MIYEKEJ kimatij ika yeuejkaui egipcios kikuiyaj papiro niman ijkon kichijchiuayaj amatl tlen ipan tlajkuilouayaj. Griegos niman romanos noijki kikuiyaj amatl tlen tlachijchiujtli ika papiro. * San ika, miyekej xkimatij ika papiro noijki ika kinchijchiuayaj barcos.

Ikipiya ipantsin 2,500 xiuitl, teotlajtoketl Isaías okijkuilo ika, akin chantiyaj ipan “on ríos yejuan onkaj ne Etiopía”, okintitlankej “itlajtokauan yejuan uajlauij ipan on río Nilo yejuan uajlauij ipan on atl ipan inbarcos tlachijchijtli ika iakayo papiro”. Sakin, teotlajtoketl Jeremías okijto ika, ijkuak medos niman persas kinotlatkitiskiaj Babilonia, kintlatiskiaj on barcos tlachijchiujtin ika papiro niman ijkon babilonios xueliskiaj choloskiaj (Is. 18:1, 2; Jer. 51:32).

Pampa Biblia ualeua itech toTajtsin, akin nomachtiaj xkinmojkatlachialtia ika ixtlamatkej yokinextijkej miyek tlen kiteititia ika yeuejkaui kinchijchiuayaj barcos ika papiro (2 Tim. 3:16). Ne Egipto onka seki tlen techititia kenon kinchijchiuayaj barcos ika papiro. Matikitakan.

Ne Egipto, yokinnextijkej seki tlalkontin kampa nesij tlaixkopinaltin tlen kiteititiaj kenon kitekiyaj papiro niman kenon ika kinchijchiuayaj barcos. Tlakamej kitekiyaj papiro niman kuajli kisasalouayaj ika manojos. Ijkuak kisesentlaliayaj niman kuajli kisasalouayaj ikojyo papiro melak tlaxikouaya. A Companion to Ancient Egypt, kijtoua ika barcos tlen tlachijchiujtin ika papiro ueueyakej katkaj más de 17 metros niman kipiayaj 10 noso 12 remos inajnakastlan.

Itejtenko atentli Nilo melak noskaltiaya papiro. Noijki, xmás ouijtika katka kinchijchiuaskej barcos ika papiro. Maski sakin opeuj kinchijchiuaj barcos ika kojtli, nesi ika akin kimajsiyaj michimej niman akin kimajsiyaj oksekimej yolkamej ok kinnochijchiuiliayaj barcos ika papiro.

Melak ouejkauj ika onotekitiltijkej barcos tlen tlachijchiujtin ika papiro. Se ixtlamatki griego, akin itoka katka Plutarco niman onen ijkuak nemiyaj akin kichiuayaj ken Cristo ipan kachtopa siglo, okijto ika tlaltikpakchanejkej ok kinchijchiuayaj balsas ika papiro.