Se tokniuj akin itoka Sara * kijtoua: “Pampa nejua xmás nitlajtlajto, xnikuelita ninemis imiuan akin nimantsin kualanij. San ika, ijkuak ninemi imiuan akin yolyemankej niman yolseujkej, melak kualtsin ninomachilia. Xouijtika nikita nikimijlis tlenon nikmachilia, tlenon nechajmana niman tlenon nikixnamiktika. Niyolpaki pampa noamigos yolyemankej”.

Tlen kijtoua Sara techititia ika tla tejuamej tiyolyemankej, oksekimej kinekiskej technisiuiskej. Niman Jehová kuelita ijkuak se yolyemanki. ¿Tleka ijkon tikijtouaj? Pampa ipan iTlajtol techijlia: “Xmouikakan ikan [...] yolyemanilistli” (Col. 3:12). ¿Tlenon kijtosneki yolyemanilistli? ¿Kenon okiteititi Jesús ika yolyemanki? ¿Tleka tikijtouaj ika más tiyolpakiskej tla tiyolyemankej?

Ijkuak se yolyemanki, kiteititia ika yejua yolseujki. Akin yolyemankej noso yolseujkej kiteititiaj ika tetlasojtlaj, niman ijkuak kixnamikij tlen teyolkoko, tlaxikouaj niman xnimantsin kualanij.

Ipan Biblia, tlajtojli griego tlen notlajtolkuepa ken “yolyemanilistli” yeuejkaui nokuiya niman ijkon noteititis kenon se caballo okimajmachtijkej maka nimantsin manotlalojteua. Maski yejon caballo xok nimantsin notlalojteua, xkijtosneki tla xok kojtik. Noijki ijkon, akin yolyemanki xkijtosneki tla xkojtik, yej kijtosneki ika melak kojtik. ¿Tleka ijkon tikijtouaj? Pampa, akin yolyemanki, ueli iselti noteltia niman nemi ika yolseuilistli imiuan oksekimej.

Kanaj ueliskia tiknemiliskej ika tejuamej xtiyolyemankej pampa niman ijkon otinemikoj. Noijki, pampa melak miyekej nemij akin nimantsin nosiaujkauaj noso nimantsin kualanij, kemantika ouijtika tikitaj tiyolyemankej yeskej (Rom. 7:19). Kuakon, tla tiknekij tiyolyemankej yeskej, noneki melak tokojtiliskej, san ika, iespíritu santo Jehová techpaleuis maka matosiaujkauakan (Gál. 5:22, 23, TNM). ¿Tleka noneki tokojtiliskej niman ijkon tiyolyemankej yeskej?

Yolyemanilistli kinyoltilana oksekimej. Ken okijto Sara, akin otikteneujkej ipeujyan yejuin tlamachtijli, tinochimej kualtsin tomachiliaj ijkuak nisiuj tinemij intech akin yolyemankej. Miyekej kixmatiyaj Jesús ken se tlakatl akin melak yolyemanki katka niman akin teikneliaya (2 Cor. 10:1). Hasta kokonetsitsintin akin xmás kixmatiyaj kuelitayaj iuan nemiskej (Mar. 10:13-16).

Yolyemanilistli techpaleuiya niman kinpaleuiya oksekimej. Tla tiyolyemankej, xnimantsin  tikualaniskej niman xtotlaueltiskej (Prov. 16:32). Noijki, techpaleuis maka matikinyolkokokan oksekimej niman akin tikintlasojtlaj. Yolyemanilistli noijki kinpaleuiya akin touan nemij. Tla xnimantsin tikualanij, xakaj tikyolkokoskej.

Maski Jesús kipiaya miyek tekitl, nochipa okiteititi ika yolyemanki katka. Miyekej tlaltikpakchanejkej kipiayaj miyek ajmantin niman kinekiyaj yakaj makinyolseui. Uelis kuajli tikmatstoskej ika yejuin tlajtoltin tlen okijto Jesús melak okinyolchikauj, yejua okimijli: “Xuajlakan notech [...] pampa nejua niyolsejki niman niyolyemanki” (Mat. 11:28, 29).

¿Kenon uelis tiyolyemankej yeskej ijkon ken Jesús? Kachtopa, noneki tomachtiskej iTlajtol toTajtsin niman ijkon tiueliskej kenon Jesús kinnojnotsaya oksekimej niman kenon kixnamikiya tlen ouijtika. Noijki, ijkuak tikixnamikiskej itlaj tlen uelis kichiuas maka matiyolseujkej, matokojtilikan tikchiuaskej ken Jesús (1 Ped. 2:21). Matikitakan tlenon okipaleui Jesús nochipa mayolyemanki.

Jesús yemelak yolyemanki katka. Yejua okijto: “Nejua niyolsejki niman niyolyemanki” (Mat. 11:29). Biblia san sekan kiteneua yolseuilistli niman yolyemanilistli, pampa tla yakaj kineki yolyemanki yes, noijki noneki yolseujki yes (Efes. 4:1-3). ¿Tleka ijkon tikijtouaj?

Tla tiyolyemankej, xtoueyimatiskej niman xnimantsin toyolkokoskej. ¿Kenon onomachili Jesús ijkuak okijtouilijkej ika katka se tlakatl akin melak tlakuaya niman ika katka se tlauanketl? Ika tlen okichiuj, okiteititi ika xmelak tlen kijtouiliayaj niman, ika yolseuilistli, okijto ika tlamachilistli noteititia ika on tlen se kichiua (Mat. 11:19).

Tla yakaj techpijpinaujtia pampa oksekan tiualeuaj noso pampa tlamantik titlachiaj, matokojtilikan kuajli tiknankiliskej. Tokniuj Peter, se tlayekanketl akin chanti Sudáfrica, techijlia: “Ijkuak yakaj nechijlia itlaj tlen nechkualania, niknemilia tlenon kichiuaskia Jesús”. Peter noijki kijtoua: “Kuajli yonikasikamat ika xnoneki ninoueyimatis”.

Jesús kasikamatiya ika inomachtijkauan tlajtlakolejkej katkaj. Inomachtijkauan Jesús kinekiyaj kipaleuiskej, san ika, pampa tlajtlakolejkej katkaj, kemantika xueliyaj kichiuayaj. Matontlanemilikan itech yejon yeuajli achto kimiktiskiaj Jesús. Ijkuakon, Pedro, Santiago niman Juan xokiyolchikaujkej Jesús ijkon ken yejua okintlajtlanilijka. Jesús okimasikamat niman okimijli: “On nemoespíritu kineki kichiuas kuajli, pero nemotlalnakayo xkojtik” (Mat. 26:40, 41). Pampa kasikamatiya ika inomachtijkauan tlajtlakolejkej katkaj, xokimajuak.

Se tokniuj siuatl itoka Mandy, kijtoua ika yeuejkaui nion achijtsin xkinekiya manopopolokan oksekimej, san ika, aman nokojtilia yolseujki yes ijkon ken Jesús. Yejua kijtoua: “Ninokojtilia nikilnamikis ika tinochimej titlajtlakolejkej niman nikyejyekoua nikitas tlen kuajli kichiuaj oksekimej, ijkon ken kichiua Jehová”. Mandy opeuj kichiua ken Jesús niman aman kasikamati ika tinochimej titlajtlakolejkej. Tla tejuamej noijki ijkon tikchiuaj, tikitaskej ika xouijtika tinemiskej ika yolseuilistli imiuan oksekimej.

Jesús okikauili toTajtsin yejua matetlajtlakolmaka. Ijkuak Jesús nemiya ipan tlaltikpaktli, okichiuilijkej tlen xkinamikiya. Okitejteneujkej, okitlauelitakej niman okitlajyouiltijkej. Maski ijkon, yejua nochipa oyolyemankanen pampa okikauili Jehová yejua makintlajtlakolmaka ken kinamiki akin okichiuilijkej tlen xkuajli (1 Ped. 2:23). Jesús kuajli kimatstoya ika iTajtsin, akin nemi ne iluikak, nochipa kitlajpiyaskia niman ika tetlajtlakolmakaskia ijkuak kinamikiskia.

Tla nimantsin tikualanij ijkuak texchiuiliaj tlen xkinamiki, uelis más tikueyiliskej yejon tlauejli niman kanaj tikchiuaskej tlen xkuajli. ITlajtol toTajtsin techilnamiktia: “Ijkuak sen tlakatl kualani, yejua xkichiua on tlen Dios kuelita” (Sant. 1:20). Maski kemantika tikualanij pampa yemelak texchiuiliaj tlen xkinamiki, totlajtlakol uelis kichiuas matikchiuakan tlen xkuajli.

Se tokniuj siuatl itoka Cathy akin chanti Alemania, kinemiliaya ika tla xsan no yejua kichiuaya makitlakaitakan, xakaj kichiuaskia ipampa. San ika, okipatlak ken tlanemiliaya ijkuak opeuj tlaneltoka itech Jehová. Yejua kijtoua: “Xok noneki nikimijlis oksekimej ika nexchiuilijtokej tlen xkinamiki. Aman xok ouijtika nikita niyolyemanki yes pampa kuajli nikneltoka  ika Jehová kimati kenon nechpaleuis”. Tla kemantika texchiuiliaj tlen xkinamiki, matikilnamikikan ika tla titlaneltokaj itech toTajtsin ijkon ken kichiuaya Jesús, yejon kichiuas matiyolseujtokan.

Jesús okijto ika noneki tiyolyemankej yeskej tla tiknekij tiyolpakiskej. Yejua okijto: “Yolpakij akin yolyemankej” (Mat. 5:5, TNM). Matikitakan kenon techpaleuiya tla tiyolyemankej.

Tla tiyolyemanki noso tiyolseujki, xmás tikpiyas tlauejli iuan moixnamik. Se tokniuj akin chanti Australia, itoka Robert, kijtoua: “Miyekpa nikyolkokouaya nosiuatsin. Pampa san totoka nikualaniya, nikijliaya tlen nion xnikmachiliaya. Tla yotikijto tlen teyolkoko, xok uelis itlaj tikchiuas niman ijkon maka mapeua tlauejli. Melak xkuajli ninomachiliaya ijkuak nikitaya kenon melak yonikyolkokojka nosiuatsin”.

Ijkuak titlajtouaj, tinochimej topopolouaj. Niman ijkuak se xkinemilia tlenon kijtoua, uelis melak kiyolkokos ixnamik niman onias miyek tlauejli (Sant. 3:2). Ijkuak ijkon panos, yolseuilistli techpaleuis maka san totoka tikualaniskej niman maka tikijtoskej tlen uelis teyolkokos (Prov. 17:27).

Robert melak onokojtili xsan totoka kualanis. ¿Kenon okipaleui pampa ijkon okichiuj? Yejua kijtoua: “Aman, ijkuak xninotlajtolnamiki iuan nosiuatsin, melak ninokojtilia kuajli nijkakis, nitlajtos ika yolyemanilistli niman xsan totoka nikualanis. Aman más kuajli iuan ninouika”.

Tla tiyolyemanki noso tiyolseujki, kuajli timouikas imiuan oksekimej. Akin nimantsin noyolkokouaj xmiyekej imiuan nouikaj. San ika, akin yolseujkej melak kuajli nouikaj imiuan oksekimej (Efes. 4:2, 3). Cathy, akin yotikteneujkaj, kijtoua: “Pampa niyolyemanki, más niyolpaki ninemis imiuan oksekimej, maski sekimej ouijtika imiuan timouikas”.

Tla tiyolyemanki noso tiyolseujki, tinemis ika moyojlo. Biblia kijtoua ika akin kipiya “itlamatkilis Dios”, yolyemanki niman nemi ika iyojlo (Sant. 3:13, 17). Akin yolyemanki kipiya se “yojlotl yolseujki” (Prov. 14:30, TNM). Martin, akin melak yonokojtili más yolseujki yes, kijtoua: “Aman más niteasikamati niman xok san totoka nikualani. Ninemi ika noyojlo niman melak nipaki”.

Melak noneki tokojtiliskej niman ijkon tiyolseujkej yeskej. Se tokniuj kijtoua: “Yemelak tlen nimechijlis, hasta ipan yejuin tonaltin, kemantika melak nitlauelmiki”. San ika, Jehová, akin techijlia ika noneki tiyolseujkej yeskej, techpaleuis (Is. 41:10; 1 Tim. 6:11). Yejua techyektlalis niman techkojtilis (1 Ped. 5:10). Sakin, uelis tikteititiskej ika tikpiyaj “iyolyemanilis niman itetlajsojtlalis” Cristo, ijkon ken okiteititi apóstol Pablo (2 Cor. 10:1).