TLAMACHTIJLI 19
Tlasojtlalistli niman melajkayotl ijkuak nochiua tlen xkuajli
“Pampa tejua noTajtsin xmitsyolpaktia tlen xkuajli; akin xyolkuajli xuelis nemis motech” (SAL. 5:4, TNM).
TLAKUIKAJLI 142 Maka matikmakauakan totlamachialis
TLEN TIKITASKEJ *
1-3. a) Ken kijtoua Salmo 5:4-6, ¿kenon kita Jehová ijkuak nochiua tlen xkuajli? b) ¿Tleka uelis tikijtoskej ika akin kinnajnauiltiaj kokonej xkitlakamatstokej “itlanauatil Cristo”?
TOTAJTSIN JEHOVÁ kitlauelita ijkuak nochiua tlen xkuajli (xpoua Salmo 5:4-6). San matikonnemilikan kenon melak kitlauelita ijkuak kinnajnauiltiaj kokonej. Yejon itlaj tlen melak xkuajli niman tsokuiltik. Tejuamej akin tiktekichiuiliaj Jehová noijki tiktlauelitaj ijkuak yakaj kinnajnauiltia kokonej niman xtikxikouaj ika ijkon manochiua ipan tlanechikojli (Rom. 12:9; Heb. 12:15, 16).
2 Akin kinajnauiltia se konetl xkitlakamatstika “itlanauatil Cristo” (Gál. 6:2). ¿Tleka ijkon tikijtouaj? Pampa itlanauatil Cristo noyekana ika tlasojtlalistli niman kiteititia melajkayotl. Kema, yejon tlen okiteititi Jesús ika tlen okijto niman ika tlen okichiuj. Tejuamej akin yemelak tikchiuaj ken Cristo tiktlakamatij yejuin tlanauatijli, ika yejon, tikinpaleuiyaj kokonej kuajli manomachilikan niman makimatikan ika melak tikintlasojtlaj. San ika, akin kinnajnauiltiaj kokonej kiteititiaj ika melak xkuajli inyojlo niman san intech tlanemiliaj. Yejuamej kichiuaj ika kokonej maka manemikan ika inyojlo niman makinemilikan ika xakaj kintlasojtla.
3 Teajman ika nochiuiyan nemij akin kinnajnauiltiaj kokonej, niman akin kitekichiuiliaj Jehová noijki yokimijtlako yejuin. ¿Tleka ijkon panoua? Pampa ipan yejuin tonaltin melak miyekej “on yejuan xkuajkualtin tlakamej niman tlakajkayajkej”, niman sekimej kanaj kinekiskej kalakiskej ipan tlanechikojli (2 Tim. 3:13). Niman xsan yejon, sekimej ipan tlanechikojli yopeuj ijtlakaui intlamachilis niman yotenajnauiltijkej. Matikitakan tleka se ueyi tlajtlakojli ijkuak yakaj kinajnauiltia se konetl. Sakin, tikitaskej tlenon kichiuaj tlayekankej ijkuak yakaj kichiua itlaj tlen melak xkuajli, ken ijkuak kinnajnauiltiaj kokonej. Noijki tikitaskej kenon tatajtin uelis kintlajpiyaskej inkoneuan. *
SE UEYI TLAJTLAKOJLI
4, 5. ¿Tleka tikijtouaj ika akin tenajnauiltiaj kinchiuiliaj kokonej tlen melak xkuajli?
4 Akin kinnajnauiltiaj, uejkaui kijyouiyaj tlen xkuajli. Niman xsan kokonej tlajyouiyaj, noijki melak tlajyouiyaj akin kintlasojtlaj: inchanejkauan niman tokniuan akin nemij ipan tlanechikojli. Akin tenajnauiltia kichiua se ueyi tlajtlakojli.
5 Melak xkuajli tlen kichiuiliaj akin kinajnauiltiaj. Akin tetlajyouiltia kichiua itlaj tlen melak xkuajli. Ken tikitaskej ipan okse tlamachtijli, akin tenajnauiltiaj yejon tlen kinchiuiliaj kokonej: kichiuaj ika melak matlajyouikan. Yejuamej kimatstokej ika kokonej intech tlaneltokaj, kuakon, kinchiuiliaj tlen xkuajli. Niman yejon kichiua ika kokonej maka sa ika inyojlo manemikan. Tejuamej noneki tikintlajpiyaskej kokonej niman ijkon maka yakaj makinnajnauilti. Niman noijki noneki tikinyolseuiskej niman tikinpaleuiskej akin yokinnajnauiltijkej (1 Tes. 5:14).
6, 7. ¿Tleka tikijtouaj ika akin tenajnauiltiaj kichiuiliaj tlanechikojli tlen melak xkuajli niman ika xkintlakamatstokej tekiuajkej?
6 Tlanechikojli noijki kichiuiliaj tlen xkuajli. Tla yakaj akin nemi ipan tlanechikojli tenajnauiltia, kipinaujtia tlanechikojli (Mat. 5:16; 1 Ped. 2:12). Yejuin kimijtlakoua miyekej tokniuan. Niman xkinamiki ika ijkon inpan manochiua yejuin tokniuan akin nokojtilijtokej melajkanemiskej itech Jehová (Jud. 3). Xtikxikouaj ika touan manemi akin kichiua tlen xkuajli niman xnoyolkuepa, niman kipinaujtitika tlanechikojli.
7 Xkintlakamatstokej tekiuajkej. Akin kichiuaj ken Cristo noneki kintlakamatiskej tekiuajkej (Rom. 13:1). Ijkuak tikchiuaj ken kijtouaj tlanauatiltin, tikintlakamatstokej tekiuajkej. Tla yakaj ipan tlanechikojli xkichiujtika tlen kijtouaj tlanauatiltin, ken ijkuak kinajnauiltia se konetl, kuakon, xkintlakamatstika tekiuajkej (uelis tikitas Hechos 25:8). Maski xintekiyo tlayekankej kitaskej ika manochiua ken kijtouaj tlanauatiltin, yejuamej xkipaleuiyaj akin yotlajtlako. Kimatstokej ika aman kipiya ika kixnamikis tlen tekiuajkej kijliskej (Rom. 13:4). Akin tlajtlakoua kipiya ika kixnamikis tlen okinotejtemouili (Gál. 6:7).
8. ¿Kenon kita Jehová ijkuak yakaj kitechiuilia tlen xkuajli?
8 Niman tlen más xkuajli, tlajtlakouaj ixpan Jehová (Sal. 51:4). Ijkuak yakaj kitechiuilia tlen xkuajli, noijki tlajtlakoua ixpan toTajtsin. Matikitakan tlen kijtouaya Tlanauatijli tlen okimakakej Israel niman ijkon tikasikamatiskej yejuin. Tlanauatijli kijtouaya ika akin tetlachtekiliaya noso tekajkayauaya xmelajkanemiya itech Jehová (Lev. 6:2-4). Akin tenajnauiltiaj kentla kintlachtekiliskiaj kokonej, yejuamej kichiuaj ika kokonej nochipa manomojtitokan. Kuakon, tla yakaj ijkon kichiua ipan tlanechikojli, xmelajkanemi itech toTajtsin niman kitsokuiloua itoka. Ika yejon, tikmelajkaijtouaj ika akin tenajnauiltia kichiujtika se ueyi tlajtlakojli ixpan toTajtsin.
9. ¿Tleka tikijtouaj ika ikalpan toTajtsin melak kineki techpaleuis, niman tleka ijkon kichiua?
9 Ikalpan Jehová miyek yokikixti amatlajkuiloltin kampa techijlia tlen kijtoua Biblia itech yejuin tlajtlakojli, tikteneujtokej ijkuak yakaj kinajnauiltia se konetl. Ipan revistas Amatl Tekakistilijketl niman ¡Xtlachiakan! yonotlali tlen uelis kichiuaskej akin yokinnajnauiltijkej niman ijkon maka melak manoyolkokokan, noijki yonotlali kenon oksekimej uelis kinpaleuiskej niman kinyolchikauaskej, niman noijki kenon tatajtin uelis kintlajpiyaskej inkoneuan. Tlayekankej noijki yokimijlikej tlenon kijtoua Biblia ika kipiya ika kichiuaskej ijkuak yakaj kichiua yejon tlajtlakojli. Ikalpan toTajtsin miyekpa kita tlen ika noyekanaj tlayekankej ijkuak yakaj kinajnauiltia se konetl. ¿Tleka ijkon kichiua? Pampa kineki manotlakamati itlanauatil Cristo.
TLEN NOCHIUA IJKUAK YAKAJ KINAJNAUILTIAJ
10-12. a) ¿Tlenon nochipa kilnamikij tlayekankej ijkuak yakaj kichiua se ueyi tlajtlakojli, niman tlenon kinmajmana? b) Ken kijtoua Santiago 5:14, 15, ¿tlenon kiyejyekouaj kichiuaskej tlayekankej?
10 Ijkuak yakaj kichiua se ueyi tlajtlakojli, tlayekankej nochipa kilnamikij ika tla kinekij kitlakamatiskej itlanauatil Cristo, noneki kimititiskej tokniuan ika kintlasojtlaj niman kichiuaskej tlen kinamiki niman tlen melajki ixpan toTajtsin. Ika yejon, ijkuak kimijliaj ika yakaj yokichiuj se ueyi tlajtlakojli, yejuamej miyek tlen kinmajmana. Yejuamej melak kinekij machipaujto itoka toTajtsin (Lev. 22:31, 32; Mat. 6:9). Noijki melak kinekij ika tokniuan chikauak makipiyakan intlaneltok niman kinekij kinpaleuiskej akin yokinchiuilijkej tlen xkuajli.
11 Niman tla yakaj akin nemi ipan tlanechikojli kichiua tlajtlakojli, tlayekankej kiyejyekouaj kipaleuiskej oksejpa manouika iuan Jehová, tla kitaj ika ok uelis kipaleuiskej (xpoua Santiago 5:14, 15). Akin kichiua tlen kileuiya itlalnakayo niman kichiua se ueyi tlajtlakojli, kijtosneki ika xchikauak itlaneltok, kentla kualoskia. Yejuin noijki kijtosneki ika xok kuajli nouika iuan Jehová. * Tlayekankej kentla tepajtikej yeskiaj. Yejuamej kiyejyekouaj kipajtiskej tokniuj kokoxki, tikteneujtokej akin okichiuj tlajtlakojli. Tlen yejuamej kijliskej itech Biblia uelis kipaleuis oksejpa manouika iuan toTajtsin. San ika, yejuin san uelis panos tla akin otlajtlako yemelak noyolkuepa (Hech. 3:19; 2 Cor. 2:5-10).
12 Kuajli tikitaj ika tlayekankej kipiyaj se ueyi tekitl. Yejuamej yemelak kinekij kinpaleuiskej borreguitos tlen toTajtsin yokiminmaktili (1 Ped. 5:1-3). Tlayekankej kinekij ika tokniuan kuajli manomachilikan ipan tlanechikojli. Ika yejon, nimantsin kitaj tlenon kichiuaskej ijkuak kimijliaj ika yakaj yokichiuj se ueyi tlajtlakojli, ken ijkuak yakaj kinajnauiltia se konetl. ¿Tlenon kichiuaj? Matikitakan tlenon kijtouaj tlajtoltilistin tlen ika peuaj párrafos 13, 15 niman 17.
13, 14. ¿Kitlakamatij tlayekankej tlanauatiltin kampa kijtoua ika noneki makiteixpantikan akin noijtoua ika yokinajnauilti se konetl? Xkijto tleka ijkon titlanankilia.
13 ¿Kitlakamatij tlayekankej tlanauatiltin kampa kijtoua ika noneki makiteixpantikan akin noijtoua ika yokinajnauilti se konetl? Kema. Tla kampa yejuamej chantij ijkon kijtouaj tlanauatiltin, kuakon kintlakamatij (Rom. 13:1). Yejuin itlanauatiluan tekiuajkej xkixnamikij itlanauatil toTajtsin (Hech. 5:28, 29). Kuakon, ijkuak kimijliaj ika yakaj yotenajnauilti, yejuamej nimantsin ontenotsaj sucursal niman ijkon kimatiskej tlenon uelis kichiuaskej niman kintlakamatiskej itlanauatiluan tekiuajkej.
14 Tlayekankej kimijliaj akin yokinnajnauiltijkej, noijki intajuan noso yakaj okse akin kimatstika tlen onochiuj ika uelis konteixpantiskej akin otenajnauilti. San ika ¿tlenon panoua tla akin otenajnauilti se tokniuj niman miyekej kimatij? ¿Kinamiki ika tokniuj akin oteteixpanti makinemili ika yokitsojkuilo itoka toTajtsin? Ka, xkinamiki ijkon makinemili. Akin otenajnauilti yejua akin yokitsojkuilo itoka toTajtsin.
15, 16. a) Ken kijtoua 1 Timoteo 5:19, ¿tleka notlajtlani manemikan omemej akin okitakej tlen opanok niman ijkon tlayekankej uelis temelajkatlaliskej? b) ¿Tlenon kichiuaj tlayekankej ijkuak kimijliaj ika yakaj ipan tlanechikojli yokinajnauilti se konetl?
15 Ipan tlanechikojli, ¿tleka notlajtlani manemikan omemej akin okitakej tlen opanok niman ijkon tlayekankej uelis temelajkatlaliskej? Pampa Biblia ijkon kijtoua, niman yejon tlen kinamiki. Tla akin okichiuj se tlajtlakojli xkijtoua tlen okichiuj, noneki manemikan omemej akin okitakej tlen opanok niman ijkon kiteititiskej ika yemelak yonochiuj se tlajtlakojli. Tla ijkon nochiua, tlayekankej uelis kimelajkatlaliskej (Deut. 19:15; Mat. 18:16; xpoua 1 Timoteo 5:19). ¿Kijtosneki ika nonekij omemej akin okitakej tlen opanok niman ijkon uelis kimijliskej tekiuajkej ika yakaj yotenajnauilti? Ka. Nikan xnochiua yejuin tlen kijtoua Biblia ijkuak tlayekankej noso yakaj okse kineki kimijlis tekiuajkej tlen xkuajli onochiuj.
16 Ijkuak kimijliaj tlayekankej ika yakaj ipan tlanechikojli yotenajnauilti, yejuamej kichiuaj ome tlemach. Kachtopa, nokojtiliaj kitlakamatiskej tlanauatiltin kampa kijtoua ika noneki manoteixpanti akin yotenajnauilti imixpan tekiuajkej. Noijki, ika tlen kijtoua Biblia yejuamej nokojtiliaj kasikamatiskej tlen yemelak opanok niman tla nonekiskej tlayekankej akin temelajkatlaliskej. Tla akin kitlajtlakoltiaj xnokuitia, tlayekankej kinkakij akin okitakej tlen opanok. Tlayekankej akin temelajkatlaliaj nosentlaliskej tla yemelak nesi ika onochiuj se tlajtlakojli ipampa tlen kijtouaj omemej tlaltikpakchanejkej: tikteneujtokej akin oteteixpanti niman noijki akin kiteititia ika akin kitlajtlakoltijtokej yemelak otenajnauilti noso okichiuj itlaj okse tlen xkuajli. * Tla xnemi okse akin okitak tlen opanok xkijtosneki tla akin teteixpantia tekajkayaujtika. Kuakon, maski xnemij omemej akin okitakej tlen opanok, tlayekankej kasikamatij ika kanaj onochiuj se ueyi tlajtlakojli tlen melak yotetlajyouilti. Kuakon, tlayekankej nochipa kinpaleuijtokej akin yokinchiuilijkej tlen xkuajli. Noijki, nochipa kitstokej kenon uelis kitlajpiyaskej tlanechikojli itech akin noijtoua ika yokinajnauilti se konetl (Hech. 20:28).
17, 18. Xkijto tlenon kichiuaj tlayekankej akin temelajkatlaliaj.
17 ¿Tlenon kichiuaj tlayekankej akin temelajkatlaliaj? Yejuamej kijtouaj tla akin okichiuj tlajtlakojli ok uelis nemis ipan tlanechikojli noso ka, niman xkijtouaj tla tekiuajkej uelis kitlajtlakolmakaskej. Tlayekankej xnokalaktiaj ika tlen kichiuaj tekiuajkej, kinkauiliaj tekiuajkej makitakan kenon kintlajtlakolmakaskej akin xkintlakamatij tlanauatiltin (Rom. 13:2-4; Tito 3:1).
18 Tlayekankej akin temelajkatlaliaj kitaj kenon nemi akin okichiuj tlajtlakojli ixpan Jehová niman imixpan tokniuan. Kichiuaj tlen kijtoua Biblia niman kuajli kitaj tla yonoyolkuep noso tla xnoyolkuepa. Tla xnoyolkuepa, kikixtiaj itech tlanechikojli niman kualijtouaj ika xok iteixpantijkauj Jehová (1 Cor. 5:11-13). Niman tla noyolkuepa, kuakon, ok uelis nemis ipan tlanechikojli. San ika, tlayekankej kijliskej ika kanaj xok keman kimakaskej se tekitl ipan tlanechikojli. Niman pampa tlayekankej kinekij ika kokonej kuajli manemikan, uelis nonojnotsaskej san imiuan tatajtin niman kimijliskej makintlajpiyakan inkoneuan ijkuak yejuamej nisiuj nemiskej itech akin yotlajtlako. Niman ijkuak ijkon kichiuaskej, tlayekankej noneki kuajli kitaskej maka kimijliskej akinomej yokinnajnauiltijkej.
¿KENON TIKINTLAJPIYAS MOKONEUAN?
Tatajtin kinmachtijtokej inkoneuan niman ijkon maka yakaj makinnajnauilti, kimijliaj tlen noneki kimatiskej itech sexo. Yejuamej kitekitiltiaj amatlajkuiloltin tlen yokinchijchiuj ikalpan toTajtsin. (Xkimita párrafos 19-22).
19-22. ¿Tlenon uelis kichiuaskej tatajtin niman ijkon kintlajpiyaskej inkoneuan? (Xkita tlaixkopinajli tlen onka ixpan yejuin revista).
19 Tatajtin yejuamej akin noneki kintlajpiyaskej inkoneuan niman ijkon maka yakaj makinchiuili tlen xkuajli. * Tatajtin, nemokoneuan se tetlayokolijli tlen toTajtsin yomechmakak (Sal. 127:3). Nemejuamej nemotekiyo nekintlajpiyaskej nemokoneuan. ¿Tlenon uelis nenkichiuaskej niman ijkon maka yakaj makinnajnauilti nemokoneuan?
20 Kachtopa, kuajli xkasikamatikan tlen panoua ijkuak yakaj kinajnauiltia se konetl. Kuajli xkasikamatikan akinomej más tenajnauiltiaj niman kenon kinkajkayauaj kokonej. Xtlatlachixtokan maka yakaj kinekis kinnajnauiltis nemokoneuan (Prov. 22:3; 24:3). Xkilnamikikan ika miyekpa akin tenajnauiltiaj sa no yejuamej akin nemokoneuj kixmatstika niman itech tlaneltoka.
21 Ika ome, xmonojnotsakan imiuan nemokoneuan (Deut. 6:6, 7). Yejuin kijtosneki ika noneki nenkinkakiskej (Sant. 1:19). Xkilnamikikan ika miyekpa, kokonej xnoyolchikauaj kiteijliskej tla yakaj yokinchiuili tlen xkuajli. Kanaj kinemiliaj ika xakaj kimineltokilis. Noso kanaj akin yokinnajnauilti yokinmojmojti niman yokimijli maka itlaj makiteijlikan. Tla nenkitaj ika itlaj inpan nochiujtika nemokoneuan, san kualtsin xkintlajtoltikan niman kuajli xkinkakikan.
22 Ika yeyi, xkinmachtikan nemokoneuan. Xkitakan kech xiuitl kipiyaj nemokoneuan niman xkimijlitiakan tlen noneki kimatiskej itech sexo. Xkimijlikan tlenon noneki kijtoskej niman kichiuaskej tla yakaj peua kinkijkitskia. Xkinkuikan amatlajkuiloltin tlen ikalpan toTajtsin yokinchijchiuj, kampa kijtoua kenon tikintlajpiyaskej kokonej (xkita recuadro “ Xmomachti niman xkinmachti mokoneuan”).
23. ¿Kenon tikitaj ijkuak yakaj kinajnauiltia se konetl, niman tlenon tiknankilijtoskej ipan okse tlamachtijli?
23 Akin tiiteixpantijkauan Jehová xkuajli tikitaj ijkuak yakaj kinajnauiltia se konetl, tikitaj ken se tlajtlakojli tlen melak xkuajli niman tsokuiltik. Tlanechikoltin kichiuaj tlen kijtoua itlanauatil Cristo, ika yejon, xkipaleuiyaj akin kichiuaj yejuin tlajtlakojli. Kasikamatij ika noneki kixnamikis tlen yokinotejtemouili. Aman tej, ¿tlenon uelis tikchiuaskej niman ijkon tikinpaleuiskej akin yokinnajnauiltijkej? Tiknankilijtoskej yejuin ipan okse tlamachtijli.
TLAKUIKAJLI 103 Tlayekankej se itetlayokolil toTajtsin
^ párr. 5 Ipan yejuin tlamachtijli tikitaskej tlenon uelis tikchiuaskej niman ijkon maka yakaj makinnajnauilti kokonej. Tikitaskej kenon tlayekankej uelis kitlajpiyaskej tlanechikojli niman kenon tatajtin uelis kintlajpiyaskej inkoneuan.
^ párr. 3 TLEN NONEKI MATIKMATIKAN: Ijkuak yakaj kinajnauiltia se konetl kijtosneki ika kaajsi se konetl niman ijkon ika nopaktia. Kijtosneki ika iuan noteka, kichiua sexo oral noso anal; noijki kijtosneki ika kimajmatokilia ikouj noso imaxak, ichichiualuan noso itsinteuan, noso kichiua okse itlaj tlen tsokuiltik. Maski más miyekej ichpokatsitsintin akin kinnajnauiltiaj, telpokatsitsintin noijki ijkon kinchiuiliaj. Niman maski más miyekej tlakamej akin kichiuaj yejuin, noijki sekimej siuamej ijkon kichiuaj.
^ párr. 11 Tla yakaj kichiua se ueyi tlajtlakojli pampa xchikauak itlaneltok, xkijtosneki ika xkipiya tlajtlakojli ipampa tlen yokichiuj. Akin otlajtlako kipiya ika tlanankilis ixpan Jehová ipampa tlen xkuajli okichiuj (Rom. 14:12).
^ párr. 16 Se tajtli noso se nantli noso okse akin iuan nouika se konetl uelis kimijlis tlayekankej ika yejon konetl kanaj okinajnauiltijkej. Tla ijkon nochiua, konetl xok más tlajyouis. Tlayekankej xkeman kijliskej konetl ompa manemi kampa kinojnotstoskej akin nonemilia okinajnauilti.
^ párr. 19 Tlen nikan tikimijliaj tatajtin makichiuakan, noijki yejon tlen noneki kichiuaskej akin kintlajpiyaj kokonej niman akin tekiuajkej yokiminmaktilijkej.
