1, 2. ¿Kanaj tlenon yototlajtoltijkaj?

 ¿KEMANTIKA yotimotlajtoltijka tla toTajtsin kinnankilia moteoyouan? Tla kema, xsan tejua ijkon yotimotlajtoltijka. Miyekej tokniuan kijtouaj ika ijkon yonotlajtoltijkaj, niman más ijkuak itlaj kixnamiktokej. Tla titlajyouijtokej, kanaj tejuamej noijki xueli tikitaj kenon Jehová kinnankilia toteoyouan.

² Ipan yejuin tlamachtijli, tikitaskej tleka uelis kuajli tikmatstoskej ika Jehová kinnankilia iteoyouan itekipanojkauan (1 Juan 5:15). Noijki, tiknankiliskej yejuin: ¿tleka kemantika nesi ika Jehová xtechnankilia? ¿Kenon aman Jehová kinnankilia toteoyouan?

3. ¿Tleka Jehová kineki matiknotsakan?

³ Biblia kuajli techijlia ika Jehová melak techtlasojtla niman techpatiojkaita (Ageo 2:7; 1 Juan 4:10). Ika yejon, techijlia matiknotsakan niman matiktlajtlanilikan matechpaleui (1 Ped. 5:6, 7). Yejua kineki techpaleuis para nochipa nisiuj itech matinemikan niman matikxikokan nochi tlen tikixnamikij.

4. ¿Kenon tikmatij ika Jehová kinnankilia itekipanojkauan ijkuak kinotsaj? (Noijki xkita tlaixkopinajli).

⁴ Biblia miyekpa kijtoua ika Jehová okinnankili itekipanojkauan ijkuak okinotskej. Kanaj tikilnamikij tekiuaj David. Maski itlauelikniuan kinekiyaj kichiuiliskej tlen xkuajli, yejua nochipa kinotsaya Jehová para makipaleui. Sejpatipan, yejua ijkin okijli: “Xkaki tlinon nimitsiknotlajtlanilia. ¡Xnechnankili,  pampa tejua tiyolmelajki niman nochipa titechkaki[!]” (Sal. 143:1). Jehová nochipa okinankili niman okipaleui (1 Sam. 19:10, 18-20; 2 Sam. 5:17-25). Ika yejon, David okijto: “ToTEKO nisiu nemi iminuan on yejuan kinotsaj”. Tejuamej noijki uelis kuajli tikmatstoskej ika yemelak tlen okijto (Sal. 145:18).

5. ¿Jehová nochipa okinnankili itekipanojkauan ijkon ken yejuamej kichiayaj? Xkijto se neskayotl. (Noijki xkita tlaixkopinajli).

⁵ Kanaj Jehová xkinnankilis toteoyouan ken tejuamej tikchiaj. Yejon tlen ipan onochiuj apóstol Pablo. Yejua kipiaya “sen tlajyouilistli yejuan ken itlaj uitstli”, niman yexpa okitlajtlanili toTajtsin makikixtili yejon tlajyouilistli. ¿Jehová okinnankili iteoyouan Pablo? Kema, san ika, xokinnankili ijkon ken kichiaya. Jehová xokikixtili tlen kitlajyouiltijtoya, yej okipaleui matlaxiko niman ijkon ok ueliskia kitekichiuilis (2 Cor. 12:7-10).

6. ¿Tleka kemantika nesi kentla Jehová xkinnankilia toteoyouan?

⁶ Jehová noijki uelis kinnankilis toteoyouan ijkon ken xtikchiayaj. San ika, kuajli matikmatstokan ika Jehová kimati tlenon más techpaleuis. Niman hasta “uelis kichiuas miyek más de on yejuan tejuamej tiktlajtlaniaj noso on yejuan tiknemiliaj” (Efes. 3:20). Ika yejon, kanaj Jehová technankilis ijkuak tejuamej xtikchiayaj noso technankilis ijkon ken xkeman tiknemiliskiaj.

7. ¿Tleka kemantika nonekis tikpatlaskej tlen tiktlajtlaniliaj Jehová ipan toteoyouan? Xkijto se neskayotl.

⁷ Kanaj nonekis tikpatlaskej tlen tiktlajtlaniliaj Jehová ipan toteoyouan ijkuak peuas tikasikamatiskej tlen kineki matikchiuakan. Yejon tlen ipan opanok tokniuj Martin Poetzinger. Ijkuak tokniuj kemach yononamiktijka, okontitlankej ipan se campo de concentración nazi. Ijkuak kemach ompa okikalaktijkej, nochipa kitlajtlaniliaya Jehová makipaleui para makikixtikan niman ijkon uelis nemis iuan isiuatsin niman uelis oksejpa tenojnotsas. San ika, opanok ome semana niman xnesiya tla Jehová kipaleuiskia para makisa. Ika yejon, tokniuj Poetzinger okichiuili teoyotl Jehová niman okijli: “Nimitstlajtlanilia xnechpaleui manikita tlenon tikneki manikchiua”. Kuakon, opeuj tlanemilia itech nochi tlen kixnamiktoyaj oksekimej tokniuan akin noijki ompa tsauktoyaj. Miyekej najmanayaj pampa xkimatiyaj kenon nemiyaj insiuauan niman inkoneuan. Ika yejon, tokniuj Poetzinger okijli Jehová: “Tlaxtlaui pampa otinechmakak se yenkuik tekitl. Xnechpaleui  manikinyolchikaua niman manikinyolseui nokniuan”. Tokniuj ouejkauj nueve xiuitl ika ompa tsauktoya niman nochipa okinyolchikauj tokniuan.

8. ¿Tlenon noneki tikilnamikiskej ijkuak tikchiuaskej teoyotl?

⁸ Noneki tikilnamikiskej ika Jehová yokitlali se tonajli para kichiuas tlen yejua kineki. Ijkuak kuajkuis iTekiuajyo, kipopolos nochi tlen techtlajyouiltia, xok kanaj tlaixpoliuis, xok onias kokolistli nion mikilistli (Dan. 2:44; Apoc. 21:3, 4). San ika, hasta mayejko on tonajli, Jehová kikauilijtos Satanás yejua matlayekana ipan in tlaltikpaktli (Juan 12:31; Apoc. 12:9). b Tla Jehová kipopoloskia nochi tlen techtlajyouiltia, ueliskia nesis ika Satanás melak kuajli tlayekantok. Aman tej, maski noneki tikchiaskej tonajli ijkuak Jehová tlayektlalis, xkijtosneki ika yejua xuelis techpaleuis. Matikitakan kenon Jehová techpaleuiya.

9. ¿Kenon techpaleuiya Jehová ijkuak noneki itlaj tiktlapejpeniskej? Xkijto se neskayotl.

⁹ Techmaka tlamachilistli. Jehová techijlia ika techmakas tlamachilistli ijkuak nonekis tiktlapejpeniskej tlen tikchiuaskej. Niman más tiknekij matechmaka tlamachilistli ijkuak tiktlapejpeniskej tlen uelis kipatlas tonemilis, ken ijkuak tiktlapejpeniskej tla tonamiktiskej noso ka (Sant. 1:5). Matikitakan tlen ipan opanok se tokniuj ichpochtli akin itoka María. c Yejua, ika iyojlo kitekichiuilijtoya Jehová ken precursora regular ijkuak okixmat se tokniuj telpochtli. Yejua kijtoua: “Melak kuajli opeuj touikaj niman opeuj touelitaj. Nikmatstoya ika nonekiya niknemilis tlenon nikchiuas. Kuakon, oniknots Jehová niman oniuejkauj iuan onitlajtlajto itech tlen panotoya. Niknekiya manechyekana Jehová, san ika, nikmatstoya ika san nejua ueliskia nikijtos tlenon nikchiuas”. María kijtoua ika okimachili kenon Jehová okinnankili iteoyouan niman kenon okimakak tlamachilistli. ¿Kenon okinankili Jehová? Yejua kijtoua ika onomachti seki toamatlajkuiloluan niman okinexti ipan seki tlamachtiltin tlen yejua kinekiya kimatis. Noijki, inan, akin iteixpantijkauj Jehová, okipaleui kuajli makita tlen yemelak kimachiliaya. Nochi yejuin okipaleui María makitlapejpeni tlen kuajli.

10. Ken kijtoua Filipenses 4:13, ¿kenon Jehová kinpaleuis itekipanojkauan? Xkijto se neskayotl. (Noijki xkita tlaixkopinajli).

¹⁰ Techpaleuiya matitlaxikokan. Jehová techpaleuis matitlaxikokan ijkuak itlaj tikixnamikiskej, ijkon ken okipaleui apóstol Pablo (xpoua Filipenses 4:13, TNM). d Matikitakan  kenon Jehová okipaleui se tokniuj akin itoka Benjamin. Desde ijkuak melak telpochtli, ouejkauj chantiya imiuan ichanejkauan ipan kaltin tlen kinmakayaj akin kisayaj de inchan. Yejua kijtoua: “Nochipa niknotsaya Jehová niman niktlajtlaniliaya manechpaleui manikchiua tlen kuajli. Yejua okinnankili noteoyouan pampa onechyolseui, onechpaleui maka manikajkaua ika nitenojnotsa niman okichiuj manikinpiya amatlajkuiloltin niman ijkon nikchikauas notlaneltok. Noijki, onikpouj tlen inpan onochiuj sekimej tokniuan niman onikitak kenon Jehová okinpaleui matlaxikokan, yejon onechpaleui nochipa manimelajkanemi itech Jehová”.

11, 12. ¿Kenon Jehová uelis kintekitiltis tokniuan para kinnankilis toteoyouan? (Noijki xkita tlaixkopinajli).

¹¹ Techinmaka tokniuan akin yeskiaj kentla tochanejkauan. Ipan on yeuajli achto ika Jesús mikiskia, yejua, ika nochi iyojlo okinots Jehová. Okitlajtlanili maka makitekauili ika oksekimej makinemilikan ika yokiuijuikaltijka. Jehová xokichiuj tlen okitlajtlanili Jesús. San ika, kema okipaleui, okuajtitlan se ángel para makiyolchikauaki (Luc. 22:42, 43). Noijki ijkon, kanaj Jehová uelis techpaleuis ijkuak se tokniuj techuajnotsas noso techuajtlajpalos para techyolchikauas. Tinochimej uelis tikitaskej kemanon tiktemakaskej “sen kuajli tlajtojli” niman ijkon tikyolchikauaskej se tokniuj (Prov. 12:25).

¹² Matikitakan tlen ipan onochiuj se tokniuj siuatl akin itoka Míriam. Ijkuak yopanokaj seki semanas ika omik iueuentsin, tokniuj san iselti nemiya ichan, melak najmanaya niman noyolkokouaya. Noijki, melak chokaya niman kinekiya yakaj iuan tlajtos. Yejua kijtoua: “Xueliya yakaj nikonotsaya pampa nikmachiliaya ika xnikojtik katka, ika yejon, oniknots Jehová. Ijkuak ok nichokatoya, onechuajnots se tlayekanketl akin kuajli iuan ninouikaya”. Tokniuj tlayekanketl niman isiuatsin okiyolseuijkej Míriam. Niman Míriam okasikamat ika Jehová okichiuj ika yejon tokniuj makonnotsa.

13. ¿Kenon Jehová uelis kintekitiltis akin xkiueyichiuaj para kinnankilis toteoyouan? Xkijto se neskayotl.

¹³ Ueli kintekitiltia akin xkiueyichiuaj (Prov. 21:1). Kemantika, Jehová kintekitiltia akin xkiueyichiuaj para makinpaleuikan  itekipanojkauan niman ijkon kinnankilia inteoyouan itekipanojkauan. Ken ijkuak Jehová okichiuj ika tekiuaj Artajerjes makikauili Nehemías manokuepa Jerusalén niman ijkon matlapaleuiti kampa kinyektlalijtoyaj itepanuan (Neh. 2:3-6). Niman aman Jehová noijki uelis kichiuas ika akin xkitekichiuiliaj matechpaleuikan ijkuak nonekis.

14. ¿Kenon mitsyolchikaua tlen ipan onochiuj Soo Hing? (Noijki xkita tlaixkopinajli).

¹⁴ Se tokniuj siuatl akin itoka Soo Hing okimachili ika Jehová okitekitilti se tlapajtijketl para kipaleuis. Ikoneuj, akin kipiya seki kokolistin ipan itsontekon tlen kichiua maka kuajli matlanemili, ouetsiko niman melak onokoko. Kuakon, Soo Hing niman iueuentsin xok otekitkej para kipaleuiskej inkoneuj. Ipampa yejon, xok kipiayaj tomintsin. Melak ouijtika tlen okixnamijkej, hasta Soo Hing okijto ika xok ueliya tlaxikouaya. Kuakon, ika nochi iyojlo okinots Jehová niman okitlajtlanili makipaleui. Tlapajtijketl akin kipajtitoya ikoneuj melak okajman tlen inpan panotoya, hasta okitlajtlanili gobierno makinpaleui niman noijki okinpaleui makinextikan kanon chantiskej kampa xmás patioj kitlaxtlauaskiaj. Sakin, Soo Hing okijto: “Otikitakej ika Jehová nochipa otechpaleui. Noijki otikitakej ika toTajtsin kinkaki toteoyouan” (Sal. 65:2).

15. ¿Tlenon okipaleui se tokniuj makita ika Jehová kema kinnankilijtoya iteoyouan?

¹⁵ Miyekpa, Jehová xkichiua itlaj tlen melak temojkatlachialti ijkuak kinnankilia toteoyouan. San ika, ken technankilia techpaleuiya itech matimelajkanemikan. Kuakon, noneki melak kuajli tikitaskej kenon technankilia Jehová. Se tokniuj siuatl, akin itoka Yoko, kinemiliaya ika Jehová xkinnankiliaya iteoyouan. Ika yejon, opeuj kijkuiloua nochi tlen kitlajtlaniliaya Jehová. Sakin, okitak tlen okijkuilojka niman okitak ika Jehová kema yokinnankilijka iteoyouan, hasta tlen yejua xok kilnamikiya. Melak kuajli tla tikxelouaj tiempo niman ijkon tiknemiliskej kenon Jehová kinnankilijtika toteoyouan (Sal. 66:19, 20).

16. ¿Kenon tikteititiaj ika titlaneltokaj ijkuak tikchiuaj teoyotl? (Hebreos 11:6).

¹⁶ Xsan noneki titlaneltokaskej para tiknotsaskej Jehová, noijki noneki titlaneltokaskej para tikseliskej ken Jehová technankilis  (xpoua Hebreos 11:6). Matitlajtokan itech tokniuj Mike niman isiuatsin Chrissy. Yejuamej melak kinekiyaj ontlapaleuiskej Betel. Mike kijtoua: “Miyekpa otikontitlankej solicitud niman tikijliayaj Jehová ika tiknekiyaj tiaskej, san ika, xkeman otechnotskej”. Mike niman Chrissy nochipa okineltokakej ika Jehová kimatstoya kanon más kuajli tlapaleuiskiaj. Onokojtilijkej nochipa chikauak kitekichiuiliskej Jehová: otlapaleuijkej ken precursores regulares kampa más nonekiya akin tenojnotsaskej niman teuan okinchijchiuatoj kaltin kampa tikueyichiuaj Jehová. Aman tlapaleuijtokej ken tlayekankej ipan circuito. Mike noijki kijtoua: “Jehová xnochipa okinnankili toteoyouan ken tejuamej tikchiayaj, san ika, kema yokinnankili. Hasta más kuajli yokinnankili xijkon ken tejuamej tiknemiliayaj”.

17, 18. Ken kijtoua Salmo 86:6, 7, ¿tlenon kuajli tikmatstokej?

¹⁷ (Xpoua Salmo 86:6, 7). David kuajli kimatstoya ika Jehová kinkakiya niman kinnankiliaya iteoyouan. Tejua noijki uelis kuajli tikmatstos yejon. Akin yotikominteneujkej ipan yejuin tlamachtijli techititiaj ika Jehová uelis techmakas tlamachilistli niman kojtilistli para matitlaxikokan. Noijki otikitakej ika yejua uelis kintekitiltis tokniuan akin yeskiaj kentla tochanejkauan noso hasta uelis kintekitiltis akin xkiueyichiuaj para matechpaleuikan.

¹⁸ Maski kanaj Jehová xkinnankilis toteoyouan ken tejuamej tikchiaj, tikmatstokej ika kema kinnankilis. Techmakas tlen techpoloua ijkuak kitas ika noneki. Kuakon, nochipa matiknotsakan Jehová niman kuajli matikmatstokan ika techtlajpiyas aman, niman ipan yenkuik tlaltikpaktli techmakas nochi tlen tiknekiskej (Sal. 145:16).