1. ¿Tlenon okimachti Jehová iamigo Abrahán?

 ABRAHÁN xkeman okilkauj ken otlajtlajto iuan Jehová. Itechkopa se ángel, Jehová okijli Abrahán ika kinpopoloskia kalpamej Sodoma niman Gomorra. Maski Abrahán melak tlaneltokaya itech toTajtsin, xmás kasikamatiya tleka Jehová ijkon kichiuaskia, ika yejon, yejua okitlajtolti: “¿Tikimpolos on tlakamej yejuan nemij yolmelajkej iminuan on yejuan tlajtlakolejkej? […] Tejua tijuez yejuan más tiueyixtikaj ipan nochi in tlaltikpaktli, niman nikmati ika tejua tikchiuas on tlen melajki”. Ijkuakon, Jehová okimachti iamigo Abrahán ika yejua xkeman kinpopolos akin yolmelajkej. ¡Yejon melak techyolchikaua! (Gén. 18:​23-33).

2. ¿Tleka kuajli tikmatstokej ika Jehová melajki niman teiknelia ijkuak tetlajtlakolmaka?

² ¿Tleka kuajli tikmatstokej ika Jehová melajki niman teiknelia ijkuak tetlajtlakolmaka? Pampa yejua kita inyojlo tlaltikpakchanejkej (1 Sam. 16:7). Biblia kijtoua ika yejua kixmati “iyojlo cada tlakatl” (1 Rey. 8:39; 1 Crón. 28:9). ¡Melak kualtsin ika Jehová ijkon kichiua! Jehová sajnoye tlamachilise, ika yejon, kemantika xkuajli tikasikamatij ken tetlajtlakolmaka. Yejua ika, apóstol Pablo okijto: “Xakaj ueli kiteijlia tline Dios kichiua itlaj” (Rom. 11:33).

3, 4. ¿Kanaj tlenon totlajtoltiaj, niman tlenon tikitaskej ipan yejuin tlamachtijli? (Juan 5:​28, 29).

 ³ Aman, tejuamej noijki miyek xtikasikamatij ken Abrahán. Kanaj totlajtoltiaj: “¿Yoliuiskej akin Jehová okinpopolo, ken akin chantiyaj Sodoma niman Gomorra? ¿Oksejpa nokuiteuaskej ijkuak ‘yoliuiskej […] on yejuan xyolmelajkej’?” (Hech. 24:15).

⁴ Ipan yejuin tlamachtijli, titlajtoskej itech yoliuilistli. Xiuejkaui, otomachtijkej tlen yenkuik yotikasikamatkej ijkuak Biblia kijtoua ika sekimej yoliuiskej “para kipiyaskej nemilistli yejuan para nochipa” niman oksekimej yoliuiskej “para kintlajtlakolmakaskej” (xpoua Juan 5:​28, 29). a Aman, ipan yejuin tlamachtijli niman ipan on okse, tikitaskej okseki tlen yenkuik yotikasikamatkej. Kachtopa tikitaskej tlen xtikmatij itech ken Jehová tetlajtlakolmaka niman sakin tikitaskej tlen tikmatij.

TLEN XTIKMATIJ

5. ¿Tlenon tikijtouayaj intech akin chantiyaj Sodoma niman Gomorra?

⁵ ¿Tlenon inpan nochiuas akin Jehová okinpopolo pampa okitak ika xyolmelajkej katkaj, ijkon ken akin chantiyaj Sodoma niman Gomorra? Tejuamej tikijtouayaj ika xyoliuiskej. San ika, “tekitketl” yolmelauak niman tlamachilise melak kuajli yonomachti niman yokichiuj teoyotl niman yokitak ika xuelis tikijtoskej ika xyoliuiskej. Matikitakan tleka xok ijkon tikijtouaj.

6. ¿Kemanon Jehová okinpopolo akin xyolmelajkej katkaj, niman tlenon xkijtoua Biblia?

⁶ Ipan Biblia miyekpa tikitaj ika Jehová okinpopolo akin xyolmelajkej katkaj. San sekimej matikinteneuakan. Jehová okinmikti nochimej tlaltikpakchanejkej ipan se Apachiuilistli, san Noé niman ifamilia okinmakixti. Sakin, Jehová okinnauati israelitas makinmiktikan akin chantiyaj ipan chikome kalpamej tlen onkatkaj ipan Tlajli tlen yokimijlika kinmakaskia. Niman sejpatipan, Jehová okinauati se ángel makinmikti 185,000 soldados asirios san ipan se yeuajli (Gén. 7:23; Deut. 7:​1-3; Is. 37:​36, 37). Biblia xtlaj kijtoua tla Jehová okinpopolo para nochipa niman xok kinyolitis. Más matitlajtokan itech yejuin.

7. ¿Tlenon xtikmatij intech akin omijkej ipan Apachiuilistli niman intech akin chantiyaj Canaán? (Xkita tlaixkopinajli).

⁷ Jehová setipan okinpopolo yejuin tlaltikpakchanejkej, san ika, inseselti xtikmatij kenon kimitaya. Noijki xtikmatij tla ouel okixmatkej Jehová niman onoyolkuepkej. Ijkuak opanok Apachiuilistli, Biblia kijtoua ika Noé otenojnots niman “okiteijlij kenijki se uelis kuajli nouikas ken noneki” (2 Ped. 2:5). San ika, xkijtoua tla onokojtili nochimej kinnojnotsas ijkuak kichijchiujtoya akajli. Noijki xtikmatij tla akin chantiyaj Canaán ouel okixmatkej Jehová niman onopatlakej.

8. ¿Tlenon xtikmatij intech akin chantiyaj Sodoma niman Gomorra?

⁸ Aman matitlajtokan intech akin chantiyaj Sodoma niman Gomorra. Akin ompa chantiyaj kichiuayaj tlen melak xkuajli. Niman ne Sodoma chantiya se tlakatl akin yolmelajki katka, Lot. San ika, xtikmatij tla Lot ouel nochimej okinnojnots. Biblia kijtoua ika sejpa, sekimej tlakamej akin chantiyaj Sodoma kinekiyaj kinnajnauiltiskej akin okitlajpalotoj Lot. Sekimej akin ijkon techiuilisnekiyaj san telpokamej katkaj niman sekimej ueuentsitsintin katkaj niman yejuamej kanaj xkimatiyaj tla tlajtlakojli katka tlen kichiujtoyaj (Gén. 19:4; 2 Ped. 2:7). San ika, Jehová okichiuj tlen melajki ijkuak okinmikti pampa  okijli Abrahán ika ipan yejon kalpan xnemiyaj nion majtlaktli tlakamej akin yolmelajkej katkaj (Gén. 18:32). Kuakon, ¿uelis tikijtoskej ika Jehová, akin melak teiknelia, yokijto ika nion se akin chantiya Sodoma niman Gomorra kikuiteuas ijkuak yoliuiskej akin xyolmelajkej? Ka, xuelis ijkon tikijtoskej.

9. ¿Tlenon xtikmatij itech Salomón?

⁹ Biblia noijki kinteneua akin yolmelajkej katkaj, san ika, xnochipa omelajkanenkej, ken tekiuaj Salomón. Yejua kuajli kixmatstoya Jehová niman kimatstoya kenon kiueyichiuas, niman Jehová melak okiteochiuj. San ika, sakin opeuj kinueyichiua tajtsitsintin. Yejon melak okikualani Jehová niman nochimej israelitas otlajyouijkej ipampa tlen okichiuj Salomón. Biblia kijtoua ika “ijkuak omik, okitokakej ne kampa toktokej [noso kampa okintokakej] iachtojtajuan”, kampa noijki okitokakej tekiuaj David, akin nochipa omelajkanen (1 Rey. 11:​5-9, 43; 2 Rey. 23:13). Pampa ompa okitokakej, ¿kijtosneki ika yoliuis? Biblia xtlaj kijtoua. Miyekej ueliskia kinemiliskej ika kema yoliuis pampa ipan Romanos 6:7 kijtoua ika “ijkuak se miki, nomanauiya de ipoder on tlajtlakojli”. San ika, yejon tlaxelojli xkijtosneki ika nochimej akin mikij yoliuiskej. Yoliuilistli se itetlayokolil Jehová, niman yejua san kinmaka akin kineki nochipa makitekichiuilikan (Job 14:​13, 14; Juan 6:44). Kuakon, ¿Jehová kiyolitis Salomón? Xtikmatij, san Jehová kimatstok. San ika, tikmatstokej ika yejua kichiuas tlen melajki.

TLEN TIKMATIJ

10. Ijkon ken kijtoua Ezequiel 33:​11, ¿kenon nomachilia Jehová ijkuak kinpopoloua akin xkuajkualtin? (Noijki xkita tlaixkopinajli).

¹⁰ Jehová techijlia kenon nomachilia ijkuak kinpopoloua akin xkuajkualtin ipan Ezequiel 33:11 (xpoua). Niman apóstol Pedro okijkuilo ika Jehová “nion se tlakatl xkineki ma poliui” (2 Ped. 3:9). ¡Melak kualtsin ika Jehová ijkon kichiua! Yejuin tlaxeloltin techpaleuiyaj kuajli matikmatstokan ika Jehová xakaj kipopolos para nochipa tla xkimelaua makipopolokan. Yejua melak teiknelia niman nochipa teiknelis ijkuak kitas ika yakaj kinamiki makiknelikan.

11. ¿Akinomej xyoliuiskej, niman kenon tikmatij?

¹¹ ¿Akinomej kuajli tikmatstokej ika xyoliuiskej? Biblia san sekimej kinteneua. b Jesús okijto ika Judas Iscariote xyoliuis (Mar. 14:21; noijki xkita Juan 17:​12, niman nota de estudio ipan TNM). Judas kuajli kimatstoya tlen kichiujtoya ijkuak okixnamik Jehová niman iKoneuj (xkita Marcos 3:​29, niman notas de estudio ipan TNM). Jesús noijki okijto ika tlayekankej ipan tlaneltokiltin akin okixnamijkej xyoliuiskej (Mat. 23:33; noijki xkita Juan 19:​11, niman nota de estudio “del hombre” ipan TNM). Niman apóstol Pablo okijto ika akin kixnamikij ikalpan Jehová, noso apóstatas, akin xnoyolkuepaj noijki xyoliuiskej (Heb. 6:​4-8; 10:29).

12. Xteneua tlen makiteititi ika Jehová melak teiknelia.

¹² Ken yotikitakej, Jehová melak teiknelia niman “nion se tlakatl xkineki ma poliui”. ¿Kenon okimikneli sekimej akin okichiujkej se ueyi tlajtlakojli? Tekiuaj David oauilnen niman otemikti, san ika, Jehová okikneli niman okitlapopolui ijkuak onoyolkuep maski yokichiujka ueyi tlajtlakojli (2 Sam. 12:​1-13). Tekiuaj Manasés melak ouejkauj kichiua tlen melak xkuajli. Maski ijkon, Jehová okitlapopolui ijkuak onoyolkuep (2 Crón. 33:​9-16). Yejuin techititia ika Jehová kimiknelia akin kita ika  kinnamiki makimiknelikan. Jehová kinyolitis David niman Manasés pampa ijkuak okitakej ika yokichiujkaj se ueyi tlajtlakojli, yejuamej onoyolkuepkej.

13. a) ¿Tleka Jehová okimikneli akin chantiyaj Nínive? b) ¿Tlenon okijto Jesús intech ninivitas?

¹³ Aman matitlajtokan itech kenon Jehová okimikneli akin chantiyaj Nínive. ToTajtsin okijli Jonás: “Yonikitak sanoyej tlajtlakouaj nixpan”. Ninivitas kichiuayaj tlen melak xkuajli. San ika, ijkuak onoyolkuepkej, Jehová okimikneli niman okintlapopolui. Jehová más okimikneli xijkon ken Jonás. Ijkuak teotlajtoketl Jonás okualan, toTajtsin okijli ika ninivitas xkimatiyaj tlenon kuajli niman tlenon xkuajli (Jon. 1:​1, 2; 3:10; 4:​9-11). Sakin, Jesús okiteneuj ijkuak ninivitas onoyolkuepkej niman ijkon temachtis ika Jehová melak teiknelia niman kichiua tlen melajki. Noijki okijto ika yejuamej yoliuiskej para “kintlajtlakolmakaskej” (Mat. 12:41).

14. ¿Tlenon uelis kitlapejpeniskej ninivitas ijkuak kinyolitiskej?

¹⁴ ¿Kemanon “kintlajtlakolmakaskej” ninivitas? Ijkuak Jesús okijto ika kinyolitiskej sekimej mijkatsitsintin “para kintlajtlakolmakaskej” (Juan 5:29). Yejuin nochiuas ijkuak yejua tekiuajtis Mil Xiuitl, ijkuak yoliuiskej on “yejuan yolmelajkej niman on yejuan xyolmelajkej” (Hech. 24:15). Akin xyolmelajkej “nokuiteuaskej para kintlajtlakolmakaskej” pampa Jehová niman Jesús kitaskej tla kintlakamatij niman tla kichiuaj tlen kinmachtiaj. Tla se ninivita yoliui, yejua uelis kitlapejpenis kiueyichiuas Jehová niman itech melajkanemis niman ijkon uelis nochipa nemis (Dan. 12:2). San ika, tla xkineki tetlakamatis, kuakon mikis (Is. 65:20).

15. a) ¿Tleka xuelis tikijtoskej ika akin chantiyaj Sodoma niman Gomorra xyoliuiskej? b) ¿Tlenon okijtosnek Judas? (Xkita recuadro “ ¿Tlenon okijtosnek Judas?”).

¹⁵ Jesús okijto ika “ipan on tonajli ijkuak Dios teyolkuitis”, akin xokiselijkej niman akin xokinejkej kineltokaskej tlen otemachti ijkuak ouajla ipan tlaltikpaktli “más temojtij kiseliskej tlajtlakolmakalistli xken on tlakamej yejuan chantiyaj ne Sodoma niman Gomorra” (Mat. 10:​14, 15; 11:​23, 24; Luc. 10:12). ¿Tlenon okijtosnek Jesús? Ueliskia tiknemiliskej ika Jesús san kinteneujtoya akin chantiyaj Sodoma niman Gomorra para kijtos ika ijkuak yejua nikan nemiya, tlaltikpakchanejkej  noijki melak xkuajkualtin katkaj. San ika, nesi ika Jesús kijtojtoya ika sekimej de Sodoma niman Gomorra ueliskia yoliuiskej. ¿Tleka ijkon tikijtouaj? Pampa Jesús okijto ika akin chantiyaj Sodoma niman Gomorra nemiskiaj “ipan on tonajli ijkuak Dios teyolkuitis”, nesi kiteneujtoya san noijki tiempo ijkuak ninivitas “kintlajtlakolmakaskej”. Nochi yejuin kalpamej kichiuayaj tlen melak xkuajli, san ika, ninivitas okipixkej tiempo para noyolkuepaskej. Noijki, matikilnamikikan ika Jesús okijto ika “on yejuan okichijkej tlen xkuajli, yoliskej niman nokuiteuaskej para kintlajtlakolmakaskej” (Juan 5:29). Kuakon, uelis tiknemiliskej ika sekimej akin chantiyaj Sodoma niman Gomorra kinyolitiskej niman tikinpaleuiskej makixmatikan Jehová niman Jesús.

16. ¿Tlenon kitas Jehová ijkuak kijtos akinon kiyolitis? (Jeremías 17:​10, TNM).

¹⁶ (Xpoua Jeremías 17:​10, TNM). c Yejuin tlaxelojli kuajli techijlia tlen tikmatij: Jehová kita tlen yakaj kipiya “ipan iyojlo” niman kimatstok “tlenon kinemilia”. Jehová nochipa kichiua tlen melajki niman yejua xkiyolitis akin kitas ika xkinamiki makiyolitikan. San ika, tla kita ika yakaj kinamiki makiknelikan, yejua kiknelis niman kiyolitis. Jehová ijkon kichiuas para kimakas tlen kinamiki ipampa tlen okichiuj. Kuakon, xnoneki tikijtoskej tla yakaj xyoliuis tla xkuajli tikmatij, san uelis ijkon tikijtoskej tla Biblia kuajli kijtoua ika xyoliuis.

JEHOVÁ NOCHIPA KICHIUAS TLEN MELAJKI

17. ¿Tlenon inpan panos akin yomijkej?

¹⁷ Desde ijkuak Adán niman Eva otlajtlakojkej niman okichiujkej ken Satanás, melak miyekej yomijkej. “On mikilistli, yejuan nochi tlak[a]tl itlauelikniu”, yokichiuj miyekej mamikikan (1 Cor. 15:26). Niman ¿tlenon inpan panos akin yomijkej? Se grupo, kampa nemij 144,000 tlaltikpakchanejkej, yoliuiskej ne ipan cielo niman xok keman mikiskej (Apoc. 14:1). Noijki miyekej tlakamej niman siuamej akin okitlasojtlakej Jehová oksejpa nokuiteuaskej ijkuak kinyolitiskej “on yejuan okichijkej tlen kuajli”. Niman tla melajkanemij  ijkuak Cristo tekiuajtis Mil Xiuitl niman ijkuak Satanás sa ika tlami tetlatlatas, uelis nochipa nemiskej ipan tlaltikpaktli (Dan. 12:13; Heb. 12:1). Noijki, ijkuak Jesús tekiuajtitos Mil Xiuitl, akin “xyolmelajkej”, akin xkeman okitekichiuilijkej Jehová niman akin “okichiujkej tlen xkuajli”, kinyolitiskej niman ijkon kiteititiskej tla kinekij nopatlaskej niman kitekichiuiliskej Jehová (Luc. 23:​42, 43). San ika, Jehová yokijto ika xkinyolitis akin nochipa okixnamijkej niman okichiujkej tlen melak xkuajli (Luc. 12:​4, 5).

18, 19. a) ¿Kenon tikmatstokej ika Jehová kichiuas tlen kuajli ijkuak kinyolkuitis akin yomijkej? (Isaías 55:​8, 9). b) ¿Tlenon tikitaskej ipan okse tlamachtijli?

¹⁸ Ijkon ken Abrahán, tejuamej tikmatstokej ika Jehová se Juez akin melak tlamachilise, melak teiknelia niman xkipiya tlajtlakojli. Kuakon, kuajli matikmatstokan ika Jehová nochipa kichiuas tlen melajki ijkuak tetlajtlakolmakas. Noijki, Jehová yokitekitlali iKoneuj para matetlajtlakolmaka, niman yejua kuajli yokimachti kenon kichiuas (Juan 5:22). Jehová niman Jesús uelij kitaj tlen tikpiyaj ipan toyojlo (Mat. 9:4). Kuakon, yejuamej nochipa kichiuaskej tlen melajki.

¹⁹ Kuajli matikmatstokan ika Jehová nochipa kichiuas tlen kuajli. Tejuamej xtiuelij titetlajtlakolmakaj, san ika, Jehová kema (xpoua Isaías 55:​8, 9). Tejuamej kuajli tikmatstokej ika Jehová niman iKoneuj nochipa kichiuaj tlen melajki ijkuak tetlajtlakolmakaj. Noijki tikmatstokej ika Jesús, akin toTekiuaj, kichiua tlen melajki niman teiknelia ijkon ken iTaj (Is. 11:​3, 4). Ipan okse tlamachtijli tikitaskej tlenon xtikmatij niman tlenon tikmatij itech kenon tetlajtlakolmakaskej Jehová niman Jesús ijkuak panotos ueyi tlajyouilistli.