1, 2. ¿Tleka noneki tomachtiskej amoxtli Apocalipsis?

 ¿KEMANTIKA yakaj yomitsimititijka ifotos? Kanaj ijkuak opeuj tikimita, sekimej akin ompa uajnesiyaj nion xtikimixmatiya. San ika, sakin otiknextito se foto tlen melak otikuelitak. ¿Tikmatstika tleka? Pampa ompa tiuajnesi. Tejua peua kuajli tiktlajtlata niman peua timotlalnamiktia kemanon niman kanon omechkixtilijkej yejon foto. Niman peua tikimilnamiki nochimej akin ompa uajnesij. ¡Melak tikuelita yejon foto!

² Amoxtli Apocalipsis yeskia ken yejon foto kampa tiuajnesij. ¿Tleka? Kachtopa, pampa yejuin amoxtli tejuamej otechijkuilouilijkej. Ijkuak peua, kijtoua: “Ipan in tlajkuilolamatl nikijkuiloua on tlajtlamach yejuan Dios okinek para JesuCristo ma kinmachisti on itekitkauan on tlen saniman nochiuas” (Apoc. 1:1). Ken tikitaj, yejuin amoxtli san okimijkuilouilijkej itekipanojkauan Jehová. Niman teotlajtoltin tlen uajlauej ipan Apocalipsis inochiujtokej, ika yejon, tikijtouaj ika kentla tinemiskiaj ipan yejon “foto”.

3, 4. ¿Kemanon peuaskiaj nochiuaskiaj teotlajtoltin tlen uajlauej ipan Apocalipsis, niman tlenon noneki tikchiuaskej? 

 ³ Ika ome, pampa apóstol Juan okijto ika ajsiskia tonajli ijkuak nochiuaskiaj teotlajtoltin tlen uajlauej ipan Apocalipsis. Yejua okijto: “Ijkuak nopan oyejkok espíritu santo, oninen ipan itonal toTeko” (Apoc. 1:10, TNM). Yejua okijkuilo yejuin teotlajtojli kanaj ipan xiuitl 96, niman ijkuakon “itonal toTeko” xiyejkoya (Mat. 25:14, 19; Luc. 19:12). Kuakon, ¿kemanon opeuj “itonal toTeko”? Seki teotlajtoltin techititiaj ika opeuj ipan 1914, ijkuak Jesús opeuj tekiuajti ne iluikak. Ijkuakon opeuj nochiuaj teotlajtoltin kampa tlajtouaj itech ikalpan toTajtsin tlen uajlauej ipan amoxtli Apocalipsis. Kuakon, amantsin itinentokej ipan “itonal toTeko”.

⁴ Pampa itinemij ipan “itonal toTeko”, melak noneki matikchiuakan tlen kijtoua Apocalipsis 1:3, ompa kijtoua: “Dios sanoyej kitiochiua on yejuan kitekakistilia in tiotlajtojli. Niman no sanoyej kintiochiua on yejuan kakij in tiotlajtojli niman kitlakamatij pampa ye nisiu on tonaltin ijkuak nochi in tlen nikan tlajkuilolnestikaj nochiuas”. Ken tikitaj, melak noneki matikamapouakan, matijkakikan niman matiktlakamatikan “in tiotlajtojli”. Matikitakan tlenon noneki tiktlakamatiskej.

5. ¿Tleka noneki matikitakan tla tiktekichiuilijtokej Jehová ijkon ken yejua kuelita?

⁵ Ipan Apocalipsis capítulo 1 kijtoua ika Jesús kitstika nochi tlen panotika ipan tlanechikoltin (Apoc. 1:12-16, 20; 2:1). ¿Kenon tikmatij? Pampa yejua okitak tlen kichiujtoyaj chikome tlanechikoltin tlen onkatkaj Asia Menor, ika yejon, itechkopa Juan, okomintlajkuilouili niman okimijli tlenon nonekiya kichiuaskej tla kinekiyaj kitekichiuiliskej Jehová ijkon ken yejua kuelita. ¿Tlenon techmachtia tlen okimijlikej yejon tlanechikoltin? Ika akin techyekana, Jesucristo, techitstika niman kuajli kimatstika tla chikaujtika totlaneltok noso ka. Noijki, techtlajpiya, techyekana niman techijlia tlenon noneki tikchiuaskej tla tiknekij tikyolpaktiskej Jehová. Amantsin tikitaskej tlenon technauatia Jesús.

6. a) Ken kijtoua Apocalipsis 2:3, 4, ¿tlenon xkuajli kichiujtoyaj tokniuan akin chantiyaj Éfeso? b) ¿Tlenon techmachtia yejuin?

⁶ (Xpoua Apocalipsis 2:3, 4). Nochipa matiktlasojtlakan Jehová. Jesús okimijli tokniuan akin chantiyaj Éfeso ika yejuamej yotlaxikojkaj pampa ok kitekichiuilijtoyaj Jehová. San ika, noijki okimijli ika xok más kitlasojtlayaj Jehová. Ika yejon, okimijli ika tla kinekiyaj kiyolpaktiskej Jehová, nonekiya más kitlasojtlaskej. ¿Tlenon techmachtia yejuin? Ika xsan noneki titlaxikoskej para tikyolpaktiskej Jehová. ¿Tleka? Pampa yejua xsan kita tla tiktekichiuilijtokej, yejua noijki kita tleka tiktekichiuilijtokej. Yejua kineki matikueyichiuakan pampa tiktlasojtlaj niman pampa tiktlasojkamatij nochi tlen yotechmakak (Prov. 16:2; Mar. 12:29, 30).

7. a) Ken kijtoua Apocalipsis 3:1-3, ¿tlenon xkuajli kichiujtoyaj tokniuan akin chantiyaj Sardis? b) ¿Tlenon noneki tikchiuaskej?

⁷ (Xpoua Apocalipsis 3:1-3). Nochipa matitlatlachixtokan. Jesús okitak ika tokniuan akin nemiyaj ipan tlanechikojli Sardis xok más chikauak kitekichiuiliayaj Jehová, ika yejon, okimijli ika nonekiya  tlatlachixtoskej. ¿Tlenon techmachtia yejuin? Ika noneki titlatlachixtoskej niman ika xnoneki tiknemiliskej ika xok noneki chikauak tiktekichiuiliskej Jehová. Tla xok ueli tiktekichiuiliaj Jehová ken yeuejkaui tiktekichiuiliayaj, matikilnamikikan ika Jehová xkilkaua nochi tlen yotikchiujkej (Heb. 6:10). San ika, noijki matikilnamiktokan ika maski tla itlaj tikixnamiktokej, noneki nochipa titlatlachixtoskej niman tiktekichiuilijtoskej Jehová hasta ijkuak tlapopoliuis (1 Cor. 15:58; Mat. 24:13; Mar. 13:33).

8. ¿Tlenon techmachtia tlen okimijlikej tokniuan akin chantiyaj Laodicea? (Apocalipsis 3:15-17).

⁸ (Xpoua Apocalipsis 3:15-17). Matiktekichiuilikan Jehová ika nochi toyojlo. Jesús okitak ika tokniuan akin chantiyaj Laodicea xok más ika inyojlo kitekichiuilijtoyaj Jehová, ika yejon, okimijli: “Xmelauak kuajli tinechtlajsojtla nion xmelauak tinechtlauelita [...], hasta ixko tlajli tixpolijtikaj, xkaman tipaktikaj”. Ken tikitaj, tokniuan de Laodicea nonekiya más ika inyojlo kitekichiuiliskej Jehová (Apoc. 3:19). ¿Tlenon techmachtia yejuin? Ika tla xok más ika toyojlo tiktekichiuiliaj Jehová, noneki tokojtiliskej más tiktlasojkaitaskej tlen techmaka ikalpan (Apoc. 3:18). Niman tla tiknekij chikauak tiktekichiuiliskej Jehová ika nochi toyojlo, xnoneki tiknekiskej tikpiyaskej miyek tlemach.

9. ¿Tlenon techmachtia tlen okimijlikej tokniuan akin chantiyaj Pérgamo niman Tiatira?

⁹ Maka matijkakikan tlen temachtiaj akin kixnamikij ikalpan Jehová. Jesús okitak ika sekimej tokniuan akin chantiyaj Pérgamo temachtiayaj tlen xuajlaya ipan Biblia niman texexelouayaj, ika yejon, okinchikajkanots (Apoc. 2:14-16). San ika, okitak ika tokniuan akin chantiyaj Tiatira xokinejkej kikakiskej itlamachtiluan Satanás, ika yejon, okimijli ika melak kuajli tlen okichiujkej niman okinyolchikauj nochipa matlaneltokakan itech Jehová (Apoc. 2:24-26). Niman tokniuan akin okinkajkayaujkej niman okikakej intlamachtil akin kixnamikiyaj ikalpan toTajtsin nonekiya noyolkuepaskej. ¿Tlenon techmachtia yejuin? Ika xnoneki tijkakiskej tlen temachtiaj akin kixnamikij Jehová. Biblia kijtoua ika yejuamej “nochiuaskej ken kineltokaj Dios, pero ika on tlen kichiuaj nesi ika xnelij kineltokaj” (2 Tim. 3:5). Tla kuajli tomachtiaj iTlajtol toTajtsin, xtechkajkayauaskej akin  kixnamikij ikalpan Jehová (2 Tim. 3:14-17; Jud. 3, 4).

10. ¿Tlenon techmachtia tlen Jesús okimijli tokniuan akin chantiyaj Pérgamo niman Tiatira?

¹⁰ Maka matiauilnemikan. Jesús okinchikajkanots sekimej tokniuan akin chantiyaj Pérgamo niman Tiatira pampa auilnemiyaj noso pampa xtlaj kijtouayaj ijkuak kitayaj kenon sekimej auilnemiyaj (Apoc. 2:14, 20). ¿Tlenon techmachtia yejuin? Ika Jehová melak kikualania ijkuak auilnemi se itekipanojkauj, niman más kikualania ijkuak ijkon kichiua yakaj akin youejkauj ipan ikalpan niman kipiya se ueyi tekitl (1 Sam. 15:22; 1 Ped. 2:16). Maski miyekej kichiuaj tlen xkuajli, Jehová kineki nochipa matiktlakamatikan (Efes. 6:11-13).

11. ¿Tlenon yotikitakej? (Noijki xkita recuadro “ Tlen techmachtia”).

¹¹ Hasta nikan yotikitakej ika melak noneki matikitakan tla tikyolpaktijtokej Jehová ijkuak tiktekichiuiliaj. Kuakon, tla itlaj xkuajli tikchiujtokej, nimantsin matikpatlakan (Apoc. 2:5, 16; 3:3, 16). Aman matikitakan tlenon okimijli Jesús okseki tlanechikoltin.

12. ¿Tlenon techmachtia tlen okimijlikej tokniuan akin chantiyaj Esmirna niman Filadelfia? (Apocalipsis 2:10).

¹² Jesús okimijli tokniuan akin chantiyaj Esmirna niman Filadelfia ika xnonekiya nomojtiskej ijkuak kintlaueltokaskiaj. Niman okimijli ika tla yejuamej tlaxikouayaj, Jehová kinteochiuaskia (xpoua Apocalipsis 2:10; 3:10). ¿Tlenon techmachtia yejuin? Ika noneki tikmatstoskej ika techtlaueltokaskej niman ika noneki titlaxikoskej (Mat. 24:9, 13; 2 Cor. 12:10). ¿Niman tleka melak noneki matikmatstokan yejuin?

13, 14. Ken kijtoua Apocalipsis capítulo 12, ¿tlenon inpan panotika itekipanojkauan Jehová?

¹³ Ipan amoxtli Apocalipsis kijtoua ika kintlaueltokaskiaj itekipanojkauan toTajtsin ipan “itonal toTeko” noso ipan yejuin tonaltin. Ipan capítulo 12 kijtoua ika ijkuak opeuj tlayekana iTekiuajyo toTajtsin, “ne iluikak onochiu sen nouijsokilistli”. Noijki kijtoua ika “Miguel [noso Jesucristo] iuan iángeles onouijsokkej iuan on dragón iuan iángeles” (Apoc. 12:7, 8). Niman ¿kenon otlamito? Okintlankej itlauelikniuan Jehová niman okinuajtlakalkej nikan ipan tlaltikpaktli, kampa aman melak tetlajyouiltiaj (Apoc. 12:9, 12). Niman ¿tlenon kinchiuiliaj itekipanojkauan toTajtsin?

¹⁴ Apocalipsis kijtoua ika Satanás melak kualantok pampa xok uelis yas iluikak. Ika yejon, melak kintlaueltoka tokniuan tlapejpeniltin akin tekiuajtiskej iuan Jesús. Yejuin  tokniuan ika yolchikaualistli kijtouaj ika kineltokaj Jesucristo (Apoc. 12:17; 2 Cor. 5:20; Efes. 6:19, 20). Niman ¿kenon yonochiuj yejuin teotlajtojli?

15. ¿Akinomej yejon omemej testigos akin kinteneua Apocalipsis capítulo 11, niman tlenon okinchiuilijkej?

¹⁵ Satanás okichiuj makimixnamikikan tokniuan tlapejpeniltin akin kiyekantoyaj ikalpan toTajtsin. Apocalipsis kijtoua ika kinmiktiskiaj omemej testigos (Apoc. 11:3, 7-11). * ¿Akinomej yejuin omemej testigos? Tokniuan tlapejpeniltin akin kiyekanayaj ikalpan toTajtsin. Ipan 1918, chikueyimej tokniuan okintlajtolchijchiuilijkej niman okintsajkej. Miyekej okinemilijkej ika yokinteltilijkaj intekiyo itekipanojkauan Jehová.

16. ¿Tlenon opanok ipan 1919, niman tlenon kichiujtok Satanás?

¹⁶ Apocalipsis capítulo 11 kijtoua ika yejuin omemej testigos oksejpa nimantsin yoliuiskiaj. Niman ijkon onochiuj, yejuin tokniuan tlapejpeniltin nion xouejkaujkej se xiuitl ipan cárcel. Ipan marzo de 1919, okiskej niman okinkauilijkej makichiuakan intekiyo, yejuamej oksejpa opeuj tenojnotsaj. Biblia kijtoua ika desde ijkuakon, Satanás “okuajkixtij ikamak sen ueyi río” (Apoc. 12:15). ¿Tlenon kijtosneki yejuin? Ika Satanás opeuj más kintlaueltoka tokniuan. Ika yejon, tinochimej noneki titlaxikoskej niman titlaneltokaskej itech Jehová (Apoc. 13:10).

17. ¿Kenon yokinpaleuijkej itekipanojkauan toTajtsin maski Satanás melak kintlaueltoka?

¹⁷ Apocalipsis capítulo 12 kijtoua ika “tlajli otlapou niman okonik on río” (Apoc. 12:16). ¿Tlenon kijtosneki yejuin? Ika kinpaleuiskiaj itekipanojkauan toTajtsin akin kintlaueltokaj. Niman ¿kenon nochiua yejuin teotlajtojli? Sekimej tekiuajkej yokinpaleuijkej itekipanojkauan toTajtsin. Tokniuan akin yokinkauilijkej makiueyichiuakan Jehová ipan inpaís, nokojtiliaj chikauak kitekichiuiliskej toTajtsin (1 Cor. 16:9). ¿Kenon kitekichiuilijtokej?

18. ¿Tlen tekitl noneki tikchiuaskej?

¹⁸ Jesús okijto ika inomachtijkauan kiteijliskiaj “kuajli tlajtoltin itech Tekiuajyotl” hasta ijkuak tlapopoliuis (Mat. 24:14, TNM). Yejuin inochiujtok. San ika, yejuin tekitl  xsan yejuamej kichiuaj. Biblia kijtoua ika se ángel noso miyekej ángeles kinpaleuiyaj. Apocalipsis kijtoua ika se ángel kitki “on kuajli tlajtojli yejuan para nochipa onkaj [...] para kimijlis on yejuan chanejkej ipan in tlaltikpaktli de nochi tribus, de nochi raza, de nochi kech sesekneka tlajtoltin, niman nochi países” (Apoc. 14:6).

19. ¿Tlenon noijki kiteijliaj itekipanojkauan Jehová?

¹⁹ Apocalipsis capítulos 8 a 10 kijtoua ika ángeles kiteijliaj tlenon inpan nochiuas akin xkinekij matekiuajti iTekiuajyo toTajtsin. Niman itekipanojkauan Jehová noijki ijkon kichiuaj, yejuamej xsan kiteijliaj tlen kuajli kichiua iTekiuajyo toTajtsin, yejuamej noijki kiteijliaj tlen xkuajli inpan nochiuas akin xkitlakamatij Jehová. Apocalipsis kijtoua ika tlen kiteijliaj yeskia kentla tesiujtli niman tlitl (Apoc. 8:7, 13). Melak noneki nochimej matikimijlikan ika itlapopoliuis. ¿Tleka? Pampa san ijkon uelis kinemiliskej tla nopatlaskej para uelis makisaskej (Sof. 2:2, 3). San ika, noneki toyolchikauaskej pampa miyekej xkuelkakij tlen tikteijliaj. Niman ijkuak yejkos ueyi tlajyouilistli, tlen tikteijliskej, más kinkualanis (Apoc. 16:21).

20. ¿Tlenon tikitaskej ipan tlamachtijli 20 niman 21?

²⁰ Melak noneki matiktlakamatikan tlen kijtoua “tiotlajtojli”. ¿Tleka? Pampa titlapaleuijtokej manochiua tlen kijtoua Apocalipsis (Apoc. 1:3). Onka ome tlemach tlen techpaleuis matitlaxikokan ijkuak techtlaueltokaskej niman tlen techpaleuis maka matomojtikan ijkuak titenojnotsaskej. ¿Katlejua yejon ome tlemach? Kachtopa, tla tikmatij tlenon inpan nochiuas itlauelikniuan toTajtsin. Niman ika ome, tla tikmatij kenon techteochiuas Jehová tla itech timelajkanemij. Nochi yejuin uajlauj ipan Apocalipsis. Ipan tlamachtijli 20 niman 21 tikitaskej yejuin ome tlemach.