1. ¿Tlenon noneki tiktlapejpeniskej?

 TEJUA, ¿tlenon tikchiuas? ¿Tikpaleuis Jehová akin san yejua kimelaua tlayekanas, noso tikpaleuis Satanás, itlauelikniuj toTajtsin? Sa no tejua noneki tiktlapejpenis tla tikneki nochipa tinemis noso ka (Mat. 25:31-33, 46). Ipan ueyi tlajyouilistli, nochimej itekipanojkauan Jehová akin itech melajkanemiskej, kintlaliliskej se neskayotl niman ijkon xkinpopoloskej (Apoc. 7:14; Ezeq. 9:4, 6). Niman, nochimej akin kipiyaskej ineskayo on xkuajli yolki, kinpopoloskej (Apoc. 14:9-11).

2. a) ¿Tlenon technauatia Hebreos 10:35-39? b) ¿Kenon techpaleuis amoxtli Apocalipsis?

² (Xpoua Hebreos 10:35-39). Melak kuajli tla tejua itikpaleuijtika iTekiuajyo Jehová. Tikmatstokej ika aman tikneki tikinpaleuis oksekimej para noijki ijkon makichiuakan. Apocalipsis uelis mitspaleuis ijkon xchiua pampa ompa techijlia tlenon inpan nochiuas akin xkitlakamatij Jehová niman noijki kijtoua kenon kinteochiuaskej akin melajkanemij. Tla kuajli tomachtiaj amoxtli Apocalipsis, techpaleuis más kuajli matiktekichiuilikan Jehová niman matikinyolchikauakan oksekimej para noijki makipaleuikan iTekiuajyo Jehová.

3. ¿Tlenon tiknankiliskej ipan yejuin tlamachtijli?

 ³ Ipan yejuin tlamachtijli tiknankiliskej yejuin: ¿kenon kinteochiuas Jehová akin kipaleuiyaj iTekiuajyo? niman ¿tlenon inpan nochiuas akin kipaleuiyaj yejon xkuajli yolki chichiltik tlen noteneua ipan Apocalipsis?

4. ¿Akinomej okimitak apóstol Juan ipan se tlatlachalistli?

⁴ Apóstol Juan okitak ipan se tlatlachalistli ome grupos akin kipaleuiyaj iTekiuajyo Jehová niman noijki okitak kenon kiseliaj nemilistli tlen xkeman tlamis niman miyek tlateochiualistin. Uan kachtopa grupo xmiyekej, san 144,000 (Apoc. 7:4). Maski yejuamej san tlaltikpakchanejkej, okintlapejpenijkej para yaskej iluikak niman ijkon iuan tekiuajtiskej Jesús niman iuan tlayekanaskej ipan tlaltikpaktli (Apoc. 5:9, 10; 14:3, 4). Juan kita ika yejuin grupo nemi iuan Jesús ipan tepetl Sion, tlen onka iluikak (Apoc. 14:1).

5. ¿Tlenon inpan nochiuas tlapejpeniltin akin ok nikan nemiskej?

⁵ Yejon 144,000 yokinuajtlapejpenijtiajkej desde ijkuak nemiyaj apóstoles hasta aman (Luc. 12:32; Rom. 8:17). San ika, Juan okijlikej ika ipan itlamiyan tonaltin sekimej tlapejpeniltin ok nemiskiaj ipan tlaltikpaktli. Achto ika peuas ueyi tlajyouilistli, tlapejpeniltin akin ok nikan nemiskej, kiseliskej “sen sello” tlen kiteititis ika Jehová yokintlapejpeni para matekiuajtikan iuan Jesús (Apoc. 7:2, 3; 12:17). Kuakon, ijkuak panotos ueyi tlajyouilistli, yejuin tlapejpeniltin yaskej iluikak niman onnosentlaliskej imiuan oksekimej tlapejpeniltin akin iompa nemij. Ijkon, yejuin 144,000 tekiuajtiskej iuan Jesús ipan iTekiuajyo toTajtsin (Mat. 24:31; Apoc. 5:9, 10).

6, 7. a) ¿Katlejua okse grupo okitak Juan, niman akinomej yejon grupo? b) ¿Tleka tinochimej noneki kuajli tikitaskej tlen kijtoua Apocalipsis capítulo 7?

⁶ Biblia kijtoua ika Juan noijki okitak okse grupo kampa nemiya “sanoyej miyek tlakatl” (Apoc. 7:9, 10). ¿Tlenon tikmatij itech yejuin grupo? Juan okijlikej: “In yejuamej on yejuan youajkiskej ipan on temojtij tlajyouilistli. Niman yejuamej okimpakkej intlakeuan niman okimistalijkej ikan iyesyo on Borreguito” (Apoc. 7:14). Sakin ika yopanok ueyi tlajyouilistli, yejuin grupo, kampa nemi “sanoyej miyek tlakatl”, chantis ipan tlaltikpaktli niman toTajtsin melak kiteochiuas (Sal. 37:9-11, 27-29; Prov. 2:21, 22; Apoc. 7:16, 17).

⁷ Nochimej akin yaskej iluikak niman nochimej akin nokauaskej nikan ipan tlaltikpaktli noneki kuajli kitaskej tlen kijtoua Apocalipsis capítulo 7. ¡Melak kualtsin tlen kitaskej itekipanojkauan Jehová ika tlayekapan! Ijkuakon, akin tikpaleuiyaj iTekiuajyo toTajtsin melak tiyolpakiskej. Matikitakan tlenon más kijtoua Apocalipsis itech tlen panos ipan ueyi tlajyouilistli (Mat. 24:21).

8. ¿Kemanon peuas ueyi tlajyouilistli, niman tlenon kichiuaskej tlaltikpakchanejkej?

⁸ Ken otikitakej ipan okse tlamachtijli, gobiernos kixnamikiskej Ueyixtika Babilonia noso nochi religiones tlen xmelajkej (Apoc. 17:16, 17). Ijkuak kixnamikiskej, ijkuakon peuas ueyi tlajyouilistli. Niman ¿tlenon kichiuaskej tlaltikpakchanejkej? ¿Nopaleuiskej itech Jehová? Ka, yejuamej xijkon kichiuaskej. Ipan Apocalipsis capítulo 6 kijtoua ika nopaleuiskej itech “tepemej”. ¿Tlenon kijtosneki? Ika tlaltikpakchanejkej nopaleuiskej itech gobiernos niman itech tomin.  Ika yejon, Jehová kimitas ken itlauelikniuan pampa xkipaleuiskej iTekiuajyo (Luc. 11:23; Apoc. 6:15-17).

9. ¿Tleka miyekej kitaskej tlen kichiuaj iteixpantijkauan Jehová ipan ueyi tlajyouilistli, niman tlenon panos?

⁹ Ijkuak panotos ueyi tlajyouilistli, ipan tlaltikpaktli san iteixpantijkauan Jehová kitekichiuilijtoskej toTajtsin niman xkinekiskej kipaleuiskej on “xkuajli yolki” (Apoc. 13:14-17). Miyekej san kitstoskej tlen kichiuaj. Niman itlauelikniuan toTajtsin melak kualaniskej ijkuak kitaskej ika xkinekij kinpaleuiskej gobiernos. Biblia kijtoua ika ijkuakon Gog de Magog, noso miyekej kalpamej, kimixnamikiskej itekipanojkauan toTajtsin ipan nochi tlaltikpaktli (Ezeq. 38:14-16).

10. Ijkon ken kijtoua Apocalipsis 19:19-21, ¿tlenon kichiuas Jehová ijkuak kitas ika ikixnamiktokej ikalpan?

¹⁰ ¿Tlenon kichiuas Jehová ijkuak kitas ika ikixnamiktokej ikalpan? Yejua kijtoua: “Melak nikualanis” (Ezeq. 38:18, 21-23, TNM). Ipan Apocalipsis capítulo 19 kijtoua ika Jehová kuajtitlanis iKoneuj niman ijkon makipaleui ikalpan niman makinpopolo itlauelikniuan. Niman, ijkuak Jesús tlaixnamikis, noijki kipaleuiskej “miyekej iluikaksoldados”, kijtosneki iluikaktekitkej niman 144,000 tlapejpeniltin (Apoc. 17:14; 19:11-15). Niman ¿tlenon panos ipan yejon guerra? Kinmiktiskej niman kinpopoloskej nochimej akin kixnamikij Jehová (xpoua Apocalipsis 19:19-21).

11. ¿Tlenon panos tlen más techyolpaktis?

¹¹ San matikonnemilikan kenon melak yolpakiskej itekipanojkauan Jehová ijkuak kitaskej ika yokinpopolojkej intlauelikniuan. Ne iluikak noijki melak yolpakiskej ijkuak kitaskej ika yokipopolojkej “Ueyixtikaj Babilonia”. San ika, onka itlaj okse tlen más kinyolpaktis (Apoc. 19:1-3). Ipan Apocalipsis kijtoua ika más yolpakiskej “ijkuak nonamiktis on Borreguito” (Apoc. 19:6-9).

12. ¿Kemanon “nonamiktis on Borreguito”? (Apocalipsis 21:1, 2).

¹² ¿Kemanon “nonamiktis on Borreguito”? Yejua xnonamiktis achto peuas Armagedón, maski yejon 144,000 inemiskej ne iluikak (xpoua Apocalipsis 21:1, 2). Yejua nonamiktis ijkuak yopanok Armagedón, ijkuak yokinpopolojkej nochimej itlauelikniuan toTajtsin (Sal. 45:3, 4, 13-17).

13. ¿Iuan akinon “nonamiktis on Borreguito”, niman tlenon kijtosneki?

¹³ ¿Iuan akinon “nonamiktis on Borreguito”? Ijkon ken ijkuak nonamiktia se tlakatl niman se siuatl, Jesús kentla noijki nonamiktiskia imiuan yejon 144,000. ¿Tlenon kijtosneki yejuin? Ika yejuamej san sekan peuaskej tekiuajtiskej mil xiuitl ipan yejuin tlaltikpaktli (Apoc. 20:6).

14, 15. ¿Tlenon kijtoua Apocalipsis 21 intech yejon 144,000? (Xkita tlaixkopinajli tlen onka ixpan yejuin revista).

¹⁴ Ipan Apocalipsis capítulo 21, kijtoua ika yejon 144,000 yeskiaj kentla se “yenkuik [...] ueyikalpan Jerusalén” (Apoc. 21:2, 9). ¿Kenon tlachijchiujtli yejuin ueyikalpan? Biblia kijtoua ika “kampa peua icimiento itepanchinan on ueyikalpan, onkatkaj majtlaktli uan ome temej. Niman ipan cada tetl tlajkuilolnestikatka sen itoka de on majtlaktli uan ome iapóstoles on Borreguito”. Kanaj yejuin melak okimojkatlachialti Juan pampa okitak ika ompa ijkuiliujtoya itoka. ¡San matikonnemilikan kenon melak oyolpak! (Apoc. 21:10-14; Efes. 2:20).

 ¹⁵ Yejuin yenkuik kalpan melak kualtsin. Iojui kampa melak nouijtilo tlachijchiujtli ika oro, 12 puertas tlen kinpiya tlachijchiujtli ika perlas, itepanuan kinpiya kualtsitsintin temej niman yejuin kalpan melak kualtsin tlatemachiujtli (Apoc. 21:15-21). San ika, Juan okitak ika itlaj poliuiya. Yejua kijtoua: “Nion sen tiopan xonikitak ipan on ueyikalpan, pampa toTEKO Dios yejuan nochi ueli kichiua niman on Borreguito, sano yejuamej tiopan. On ueyikalpan xkipoloua tonaltsintli nion metstli para kitlauiluiyaj, pampa iueyilis Dios kitlauiluiya, niman on Borreguito yejua itlauil on ueyikalpan” (Apoc. 21:22, 23). Akin nemiskej ipan “yenkuik [...] ueyikalpan Jerusalén” uelis yaskej hasta kampa Jehová nemi (Heb. 7:27; Apoc. 22:3, 4). Ika yejon, Biblia kijtoua ika Jehová niman Jesús sa no yejuamej teopan.

16. ¿Kenon kinteochiuaskej itekipanojkauan toTajtsin ipan mil xiuitl ijkuak tekiuajtis iTekiuajyo toTajtsin?

¹⁶ Tokniuan tlapejpeniltin melak yolpakij ijkuak tlanemiliaj itech yejuin yenkuik kalpan. San ika, akin tinemiskej nikan ipan tlaltikpaktli noijki noneki itech titlanemiliskej. ¿Tleka? Pampa ipan mil xiuitl, ijkuak tekiuajtitos iTekiuajyo toTajtsin, “yenkuik [...] ueyikalpan Jerusalén” melak kinteochiuas akin nemiskej ipan tlaltikpaktli. Juan noijki okitak se “río yejuan kipiya on atl de nemilistli. […] Niman inajnakastlan on río, onkatka on kojtlakijlotl yejuan kitemaka nemilistli. […] Niman ixojyo kitekitiltiayaj ken pajtli para ika nopajtiayaj on países” (Apoc. 22:1, 2). ¿Tlenon kijtosneki tlen okitak? Ika itekipanojkauan toTajtsin melak kinteochiuaskej ipan yejon tonaltin. Niman ijkuak tlamis mil xiuitl, nochimej akin okitlakamatkej Jehová xok kipiyaskej tlajtlakojli, xok kualoskej, xok najmanaskej nion xok ajmankachokaskej (Apoc. 21:3-5).

17. ¿Akinomej nemiskej ipan yenkuik tlaltikpaktli? (Apocalipsis 20:11-13).

¹⁷ ¿Akinomej nemiskej ipan yenkuik tlaltikpaktli? Itekipanojkauan toTajtsin akin makisaskej ipan Armagedón niman kokonej akin uajnemiskej ipan yenkuik tlaltikpaktli. San ika, ipan Apocalipsis capítulo 20 kijtoua ika akin yomijkej noijki yoliuiskej (xpoua Apocalipsis 20:11-13). Niman ¿akinomej yoliuiskej? Akin “yolmelajkej” noso itekipanojkauan toTajtsin akin itech omelajkanenkej.  Noijki yoliuiskej akin “xyolmelajkej” noso akin xkeman okixmatkej Jehová (Hech. 24:15; Juan 5:28, 29). Kuakon, ¿nochimej mijkatsitsintin yoliuiskej ipan yejon mil xiuitl? Ka. Akin okixmatkej toTajtsin niman xokinejkej okitekichiuilijkej noso xokinejkej kikajkauaskej tlen xkuajli, yejuamej xok kinyolitiskej. ¿Tleka? Pampa ijkuak yoltoyaj okiteititijkej ika xkinekiyaj nemiskej ipan se kualtsin xochitlalpan (Mat. 25:46; 2 Tes. 1:9; Apoc. 17:8; 20:15).

18. ¿Kenon nemiskej tlaltikpakchanejkej itlamiyan mil xiuitl?

¹⁸ Ijkuak tlamis mil xiuitl, nochimej akin nemiskej ipan tlaltikpaktli xok kipiyaskej tlajtlakojli tlen Adán otechkauilijteuj (Rom. 5:12). Ijkuakon xok yakaj tlajyouis pampa kuajli popoliuis itlajtlakol Adán. Uelis tikijtoskej ika ijkuak tlamis mil xiuitl, nochimej tlaltikpakchanejkej kentla oksejpa yoliuiskiaj pampa aman xok kipiyaskej tlajtlakojli niman aman kema ika inyojlo nemiskej (Apoc. 20:5).

19. ¿Tleka techtlatlataskej ijkuak tlamis mil xiuitl?

¹⁹ Tikmatstokej ika Jesús nochipa omelajkanen maski Satanás melak okitlatlatak. San ika ¿noijki ijkon kichiuaskej tlaltikpakchanejkej? ¿Noijki melajkanemiskej ijkuak Satanás kintlatlatas? Yejuin noitas ijkuak tlamis mil xiuitl, ijkuak Satanás kimakauaskej niman tetlatlatas (Apoc. 20:7). Akin melajkanemiskej itech toTajtsin nochipa ika inyojlo nemiskej niman xok keman mikiskej (Rom. 8:21). San ika, akin kixnamikiskej toTajtsin, kinpopoloskej ijkon ken Satanás niman idemonios (Apoc. 20:8-10).

20. ¿Kenon timomachilia aman ika yotikimitak teotlajtoltin tlen uajnestiuej ipan amoxtli Apocalipsis?

²⁰ ¿Kenon timomachilia aman ika yotikitak tlen kijtoua amoxtli Apocalipsis? ¿Tiyolpaki pampa tikita ika inochiujtokej teotlajtoltin tlen kijtoua yejuin amoxtli? ¿Tikneki tikimijlis oksekimej noijki makiueyichiuakan Jehová? (Apoc. 22:17). Kuajli tikmatstokej ika melak tiyolpaki ijkuak tiknemilia tlen panos ika tlayekapan niman, ika nochi moyojlo tikijtoua ijkon ken apóstol Juan: “Ma ijki nochiua. ¡Xuajla toTEKO Jesús!” (Apoc. 22:20).