1. ¿Tlenon techijlia Jehová matikchiuakan? (Noijki xkita tlaixkopinajli).

 ¿AKINON uelis tiktlajtlaniliskej matechyolseui niman matechyekana? Tejuamej kuajli tikmatstokej ika san Jehová uelis tiknotsaskej. Yejua hasta techijlia ika kineki miyekpa matiknotsakan, pampa kijtoua: “Nochipa xchiuakan oración” (1 Tes. 5:17). Uelis tikijliskej nochi tlen tikmachiliaj niman tiktlajtlaniliskej matechyekana ipan tonemilis (Prov. 3:5, 6). Niman, pampa Jehová melak yolkuajli, techkauilia matiknotsakan nochipa ijkuak tejuamej tiknekiskej.

2. ¿Tlenon tikitaskej ipan yejuin tlamachtijli?

² Melak tiktlasojkamachiliaj Jehová pampa techkauilia matikchiuilikan teoyotl. Maski ijkon, kanaj kemantika ouijtika tikitaj tiknotsaskej pampa tikpiyaj miyek tekitl. Niman kanaj tiknemiliaj ika noneki más kuajli tikinchiuaskej toteoyouan. San ika, Biblia uelis techpaleuis. Ipan yejuin tlamachtijli, tiueliskej itech Jesús niman itech kenon uelis tikxeloskej tiempo para tiknotsaskej toTajtsin. Noijki tikitaskej makuijli tlemach tlen techpaleuis más kuajli matikinchiuakan toteoyouan.

3. ¿Tlenon kimatstoya Jesús?

³ Jesús kimatstoya ika Jehová melak kinpatiojkaita toteoyouan. Ijkuak xiuajlaya ipan tlaltikpaktli, yejua okitak kenon iTaj kinnankiliaya inteoyouan itekipanojkauan. Pampa iuan nemiya, okitak ijkuak okinnankili iteoyouan Ana,  David, Elías niman oksekimej itekipanojkauan (1 Sam. 1:10, 11, 20; 1 Rey. 19:4-6; Sal. 32:5). Ika yejon, Jesús okimijli inomachtijkauan ika miyekpa makinotsakan toTajtsin niman ika kuajli makimatstokan ika yejua kinnankilis (Mat. 7:7-11).

4. ¿Tlenon tiuelij itech iteoyouan Jesús?

⁴ Jesús okimititi inomachtijkauan ika nonekiya miyekpa kichiuaskej teoyotl. Ijkuak yejua otenojnotstinen, miyekpa okichiuj teoyotl. Nonekiya kixelos tiempo para kichiuas teoyotl pampa nochipa kipiaya miyek tekitl niman miyekej konitayaj (Mar. 6:31, 45, 46). Saniman nokuiteuaya niman ijkon tlajtos iuan iTajtsin (Mar. 1:35). Sejpatipan, nochi yeuajli okinots iTajtsin pampa nonekiya kitlapejpenis itlaj tlen ueyi kijtosnekiya (Luc. 6:12, 13). Niman ipan yeuajli ijkuak Jesús mikiskia, yejua miyekpa okinots Jehová pampa kimatstoya ika kixnamikiskia tlen melak ouijtika (Mat. 26:39, 42, 44).

5. ¿Kenon uelis tikchiuaskej ken Jesús ijkuak tiknotsaskej toTajtsin?

⁵ Tlen Jesús okichiuj techmachtia ika maski tikpiyaskej miyek tekitl, noneki tikxeloskej tiempo para tiknotsaskej Jehová. Ijkon ken Jesús, kanaj noneki tikitaskej kemanon tikchiuaskej teoyotl: kanaj uelis más saniman tokuiteuaskej, xnimantsin tikochiskej ika tlayoua niman ijkon tiknotsaskej Jehová. Tla ijkon tikchiuaj, tikititiskej Jehová ika melak tikpatiojkaitaj ika techkauilia matiknotsakan. Se tokniuj siuatl akin itoka Lynne kilnamiki ika melak kuajli onomachili ijkuak okimat ika ueliskia tlajtos iuan Jehová ika teoyotl. Yejua kijtoua: “Ijkuak onikmat ika Jehová nochipa nechkaki, opeuj nikita ken se noamigo niman onikijto ika más kuajli nikchiuiliskia teoyotl”. Kanaj tinochimej ijkon tomachiliaj. Aman matikitakan makuijli tlemach tlen uelis tikchiuaskej ijkuak tiknotsaskej Jehová.

6. Ken kijtoua Apocalipsis 4:10, 11, ¿tlenon kinamiki kiselis Jehová?

⁶ Matikueyichiuakan Jehová. Ipan se tlatlachalistli, apóstol Juan okitak ika “24 ueuetkej tlayekankej” kiueyichiujtoyaj Jehová ne iluikak. Niman kijtotoyaj ika san yejua kinamiki kiselis “ueyilistli, tetlakaitalistli, niman poder” (xpoua Apocalipsis 4:10, 11).  Iluikaktekitkej nemij ne iluikak iuan Jehová niman kuajli kixmatij. Kitaj nochi tlen kuajli kichiua. Niman, ika yejon, kiueyichiuaj niman kiueyiteneuaj (Job 38:4-7).

7. ¿Kenon tikueyiteneuaj Jehová ijkuak iuan titlajtouaj?

⁷ Tejuamej noijki uelis tikueyiteneuaskej Jehová ijkuak iuan titlajtoskej. Niman, ijkon tikchiuaj ijkuak tikijliaj tlenon tikuelitaj itech yejua niman tleka melak tiktlakaitaj. Ijkuak tikpouaskej niman ijkuak tomachtiskej Biblia, matokojtilikan matikitakan tlenon tikuelitaj itech nochi tlen kualtsin kichiua Jehová (Job 37:23; Rom. 11:33). Sakin, ijkuak yotitlanemilijkej itech tlen kualtsin kichiua Jehová, matikijlikan tlenon tikmachiliaj. Noijki uelis tikueyiteneuaskej Jehová ijkuak techpaleuiya noso ijkuak kinpaleuiya oksekimej tokniuan. Yejua nochipa kitstok tlenon topan panoua niman techtlajpiya (1 Sam. 1:27; 2:1, 2).

8. ¿Tlenon uelis tiktlasojkamachiliskej Jehová? (1 Tesalonicenses 5:18).

⁸ Matiktlasojkamachilikan Jehová. Ijkuak tikchiuaskej teoyotl, uelis tiktlasojkamachiliskej Jehová ipampa nochi tlen kualtsin tikpiyaj (xpoua 1 Tesalonicenses 5:18). Tikmatstokej ika nochi tlen kualtsin tikpiyaj yejua yotechmakak (Sant. 1:17). Uelis tiktlasojkamachiliskej pampa yotechmakak se kualtsin tlaltikpaktli, melak kualtsin nochi tlen okichijchiuj, otechmakak tonemilis, tochanejkauan, toamigos niman se tlamachialistli. Noijki tiknekij tiktlasojkamachiliskej pampa techkauilia iuan matouikakan.

9. ¿Tleka kemantika ouijtika tikitaj titetlasojkamachiliskej?

⁹ Tichantij kampa miyekej xok tetlasojkamachiliaj. Ika yejon, melak noneki tikitaskej tlen kualtsin tikpiyaj niman ijkon tiktlasojkamachiliskej Jehová. Tlaltikpakchanejkej más kitaj tlen kinekij kipiyaskej niman xkitaj tlen ikipiyaj niman ijkon kitlasojkamachiliskej toTajtsin. Tla tejuamej noijki ijkon tikchiuaskiaj, ijkuak tiknotsaskiaj Jehová san tikijliskiaj nochi tlen tiknekij. Tla xtiknekij ijkon topan manochiua, noneki tokojtiliskej niman ijkon tiktlasojkamachiliskej Jehová nochi tlen techmaka (Luc. 6:45).

10. ¿Tlenon okipaleui se tokniuj ijkuak kixnamiktoya tlen ouijtika? (Noijki xkita tlaixkopinajli).

¹⁰ Tla titetlasojkamachiliaj, techpaleuis matitlaxikokan. Matitlajtokan itech tokniuj Kyung-sook. Yejua otlajto itech inemilis ipan La Atalaya del 15 de enero de 2015. Okijlikej ika melak kualouaya pampa kipiaya cáncer de pulmón. Yejua kijtoua: “Melak oninajman ijkuak onechijlikej ika nikualouaya. Onikmachili ika xok itlaj nikpiaya niman melak oninomojti”. ¿Tlenon okipaleui? Yejua kijtoua ika mojmostla ika tlayoua, ijkuak xionkochiya, tlejkouaya ikuatipan ikal niman ijkon tlajtouaya iuan Jehová niman kiteneuiliaya makuijli tlemach tlen kuajli ipan onochiujka ipan yejon tonajli niman kitlasojkamachiliaya. Ijkuak kichiuaya yejon, yolseuiya niman  kipaleuiaya para kijlis Jehová ika melak kitlasojtlaya. Yejua okitak kenon Jehová kinpaleuiya itekipanojkauan ijkuak kixnamikij tlen ouijtika, niman kenon maski topan panoua tlen xkuajli, más topan panoua tlen kualtsin. Ijkon ken tokniuj Kyung-sook, tikpiyaj miyek tlen uelis tiktlasojkamachiliskej Jehová maski tikixnamiktokej tlen ouijtika. Tla tiktlasojkamachiliaj Jehová, techpaleuis matitlaxikokan niman maka sajnoye matajmanakan.

11. ¿Tleka inomachtijkauan Jesús nonekiya yolchikaujkej yeskej?

¹¹ Matiktlajtlanilikan Jehová yolchikaualistli para titenojnotsaskej. Ijkuak Jesús xinokuepaya iluikak, yejua ijkin okimijli inomachtijkauan: “Noka nentenojnotsaskej ne Jerusalén, niman imanian Judea, niman Samaria, niman nochiuiyan ipan in tlaltikpaktli” (Hech. 1:8; Luc. 24:46-48). Sakin, tekiuajkej judíos okimajsikej Pedro niman Juan, niman on tekiuajkej ipan on Sanedrín okimijlikej maka sa matenojnotsakan pampa tla oksejpa tenojnotsayaj, itlaj kinchiuiliskiaj (Hech. 4:18, 21). ¿Tlenon okichiujkej Pedro niman Juan?

12. Ken kijtoua Hechos 4:29, 31, ¿tlenon okichiujkej inomachtijkauan Jesús?

¹² Maski Pedro niman Juan okimijlikej maka sa matenojnotsakan, yejuamej okijtokej: “Xkixtlalokan nemejuamej ixpan Dios. ¿Akinon kitocarouaj tiktlakamatiskej, nemejuamej noso Dios? Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hech. 4:19, 20). Ijkuak tlayekankej judíos okinkauilijkej mauiyan, Pedro niman Juan onosentlalitoj iuan oksekimej inomachtijkauan Jesús. Kuakon, san sekan okinotskej Jehová niman okitlajtlanilijkej makinpaleui makichiuakan tlen yejua kuelita. Okijtokej: “Xkinkauili motekitkauan para ma kiteijlijkan motlajtol ikan nochi yolchikaualistli”. Niman Jehová okinnankili (xpoua Hechos 4:29, 31).

13. ¿Tlenon techmachtia tlen okichiuj Jin-hyuk?

¹³ Tla tekiuajkej techijliaj maka sa matitenojnotsakan, uelis tikchiuaskej ken inomachtijkauan Jesús. Yejon tlen okichiuj Jin-hyuk, se tokniuj akin okitsajkej pampa xnokalaktiaya ipan política. Ompa, tokniuj okijlikej ika nonekiya kintlajpiyas akin oksekan okintsakuatoj. Niman okijlikej ika san ueliskia kinnotsas para kintlajtoltis tlenon kinpolouaya. Niman xnonekiya kinnotsas itech Biblia. San ika, tokniuj okitlajtlanili Jehová makimaka yolchikaualistli niman makipaleui makita kemanon ueliskia kinnojnotsas (Hech. 5:29). Yejua kijtoua: “Jehová okinnankili noteoyouan, niman onechmakak yolchikaualistli niman tlamachilistli niman ijkon ueliskia nitenojnotsas. Opeuj nikinmachtia sekimej maski san cinco minutos ipan inpuerta kampa tsauktoyaj. Ika tlayoua, nikimijkuilouiliaya cartas akin tsauktoyaj niman uajmostla nikinmakaya”. Ijkon ken Jin-hyuk, uelis tiktlajtlaniliskej Jehová yolchikaualistli niman tlamachilistli niman tikmatstoskej ika yejua techpaleuis nochipa kuajli matitenojnotsakan.

14. ¿Tlenon mitspaleuis ijkuak itlaj tikixnamikis? (Salmo 37:3, 5).

¹⁴ Matiktlajtlanilikan Jehová matechpaleui ijkuak itlaj tikixnamiktoskej. Miyekej titlajyouijtokej pampa tikualoj noso pampa sajnoye tajmanaj, pampa yotomijkatijkej noso onka tlauejli tochan, pampa techtlaueltokaj noso ipampa itlaj okse. Noijki, pandemias niman guerras yokichiujkej más matitlajyouikan. Yejua ika, xkijli Jehová nochi tlen tikmachilia kentla tla tiknojnotsaskia se moamigo. Kuajli  xmatsto ika Jehová mitspaleuis (xpoua Salmo 37:3, 5).

15. ¿Kenon techpaleuiya teoyotl matitlaxikokan ijkuak tikixnamikij tlen ouijtika? Xkijto se neskayotl.

¹⁵ Tla miyekpa tikchiuaj teoyotl, techpaleuis matitlaxikokan ijkuak itlaj tikixnamikiskej (Rom. 12:12). Jehová kimati nochi tlen itekipanojkauan kixnamikij, niman “ijkuak kitlajtlaniliaj ma kimpaleui, yejua kinkaki” (Sal. 145:18, 19). Se precursora akin kipiya 29 xiuitl, akin itoka Kristie, ouel okitak ika melauak tlen kijtoua yejon tlaxelojli. Yejua opeuj melak kualo, ika yejon, opeuj sajnoye najmana. Sakin, okimat ika inan kipiaya se kokolistli tlen kichiuaskia mamiki. Kristie kijtoua: “Melak niktlajtlaniliaya Jehová manechpaleui niman ijkon mojmostla ueliskia nitlaxikos. Oninokojtili nochipa nikchikauas notlaneltok: nochipa niaya tlanechikoltin niman nochipa ninomachtiaya”. Yejua noijki kijtoua: “Teoyotl onechpaleui manitlaxiko ijkuak melak ouijtika nipanotoya. Melak nechyolseuiaya nikmatis ika Jehová nouan nemiya. Maski xnimantsin onipajtik, Jehová okinnankili noteoyouan pampa okichiuj maniyolseui”. Maka matikilkauakan ika “Dios ueli kinmanauiya on yolchipakej tlakamej itech on tetlatlatalistli” (2 Ped. 2:9).

16. ¿Tleka noneki matechpaleui Jehová niman ijkon xtikchiuaskej tlen xkuajli?

¹⁶ Matiktlajtlanilikan Jehová matechpaleui matikxikokan se tlatlatalistli. Pampa titlajtlakolejkej, noneki tokojtiliskej niman ijkon xtikchiuaskej itlaj tlen xkuajli. Niman Satanás kichiua nochi tlen ueli para más ouijtika matikitakan tikchiuaskej tlen kuajli. Yejua kineki matoyolpaktikan ika tlen xkuajli niman ijkon kijtlakos totlamachilis. Tla tejuamej peua toyolpaktiaj ika tlen xkuajli, peuas tiknemiliskej tlen tsokuiltik, niman Jehová kitas ika xok tichipaujkej niman yejon uelis kichiuas matikchiuakan se ueyi tlajtlakojli (Mar. 7:21-23; Sant. 1:14, 15).

17. Tla yotikchiujkej se teoyotl, ¿tlenon noneki tikchiuaskej tla tiknekij tikxikoskej se tlatlatalistli? (Noijki xkita tlaixkopinajli).

 ¹⁷ San tejuamej xuelis tikixnamikiskej se tlatlatalistli; noneki matechpaleui Jehová. Ijkuak Jesús otechmachti kenon noneki tikchiuaskej teoyotl, noijki okiteneuj yejuin: “Xtechpaleui para maka titlajtlakoskej, yej xtechejeua maka tikchiuaskej tlen xkuajli” (Mat. 6:13). Jehová kinektok techpaleuis, san noneki tiktlajtlaniliskej matechpaleui. Aman tej, xsan noneki tikchiuaskej teoyotl, noijki noneki tokojtiliskej niman ijkon xtoyolpaktiskej ika tlen uelis kijtlakos totlamachilis niman tlen uelis kichiuas matitlanemilikan ken tlanemiliaj tlaltikpakchanejkej akin Satanás kinyekana (Sal. 97:10). Tla tiknekij tiktlajpiyaskej totlamachilis niman tiknemiliskej tlen kuajli, noneki tikpouaskej niman tomachtiskej Biblia, tiaskej tlanechikoltin niman titenojnotsaskej. Niman Jehová techijlia ika xkitekauilis matikixnamikikan tlen xuelis tikxikoskej (1 Cor. 10:12, 13).

18. ¿Tlenon noneki tikchiuaskej?

¹⁸ Pampa melak ouijtika tlen tikixnamikij ipan yejuin itlamiyan tonaltin, noneki nochipa tikchiuaskej teoyotl tla tiknekij timelajkanemiskej. Jehová kineki matikijlikan nochi tlen techajmana (Sal. 62:8). Ika yejon, mojmostla xxelo tiempo niman ijkon xnotsa Jehová ika nochi moyojlo. Xueyiteneua niman xtlasojkamachili ipampa nochi tlen kichiua. Xtlajtlanili mamitsmaka yolchikaualistli para titenojnotsas niman mamitspaleui ijkuak itlaj tikixnamiktos. Nochipa xnotsa Jehová niman maka xkauili ika itlaj noso yakaj mamitstelti. San ika ¿kenon kinnankilia Jehová toteoyouan? Ipan okse tlamachtijli titlajtoskej itech yejuin.