1. ¿Tlenon okijto Jesús itech tetlayokoliltin tlen ualeuaj iluikak?

ONKA seki tlemach tlen xueli tikimitaj, san ika, más patiojkej. Ipan Tlamachtijli ipan Tepetl, Jesús okijto ika tetlayokoliltin tlen ualeuaj iluikak más patiojkej xijkon ken tlen ueliskia tikpiyaskej ipan tlaltikpaktli. Niman okijto: “Kampa nemejuamej nenkipiyaskej nemoriquezas, no ompa onyas nemoyojlo” (Mat. 6:19-21). Toyojlo kichiuas matiktejtemokan tlen tikpatiojkaitaj. Tiksentlaliaj tlen patioj ne iluikak ijkuak tokojtiliaj kuajli matechita toTajtsin niman ijkuak tikyolpaktiaj. Ijkon ken okijto Jesús, xakaj uelis kipopolos nion techichtekilis tlen tiksentlalijtiuej iluikak.

2. a) ¿Tlenon techyolchikaua Pablo matikchiuakan ipan 2 Corintios 4:17, 18? b) ¿Tlenon tikitaskej ipan yejuin tlamachtijli?

² Pablo techyolchikaua matontlachixtokan ipan “on tlajtlamach tlen xtikitaj” (xpoua 2 Corintios 4:17, 18). Onokej miyek itetlayokoliluan Jehová tlen xueli tikimitaj: ken yejon tlateochiualistin tlen tikinseliskej ipan xochitlalpan. Ipan yejuin tlamachtijli, tikimitaskej naui itetlayokoliluan Jehová tlen itikinpiyaj ipan yejuin tonaltin. ¿Itech tlenon titlajtotokej? Ika ueli touikaj iuan toTajtsin, ueli tikchiuiliaj teoyotl, techpaleuiya espíritu santo niman techpaleuiya Jehová, Jesús niman iluikaktekitkej ijkuak titenojnotsaj. Noijki tikitaskej kenon uelis tikteititiskej ika tikintlasojkamatij yejuin tetlayokoliltin tlen xueli tikimitaj.

3. ¿Katlejua tetlayokolijli tlen más ueyi kijtosneki, niman tleka ueli tikpiyaj?

³ ¿Katlejua tetlayokolijli tlen más ueyi kijtosneki? Ika ueli touikaj iuan Jehová (Sal. 25:14). San ika ¿kenon toTajtsin  akin melak chipauak uelis nouikas imiuan akin tlajtlakolejkej? Pampa Jesús okitemakako inemilis ipampa tlaltikpakchanejkej (Juan 1:29). Achto mikiskia Jesús, Jehová ikimatiya ika iKoneuj nochipa melajkanemiskia niman ijkon ueliskia kinmakixtis nochimej tlaltikpakchanejkej. Yejua ika, toTajtsin ouel onouikak imiuan sekimej tlaltikpakchanejkej akin onenkej achto mikis Jesús (Rom. 3:25).

4. Xkinteneua sekimej tlakamej akin toTajtsin imiuan onouikak achto mikis Jesús.

⁴ Matikinteneuakan sekimej tlakamej akin toTajtsin imiuan onouikak achto mikis Jesús. Abrahán melak otlaneltokak itech Jehová. Maski yopanokaj kanaj mil xiujtin ika Abrahán yomijka, Jehová okijto: “Yejua notlasojkaikniu” (Is. 41:8). Yejuin techititia ika Jehová xkeman kimilkaua akin imiuan nouika, maski tla mikij. ¡Kema, Jehová ok kilnamiktok Abrahán! (Luc. 20:37, 38). Aman matitlajtokan itech Job. Sejpatipan, ijkuak nochimej iluikaktekitkej onosentlalijkej ne iluikak, Jehová kuajli otlajto itech Job. Yejua okijto: “Yejua sanoyej kuajli tlakatl, yolchipauak, nochipa nechtlakamati, niman kichiua kanika para xkitechiuilia tlen xkuajli” (Job 1:6-8). ¿Niman tlenon kinemiliaya Jehová itech Daniel, akin okitekichiuili kanaj 80 xiujtin ipan se país kampa kinueyichiuayaj tajtsitsintin? Ijkuak Daniel youeuentsintiaka, iluikaktekitkej yexpa okijlikej ika toTajtsin melak kitlasojtlaya (Dan. 9:23; 10:11, 19). Kuajli tikmatstokej ika Jehová sa kinektika kinyolitis iamigos (Job 14:15).

5. ¿Tlenon uelis tikchiuaskej niman ijkon Jehová touan nouikas?

⁵ Ipan yejuin tonaltin, miyekej tlaltikpakchanejkej nouikaj iuan Jehová. Miyekej tlakamej, siuamej niman kokonej ipan nochi tlaltikpaktli kiteititijtokej ika kinekij iuan nouikaskej toTajtsin. Biblia kijtoua ika Jehová melak kuajli imiuan nouika akin yolchipaujkej (Prov. 3:32). Yejuamej ueli nouikaj iuan toTajtsin pampa kineltokaj ika Jesús onotemakak topampa. Tlen okichiuj Jesús melak ueyi kijtosneki pampa aman uelis tosentemakaskej itech toTajtsin niman toapolaktiskej. Niman ijkuak tikchiuaj nochi yejuin, ueli touikaj iuan toTajtsin akin melak ueyixtika.

6. ¿Kenon uelis tikteititiskej ika tiktlasojkamatij pampa touikaj iuan toTajtsin?

⁶ ¿Kenon uelis tikteititiskej ika tiktlasojkamatij pampa touikaj iuan toTajtsin? Tla tikchiuaj ken Abrahán niman Job. Yejuamej oyolmelajkanenkej ipantsin 100 xiuitl. Tejuamej noijki noneki ijkon tikchiuaskej maski tla yotiuejkaujkej noso xitiuejkauij ika tiktekichiuiliaj Jehová. Noijki, noneki tikchiuaskej ken Daniel, noneki más tiktlasojkaitaskej ken touikaj iuan Jehová xijkon ken tonemilis (Dan. 6:7, 10, 16, 22). Jehová techpaleuis matikxikokan nochi tlen tikixnamikiskej niman ijkon nochipa iuan touikaskej (Filip. 4:13, TNM).

7. a) Ken kijtoua Proverbios 15:8, ¿kenon kimita Jehová toteoyouan? b) ¿Kenon kinnankilia Jehová toteoyouan?

⁷ Teoyotl noijki se tetlayokolijli tlen xueli tikitaj. Akin kuajli nouikaj kuelitaj noijliskej tlen kimachiliaj niman tlen kinemiliaj. Tejuamej akin touikaj iuan Jehová noijki ijkon tikchiuaj. Yejua technotsa ika Biblia, ompa techijlia tlenon kinemilia niman tlenon kimachilia. Niman tejuamej tiknotsaj ijkuak tikchiuiliaj teoyotl, ijkon ueli tikijliaj tlenon tiknemiliaj niman tlenon tikmachiliaj. Jehová kiyolpaktia kinkakis toteoyouan (xpoua Proverbios 15:8). Pampa Jehová se toamigo akin melak techtlasojtla, xsan kinkaki toteoyouan,  noijki technankilia. Kemantika nimantsin technankilia, san ika, kemantika noneki miyekpa tiktlajtlaniliskej tlen tiknekij. Maski tla nimantsin noso xnimantsin technankilis, uelis kuajli tikmatstoskej ika yejua technankilis ijkuak kinamiki. Melauak, kanaj Jehová xtechnankilis ijkon ken tikchiayaj. Kanaj Jehová xkipopolos se tlauejli, san ika, yejua techmakas kojtilistli niman tlamachilistli tlen techpaleuis matitlaxikokan (1 Cor. 10:13).

8. ¿Kenon uelis tikteititiskej ika tiktlasojkamatij pampa ueli tiknotsaj toTajtsin?

⁸ ¿Kenon uelis tikteititiskej ika tiktlasojkamatij pampa ueli tiknotsaj toTajtsin? Tla tikchiuaj tlen yejua techijlia. Yejua kijtoua: “Nochipa xchiuakan oración” (1 Tes. 5:17). Jehová xtexchiualtia matiknotsakan. Yejua techkauilia matiktlapejpenikan tlenon tikchiuaskej, niman techijlia: “Maka kaman xkajkauakan ika nenkichiuaj oración” (Rom. 12:12). Kuakon, tla miyekpa tiknotsaj toTajtsin, tikteititijtoskej ika tiktlasojkamatij pampa ueli tikchiuiliaj teoyotl. Ijkuak tikchiuiliskej teoyotl, nochipa matiktlasojkamachilikan niman matikueyichiuakan (Sal. 145:2, 3).

9. a) ¿Tlenon kinemilia tokniuj Chris itech teoyotl? b) ¿Tlenon tiknemilia tejua itech teoyotl?

⁹ Tla yotiuejkaujkej ika tiktekichiuilijtokej Jehová niman yotikitakej kenon technankilia toteoyouan, kipiya ika más tiktlasojkamatiskej yejuin tetlayokolijli. Matikitakan tlenon okijto tokniuj Chris, se tokniuj tlakatl akin yokitekichiuili Jehová kanaj 47 xiuitl. Yejua kijtoua: “Melak nikuelita saniman ninokuiteuas niman ijkon ika noyojlo niknotsas Jehová. Melak kuajli ninomachilia niknotsas ijkuak kemach uajtlatlanestiuj. Yejuin kichiua maniktlasojkamachili Jehová ipampa nochi tlen nechmaka niman pampa nechkauilia maniknotsa. Ijkuak iuajtlayouatiuj niman inikochis, oksejpa nikchiuilia teoyotl Jehová. Yejon kichiua melak kuajli maninomachili”.

10. ¿Tleka melak noneki tikpatiojkaitaskej iespíritu santo toTajtsin?

¹⁰ Espíritu santo okse itetlayokolil toTajtsin  tlen noneki tikpatiojkaitaskej. Jesús otechyolchikauj miyekpa matiktlajtlanikan espíritu santo (Luc. 11:9, 13). Ika espíritu santo, Jehová techmaka “on ueyi poder” (2 Cor. 4:7; Hech. 1:8). Iespíritu santo toTajtsin techpaleuis matikxikokan maski san katlejua tlauejli.

11. ¿Kenon uelis techpaleuis espíritu santo?

¹¹ Espíritu santo techpaleuiya kuajli matikchiuakan totekiyo tlen tikpiyaj ipan ikalpan toTajtsin. Kuajli tikmatij ika totekiyo kuajli onkisa pampa toTajtsin techmaka iespíritu santo, xpampa tla tejuamej melak tiueltokej.

12. Ijkon ken kijtoua Salmo 139:23, 24, ¿tlenon uelis tiktlajtlaniliskej toTajtsin?

¹² Uelis tikteititiskej ika tikpatiojkaitaj espíritu santo tla tiktlajtlaniliaj toTajtsin matechpaleui matikitakan tla itlaj xkuajli tikpiyaj ipan toyojlo (xpoua Salmo 139:23, 24). Tla ijkon tikchiuaj, Jehová uelis kitekitiltis iespíritu santo niman ijkon matikitakan kanon noneki toyektlaliskej. Tla ijkon panoua, matiktlajtlanilikan Jehová matechkojtili ika iespíritu santo niman ijkon tijkixtiskej itech toyojlo tlen xkuajli tiknemiliaj noso tikmachiliaj. Jehová kitas ika tejuamej xtiknekij tikchiuaskej tlen xkuajli, niman yejua ok techpaleuijtos ika iespíritu santo (Efes. 4:30).

13. ¿Tlenon techpaleuis más matiktlasojkamatikan espíritu santo?

¹³ Uelis más tiktlasojkamatiskej iespíritu santo toTajtsin tla tiknemiliaj nochi tlen kichiujtika ipan yejuin tonaltin. Achto yas iluikak, Jesús okimijli inomachtijkauan: “Ijkuak on Espíritu Santo uajlas nemopan, nenkiseliskej poder. Niman noka nentenojnotsaskej [...] nochiuiyan ipan in tlaltikpaktli” (Hech. 1:8). Kuajli nesi ika nochiujtika tlen okijto Jesús. Ika itlapaleuilis espíritu santo, ipantsin 8 millones tlaltikpakchanejkej yonochiujkej iteixpantijkauan Jehová. Niman xsan yejon, akin tinemij ipan ikalpan Jehová melak kuajli touikaj imiuan tokniuan pampa iespíritu santo toTajtsin techpaleuiya matitetlasojtlakan, matipakikan, matiyolseujkej, matiteijyouikan, matiteiknelikan, matitlaneltokakan, matiyolyemankej niman  toselti matoteltikan (Gál. 5:22, 23). Kuajli nesi ika espíritu santo se tetlayokolijli tlen melak noneki tikpatiojkaitaskej.

14. ¿Akinomej techpaleuiyaj ijkuak titenojnotsaj?

¹⁴ Tikpiyaj okse tetlayokolijli tlen xueli tikitaj: titekitij iuan Jehová, Jesús niman iluikaktekitkej (2 Cor. 6:1). Yejuamej nochipa techpaleuiyaj ijkuak titenojnotsaj. Pablo okijto ika yejua niman oksekimej tokniuan tekitiyaj iuan toTajtsin (1 Cor. 3:9). Ijkuak titenojnotsaj, noijki titekitij iuan Jesús. Matikilnamikikan ika ijkuak Jesús okimijli inomachtijkauan makinmachtikan oksekimej tlaltikpakchanejkej, noijki okimijli: “Nemouan ninemis” (Mat. 28:19, 20). ¿Niman kenon titekitij imiuan iluikaktekitkej? Melak tiktlasojkamatij pampa iluikaktekitkej techyekanaj ijkuak tikteijliaj “on kuajli tlajtojli” (Apoc. 14:6).

15. ¿Tlenon techititia ika Jehová melak techpaleuiya ijkuak titenojnotsaj?

¹⁵ ¿Tlenon yonochiuj pampa yejuamej techpaleuijtokej? Ueli titenojnotsaj niman ijkon sekimej makinisiuikan Jehová (Mat. 13:18, 23). ¿Akinon kichiua ijkon mapano? Jesús okijto: “Xakaj ueli notech uajlau tla xkinotsa noTajtsin” (Juan 6:44). Ipan Biblia tiknextiaj itlaj tlen kiteititia yejuin. Se tonajli, Pablo okinnojnots sekimej siuamej akin nemiyaj nisiuj ueyikalpan Filipos. Matikitakan tlenon techijlia Biblia itech Lidia, se siuatl akin teuan ompa nemiya. Biblia techijlia: “ToTEKO okitlapouilij iyojlo niman okiselij on tlen Pablo kijtouaya” (Hech. 16:13-15). Ipan yejuin tonaltin, Jehová noijki yokichiuj ika melak miyekej tlaltikpakchanejkej manemikan ipan ikalpan.

16. ¿Akinon kinamiki matikueyiteneuakan ijkuak tlaltikpakchanejkej kiseliaj tlen tikimijliaj?

¹⁶ ¿Akinon kinamiki matikueyiteneuakan ijkuak tlaltikpakchanejkej kiseliaj tlen tikimijliaj? Pablo okinankili yejuin ijkuak okintlajkuilouili tokniuan corintios. Yejua okijkuilo: “Nejua oniktôkak on xinachtli ipan nemoyojlo, niman Apolos okatekij, pero Dios yejua okiskaltij. Tla ijkon tej, nion on yejuan kitôka on xinachtli, nion on yejuan katekiya itlaj kijtosneki, yej san Dios ueyi kijtosneki, pampa yejua kiskaltia on tlatoktli” (1 Cor. 3:6, 7). Nochipa ijkuak kuajli techkakiskej ijkuak tontenojnotsaj, noneki tikueyiteneuaskej toTajtsin, ijkon ken okichiuj Pablo.

17. ¿Kenon uelis tikteititiskej ika tiktlasojkamatij pampa titekitij iuan Jehová, Cristo niman iluikaktekitkej?

¹⁷ ¿Kenon uelis tikteititiskej ika tiktlasojkamatij pampa titekitij iuan Jehová, Cristo niman iluikaktekitkej? Tla tikinnojnotsaj nochimej tlaltikpakchanejkej. Uelis titenojnotsaskej “kampa tojlan niman ipan techajchan” (Hech. 20:20). Miyekej tokniuan kuelitaj tenojnotsaskej maski san kanon. Ijkuak tokniuan kinextiaj yakaj akin xkixmatij, kuajli kitlajpalouaj niman kiyejyekouaj iuan nonojnotsaskej. Tla kuajli kinkakij, kiyejyekouaj kinnojnotsaskej itech Biblia.

18, 19. a) ¿Kenon tikteijliaj tlen melauak itech Biblia? b) ¿Kenon okipaleui Jehová se tlakatl akin itoka Raphalalani?

¹⁸ Tejuamej akin titekitij iuan Jehová xsan tikimijliaj tlaltikpakchanejkej tlen melauak, noijki tikinpaleuiyaj manochiuakan inomachtijkauan Cristo. Ijkuak tikitaj ika yakaj kuelkaki tlen tikijliaj, tiknekij tikpaleuiskej más kuajli makasikamati iTlajtol toTajtsin noso yakaj tikijliaj makimachtiti. Melak techyolpaktia ijkuak tikitaj  kenon Jehová kipaleuiya akin tikmachtiaj makipatla inemilis.

¹⁹ Matitlajtokan itech se tlakatl akin itoka Raphalalani. Yejua chanti Sudáfrica niman kichiuaya naualyotl. Yejua opeuj nomachtia Biblia niman melak kuelitaya tlen ompa ueltiaya. Ijkuak okitak ika Biblia kijtoua ika xkuajli tla tikinnotsa akin yomijkej, melak okitekiyomakak nopatlas (Deut. 18:10-12). Ika yolik, yejuin tlakatl okikauili toTajtsin makiyektlali. Oajsik se tonajli ijkuak okikajkauj ika kichiuaya naualyotl, maski yejuin ika nopanoltiaya. Raphalalani, akin aman kipiya 60 xiuitl, kijtoua: “Melak nikintlasojkamachilia iteixpantijkauan Jehová pampa onechpaleuijkej maniknexti se tekitl niman pampa okichiujkej okseki tlemach nopampa. San ika, más niktlasojkamachilia Jehová pampa onechpaleui manikpatla nonemilis. Aman yoninoapolakti niman nitenojnotsa”.

20. ¿Tlenon yotikijtokej tikchiuaskej?

²⁰ Ipan yejuin tlamachtijli, yotikimitakej naui itetlayokoliluan Jehová tlen xueli tikimitaj. ¿Katlejua tetlayokolijli tlen más ueyi kijtosneki? Ika ueli touikaj iuan Jehová. Ipampa yejuin, ueli tikinseliaj on okseki tetlayokoliltin: ueli tikchiuiliaj teoyotl, tikitaj kenon espíritu santo techpaleuiya niman noijki tikitaj kenon akin nemij ne iluikak techpaleuiyaj ijkuak titenojnotsaj. Kuajli yotikijtokej ika más tikinpatiojkaitaskej yejuin tetlayokoliltin niman nochipa tiktlasojkamachiliskej Jehová pampa yejua se toamigo akin techititia ika melak techtlasojtla.