1, 2. a) ¿Tlenon okijkuilo se ixtlamatki? b) ¿Tlenon tikitaskej ipan yejuin tlamachtijli?

MASKI aman melak miyekej tlaneltokaj itech Jesús, xkichiuaj tlen yejua otemachti (2 Tim. 4:3, 4). Se ixtlamatki ijkin okijkuilo ipan se libro: “Tla aman nemiskia okse Jesús akin kijtoskia tlen Jesús okijto [...], ¿noijki xtijkakisnekiskiaj ijkon ken miyekej yeuejkaui xokikakisnejkej? [...] Kanaj noijki ijkon tikchiuaskiaj”.

² Ipan kachtopa siglo, maski miyekej okikakkej tlen Jesús otemachti niman okitakej kenon okinchiuj milagros, xitech otlaneltokakej. ¿Tleka? Ipan tlamachtijli tlen youajpanok otikitakej tleka niman aman okseki tikitaskej itech yejon. Noijki tikitaskej tleka aman sekimej xkineltokaj tlen temachtiaj akin kichiuaj ken Cristo niman tlenon techpaleuis maka matechkajkayauakan.

3. ¿Tleka sekimej xotlaneltokakej itech Jesús?

³ Ijkuak Jesús nemiya ipan tlaltikpaktli, nochimej kuajli okiminots. Otlakua imiuan akin kipiayaj tomin niman akin uejueyixtoyaj, san ika, noijki onosentlali imiuan akin xkipiayaj tomin niman akin xmás kintlakaitayaj. Noijki, okimikneli akin miyekej kimitayaj ken tlajtlakolejkej. Sekimej akin noueyimatiyaj xotlaneltokakej itech Jesús ipampa tlen okichiuj.  Okintlajtoltijkej inomachtijkauan: “¿Tline nemejuamej nentlakuaj niman nentlaonij inuan on yejuan tlacobrarojkej ika impuestos, niman inuan on tlajtlakolejkej?”. Jesús okimijli: “On yejuan xkualoj xkimpoloua on tepajtijketl, pero on yejuan kualoj kemaj. Nejua xoniuajlaj para nikinnotsas on yejuan kuajkualtin, yej on yejuan tlajtlakolejkej para ma nokuepakan itechika Dios” (Luc. 5:29-32).

4. Itech tlen okijto teotlajtoketl Isaías, ¿tlenon xnonekiya kinmojkatlachialtis judíos?

⁴ ¿Tlenon kijtoua Biblia? Achto ika uajlaskia Mesías ipan tlaltikpaktli, Isaías okijto ika miyekej xitech tlaneltokaskiaj. Okijkuilo: “Yejua sanoyej otlajyouij, ueyi tlajyouilistli okixmat. Nion achijtsin xotiknekej otikitakej” (Is. 53:3). Yejuin teotlajtojli yokijtoka ika nion achijtsin xkinekiskiaj kitaskiaj Mesías, yejua ika, judíos akin onenkej ipan kachtopa siglo xnonekiya mojkatlachiaskiaj ijkuak kitaskiaj ika miyekej xtlaneltokayaj itech Jesús.

5. ¿Tlenon kinemiliaj miyekej itech iteixpantijkauan Jehová?

⁵ ¿Aman noijki ijkon panoua? Kema. Miyekej akin tlayekanaj ipan tlaneltokiltin kuajli kinseliaj akin kipiyaj tomin, akin ixtlamatkej niman akin uejueyixtokej, maski yejuamej xkichiuaj tlen kijtoua Biblia. Yejuin tlayekankej itech tlaneltokiltin xkintlakaitaj iteixpantijkauan Jehová, akin kitekichiuiliaj toTajtsin ika nochi inyojlo niman chipaujkanemij, pampa kimitaj ika xuejueyixtokej. Ken okijto apóstol Pablo, toTajtsin okintlapejpeni akin xkintlakaitaj (1 Cor. 1:26-29). San ika, Jehová kinpatiojkaita nochimej itekipanojkauan akin itech yolmelajkanemij.

6. ¿Tlenon okijto Jesús ipan Mateo 11:25, 26, niman kenon uelis tikchiuaskej ijkon ken yejua okichiuj?

⁶ ¿Tlenon noneki tikchiuas tla xtikneki mamitskajkayauakan? (Xpoua Mateo 11:25, 26). Maka xkauili mamitskajkayaua tlen miyekej kijtouaj itech iteixpantijkauan Jehová. Noneki tikasikamatis ika Jehová san kintekitiltia akin yolyemankej niman kinekij kitekichiuiliskej (Sal. 138:6). Noijki xkonnemili tlen yokichiuj toTajtsin itechkopa itekipanojkauan akin xixtlamatkej.

7. ¿Tleka Jesús okimijli fariseos ika omexayakyejkej, niman tlenon okichiujkej yejuamej?

⁷ Jesús xonomojti niman okimijli tlen xkuajli kichiujtoyaj tlayekankej itech tlaneltokiltin. Yejua okimijli fariseos ika omexayakyejkej pampa kijtouayaj ika más nonekiya nomajtekiskej xijkon ken kintlajpiyaskej intajuan (Mat. 15:1-11). Nesi ika inomachtijkauan Jesús melak omojkatlachixkej, yejua ika okijlikej: “¿Tikmati ika on fariseos okualankej ijkuak okakkej on tlen otikijtoj?”. Jesús okinnankili: “San katlejua xojtli noso kojtli yejuan noTajtsin iluikak chanej xokitokak, hasta ipan ineluayo kinuiuitlaskej. Maka xkinkakikan. Yejuamej ken on ciegos yejuan kinyekanaj oksekimej ciegos. Tla sen ciego kiyekanas okse ciego, nochimej on omemej onxiniskej ne kampa uejkatlan” (Mat. 15:12-14). Maski yejon tlayekankej itech tlaneltokiltin melak okualankej, Jesús nochipa okijto tlen melauak.

8. ¿Kenon okiteititi Jesús ika toTajtsin xkinselia nochi religiones?

⁸ Jesús noijki okiteijli tlen xkuajli temachtijtoyaj okseki religiones. Yejua xokijto tla toTajtsin kinselia nochi religiones. Yejua okijto ika miyekej yaskiaj ipan ojtli patlauak tlen teuika ipan tlapopolouilistli, niman ika san achijtsitsintin yaskiaj ipan ojtli pitsauak tlen teuika ipan nemilistli (Mat. 7:13, 14, TNM). Kuajli okijto ika miyekej kijtoskiaj ika kitekichiuiliaj toTajtsin, san ika, san tekajkayaujtoskiaj.  Yejua ika, okijto: “Xpiyakan cuidado de on tlakajkayajkej tiotlajtojkej yejuan kijtouaj tenojnotsaj ikan itemachtil Dios. Yejuamej uajlauij nemotech, niman nesij ken kuajli tlakamej, pero kinekij kixoxotoniskej nemotlaneltok. Nemejuamej uelis nenkintaskej tla tlakajkayajkej noso ka ika on tlen kichiuaj” (Mat. 7:15-20).

9. Xkijto seki tlen xkuajli temachtiayaj religiones tlen xmelajkej.

⁹ ¿Tlenon kijtoua Biblia? Se teotlajtojli yokijtoka ika Mesías melak kitlasojtlaskia kajli kampa kiueyichiuaj Jehová (Sal. 69:9; Juan 2:14-17). Pampa Jesús melak kitlasojtlaya iTajtsin okiteijli tlen xkuajli temachtijtoyaj on religiones tlen xmelajkej. Fariseos kineltokayaj ika tikpiyaj se alma tlen xkeman miki, san ika, Jesús otemachti ika akin yomijkej kentla kochtoskiaj (Juan 11:11). Saduceos xtlaneltokayaj itech yoliuilistli, san ika, Jesús okiyoliti iamigo Lázaro (Juan 11:43, 44; Hech. 23:8). Fariseos kineltokayaj ika ijkuak itlaj nochiuaya, ijkon panouaya pampa toTajtsin ijkon yokijtoka, san ika, Jesús otemachti ika san no tejuamej uelis tiktlapejpeniskej tla tiktekichiuiliskej toTajtsin noso ka (Mat. 11:28).

10. ¿Tleka miyekej xkuelitaj tlen titemachtiaj?

¹⁰ ¿Aman noijki ijkon panoua? Kema. Miyekej xkineltokaj tlen tikimijliaj pampa ika Biblia tikteititiaj ika xmelauak tlen temachtiaj okseki religiones. Tlayekankej itech tlaneltokiltin temachtiaj ika toTajtsin kintlajyouiltia akin xkuajkualtin ipan infierno, niman ijkon kinyekanaj tlaltikpakchanejkej ken yejuamej kinekij. Akin tiktekichiuiliaj Jehová, akin melak tetlasojtla, tikteijliaj ika yejuin xmelauak. Okseki religiones noijki temachtiaj ika tikpiyaj se alma tlen xkeman miki. Tla yejuin melauak yeskia, akin yomijkej xnonekiskia makinyolitikan. San ika, tejuamej titemachtiaj ika yejon xuajlauj ipan Biblia. Niman maski miyekej religiones kineltokaj ika toTajtsin kijtoua nochi tlen topan nochiuas, tejuamej titemachtiaj ika uelis tiktlapejpeniskej tla tiktekichiuiliskej toTajtsin noso ka. Ijkuak tejuamej ijkon tikteijliaj, tlayekankej itech tlaneltokiltin melak kualanij.

11. Itech tlen Jesús okijto ipan Juan 8:45-47, ¿tlenon kineki toTajtsin makichiuakan akin kitekichiuiliaj?

 ¹¹ ¿Tlenon noneki tikchiuas tla xtikneki mamitskajkayauakan? Tla tejua tiktlasojtla tlen melauak, noneki tikneltokas tlen toTajtsin kijtoua (xpoua Juan 8:45-47). Maka xchiua ijkon ken Satanás, xyolmelaujkanemi itech tlen melauak niman maka keman xkajkaua (Juan 8:44). ToTajtsin kineki ika akin kitekichiuiliaj makichiuakan ijkon ken Jesús okichiuj. Yejua ika kimijlia: “Xtlauelitakan on tlen xkuajli, yej xchiuakan on tlen kuajli” (Rom. 12:9; Heb. 1:9).

12. ¿Tleka miyekej judíos xotlaneltokakej itech Jesús ijkuak okimiktijkej ipan se kojtli melaktik?

¹² ¿Tlenon más okichiuj ika judíos maka matlaneltokakan itech Jesús? Pablo okijto: “Tejuamej tikteijliaj ika Cristo okipilojkej ipan kojtli melaktik, itlaj tlen judíos xkuelitaj niman akin xjudíos xueli kineltokaj” (1 Cor. 1:23, TNM). ¿Tleka yejuin okichiuj maka matlaneltokakan itech Jesús? Pampa yejuamej kinemiliayaj ika Jesús okipilojkej ipan se kojtli melaktik pampa okichiuj itlaj tlen xkuajli (Deut. 21:22, 23).

13. ¿Tlenon okichiujkej judíos akin xotlaneltokakej itech Jesús?

¹³ Judíos akin xotlaneltokakej itech Jesús okitlajtolchijchiuilijkej niman okichiuilijkej tlen xkuajli. Akin kiyolkuitijtoyaj Jesús xkuajli okitakej tla melauak tlen kijtouiliayaj. Akin teuamej katkaj itech Sanedrín nimantsin onosentlalijkej niman xokichiujkej ijkon ken tlanauatiltin kijtouayaj (Luc. 22:54; Juan 18:24). Yejuamej xkuajli okikakkej tlen ika kitlajtlakoltiayaj Jesús, niman okitejtemouilijkej “kenijki kiteixpanuiskej [...] para ijki uelis kimiktiskej”. Ijkuak xitlaj okinextilijkej, ueyi teopixki okiyejyeko ika Jesús makijto itlaj tlen ika kitlajtlakoltiskej. Yejuin itlaj tlen xnonekiya nochiuas (Mat. 26:59; Mar. 14:55-64). Niman sakin ika oyoliuj Jesús, akin teuamej itech Sanedrín “okinmakakej miyek tomin on soldados niman ijkin okinmijlijkej: ‘Xkimijlikan on tlakamej ika ijkuak tlayoua, chika nemejuamej nenkochtikatkaj,  on inomachtijkauan oualajkej niman okichtekkej itlalnakayo’” (Mat. 28:11-15).

14. ¿Tlenon yonoijtoka itech imikilis Mesías?

¹⁴ ¿Tlenon kijtoua Biblia? Maski miyekej judíos xkichiayaj ika Mesías mamiki, matikitakan tlen yokijtoka se teotlajtojli: “Onotemakak para ma kimiktikan. Niman iuan okipojkej on tlajtlakolejkej pampa yejua okinomamaltij itlajtlakol miyek tlakatl, niman impampa okichiu oración para yejuamej otlapojpoluilok intlajtlakoluan” (Is. 53:12). Ika yejon, judíos ueliskiaj kineltokaskiaj ika Jesús Mesías katka maski okipilojkej ipan se kojtli melaktik.

15. ¿Tlenon yokimijtouilijkej iteixpantijkauan Jehová?

¹⁵ ¿Aman noijki ijkon panoua? Kema. Ijkon ken Jesús, miyekej iteixpantijkauan Jehová noijki yokintlajtolchijchiuilijkej niman hasta yokintsajkej. Ne Estados Unidos, kanaj ipan xiuitl 1930 hasta 1940, ononek tiaskej ixpan tekiuajkej para tikimijliskej matechkauilikan matikueyichiuakan toTajtsin. Sekimej jueces akin ompa nemiyaj, kuajli okiteititijkej ika techtlauelitayaj. Ne Quebec (Canadá), akin católicos niman gobierno onopaleuijkej niman ijkon okichiujkej maka sa matitenojnotsakan. Miyekej tokniuan okintsajkej san pampa tenojnotsayaj itech iTekiuajyo toTajtsin. Ne Alemania, nazis okinmiktijkej miyekej tokniuan telpokamej. Ipan yejuin tonaltin, miyekej tokniuan akin chantij Rusia yokintsajkej san pampa kiteijliaj tlen kijtoua Biblia, niman noijki kimijtouiliaj ika kichiuaj tlen xkuajli. Niman hasta Traducción del Nuevo Mundo de las Santas Escrituras ika ruso xkitekauiliaj manotekitilti san pampa kitekitiltia itoka toTajtsin Jehová.

16. Itech tlen kijtoua 1 Juan 4:1, ¿tleka xnoneki tikneltokaskej nochi tlen oksekimej kijtouaj itech iteixpantijkauan Jehová?

¹⁶ ¿Tlenon noneki tikchiuas tla xtikneki mamitskajkayauakan? Kuajli xkita tla melauak tlen mitsijliaj. Ipan se itlamachtil, Jesús okijto ika sekimej kijtoskiaj “tlajtlamach tlen xmelauak” itech inomachtijkauan (Mat. 5:11). Nochi yejuin ualeua itech Satanás. Yejua kichiua ika akin techtlauelitaj matechtlajtolchijchiuilikan (Apoc. 12:9, 10). Maka xneltoka nochi tlen kijtouaj, maka mamitsmomojtikan niman maka xtlalkaui Jehová (xpoua 1 Juan 4:1).

17. ¿Kanaj tlenon okinemilijkej sekimej ijkuak okitakej ika inomachtijkauan Jesús okitlalkauijkej?

¹⁷ Achto mikis Jesús, se iapóstol okikajkayauj. Okse iapóstol yexpa okiteijli ika xkixmatiya, niman oksekimej okitlalkauijkej (Mat. 26:14-16, 47, 56, 75). San ika, nochi yejuin Jesús xokimojkatlachialti pampa yejua ikimatstoya ika ijkon panoskia (Juan 6:64; 13:21, 26, 38; 16:32). Ijkuak sekimej okitakej yejuin, kanaj okinemilijkej: “Tla ijkon kichiuaj inomachtijkauan Jesús, nejua xnikneki niyes se inomachtijkauj”.

18. ¿Katlejua teotlajtoltin onochiujkej achto ika mikiskia Jesús?

¹⁸ ¿Tlenon kijtoua Biblia? Achto ika Jesús uajlaskia ipan tlaltikpaktli, Jehová yokijtoka ika Mesías kinemakaskiaj ika 30 platajtomin (Zac. 11:12, 13). Se akin iamigo kinemakaskia (Sal. 41:9). Zacarías noijki okijkuilo: “Xkoko on tlajpixketl niman borreguitos mauijuiyan” (Zac. 13:7, TNM). Akin kipiyaskiaj kuajli inyojlo, tlaneltokaskiaj itech Jesús maski yejua okixnamik nochi yejuin. Niman intlaneltokil más chikauiskia ijkuak kitaskiaj ika nochi teotlajtoltin tlen yonoteneujkaj itech Mesías yonochiujkaj.

19. ¿Tlenon kuajli kimatstokej akin chikaujtok intlaneltokil?

¹⁹ ¿Aman noijki ijkon panoua? Kema. Sekimej iteixpantijkauan Jehová akin melak kimixmatij  yokikaujkej tlanechikojli, kiteijliaj tlen xmelauak itech ikalpan toTajtsin niman kiyejyekouaj ika oksekimej noijki ijkon makichiuakan. Ipan Internet, radio noso televisión, yejuamej kiteijliaj tlen xkuajli noso kijtouaj tlen xmelauak itech ikalpan toTajtsin. San ika, akin chikaujtok intlaneltokil xkinokauiliaj makinkajkayauakan pampa kuajli kimatstokej ika Biblia yokijtoka ika ijkon nochiuaskia (Mat. 24:24; 2 Ped. 2:18-22).

20. ¿Tlenon mitspaleuis maka mamitskajkayauakan akin yokiskej itech ikalpan toTajtsin? (2 Timoteo 4:4, 5).

²⁰ ¿Tlenon noneki tikchiuas tla xtikneki mamitskajkayauakan? Tla tikneki machikaujto motlaneltokil, noneki mojmostla timomachtis Biblia, tikchiuas teoyotl niman titenojnotsas ijkon ken Jehová yotechnauati (xpoua 2 Timoteo 4:4, 5). Tla chikauak motlaneltokil, xtimomojtis ijkuak tijkakis ika kijtouiliaj itlaj tlen xkuajli ikalpan toTajtsin (Is. 28:16). Tla tiktlasojtla Jehová, Biblia niman tokniuan akin nemij ipan tlanechikojli mitspaleuis maka mamitskajkayauakan akin yokiskej itech ikalpan toTajtsin.

21. ¿Tlenon uelis kuajli tikmatstoskej maski miyekej xtechkakisnekij?

²¹ Ipan kachtopa siglo, miyekej xotlaneltokakej itech Jesús. San ika, sekimej kema itech otlaneltokakej. Hasta se akin teuan katka itech Sanedrín niman miyekej teopixkej otlaneltokakej itech Jesús (Hech. 6:7; Mat. 27:57-60; Mar. 15:43). Aman, noijki miyekej yokijtokej kichiuaskej ijkon ken Jesús. ¿Tleka? Pampa kixmatij tlen melauak temachtia Biblia niman kitlasojtlaj. ITlajtol toTajtsin kijtoua: “Yejuan melauak kitlajsojtlaj moleyes, kipiyaj yolseuilistli, niman xitlaj ika uetsij ipan on tlen xkuajli” (Sal. 119:165).