TLAMACHTIJLI 22
Tlamachilistli tlen techmaka Jehová melak techpaleuiya
“ToTEKO [Jehová] yejua kitemaka on tlamatkilistli” (PROV. 2:6).
TLAKUIKAJLI 89 Kiteochiuaj akin tlakaki niman tetlakamati
TLEN TIKITASKEJ *
1. ¿Tleka melak noneki matiktlajtlanilikan Jehová matechmaka tlamachilistli? (Proverbios 4:7).
KEMANTIKA noneki kuajli tiknemiliskej tlenon tikchiuaskej. Ijkuak ijkon panoua, tiktlajtlaniliaj Jehová matechmaka tlamachilistli para tikmatiskej tlenon tikchiuaskej (Sant. 1:5). Tekiuaj Salomón okijkuilo: “Achtoj xtejtemo tlamatkilistli niman kajsikamatilistli” (xpoua Proverbios 4:7). Yejua kijtojtoya ika melak noneki matiktlajtlanilikan tlamachilistli toTajtsin Jehová (Prov. 2:6). San ika ¿uelis techpaleuis tlamachilistli tlen techmaka Jehová ijkuak tikixnamikij itlaj tlen ouijtika? Kema. Ipan yejuin tlamachtijli tikitaskej kenon techpaleuiya.
2. ¿Kenon uelis tikpiyaskej tlamachilistli?
2 ¿Kenon uelis tikpiyaskej tlamachilistli? Tla tikitaj niman tla tikchiuaj tlen okijtojkej omemej tlakamej akin melak tlamachilisejkej katkaj. Ipan yejuin tlamachtijli, kachtopa tikitaskej tlen okijto Salomón. Biblia kijtoua ika “Dios okimakak Salomón tlamatkilistli, niman tlamachilistli” (1 Rey. 4:29). Sakin tikitaskej tlen okijto Jesús, akin más tlamachilise intech nochimej tlaltikpakchanejkej (Mat. 12:42). Biblia kiteneua se teotlajtojli kampa tlajtoua itech Jesús. Yejuin teotlajtojli ijkin kijtoua: “Iespíritu toTEKO nochipa iuan nemis, niman kimakas tlamatkilistli, tlamachilistli” (Is. 11:2).
3. ¿Tlenon tikitaskej ipan yejuin tlamachtijli?
3 Salomón niman Jesús okijtojkej miyek tlen uelis techpaleuis pampa Jehová okinmakak tlamachilistli. Yejuamej okijtojkej kenon noneki tikitaskej tomin, totekiyo, niman kenon noneki tejuamej toitaskej. Ipan yejuin tlamachtijli tikitaskej kenon uelis techpaleuis tlen yejuamej okijtojkej.
KEN NONEKI TIKITASKEJ TOMIN
4. ¿Tlenon kipiayaj Salomón niman Jesús?
4 Salomón melak kipiaya tomin niman melak kuajli nemiya (1 Rey. 10:7, 14, 15). San ika, Jesús xmás itlaj kinopiliaya nion xkipiaya ikal (Mat. 8:20). Maski ijkon, Salomón niman Jesús kuajli kitekitiltiayaj intomin tlen kipiayaj pampa Jehová kinmakaya tlamachilistli.
5. ¿Tlenon okijto Salomón itech tomin?
5 Salomón okijto ika tomin “tepaleuiya” (Ecl. 7:12). Niman yejon yemelak pampa tomin techpaleuiya matokouilikan tlen noneki niman kemantika hasta ueli tijkouaj tlen tikuelitaj. Maski Salomón kipiaya miyek tomin, yejua itlaj okasikamat. ¿Tlenon? Yejua okijto: “Más kuajli nouiyan mitsixmatiskej ika kuajli timouika, xken tla miyek tikpiyas oro niman plata” (Prov. 22:1). Noijki okitak ika akin melak kipiyaj tomin xika inyojlo nemij (Ecl. 5:10, 12). Noijki okijto ika xnoneki tiknemiliskej ika tomin uelis nochipa techpaleuis pampa, aman tikpiyaj, san ika, mostla xtikmatij (Prov. 23:4, 5).
¿Xok más tiktekichiuiliaj toTajtsin pampa tiknekij más totomintiskej? (Xkimita párrafos 6 niman 7). *
6. ¿Tlenon okichiuj Jesús maski xkipiaya miyek tlemach? (Mateo 6:31-33).
6 Maski Jesús xkipiaya miyek tlemach, kemantika noijki kuajli notlakualtiaya niman tlaoniya (Luc. 19:2, 6, 7). Biblia kijtoua ika sejpatsin, san ika atl okichijchiuj vino tlen más patioj. Yejon kachtopa milagro tlen okichiuj (Juan 2:10, 11). Noijki, ijkuak okimiktijkej, kipiaya se tlakentli tlen melak patioj (Juan 19:23, 24). San ika, Jesús xkeman okinek melak notomintis. Yejua okimijli inomachtikauan: “Xakaj ueli kitekichiuilia ome iteko […]. Xakaj uelis kitekichiuilis Dios niman no kinotekimakas on tomin” (Mat. 6:24). Noijki, Jesús otemachti ika tla kachtopa tiktekichiuiliaj Jehová, yejua techmakas tlen ika topanoltiskej (xpoua Mateo 6:31-33).
7. ¿Kenon Jehová yokiteochiuj tokniuj Daniel?
7 Jehová techijlia ipan Biblia kenon noneki tikitaskej tomin. Niman miyekej tokniuan tlakamej niman siuamej melak yokinpaleui. Matikitakan tlen okijto se tokniuj akin itoka Daniel. Yejua kijtoua: “Ijkuak nitelpochkonetl katka, oniktlapejpeni chikauak niktekichiuilis Jehová”. Daniel xokinek notomintis, yejua yej okinek más tekitis ipan ikalpan Jehová. Kemantika kominpaleuiya tokniuan kampa tlaixpoliui niman noijki tekiti Betel. Daniel noijki okijto: “Nejua xkeman ninoyolkuepa. Tla nejua melak ninotomintiskia, xnikinpiyaskia noamigos akin aman melak nechpaleuiyaj. Aman melak niyolpaki pampa oniktlapejpeni kachtopa niktekichiuilis Jehová. Maski melak ninotomintiskia, xueliskia niyolpakis ijkon ken aman pampa Jehová melak yonechteochiuj”. ¿Tlenon tiuelij? Ika tla kachtopa tiktekichiuiliaj Jehová, melak tiyolpakiskej.
KEN NONEKI TIKITASKEJ TEKITL
8. ¿Kenon kitaya tekitl Salomón? (Eclesiastés 5:18, 19).
8 Salomón okijto ika tiyolpakij ijkuak titekitij pampa tekitl yeskia kentla se itetlayokolil toTajtsin (xpoua Eclesiastés 5:18, 19). Noijki okijkuilo: “Tla tichikajkatekiti tikpiyas tlajtlamach on tlen tikneki” (Prov. 14:23). Niman yejua chikauak otekit pampa Biblia kijtoua ika yejua okinchijchiuj uejueyimej kalpamej, kaltin, jardines, niman okitokak uvas (1 Rey. 9:19; Ecl. 2:4-6). Salomón kuelitaya nochi tlen kichiuaya, san ika, kimatstoya ika xsan yejon kiyolpaktiskia. Ijkuak yejua okichijchiuj iteopan Jehová, tlen ouejkauj chikome xiuitl, okitak ika yejon tlen más okiyolpakti (1 Rey. 6:38; 9:1). Yejua okijkuilo: “Nikan onkaj nochi tlen noneki se kichiuas: Xtlakaita Dios niman xchiua on tlen mitsnauatia, pampa on san yejua kitocaroua kichiuas sen tlakatl” (Ecl. 12:13).
9. ¿Kenon kitaya tekitl Jesús?
9 Jesús noijki kuelitaya tekitis. Yejua kojxinketl katka (Mar. 6:3). Itajuan kanaj melak kitlasojkamachiliayaj pampa kinpaleuiaya. Noijki, Jesús xtlajtlakole katka, ika yejon, kuajli kikixtiaya nochi tlen kichijchiuaya. Niman kanaj kinpiaya miyekej itlakoujkauan. San ika, maski Jesús kuelitaya itekiyo, noijki kixelouaya tiempo para kiueyichiuas Jehová (Juan 7:15). Niman ijkuak itenojnotstinemiya, yejua okijto: “Maka xtekitikan ipampa on tlakuajli yejuan saniman tlami, yej xtekitikan ipampa on tlakuajli yejuan kisa itech Dios yejuan kitemaka nemilistli para nochipa” (Juan 6:27). Niman ipan se itlamachtil ipan tepetl, yejua okijto: “Xsentlalikan nemoriquezas ne iluikak” (Mat. 6:20).
¿Tlenon noneki tikchiuaskej tla tiknekij kuajli titekitiskej niman noijki tiknekij kuajli tiktekichiuiliskej toTajtsin? (Xkimita párrafos 10 niman 11). *
10. ¿Tlenon uelis topan nochiuas tla melak titekitij?
10 Tlamachilistli tlen techmaka Jehová, techpaleuiya kuajli matikitakan totekiyo. Jehová techijlia matitekitkej niman kuajli matikchiuakan totekiyo (Efes. 4:28). Akin tikinpaleuiyaj, kuelitaj ika tejuamej xtitekajkayauaj niman ika titekitkej, niman kemantika techijliaj ika kuelitaj kenon titekitij. San ika, yejuin uelis techijtlakos. ¿Tleka? Pampa ueliskia tiknemiliskej ika noneki más chikauak titekitiskej para tikititiskej akin tikpaleuiyaj ika iteixpantijkauan Jehová melak tekitkej. Niman tla tejuamej peua ijkon tikchiuaj, xok más tinemiskej imiuan tochanejkauan niman hasta ueliskia tiktlalkauiskej Jehová. Kuakon, san matikixtemachiuakan kech tiuejkauij titekitij.
11. ¿Tlenon okasikamat William ijkuak okitak kenon tekitiya se tlayekanketl?
11 Se tokniuj telpochtli akin itoka William okasikamat kenon nonekiya kitas itekiyo. Yejua kipaleuiaya se tokniuj tlayekanketl. Niman yejua okijto: “Yejuin tokniuj melak tekitki niman kuajli kichiua itekiyo, ika yejon, melak kitlakaitaj itlakoujkauan. San ika, yejua xsajnoye notekimiktia, ijkuak uajtlami itekiyo yejua yauj ichan, nemij imiuan ichanejkauan niman kichiua itekiyo Jehová. Yejuin tokniuj nochipa yolpaktinemi”. *
KEN NONEKI TOITASKEJ
12. ¿Tlenon kinemiliaya Salomón ijkuak telpochtli katka, san ika, sakin tlenon okichiuj?
12 Salomón kuajli kitekichiuiliaya Jehová niman kasikamatiya ika xnochi ueliya kichiuaya, ika yejon, ijkuak telpochtli katka niman kemach yopeujka tekiuajti, okitlajtlanili Jehová makiyekana (1 Rey. 3:7-9). Noijki, kimatstoya tlenon inpan nochiua akin noueyimatij pampa yejua okijkuilo: “Yejuan noueyimati nimantsin nopopoloua. Yejuan texixikoltia nimantsin uetsi” (Prov. 16:18). San ika, sakin okilkauj tlen okijkuilojka pampa opeuj noueyimati niman xok nochipa kitlakamatiya Jehová. Jehová okijto yeuejkaui tlenon xnonekiya kichiuaskej nochimej tekiuajkej hebreos. Yejua okijto: “Xkimpiyas miyekej siuamej para ijkon xkitlalkauis iojui toTEKO” (Deut. 17:17). Salomón xokitlakamat yejuin tlanauatijli pampa okinpix 700 isiuauan niman 300 itlakpasiuauan, niman miyekej xkitekichiuiliayaj Jehová (1 Rey. 11:1-3). Kanaj yejua kinemiliaya ika xtlaj ipan nochiuaskia. San ika, sakin otlajyoui pampa okitlalkaui Jehová (1 Rey. 11:9-13).
13. ¿Tlenon tiuelij itech Jesús?
13 Jesús xkeman onoueyimat. Ijkuak xiuajlaya nikan ipan tlaltikpaktli, yejua melak okipaleui iTaj ne iluikak. Colosenses 1:16 kijtoua ika “itechkopa Cristo, Dios okichijchiu nochi tlen onkaj ne iluikak niman nikan ipan tlaltikpaktli”. Nesi ika ijkuak onoapolakti okilnamik nochi tlen okichiuj ne iluikak iuan iTaj (Mat. 3:16, TNM; Juan 17:5). Maski okilnamik yejon, xkeman onoueyimat niman xkeman okiteititi ika melak ueyixtoya. Niman noijki okimijli inomachtijkauan: “Xoniuajlaj para nechtekichiuiliskej, yej para nitetekichiuilis, niman niktemakas nonemilis para nikmakixtis miyek tlakatl” (Mat. 20:28). Noijki okijto: “Nejua yejuan niiKoneu Dios xueli nikchiua itlaj noselti” (Juan 5:19). Ken tikitaj, Jesús melak yolyemanki katka. ¿Xmelak ika tejuamej noijki tiknekij tiyolyemankej yeskej ijkon ken yejua?
14. ¿Kenon techpaleuiya tlen okijto Jesús?
14 Jesús okimijli inomachtijkauan ika xnonekiya noueyimatiskej, san ika, noijki okimijli ika xnonekiya kinemiliskej ika xtlaj ika tepaleuijkej. Yejua ijkin okimijli: “Hasta on tsontli ipan nemotsontekon nochi onkaj tlapouajli cada se” (Mat. 10:30). Tlen okijto noijki melak techyolseuiya niman más tla tiknemiliaj ika Jehová xtechtlasojtla. Noijki techilnamiktia ika Jehová kineki techpaleuis niman ika melak techtlasojtla. Kuakon, maka matiknemilikan ika xuelis tinemiskej ipan yenkuik tlaltikpaktli noso ika xtechmelaua matiktekichiuilikan Jehová, pampa yejua yotechijli ika kema uelis ompa tinemiskej ika toyojlo.
¿Tlenon ueliskia topolouiliskej tla san totech titlanemiliaj? (Xkita párrafo 15). *
15. a) ¿Tlenon okijto yeuejkaui se revista La Atalaya? b) Ijkon ken nesi ipan tlaixkopinaltin ipan página 24, ¿tlenon uelis topolouiliskej tla melak toueyimatij?
15 Ikipiya kanaj 15 xiuitl, se revista La Atalaya ijkin okijto: “Maka matiknemilikan ika melak tiuejueyixtokej pampa, tla ijkon tikchiuaj, uelis toueyimatiskej. San ika, noijki maka matiknemilikan ika xtlaj ika titepaleuijkej pampa, tla ijkon tikchiuaj, uelis tiknemiliskej ika xakaj techtlasojtla. Noneki toitaskej san ken kinamiki. Ika yejon, matiknemilikan tlen kuajli tikchiuaj niman tlen xmás ueli tikchiuaj. Se tokniuj siuatl okijto: ‘Kemantika ninopopoloua pampa nitlajtlakole ijkon ken nochimej, san ika, noijki nikmatstok ika miyekpa nikchiua tlen kuajli’”. * Yejuin techititia ika noneki toitaskej san ken kinamiki.
16. ¿Tleka Jehová techijlia tlen uelis tikchiuaskej?
16 Jehová melak techtlasojtla niman kineki matiyolpakikan, ika yejon, ipan Biblia techijlia tlen uelis tikchiuaskej (Is. 48:17, 18). Ken yotikitakej, tla kachtopa tiktekichiuiliaj Jehová, melak tiyolpakiskej. Noijki otikitakej ika akin melak notomintisnekij, akin melak tekitij, noso akin melak noueyimatij xnemij ika inyojlo. Kuakon, tla kuajli tiktekitiltiaj tlamachilistli tlen techmaka Jehová, nochipa tikyolpaktiskej (Prov. 23:15).
TLAKUIKAJLI 94 Tiktlasojkamatij iTlajtol toTajtsin
^ Jehová okinmakak Salomón niman Jesús miyek tlamachilistli. Ipan Biblia onoijkuilo tlen yejuamej okijtojkej, niman tlen okijtojkej melak techpaleuiya. Okijtojkej kenon noneki tikitaskej tomin, tekitl, niman kenon noneki tejuamej toitaskej. Ipan yejuin tlamachtijli tikitaskej kenon techpaleuiya tlen okijtojkej Salomón niman Jesús. Noijki tikitaskej kenon sekimej tokniuan yokinpaleui tlen yejuamej okijtojkej.
^ Xkita tlamachtijli “Cómo disfrutar del trabajo duro”, tlen uajlauj ipan La Atalaya del 1 de febrero de 2015.
^ Xkita tlamachtijli “La Biblia nos ayuda a sentirnos satisfechos”, tlen uajlauj ipan La Atalaya del 1 de agosto de 2005.
^ TLEN NESI IPAN TLAIXKOPINAJLI: Tokniuj Juan niman tokniuj Tomás san sekan nemij ipan se tlanechikojli. Juan san nochipa kichipaujtinemi icarro. Niman Tomás kinuika tokniuan ipan icarro ijkuak ontenojnotsaj niman ijkuak yauej ipan tlanechikoltin.
^ TLEN NESI IPAN TLAIXKOPINAJLI: Juan tekiti hasta ika tlayoua. Ijkuak akin itech tekiti kijlia más matekiti, yejua kitlakamati pampa kineki kiteititis ika melak tekitki. Ipan yejon teotlak, Tomás niman se tlayekanketl okiyolchikauatoj se tokniuj. Yejua yokijli akin itech tekiti ika xnochipa uelis tekitis ika teotlak pampa yejua tenojnotsa noso kichiua itekiyo toTajtsin.
^ TLEN NESI IPAN TLAIXKOPINAJLI: Juan nochipa san itech tlanemilia. Niman Tomás chikauak kitekichiuilia Jehová niman yokinnexti iamigos kampa kiyektlaliaj se kajli kampa tikinpiyaj toueyitlanechikoluan.
