1, 2. ¿Tlenon kixnamikij miyekej tokniuan?

APÓSTOL Pablo okiyolchikauj Timoteo niman nochimej akin kichiuaj ken Cristo nochipa kuajli makitekichiuilijtokan toTajtsin (2 Tim. 4:5). Tinochimej tokojtiliaj ijkon tikchiuaskej, san ika, miyekej tokniuan ouijtika kitaj tenojnotsaskej (2 Tim. 4:2). San matontlanemilikan intech tokniuan akin chantij kampa tekiuajkej xkinkauiliaj matenojnotsakan. Yejuamej kimatstokej ika tla kimitaj ika tenojnotstinemij, uelis kintsakuaskej.

² Akin kitekichiuiliaj Jehová kixnamikij miyek tlen kichiua melak manoyolajmanakan. Miyekej tokniuan chikauak tekitij pampa noneki kintlakualtiskej inchanejkauan. Maski yejuamej kuelitaskiaj más tenojnotsaskej, xueli ijkon kichiuaj pampa melak siaujtokej. Oksekimej tokniuan xmás ueli kuajli kitekichiuiliaj Jehová pampa melak kualoj noso pampa iuejueyimej, sekimej hasta xueli kisaj de inchan. Niman noijki, nemij akin kinemiliaj ika xitlaj ika tepaleuiyaj. Tokniuj Mary, * akin chanti Oriente Medio, kijtoua: “Pampa nochipa niknemilijtok ika xitlaj ika nitepaleuiya, melak nisiaui. Sakin melak ninajmana pampa yejon tiempo ueliskia nijkuis para nitenojnotsas, san ika, xueli ijkon nikchiua pampa nisiaujtika”.

3. ¿Tlenon tikitaskej ipan yejuin tlamachtijli?

³ Maski san tlenon matikixnamiktokan, Jehová nochipa techpaleuis matiktekichiuilijtokan niman techkojtilis. Ipan yejuin tlamachtijli, tikitaskej kenon Jehová techpaleuiya. San ika, kachtopa matikitakan kenon Jehová okiyolchikauj  Pablo niman Timoteo niman ijkon ok makitekichiuilijtokan maski kixnamiktoyaj tlen ouijtika.

4. ¿Tlenon okixnamik Pablo?

⁴ Pablo okixnamik miyek tlen ouijtika. Melak ononek makiyolchikauakan ijkuak okiuisojkej, okitemojmotlakej niman ijkuak okitsajkej (2 Cor. 11:23-25). Yejua xopinauj niman okijto ika kemantika noijki kinemiliaya tlen xtepaleuij (Rom. 7:18, 19, 24, 25). Noijki, okitlajtlanili toTajtsin makikixtilijtiuetsi tlen kitlajyouiltijtoya, tlen katka “ken itlaj uitstli” (2 Cor. 12:7, 8).

5. ¿Tlenon ouel okichiuj Pablo maski okixnamik miyek tlen ouijtika?

⁵ Pablo ouel otenojnots maski kixnamikiya tlen ouijtika, pampa Jehová kiyolchikauaya. Matitlanemilikan itech nochi tlen okichiuj apóstol Pablo. Ijkuak yejua tsauktikatka ne Roma, okinnojnots tlayekankej judíos niman kanaj hasta akin tekitiyaj itech tekiuajkej (Hech. 28:17; Filip. 4:21, 22). Noijki okinnojnots akin kitlajpixtoyaj niman nochimej akin kontlajpalouayaj (Hech. 28:30, 31; Filip. 1:13). Ijkuak Pablo ompa tsauktoya, toTajtsin okitekitilti niman ijkon makimijkuilo seki cartas tlen okinpaleui tokniuan akin yeuejkaui onenkej niman tlen hasta aman techpaleuiyaj. Niman ipampa tlen okichiuj, tokniuan akin chantiyaj Roma onoyolchikaujkej niman opeuj “kitemachtiaj on itlajtol Dios ikan más yolchikaualistli, niman xikan nemojtijli” (Filip. 1:14). Maski xouel okitekichiuili toTajtsin ijkon ken yejua kinekiya, okichiuj nochi tlen ouel niman okijto ika tlen ipan nochiujtoya otepaleui más miyekan manotenojnotsa (Filip. 1:12).

6. Ijkon ken kijtoua 2 Corintios 12:9, 10, ¿tlenon okipaleui Pablo más kuajli matenojnotsa?

⁶ Pablo kimatstoya ika san ueliya kitekichiuiliaya Jehová pampa yejua kipaleuiaya. Yejua okijto ika ikojtilis toTajtsin “más kuajli noteititia ijkuak se xkojtik” (xpoua 2 Corintios 12:9, 10, TNM). * Ika iespíritu santo,  Jehová okipaleui Pablo más kuajli matenojnotsa maski okitlaueltokakej, okitsajkej niman okixnamik miyek tlen ouijtika.

7. ¿Tlenon okixnamik Timoteo?

⁷ ToTajtsin noijki okipaleui Timoteo niman ijkon kuajli makitekichiuilijto. Ijkon tikijtouaj, pampa yejua miyekpa okuikak Pablo ijkuak okintlajpaloto tlanechikoltin niman ijkuak otenojnotsato. Pablo noijki okititlan makintlajpaloti tlanechikoltin niman makinyolchikauati tokniuan (1 Cor. 4:17). Timoteo kanaj okimachili ika xueliskia kichiuaskia yejon tekitl. Kanaj yejua ika, Pablo okijli: “Xuelis yakaj mitspijpinauis pampa titelpochtli” (1 Tim. 4:12). Timoteo noijki kipiaya “ken itlaj uitstli” ipan itlalnakayo, pampa Biblia kijtoua ika miyekpa kualouaya (1 Tim. 5:23). Yejua kuajli kimatstoya ika Jehová kimakaskia iespíritu santo niman ijkon ok ueliskia tenojnotsas niman kinpaleuis ikniuan (2 Tim. 1:7).

8. ¿Kenon techyolchikaua Jehová?

⁸ Aman, Jehová techmaka “on ueyi poder” niman ijkon kuajli matiktekichiuilijtokan (2 Cor. 4:7). Matikitakan kenon Jehová techyolchikaua niman techpaleuiya itech matiyolmelajkanemikan ika teoyotl, Biblia, tokniuan niman totenojnotsalis.

9. ¿Kenon techpaleuiya teoyotl?

⁹ Teoyotl. Ipan Efesios 6:18, Pablo okijto: “Nochipa xchiuakan oración”. Tla ijkon tikchiuaj, toTajtsin techyolchikauas. Jonnie, akin chanti Bolivia, okitak kenon okipaleui Jehová ijkuak okixnamik miyek tlen ouijtika. Itajuan niman isiuauj melak okualokej niman melak ouijtika okitak kintlajpiyas. Inan omik, niman isiuauj niman itaj melak ouejkauj ika opajtikej. Jonnie kijtoua: “Ijkuak melak ninajmanaya, nikijliaya toTajtsin nochi tlen nikmachiliaya niman yejon nechpaleuiaya”. Jehová okipaleui tokniuj matlaxiko. Se tlayekanketl akin itoka Ronald, akin noijki chanti Bolivia, okimat ika inan kipiaya cáncer, niman opanok se metstli omik inan. ¿Tlenon okipaleui matlaxiko? Yejua kijtoua: “Teoyotl nechpaleuiya manikijli Jehová nochi tlen nikmachilia. Nikmatstika ika san Jehová kuajli nechasikamati xijkon ken nejua”. Maski melak tajmanaj niman xtikmatij tlenon tikijliskej Jehová, yejua techijlia matiknotsakan maski xtikmatij kenon tikijliskej tlen tikmachiliaj (Rom. 8:26, 27).

10. Ken kijtoua Hebreos 4:12, ¿tleka melak noneki matikpouakan niman itech matitlanemilikan toBiblia?

¹⁰ Biblia. Ijkon ken Pablo, tla tiknekij toyolchikauaskej niman tiyolseuiskej, matikpouakan Biblia (Rom. 15:4). Ijkuak tikpouaj Biblia niman itech titlanemiliaj, Jehová uelis kitekitiltis iespíritu santo niman ijkon techpaleuis matikasikamatikan kenon uelis tikchiuaskej tlen tikpoujtokej (xpoua Hebreos 4:12). Ronald, akin kemach otikonteneujkej, kijtoua: “Melak niyolpaki pampa yoninomat ika mojmostla ika tlayoua nikpoua noBiblia. Nitlanemilia itech tlen kichiua Jehová niman kenon kintlasojtla itekipanojkauan. Yejuin nechpaleuiya manitlaxiko”.

11. ¿Kenon okipaleui Biblia se tokniuj siuatl akin melak tlajyouijtoya?

¹¹ Ijkuak titlanemiliaj itech Biblia, techpaleuiya matikitakan kenon uelis tikxikoskej tlen tikixnamiktokej. Matikitakan tlen okijto se tokniuj akin omik iueuentsin. Se tlayekanketl okijli ika kipaleuiskia tla kipoua amoxtli Job. Ijkuak tokniuj siuatl okipouj, kachtopa okinemili tlen xkuajli itech Job. Yejua kinemiliaya: “Job, ¡tleka xkuajli titlanemilia!”. Ijkuakon, okasikamat ika yejua noijki tlanemilijtoya  ijkon ken Job. Yejuin okipaleui makipatla ken tlanemiliaya niman okipaleui maka melak manajmana ipampa iueuentsin.

12. ¿Kenon techyolchikaua Jehová itechkopa tokniuan?

¹² Tokniuan. Jehová noijki techyolchikaua intechkopa tokniuan. Pablo okijto ika sa kinektoya kimitas tokniuan pampa kinekiya makiyolchikauakan (Rom. 1:11, 12). Tokniuj Mary, akin otikteneujkej ipan párrafo 2, melak kuelita nemis imiuan oksekimej tokniuan. Yejua kijtoua: “Jehová yonechpaleui intechkopa tokniuan akin nion xkimatiyaj tlen nikixnamiktoya. Yejuamej onechijlikej itlaj tlen onechyolchikauj niman sekimej onechinuajtitlanilijkej seki tarjetas. Yejon melak onechpaleui. Noijki, melak nechpaleuiya ijkuak nitlajtoua imiuan oksekimej tokniuan siuamej akin noijki yokixnamijkej tlen nejua nikixnamiktok, niman miyek tlen intech niueli. Niman tokniuan tlayekankej nochipa nechititiaj ika nechpatiojkaitaj ipan tlanechikojli”.

13. ¿Kenon uelis toyolchikauaskej ipan tlanechikoltin?

¹³ Ipan tlanechikoltin uelis toyolchikauaskej. Ijkuak tiaskej, uelis tikimijliskej tokniuan ika tikintlasojtlaj niman ika tiktlasojkamatij tlen kichiuaj. Sejpa, se tokniuj tlayekanketl akin itoka Peter, ijkin okijli se tokniuj siuatl akin iueuentsin xnomachtia Biblia: “Melak techyolchikaua ijkuak nikan timitsitaj. Nochipa tikinuajuika on chikuasen mokoneuan niman yejuamej nochipa kuajli ken tlanankiliaj”. Yejua melak okitlasojkamat tlen okijlikej niman hasta ichokatoya. Yejua okinankili tokniuj tlayekanketl: “Yejon tlen amanin niknekiya nikakis”.

14. ¿Kenon techpaleuiya ijkuak titenojnotsaj?

¹⁴ Totenojnotsalis. Ijkuak titenojnotsaj, ika toyojlo tomachiliaj niman tiyolchikauij, maski tla techkakij noso xtechkakij (Prov. 11:25). Ijkon yokitak tokniuj Stacy, yejua melak onoyolkoko ijkuak se ichanejkauj okikixtijkej itech tlanechikojli niman melak najmanaya pampa xouel okipaleui. Xueliya itlaj okse kinemiliaya. ¿Tlenon okipaleui? Yejua xkeman okikajkauj ika tenojnotsa. Ijkuak ontenojnotsaya san tlanemiliaya intech akin nonekiya makinpaleuikan. Yejua kijtoua: “Ijkuak ijkon ninomachiliaya, Jehová onechpaleui maniknexti se nonomachtijkauj akin nimantsin opeuj nopatlatiuj. Yejon melak onechyolchikauj. Nikita ika melak nechpaleuiya ijkuak nontenojnotsa”.

15. ¿Tlenon techmachtia tlen okijto Mary?

¹⁵ Ipampa tlen tikixnamiktokej kanaj tikmachiliaj ika xueli titenojnotsaj ijkon ken tiknekiskiaj. San ika, matikilnamikikan ika tla tikchiuaj nochi tlen tiuelij, tikyolpaktiskej Jehová. Ijkuak Mary, akin kemach otikonteneujkej, otlapaleuito ipan tlanechikojli kampa tlajtouaj okse tlajtojli yejua kimachiliaya ika xmás tepaleuiaya. Yejua kijtoua: “Kachtopa san achijtsin tlen nikijtouaya ijkuak nitlanankiliaya ipan tlanechikojli noso san nikpouaya se itlaxelol Biblia, niman ijkuak nontenojnotsaya san niktemakaya se tratado”. Akin tlajtouaj yejon tlajtojli melak kuajli tenojnotsayaj, ika yejon, Mary kimachiliaya ika xmás tepaleuiaya. San ika, yejua okipatlak ken tlanemiliaya. Okasikamat ika Jehová ueliskia kitekitiltiskia maski xmás ueliya yejon tlajtojli, yejua kijtoua: “Tlen temachtia Biblia xouijtika niman yejon tlen kichiua miyekej manopatlakan”.

16. ¿Tlenon uelis kinpaleuis akin nemij inchan niman xueli kisaj?

¹⁶ Tla tejuamej tinemij tochan niman xueli tikisaj, kuajli matikmatstokan ika Jehová  kita niman kipatiojkaita ijkuak tejuamej tokojtiliaj titenojnotsaskej. Kanaj uelis tikinnojnotsaskej akin techtlajpiyaj noso se tepajtiketl akin techonita. Tla tikitaj ika xok ueli tikchiuaj ken yeuejkaui tikchiuayaj, kanaj uelis tajmanaskej. San ika, tla tikitaj kenon Jehová techpaleuiya, toyolchikauaskej, uelis tikxikoskej san tlenon tikixnamikiskej niman nochipa tiyolpakiskej.

17. Ken kijtoua Eclesiastés 11:6, ¿tleka noneki nochipa titenojnotsaskej maski xtikitaj kenon kinpaleuiya oksekimej?

¹⁷ Intech nochimej akin tikinnojnotsaj, tejuamej xtikmatij akinon kitlasojtlas niman kitekichiuilis Jehová (xpoua Eclesiastés 11:6). Matikitakan tlen ipan onochiuj Barbara, se tokniuj akin ikipiya ipantsin 80 xiuitl niman nochipa tenojnotsa ika teléfono niman ika carta. Ipan se icarta okitlali La Atalaya del 1 de marzo de 2014, yejuin revista kipiya se tlamachtijli tlen itoka: “¿Qué ha hecho Dios por usted?”. Maski yejua xkimatiya, icarta okititlanili se familia akin xok iteixpantijkauan Jehová katkaj. Yejuamej miyekpa okipoujkej yejuin revista. Teueuentsin okimachili kentla Jehová kinotstoya. Oksejpa opeuj yauej tlanechikoltin niman, sakin, maski yopanoka ipantsin 27 xiuitl ika xok iteixpantijkauan Jehová katkaj, oksejpa opeuj kitekichiuiliaj toTajtsin. San matikonnemilikan kenon Barbara melak onoyolchikauj niman oyolpak ijkuak okitak ika ijkon opanok. ¡Niman san ipampa se carta!

18. ¿Tlenon noneki tikchiuaskej tla tiknekij ika Jehová matechyolchikaua?

¹⁸ Ken yotikitakej, Jehová melak techyolchikaua. Yejua ika, nochipa matikchiuakan teoyotl, matikamapouakan toBiblia, matosentlalikan imiuan tokniuan niman nochipa matitenojnotsakan. Tla ijkon tikchiuaj, tikteititiskej ika tikneltokaj ika Jehová techpaleuis niman ika kinektok ijkon kichiuas. Kuakon, nochipa matopaleuikan itech toTajtsin akin “kinkojtilia on yejuan itech kitlaliaj nochi inyojlo” (2 Crón. 16:9).