neskayotl, tla tiknekij  tikasikamatiskej tlenon panouaya ijkuak chantiya teotlajtoketl Amós, uelis tikpouaskej tlaxeloltin itech 2 Reyes niman 2 Crónicas tlen uajnesij ipan Amós 1:1. Noijki techpaleuis tla tikpouaj amoxtli Oseas, pampa nesi ika yejua onen ipan itonaluan Amós. Tla tomachtiaj nochi yejon, kuajli tikasikamatiskej tlenon panouaya ijkuak Amós nemiya (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Xkijto kenon techpaleuiya más matikuelitakan tomachtiskej Biblia ijkuak tikitaj tlen xmás nesi. Xkinteneua neskayomej tlen nesij ipan párrafos noso xkijto okse neskayotl.

¹⁷ Matiktlalikan ipan toyojlo ika ijkuak tikpouaskej Biblia, noneki tokojtiliskej tiueliskej miyek tlemach. Se neskayotl, matiknemilikan ika tikpoujtokej Zacarías 12 itech Traducción del Nuevo Mundo, kampa noijtoua ika Mesías mikiskia (Zac. 12:10, TNM). Ijkuak tajsij ipan versículo 12, tikitaj ika kijtoua ika “ichanejkauan Natán” melak chokaskej pampa Mesías mikiskia. Maka san matikpanauikan yejon, matotlajtoltikan: “¿Tleka ichanejkauan Natán melak chokaskiaj ipampa Mesías? ¿Kenon uelis nikasikamatis yejuin?”. Kuakon, peuaj tomachtiaj. Se referencia marginal techijlia matikitakan 2 Samuel 5:14, kampa kijtoua ika Natán katka se ikoneuj David. Okse referencia techijlia matikitakan Lucas 3:31 kampa techijlia ika ipampa María, Jesús ualeuaya itech Natán (xkita Amatl Tekakistilijketl de agosto de 2017, página 32, párrafo 4). ¡Melak temojkatlachialti yejuin! Tikmatstoyaj ika yonoijtoka ika Jesús ualeuaskia itech David (Mat. 22:42). San ika, David kipiaya ipantsin 20 ikoneuan. Ijkuak tikitaj nochi yejuin, xtechmojkatlachialtia ika Zacarías makijto ika ichanejkauan Natán chokaskiaj pampa Mesías mikiskia.

 ¹⁸ Matitlanemilikan itech okse neskayotl. Matikitakan Lucas 1, ompa kijtoua ika iluikaktekitketl Gabriel okitlajpaloto María niman okijli yejuin itech konetl tlen kipiyaskia: “Yejua ueyixtias niman itoka yes teKoneu itech on más ueyixtikaj Dios. Niman Dios toTEKO kitlalis para Rey yes, niman kipiyas on tekiuajyotl yejuan iuejkatataj David okipix. Yejua tlamandaros para nochipa ipan on país de Israel, niman itekiuajyo xkaman tlamis” (Luc. 1:32, 33). Kanaj titlanemiliaj itech tlen kachtopa okijto iluikaktekitketl, kampa kijtoua ika Jesús kitokayotiskiaj “teKoneu itech on más ueyixtikaj Dios”. San ika, Gabriel noijki okijto ika Jesús yeskia tekiuaj. Kuakon uelis totlajtoltiskej tlenon okinemili María ijkuak okikak yejuin tlajtoltin. ¿Okinemili tla Jesús kitekipatlaskia Herodes noso okse tekiuaj ipan Israel? ¿Okinemili ika aman yejua ueyixtoskia niman ika inchanejkauan chantiskiaj ipan ueyi kajli kampa chanti tekiuaj? Biblia xkijtoua tla María otetlajtolti yejon. Noijki xtlaj kijtoua tla yejua okitlajtlan ueyixtos ipan Tekiuajyotl, ijkon ken okichiujkej omemej inomachtijkauan Jesús (Mat. 20:20-23). Yejuin techasikamachiltia ika María melak yolyemanki katka.

19, 20. Ken kijtoua Santiago 1:22-25 niman 4:8, ¿tlenon noneki nochipa matikilnamikikan?

¹⁹ Nochipa matikilnamikikan ika tejuamej tomachtiaj Biblia niman amatlajkuiloltin pampa tiknekij melak nisiuj tinemiskej itech Jehová. Niman noijki pampa tiknekij tikitaskej kenon tikyekantokej tonemilis niman tlenon noneki tikchiuaskej niman ijkon tikyolpaktiskej toTajtsin (xpoua Santiago 1:22-25; 4:8). Ika yejon, nochipa ijkuak tomachtiskej, melak noneki matiktlajtlanilikan Jehová iespíritu santo. Noijki, noneki matiktlajtlanilikan matechpaleui kuajli matomachtikan niman matoitakan ijkon ken yejua techita.

²⁰ Tinochimej matikchiuakan ijkon ken se itekipanojkauj toTajtsin akin noteneua ipan Salmo 1:2, 3, kampa kijtoua: “Kuelita itlanauatil toTEKO niman ipan tlanemilia ikan tonajli niman ikan yeuajli. [...] Ijkon tej, nochi tlen kichiua [...] kuajli kisa”.