1, 2. ¿Tleka seki textos peuaj más techpaleuiyaj?

 YOAJSIK yejon tonajli ijkuak novio niman novia nonamiktiskej. Yejuamej melak kuajli yonotlakentijkej, niman aman kuajli kikaktokej nochi tlen tokniuj kimijlia ipan itlamachtil. Yejuamej miyekpa yokinkakkaj yejon textos tlen kinpouilijtokej, san ika, aman más kuajli kinkakij pampa kimatstokej ika desde aman san sekan kichiuaskej tlen kijtouaj yejon textos.

² Noijki ijkon panoua ijkuak se kinpiya ikoneuan. Kanaj akin yononamiktijkej noijki miyekpa kinkakinij tlamachtiltin kampa kijtouaj kenon tatajtin noneki kimiskaltiskej inkoneuan. San ika, ijkuak kinpiyaj inkoneuan, más kuajli kinkakij yejon tlamachtiltin. ¿Tleka? Pampa kimatstokej ika noneki kuajli kimiskaltiskej inkoneuan. ¡Jehová yokinmakak tatajtin se ueyi tekitl! ¿Tlenon techmachtia yejuin? Ika ijkuak itlaj nopatla ipan tonemilis, tikitaj ika seki textos peuaj más kuajli techpaleuiyaj. Ika yejon, akin tiktekichiuiliaj Jehová, “mojmostla” tikpouaj Biblia niman itech titlanemiliaj, ijkon ken kichiuayaj tekiuajkej akin nemiyaj Israel (Deut. 17:19).

3. ¿Tlenon tikitaskej ipan yejuin tlamachtijli?

 ³ Tatajtin, nemejuamej nenkipiyaj se kualtsin tekitl: nenkinpaleuiskej nemokoneuan makixmatikan Jehová. San ika, xsan noneki nenkimijliskej kenon toTajtsin, ka, noneki nenkinpaleuiskej makitlasojtlakan Jehová ika nochi inyojlo. Ika yejon, ipan yejuin tlamachtijli tikimitaskej naui textos tlen melak mechpaleuiskej (2 Tim. 3:16). Noijki tikitaskej kenon sekimej tokniuan yokinpaleuijkej inkoneuan.

4. ¿Katlejua texto uelis kinpaleuis tatajtin makinpaleuikan inkoneuan makitlasojtlakan Jehová? (Santiago 1:5).

⁴ Kachtopa: xtlajtlanilikan Jehová mamechpaleui (xpoua Santiago 1:5). Xtlajtlanilikan Jehová tlamachilistli niman ijkon uelis nenkinpaleuiskej nemokoneuan makitlasojtlakan ika nochi inyojlo. San Jehová uelis mechpaleuis. ¿Tleka? Pampa Jehová noijki tajtli niman san yejua akin más youejkauj nemi (Sal. 36:9). Noijki, kuajli nenkimatstokej ika nochi tlen techijlia ipan Biblia melak techpaleuiya (Is. 48:17).

5. a) ¿Kenon Jehová kinpaleuiya tatajtin? b) ¿Tlenon mitsititia tlen okichiujkej tokniuan Amorim?

⁵ Jehová kineki ika mokoneuan noijki makitlasojtlakan, ika yejon, yomechmakak Biblia. Niman ikalpan noijki yomechinmakak miyek amatlajkuiloltin tlen ika uelis nenkinpaleuiskej nemokoneuan (Mat. 24:45). Ken ipan jw.org uelis nenkinextiskej tlen mechpaleuis, uelis nenkalakiskej kampa kijtoua TLAMACHTILTIN ITECH BIBLIA > NAMIKTILISTLI NIMAN FAMILIA. Noijki, ipan jw.org, nenkinextiskej videos tlen mechpaleuis kuajli xkinmachtikan nemokoneuan (Prov. 2:4-6). *

6. ¿Tlenon kijtoua se tajtli itech tlen kinmaka ikalpan Jehová?

⁶ Miyekej tatajtin melak kitlasojkamachiliaj Jehová pampa ikalpan kinmaka tlen ika uelis kinmachtiskej inkoneuan. Se tajtli akin itoka Joseph kijtoua: “Tejuamej tikinpiyaj yeyimej tokoneuan. Kemantika ouijtika tikitas tikimiskaltis mokoneuan ipan ikalpan Jehová, ika yejon, nosiuauj niman nejua  nochipa tiktlajtlaniliaj Jehová matechpaleui. Miyekpa tikitanij ika ijkuak tiktejtemojtokej itlaj tlen ika uelis tikinpaleuiskej tokoneuan, ikalpan Jehová kikixtia se tlamachtijli noso se video tlen melak techpaleuiya. Kuajli yotikitakej ika Jehová melak yotechpaleui”. Joseph niman isiuauj yokitakej ika yejon tlamachtiltin niman videos melak yokinpaleui inkoneuan más manouikakan iuan Jehová.

7. ¿Tleka tatajtin noneki nokojtiliskej kichiuaskej tlen kinmachtiaj inkoneuan? (Romanos 2:21).

⁷ Ika ome: xchiuakan tlen nenkinmachtiaj nemokoneuan (xpoua Romanos 2:21). Kokonej nochipa kichiuaj tlen kimituiliaj intajuan. Kemantika tatajtin nopopolouaj, san ika, kuajli tikmatstokej ika kema uelis kichiuaskej tlen kinmachtiaj inkoneuan (Rom. 3:23). Se tajtli okijto: “Kokonej yeskiaj kentla ichkatl, nochi kichichinaj. Niman ijkuak yejuamej kitaj ika xtikchiuaj tlen tikinmachtiaj, yejuamej techixkoijliskej”. Kuakon, tla tikneki ika mokoneuan makitlasojtlakan Jehová, kachtopa tejua noneki tikimititis ika melak tiktlasojtla.

8, 9. ¿Tlenon mitsmachtia tlen okijtojkej Andrew niman Emma?

⁸ Onka miyek ken uelis nenkinmachtiskej nemokoneuan makitlasojtlakan Jehová. Matikitakan tlen kijtoua Andrew, akin kipiya 17 xiuitl niman yonoapolakti. Yejua kijtoua: “Notajuan onechmachtijkej ika melak noneki maniknotsa Jehová. Ijkuak inikochiskia, notaj nochipa nouan kichiuaya teoyotl maski nejua yonikchiujka. Notaj niman nonan techijliayaj: ‘Nemejuamej uelis miyekpa nenkinotsaskej Jehová’. Ika yejon, nochipa niknotsa Jehová. Niman ijkuak niknotsa, nikita ken se notaj akin melak nechtlasojtla”. Tatajtin, xkilnamikikan ika tla nemejuamej nenkitlasojtlaj Jehová, nemokoneuan noijki kitlasojtlaskej.

⁹ Aman matikitakan tlen ipan opanok Emma. Yejua kijtoua: “Ijkuak notaj otechkaujteuj, nonan ononek kitlaxtlauas nochi tlen kiteuikiliaya notaj. Miyekpa nikitaya ika nonan xkajxiliaya itomintsin, san ika, yejua nochipa techijliaya ika Jehová kintlajpiya itekipanojkauan niman kinmaka tlen ika nopanoltiskej. Niman tlen kichiuaya nechititiaya ika kineltokaya tlen techijliaya. Noijki, nonan nochipa okichiuj tlen techmachtiaya”. ¿Tlenon kinmachtia tatajtin? Ika nochipa uelis kichiuaskej tlen kinmachtiaj inkoneuan, maski kemantika kipiyaskej tlauejli (Gál. 6:9).

10. ¿Kemanon tlajtlajtouayaj israelitas imiuan inkoneuan? (Deuteronomio 6:6, 7).

¹⁰ Ika yeyi: imiuan xtlajtlajtokan nemokoneuan (xpoua Deuteronomio 6:6, 7). Israelitas nonekiya mojmostla kinnojnotsaskej inkoneuan itech Jehová pampa yejua ijkon okinnauati. Tatajtin nochipa nemiyaj imiuan inkoneuan, ika yejon, ueliyaj imiuan tlajtlatouayaj niman kinmachtiayaj kenon nonekiya kitlasojtlaskej Jehová. Telpokatsitsintin nochipa nemiyaj imiuan intaj pampa imiuan tokayaj niman pixkayaj. Niman ichpokatsitsintin nochipa nemiyaj inchan imiuan innan, yejuamej san sekan tlajtsomayaj noso tlasalouayaj. Ken tikitaj, yejuamej ueliyaj kimijliayaj inkoneuan kenon yokintlasojtlaka Jehová niman kenon yokinpaleuijka inchanejkauan.

11. ¿Kemanon ueliskiaj tlajtlajtoskej tajtin imiuan inkoneuan?

¹¹ Aman xok ijkon panoua ken yeuejkaui. Aman miyekej tatajtin xok más kimitaj inkoneuan pampa tekitij, niman inkoneuan yauej escuela. Ika yejon, tatajtin noneki  kixeloskej tiempo niman ijkon nemiskej imiuan inkoneuan niman imiuan tlajtlajtoskej (Efes. 5:15, 16; Filip. 1:10). Niman yejon uelis kichiuaskej ijkuak san sekan kiueyichiuaj toTajtsin ken familia. Se telpochkonetl akin itoka Alexander kijtoua: “Notaj nochipa kixeloua tiempo niman ijkon san sekan tikueyichiuaskej toTajtsin ken familia, niman xkikauilia itlaj matechtelti. Tla yotomachtijkej, aman peua titlajtlajtouaj”.

12. ¿Tlenon noneki kichiuas akin kiyekana ifamilia?

¹² ¿Tlenon uelis kichiuas akin kiyekana ifamilia niman ijkon ikoneuan makuelitakan ijkuak kiueyichiuaskej toTajtsin ken familia? Uelis nomachtiskej libro ¡Nochipa uelis tiyolpakis! Tla nemomachtiaj yejuin libro, kanaj nemokoneuan uelis mechijliskej tlen kinemiliaj. San ika, maka xkinchikajkanotsakan noso maka xkinmajuakan ijkuak nenkiueyichiuaskej toTajtsin ken familia, pampa tla ijkon nenkichiuaj, xok mechijliskej tlen kimajmana noso tlen kinemiliaj. Noijki, maka xkualanikan tla mechijliaj itlaj tlen xuajlauj ipan Biblia, ka, ¡maka ijkon xchiuakan! Yej xkimijlikan ika nenkitlasojkamatij pampa mechijliaj tlen kinemiliaj niman xkinyolchikauakan ijkon makichiuakan. Xkilnamikikan ika san uelis nenkinpaleuiskej nemokoneuan tla nenkimatij tlen kinemiliaj.

13. ¿Kenon tatajtin uelis más kinpaleuiskej inkoneuan makinisiuikan Jehová?

¹³ Tatajtin, mojmostla xkitakan kenon uelis más nenkinpaleuiskej nemokoneuan makinisiuikan Jehová. Xnochipa noneki nenkikuiskej Biblia para nenkinmachtiskej nemokoneuan itech Jehová. Se nantli akin itoka Lisa kijtoua: “Tejuamej tikinpaleuiayaj tokoneuan más makixmatikan Jehová ika tlen yejua okichijchiuj. Ijkuak totskui itlaj kichiuaya niman kinuetskitiaya tokoneuan, tikimijliayaj ika Jehová noijki yolpaki niman ika kineki ika toyojlo matinemikan”.

14. ¿Tleka noneki tatajtin makinpaleuikan inkoneuan kuajli makintlapejpenikan akinon imiuan nouikaskej? (Proverbios 13:20).

¹⁴ Ika naui: xkinpaleuikan nemokoneuan kuajli makintlapejpenikan akin imiuan nouikaskej (xpoua Proverbios 13:20). Biblia  kuajli techijlia ika akin imiuan touikaj uelis techpaleuiskej noso techijtlakoskej. Tatajtin, ¿nenkimatij imiuan akinon nouikaj nemokoneuan? ¿Kuajli nenkimixmatij noso imiuan yonennenkaj? ¿Tlenon uelis nenkichiuaskej tla nenkinekij ika nemokoneuan manouikakan imiuan akin kitlasojtlaj Jehová? (1 Cor. 15:33). Ijkuak itlaj nenkichiuaskej imiuan nemokoneuan, xkinnotsakan tokniuan akin kuajli nouikaj iuan Jehová (Sal. 119:63).

15. ¿Tlenon uelis kichiuaskej tatajtin tla kinekij ika inkoneuan manouikakan imiuan akin kitlasojtlaj Jehová?

¹⁵ Matikitakan kenon sekimej tatajtin kinpaleuiyaj inkoneuan makinnextikan akinon imiuan nouikaskej. Tony kijtoua: “Ijkuak tikueyichiuaj Jehová ken familia, nosiuauj niman nejua tikinnotsaj tokniuan tlakamej, siuamej, akin iuejueyimej, akin xiuejueyimej niman akin oksekan ualeuaj niman imiuan titlakuaj. Ijkuak ijkon tikchiuaj, más tikimixmatij tokniuan niman tikitaj kenon kitlasojtlaj Jehová niman kenon chikauak kitekichiuiliaj. Tochan noijki yonokaujkaj tokniuan akin kintlajpalouaj tlanechikoltin, misioneros niman oksekimej tokniuan. Yotikitakej ika tlen techijliaj niman tlen kichiuaj yejuin tokniuan yokinpaleui tokoneuan más makinisiuikan Jehová”. ¿Tlenon kinmachtia tatajtin? Ika noneki kinpaleuiskej inkoneuan makinpiyakan inamigos akin kitlasojtlaj Jehová.

16. ¿Tlenon noneki kilnamikiskej tatajtin tla se inkoneuj xkineki kitekichiuilis Jehová?

¹⁶ ¿Niman tla mokoneuj xkineki kitekichiuilis Jehová maski tejua melak yotimokojtili kuajli tikmachtis? Maka xmotlajtlakolti. Jehová nochimej yokinkauili, hasta mokoneuan, makitlapejpenikan tla kinekij kitekichiuiliskej noso ka. Tla mokoneuj kitlalkauiya Jehová, maka xmosiaujkaua niman xkilnamiki ika yejua uelis itech uajnokuepas. Xkilnamiki tlen okichiuj se telpochtli akin Jesús okiteneuj (Luc. 15:11-19, 22-24). Yejuin telpochtli okitlalkaui itaj niman okichiuj tlen xkuajli, san ika, sakin oksejpa onokuep ichan itaj. Kanaj tikijtoua: “Yejon  san se cuento. Yejon xpanoua”. Tlen okichiuj Elie techititia ika kema ijkon panoua.

17. ¿Tlenon mitsmachtia tlen ipan onochiuj Elie?

¹⁷ Elie kijtoua: “Notajuan melak kuajli onechmachtijkej Biblia niman nechpaleuiayaj maniktlasojtla Jehová. San ika, ijkuak onitelpochtiak, xok nikintlakamatiya notajuan niman xok niknekiya ninomachtis”. Elie opeuj kichiua tlen xkuelita toTajtsin niman xkinekiya makipaleuikan itajuan. Sakin okis de ichan niman okitlalkaui Jehová. Maski ijkon, kemantika yejua tlajtlajtouaya iuan se iamigo itech Biblia. Elie kijtoua: “Ijkuak más niknojnotsaya noamigo, más nitlanemiliaya itech Jehová. Tlen onechmachtijkej notajuan ok onkatka ipan noyojlo, niman yejon onechpaleui oksejpa maniknisiui Jehová”. Sakin, Elie onokuep itech Jehová. * ¡San xkonnemili kenon onomachilijkej itajuan! Yejuamej melak oyolpakej pampa okimachtijkej inkoneuj makitlasojtla Jehová ijkuak konetl katka (2 Tim. 3:14, 15).

18. ¿Tlenon tiknemilia itech tatajtin akin nokojtilijtokej kinmachtiskej inkoneuan makitlasojtlakan Jehová?

¹⁸ Tatajtin, Jehová yomechmakak se kualtsin tekitl: nenkimiskaltiskej akin itekipanojkauan yeskej (Sal. 78:4-6). Tikmatstokej ika yejuin tekitl ouijtika, ika yejon, timechtlasojkamachiliaj pampa nemokojtiliaj kuajli nenkinmachtiskej nemokoneuan. Kuakon, ijkon xchiujtokan, xkinpaleuikan nemokoneuan más makitlasojtlakan Jehová niman xkinmachtikan nochi tlen yejua technauatia (Efes. 6:4). Tla ijkon nenkichiuaj, kuajli xmatstokan ika melak nenkiyolpaktiskej Jehová.