1. ¿Tlenon uelis techajmanas ijkuak tipeuaskej tikinnojnotsaskej oksekimej itech Biblia?

¿TIKILNAMIKI kenon otimomachili ijkuak otikasikamat tlen melauak temachtia Biblia? Otikitak ika xouijtika tlen temachtia. Otiknemili ika nochimej kinekiskiaj ueliskiaj tlen kijtoua Biblia. Kuajli tikmatstoya ika tlen ompa ueliskiaj kinpaleuiskia manemikan ika inyojlo niman makipiyakan se nemilistli tlen xkeman tlamis (Sal. 119:105). Ika moyojlo opeuj tikinnojnotsa moamigos niman mochanejkauan itech tlen timomachtijtoya. San ika, omitsajman ijkuak otikitak ika miyekej xkinekiyaj mitskakiskej.

2, 3. ¿Nochimej otlaneltokakej itech Jesús? Xkijto tleka ijkon titlanankilia.

² Xtechmojkatlachialtia ijkuak miyekej xtechkakij ijkuak tikinnojnotsaj. Pampa maski Jesús okinchiuj miyek milagros tlen kiteititiayaj ika iKoneuj katka toTajtsin, miyekej xokineltokakej. Ijkuak Jesús okiyoliti Lázaro, miyekej itlauelikniuan okitakej. San ika, tlayekankej judíos xokineltokakej ika yejua Mesías katka. Yejuamej hasta kinekiyaj kimiktiskej Jesús niman Lázaro (Juan 11:47, 48, 53; 12:9-11).

³ Jesús kimatstoya ika miyekej xkineltokaskiaj ika yejua  Mesías katka (Juan 5:39-44). Yejua okimijli sekimej inomachtijkauan Juan Teapolaktijketl: “Dios kiteochiuas on yejuan xkeman ometlamatis san nopampa” (Mat. 11:2, 3, 6). ¿Tleka miyekej xotlaneltokakej itech Jesús?

4. ¿Tlenon tikitaskej ipan yejuin tlamachtijli?

⁴ Ipan yejuin tlamachtijli niman ipan on okse, tikitaskej tleka miyekej akin onenkej ipan kachtopa siglo xotlaneltokakej itech Jesús. Noijki, tikitaskej tleka aman miyekej xtechkakisnekij ijkuak tikinnojnotsaj. Niman tikitaskej tlenon techpaleuis más matitlaneltokakan itech Jesús niman maka matiometlamatikan.

5. ¿Tleka miyekej xokineltokakej ika Jesús yejua Mesías katka?

⁵ Miyekej xokineltokakej ika Jesús yejua Mesías katka. Maski yejuamej kitayaj ika kuajli temachtiaya niman ueliya kinchiuaya milagros, yejuamej san kitayaj ken ikoneuj se kojxinketl. Noijki, xitech otlaneltokakej pampa ualeuaya ipan se pitentsin kalpan, Nazaret. Hasta Natanael, akin sakin onochiuj inomachtijkauj Jesús, okijtoka: “¿Intech on tlakamej yejuan chantij Nazaret uelis kisas se yejuan tepaleuis?” (Juan 1:46). ¿Tleka ijkon okijto? Kanaj pampa kalpan kampa ualeuaya Jesús xmás noixmatiya. Noso kanaj pampa tlanemilijtoya ipan teotlajtojli tlen kijtoua Miqueas 5:2, kampa kijtoua ika Mesías uajtlakatiskia Belén niman xuajtlakatiskia Nazaret.

6. ¿Tlenon nonekiya kichiuaskej akin xokineltokakej ika Jesús Mesías katka?

⁶ ¿Tlenon kijtoua Biblia? Teotlajtoketl Isaías okijto ika itlauelikniuan Jesús nion xkinekiskiaj kimatiskiaj kanon ualeuaya Mesías (Is. 53:8). Miyek tlen yejuamej nonekiya kimatiskej ueliskia kinextiskej ipan teotlajtoltin. Tla yejuamej nomachtiskiaj yejon teotlajtoltin, kasikamatiskiaj ika Jesús otlakat Belén niman ika ichanejkauan ualeuayaj itech tekiuaj David (Luc. 2:4-7). Ijkon kitaskiaj ika Jesús otlakatiko kampa Miqueas 5:2 yokijtoka. Kuakon, ¿tleka xokineltokakej? Pampa xkimatiyaj nochi tlen kijtouayaj teotlajtoltin. Yejua ika, yejuamej nimantsin okijtokej ika Jesús xMesías katka.

7. ¿Tleka aman miyekej xtechkakisnekij ijkuak tikiminojnotsaj?

⁷ ¿Aman noijki ijkon panoua? Kema. Miyekej iteixpantijkauan Jehová “xonomachtijkej ipan escuela nion xuejueyixtokej” (Hech. 4:13). Ika yejon, sekimej kijtouaj ika xuelis titemachtiskej Biblia pampa xotiajkej ipan uejueyimej escuelas. Oksekimej kijtouaj ika toreligión ualeua Estados Unidos. San ika, timiyekej akin tiiteixpantijkauan Jehová nion xompa tichantij. Oksekimej yokimijlikej ika tejuamej xtikneltokaj Jesús. Desde yeuejkaui, miyekej kijtouaj ika tikimixnamikij tekiuajkej niman ika tikpaleuiyaj igobierno Estados Unidos. Akin kikakij tlen kimijliaj niman xkitaj tla yemelak, xkinekij techkakiskej ijkuak tikiminojnotsaj.

8. Itech tlen kijtoua Hechos 17:11, ¿tlenon noneki tikchiuas tla tikneki tikimixmatis iteixpantijkauan Jehová?

⁸ ¿Tlenon noneki tikchiuas tla xtikneki mamitskajkayauakan? Kuajli xmomachti. Yejon tlen okichiuj Lucas ijkuak okijkuilo iEvangelio. Yejua onomachti “nochi on tlajtlamach yejuan onochiu desde ipeuyan”. Kinekiya ika akin kipouaskiaj tlen okijkuilo makasikamatikan “nochi ken onochiu” itech Jesús (Luc. 1:1-4). Judíos akin chantiyaj Berea noijki ijkon okichiujkej. Ijkuak okiminojnotskej itech Jesús, yejuamej nimantsin okitakej Tlajkuiloltin ika Hebreo  pampa kinekiyaj kitaskej tla yemelak tlen kimijlitoyaj (xpoua Hechos 17:11). Noijki ijkon, tejua noneki tikitas tla melauak tlen mitsijliaj. Xkita tlen mitsijliaj iteixpantijkauan Jehová ika tlen kijtoua Biblia. Noijki mitspaleuis tla tikita tlen aman kichiujtokej iteixpantijkauan Jehová. Tla kuajli tomachtiaj, techpaleuis maka matechkajkayauakan.

9. ¿Tlenon opanok pampa Jesús xokinek kichiuas milagro tlen okitlajtlanilijkej?

⁹ Maski miyekej kuelitayaj ken temachtiaya Jesús, kinekiyaj okseki más makimititi. Okijlikej ika makichiua se “milagro yejuan iluikak ualeua para kitaskej ika Dios okuajtitlan” (Mat. 16:1). Yejuamej kanaj ijkon okijlikej pampa xkuajli kasikamatiyaj tlen kijtoua Daniel 7:13, 14. San ika, Jehová xikinekiya manochiua yejon teotlajtojli ipan yejon tonaltin. Yejuamej nonekiya kineltokaskej ika Jesús Mesías katka san ika tlen temachtiaya. Pampa Jesús xokichiuj milagro tlen kitlajtlaniliayaj, xitech otlaneltokakej (Mat. 16:4).

10. ¿Kenon Jesús okichiuj tlen okijto Isaías?

¹⁰ ¿Tlenon kijtoua Biblia? Isaías ijkin okijto itech Mesías: “Yejua xtsajtsis, nion xitlaj chikauak kijtos, nion xitlaj kiteijlis ipan on kalpanojtli” (Is. 42:1, 2). Jesús xkinekiya makiueyikaitakan ipampa tlen kichiuaya. Yejua xokinchijchiuj uejueyimej teopantin nion xonotlakenti ken akin uejueyixtokej niman xokinek makinotsakan ken yakaj akin ueyixtika. Ijkuak kiyolkuitijtoyaj, Jesús xokichiuj nion se milagro tlen ika ueliskia kimojkatlachialtis Herodes maski kimatiya ika ueliskia kimiktiskej (Luc. 23:8-11). Jesús okinchiuj seki milagros, san ika, kitaya ika más nonekiya tenojnotsas. Yejua okimijli inomachtijkauan: “Pampa yejua ika oniuajlaj” (Mar. 1:38).

11. ¿Kenon nokajkayauaj sekimej?

¹¹ ¿Aman noijki ijkon panoua? Kema. Miyekej kinuelitaj uejueyimej teopantin tlen kipiyaj itlaj tlen melak patioj, kintlakaitaj akin  uejueyixtokej niman kinuelitaj iluimej tlen toTajtsin xkinuelita. Akin yauej ipan yejuin teopantin, xmás kimititiaj kenon kiyolpaktiskej toTajtsin niman tlenon kineki kichiuas. San ika, akin yauej totlanechikoluan kimititiaj tlenon kuelita Jehová niman tlenon kineki matikchiuakan. Kaltin kampa tosentlaliaj xkipiyaj tlen patioj, san ika, tlachipaujkan niman kipiyaj tlen noneki. Akin tlayekanaj ipan tlanechikoltin xnotlakentiaj ken akin uejueyixtokej niman xkinueyiteneuaj. Nochi tlen titemachtiaj niman tlen tikneltokaj ualeua itech Biblia. Maski ijkon, miyekej xkineltokaj tlen titemachtiaj pampa xkuelitaj kenon tikueyichiuaj toTajtsin niman tlen tikteijliaj.

12. Ken kijtoua Hebreos 11:1, 6, ¿san itech tlenon noneki titlaneltokas?

¹² ¿Tlenon noneki tikchiuas tla xtikneki mamitskajkayauakan? Apóstol Pablo ijkin okimijli tokniuan romanos: “Se ueli tlaneltoka ijkuak kaki on temachtijli niman uajlau on temachtijli ijkuak yakaj techmachtia itechkopa Cristo” (Rom. 10:17). Tla tikneki chikauak tikpiyas motlaneltokil, noneki timomachtis Biblia, niman xnoneki tikinpanoltis iluimej tlen toTajtsin xkinuelita maski melak makualtsitsintin noso matemojkatlachialtikan. Motlaneltokil noneki chikaujtos niman noijki noneki san tikneltokas tlen melauak kijtoua Biblia. Pampa “Dios xuelis tikpaktiskej tla xitech tikpiyaj totlaneltok” (xpoua Hebreos 11:1, 6). Yejua ika, tla yakaj kineki kimatis ika yokinexti tlen melauak, xnoneki kitas se milagro tlen ualeua ne iluikak. Tla itlaj xkasikamati niman kineki chikauak kipiyas itlaneltokil, san noneki kuajli nomachtis Biblia.

13. ¿Tleka okitlauelitakej Jesús?

¹³ Inomachtijkauan Juan Teapolaktijketl omojkatlachixkej ijkuak okitakej ika inomachtijkauan Jesús xnosauayaj. Jesús okimijli inomachtijkauan ika yejuamej xnonekiya nosauaskej pampa yejua ok imiuan  nemiya (Mat. 9:14-17). Maski ijkon, fariseos niman oksekimej itlauelikniuan, okijlikej ika xkuajli tlen kichiuaya pampa xkichiuaya ijkon ken yejuamej. Melak okualankej ijkuak okitakej ika tepajtiaya ipan tonajli sábado (Mar. 3:1-6; Juan 9:16). Fariseos melak noueyimatiyaj pampa kitlakamatiyaj tlanauatijli itech tonajli sábado, san ika, yejuamej tlanemakayaj ipan teopan. Noijki melak okualankej ijkuak Jesús okimijli ika xkuajli tlen kichiujtoyaj (Mat. 21:12, 13, 15). Ijkuak Jesús otenojnots ipan sinagoga tlen onkatka Nazaret, akin okikakej melak otlauelmijkej pampa okimijli ika yejuamej katkaj ken israelitas akin nexikolejkej katkaj niman xtlaneltokayaj (Luc. 4:16, 25-30). Miyekej xotlaneltokakej itech Jesús pampa xokichiuj tlen yejuamej kinekiyaj (Mat. 11:16-19).

14. ¿Tleka Jesús okimijli itlauelikniuan ika xkuajli tlen kichiujtoyaj?

¹⁴ ¿Tlenon kijtoua Biblia? Itechkopa teotlajtoketl Isaías, Jehová okijto: “Nochi tlakatl ika itlajtol kijtoua [...] nechtlajsotla niman ika inkamak kijtouaj [...] nechtlakamatij, pero ipan inyojlo yonechtlalkauijkej, niman ijkon ken nechmauistiliaj san tlakamej okinejnemilijkej” (Is. 29:13). Melak kuajli ika Jesús okimijli itlauelikniuan ika xnonekiya kichiuaskej san tlen yejuamej yokuajnejnemilijkej. Akin san kineltokayaj tlen tlakamej yokinejnemilijkaj niman akin xkintlakamatiyaj itlanauatiluan toTajtsin, xokineltokakej Jehová nion Mesías.

15. ¿Tlenon xkuelitaj sekimej itech iteixpantijkauan Jehová?

¹⁵ ¿Aman noijki ijkon panoua? Kema. Miyekej kualanij pampa tejuamej xtikpanoltiaj cumpleaños noso Navidad, pampa tikmatij ika Jehová xkuelita. Noijki, sekimej techtlauelitaj pampa xtikinpanoltiaj iluimej tlen ika kiueyiteneuaj topaís, niman pampa xtikinchiuaj san no yejua costumbres ijkuak miki se tochanejkauj. Kanaj akin techtlauelitaj, kinemiliaj ika tlen kichiuaj kuelita toTajtsin. San ika, tla yejuamej xkinekij kikajkauaskej tlen kichiuaj niman xkinekij kitlakamatiskej Biblia, xuelis kipaktiskej Jehová (Mar. 7:7-9).

16. Ken kijtoua Salmo 119:97, 113, 163-165, ¿tlenon noneki tikchiuaskej niman tlenon ka?

¹⁶ ¿Tlenon noneki tikchiuas tla xtikneki mamitskajkayauakan? Xmokojtili xtlasojtla tlen Jehová technauatia (xpoua Salmo 119:97, 113, 163-165). Tla tiktlasojtla Jehová, xtikchiuas nion se costumbre tlen yejua xkuelita. San Jehová akin más tiktlasojtlas.

17. ¿Tlenon kinekiyaj sekimej makichiua Mesías?

¹⁷ Ijkuak Jesús nikan nemiya, sekimej kinekiyaj manopatla akin kinyekanaya. Kinekiyaj ika Mesías makinmakixti itech gobierno romano. San ika, ijkuak okinejkej kitlaliskej Jesús ken tekiuaj, yejua xokinek (Juan 6:14, 15). Sekimej itlauelikniuan, ken teopixkej, kimakasiyaj itlaj makipatla ipan política tlen kichiuaskia makualanikan romanos noso tlen kichiuaskia makinkuilikan intekiyo akin uejueyixtoyaj. Miyekej judíos xokineltokakej Jesús pampa yejua xonokalakti ipan política.

18. ¿Katlejua teotlajtoltin xkimitayaj judíos?

¹⁸ ¿Tlenon kijtoua Biblia? Melauak ika Biblia yokijtoka ika Mesías tetlaniskia ipan se guerra, san ika, noijki yokijtoka ika kachtopa nonekiya mikis niman ijkon kintlaxtlauas nochi totlajtlakoluan (Is. 53:9, 12). Kuakon, ¿tleka miyekej san no yejuamej nokajkayauayaj? Pampa san kimitayaj teotlajtoltin tlen kinpaleuiskia niman xkimitayaj on okseki  teotlajtoltin tlen kijtouayaj tlenon kichiuaskia Mesías (Juan 6:26, 27).

19. ¿Tleka miyekej xkuelitaj tlen tikchiuaj?

¹⁹ ¿Aman noijki ijkon panoua? Kema. Miyekej xkuelitaj ika xtokalaktiaj ipan política niman kijtouaj ika noneki tiktlapejpeniskej se gobierno. San ika, tejuamej tikmatstokej, ika tla tiktlapejpeniaj se gobierno ipan yejuin tlaltikpaktli, tikteititijtoskiaj ika xtiknekij ika Jehová matechyekana (1 Sam. 8:4-7). Kanaj kinemiliaj ika noneki matitepaleuikan manochijchiuakan hospitales, escuelas niman okseki tekitl. Kualanij pampa titenojnotsaj niman xtitlapaleuiyaj.

20. Ken okijto Jesús ipan Mateo 7:21-23, ¿tlenon más noneki tikchiuaskej?

²⁰ ¿Tlenon noneki tikchiuas tla xtikneki mamitskajkayauakan? (Xpoua Mateo 7:21-23). Xkilnamiki ika melak noneki tikchiuaskej tlen Jesús otechnauati (Mat. 28:19, 20, TNM). Nochipa xmokojtili titenojnotsas maski onka tlauejli ipampa política niman okseki tlemach. Akin tiiteixpantijkauan Jehová kema tikintlasojtlaj oksekimej niman intech tajmanaj, san ika, tikitaj ika más noneki tikinmachtiskej itech iTekiuajyo toTajtsin niman tikinpaleuiskej manouikakan iuan Jehová.

21. ¿Tlenon yotikijtokej tikchiuaskej?

²¹ Ipan yejuin tlamachtijli, yotikitakej naui tlemach tlen otechititi tleka miyekej xotlaneltokakej itech Jesús niman tleka aman miyekej xkineltokaj tlen tikimijliaj. Ipan okse tlamachtijli tikimitaskej okseki naui. Matokojtilikan nochipa chikauak matikpiyakan totlaneltokil niman maka itlaj matechkajkayaua.