1, 2. a) ¿Tlenon kimachiliaya Jesús ipampa iTlanauatil toTajtsin? b) ¿Tleka uelis tikijtoskej ika escribas niman fariseos xkuajli kitekitiltiayaj Tlanauatijli?

JESÚS kitlasojtlaya iTlanauatil Moisés. Niman yejon xtechmokatlachialtia, pampa yejon Tlanauatijli ualeuaya itech itaj, Jehová, akin ueyi kijtosneki ipan inemilis. Biblia yokijtoka kenon Jesús melak kitlasojtlaskia itlanauatiluan toTajtsin ika yejuin tlajtoltin: “Nikchiuas tlen tejua tikneki, noTajtsin, melak nechyolpaktia, niman motlanauatil nikpiya ipan noyojlo” (Sal. 40:8). Jesús okiteititi ika itlajtoluan niman ika tlen okichiuj ika yejon Tlanauatijli kuajli katka niman tepaleuiaya, niman ika yemelak nochiuas (Mat. 5:17-19).

² Jesús kanaj melak onajman ijkuak okitak ika escribas niman fariseos xkuajli kitekitiltiayaj iTlanauatil iTajtsin. Yemelak ika yejuin tlayekankej ipan teopan kichiuayaj hasta tlen melak pitentsin notlajtlaniya. Ika yejon, Jesús okijto: “Nenkiyaxkatiaj Dios itech on majtlaktli. In se ejemplo, nenkiyaxkatiaj se menta, se anís niman se comino”. Kuakon, ¿tlenon katka tlen xkuajli kichiuayaj? Jesús okijto: “Pero xnenkichiuaj on tlen más ueyi kijtosneki ipan on temachtilistli yejuan onkaj ipan on tlanauatijli kampa kijtoua ika noneki nemouikaskej ikan melajkanemilistli, ikan teiknelilistli niman ikan tlaneltoktli” (Mat. 23:23). Yejon fariseos xkasikamatiyaj tlen kijtosnekiya Tlanauatijli niman nomatiyaj uejueyixtokej xijkon ken oksekimej. San ika, Jesús kuajli kasikamatiya Tlanauatijli niman tlen kiteititiaya se tlanauatijli itech Jehová.

3. ¿Tlenon tikitaskej ipan yejuin tlamachtijli?

 ³ Akin tikchiuaj ken Cristo xok toyekanaj itech tlajtolkaualistli itech Tlanauatijli (Rom. 7:6). Kuakon, ¿tleka Jehová okitlali Tlanauatijli ipan Biblia? Xpampa kineki san matitlanemilijtokan itech nochi tlen ompa kijtoua, okichiuj pampa kineki matikasikamatikan niman matikchiuakan “tlen más ueyi kijtosneki”, kema, tlajtolyekanalistin tlen itech nokixtia Tlanauatijli. Se neskayotl, ¿tlen tlajtolyekanalistin tiuelij ijkuak tomachtiaj tlanauatiltin itech kalpamej kampa nopaleuiayaj? Tlamachtijli tlen youajpanok okiteneuj seki tlen tiuelij itech tlen nonekiya kichiuas akin xsan okinek otemikti niman ijkon kititiskiaj teiknelilistli. Ipan yejuin tlamachtijli tikitaskej tlen kalpamej kampa nopaleuiayaj techmachtiaj itech Jehová niman kenon uelis tikixkopinaskej ikualneskayouan. Tiknankiliskej yejuin yeyi tlajtoltilistin: ¿Tlenon kiteititiaj kalpamej kampa nopaleuiayaj itech iteiknelilis Jehová? ¿Tlenon techmachtiaj itech kenon yejua kita nemilistli? Niman ¿kenon kiteititiaj ika kuajli ken teyolkuitiaj? Ijkuak inseselti tikimitstiaskej, matiknemilikan kenon tikixkopinaskej toTajtsin iluikakchane (xpoua Efesios 5:1, TNM). *

4, 5. a) ¿Tlenon nochiuaya niman ijkon akin otemikti nimantsin maajsi ipan kalpamej kampa nopaleuiayaj, niman tleka? b) ¿Tlenon techmachtia yejuin itech Jehová?

⁴ Xouijtika katka tajsis ipan yejon chikuasen uejueyimej kalpamej kampa nopaleuiayaj. Jehová otlanauati maoniakan yejyeyi kalpamej inajnakastlan atentli Jordán. Ijkon, akin otemikti ueliskia nimantsin ajsis niman xkitekiyomakas (Núm. 35:11-14). Israelitas nonekiya kuajli kinpiyaskej ojtin tlen teuikayaj ipan yejuin kalpamej (Deut. 19:3). Noijki, nomati ika judíos, kintlaliayaj tlen kititiaya ojtli akin otemikti. Pampa onkatka yejuin kalpamej, akin otemikti xnonekiya cholos itech okse kalpan, kampa kanaj ueliskia kinueyichiuas tajtsitsintin xmelajkej.

⁵ Matiknemilikan yejuin: Jehová otlanauati ika akin temiktiayaj makinmiktikan, san ika, akin xsan okinejkej otemiktijkej okichiuj ika yejuamej mauelikan makiselikan teiknelilistli niman tlapaleuilistli. Se ixtlamatki itech tlen kijtoua Biblia okijkuilo: “Nochi onotlali ika maka matepopolo, maka maouijtika niman totoka manasikamati. Ijkon teikneliayaj iojuiuan toTajtsin”. Jehová xse temojti teyolkuitijketl akin kineki kintlajtlakolmakas itekipanojkauan. Ka, yejua ueyi iteiknelilis (Efes. 2:4).

6. ¿Kenon itlanemililuan toTajtsin xijkon katkaj ken itlanemililuan fariseos?

⁶ Fariseos xijkon tlanemiliayaj ken Jehová, yejuamej xkimikneliayaj oksekimej. Se neskayotl, nomati ika judíos, xok kinekiyaj tetlapopoluiskej tla kipanoltiayaj ika yexpa kinchiuiliayaj sa no yejua tlajtlakojli. Pampa kiteititisnekiya kenon xkuajli ken tlanemiliayaj, Jesús otlajto itech se fariseo niman se akin kinechikouaya tomin akin kichiujtoyaj teoyotl. Akin kinechikouaya tomin kitlajtlaniliaya toTajtsin makikneli. San ika, yejon fariseo kijtouaya: “NoTajtsin, nimitsmaka tlaxtlauijli pampa nejua xnikchiua ken on oksekimej yejuan kiteixpachouiliaj itlaj, niman xyolmelajkej niman siuapajpatlaj. No ijki nimitsmaka  tlaxtlauijli pampa xnikchiua ken yejua in tlacobrarojketl ikan impuestos”. Fariseos kinemiliayaj ika xkipiaya ika teikneliskej, pampa kimitayaj oksekimej ken nion xitlaj kijtosnekiyaj (Luc. 18:9-14).

7, 8. a) Ijkuak yakaj techyolkokoua, ¿kenon uelis tikixkopinaskej Jehová? b) ¿Tleka noneki tiyolyemankej yeskej niman ijkon tikintlapopoluiskej oksekimej?

⁷ Maka keman tochiuaskej ken fariseos. Matikixkopinakan Jehová niman matiteiknelikan (xpoua Efesios 4:32). Se ken uelis tikixkopinaskej yejua tikchiuaskej ika oksekimej xouijtika makitakan techtlajtlaniliskej matikintlapopoluikan (Luc. 17:3, 4). Matotlajtoltikan: “¿Nikimititia oksekimej ika niknektika nikintlapopoluis nochipa ijkuak nonekis? ¿Niknektika ninoyolseuis inuan akin onechyolkokojkej?”.

⁸ Noneki tiyolyemankej yeskej niman ijkon titetlapopoluiskej. Fariseos xkinekiyaj tetlapopoluiskej pampa nomatiyaj uejueyixtokej xijkon ken oksekimej. San ika, akin tikchiuaj ken Cristo ika yolyemanilistli noneki tikimitaskej ika oksekimej “más uejueyixtokej” xken tejuamej, niman tikintlapopoluiskej ika nochi toyojlo (Filip. 2:3). Uelis totlajtoltiskej: “¿Nikixkopintok Jehová niman niyolyemanki?”. Tla ijkon, oksekimej xouijtika kitaskej techtlajtlaniliskej matikintlapopoluikan, niman tejuamej xouijtika tikitaskej tikintlapopoluiskej. Nochipa matiknektokan titeikneliskej niman maka nimantsin matoyolkokokan (Ecl. 7:8, 9).

9. ¿Kenon Jehová okinpaleui israelitas makasikamatikan ika nemilistli chipauak?

⁹ Se tlen ika okintlalijkaj uejueyimej kalpamej kampa nopaleuiayaj, katka kintlajpiyas israelitas itech tlajtlakojli ipampa yestli (Deut. 19:10). Jehová kitlasojtla nemilistli niman kintlauelita “matin tlen kitoyauaj iyesyo akin yolkuajli” (Prov. 6:16, 17). Pampa toTajtsin yolmelauak niman chipauak, yejua kitaya ken itlaj melak ueyi ijkuak yakaj kikuiliaya inemilis okse tlaltikpakchane, maski tla xkinekiya kimiktis. Yemelak ika kititiayaj teiknelilistli akin xsan okinek otemikti. San ika, ok nonekiya kimijlis tlayekankej. Niman tla yejuamej kitayaj ika xsan okinek otemikti, nonekiya nokauas ipan ueyikalpan kampa nopaleuiayaj hasta ijkuak mikiskia ueyi teopixki. Yejuin uelis kijtosnekiskia ompa nemis nochi inemilis. Ijkon Jehová okinpaleui israelitas makasikamatikan ika nemilistli chipauak. Pampa kitlakaitaj Akin temaka nemilistli, kipiaya kuajli kitaskej ika tlen kichiuayaj noso tlen xkichiuayaj maka kichiuaskia ika oksekimej makipolokan innemilis.

10. Ijkon ken okijto Jesús, ¿kenon kiteititiayaj escribas niman fariseos ika xkitlakaitayaj innemilis oksekimej?

¹⁰ Escribas niman fariseos xkixkopinayaj Jehová. Kuajli nesiya ika xkitlakaitayaj innemilis oksekimej. Jesús okimijli: “Xnenkinkauiliaj on tlakamej ma kajsikamatikan on tlajtlamach ika Dios. Nemejuamej xnenkiseliaj on tlajtlamach niman xnenkinkauiliaj oksekimej kiseliskej” (Luc. 11:52). Yejuamej kipiaya kinpaleuiskej tlaltikpakchanejkej makasikamatikan iTlajtol toTajtsin niman makiselikan nemilistli tlen xkeman tlamis. San ika, xokichiujkej yejon, yejuamej xkitekauiliayaj makitokakan Cristo, akin “kitemaka yenkuik nemilistli” (Hech. 3:15). Ipampa yejuin tlen kichiuayaj, yejon tlaltikpakchanejkej ueliskiaj kipoloskiaj innemilis. Yejon tlayekankej akin san intech tlanemiliayaj niman noueyimatiyaj, nion achijtsin xkitlakaitayaj innemilis oksekimej nion ika kuajli manemikan. ¡Melak xteikneliayaj niman xkuakualtin katkaj!

11. a) ¿Kenon okiteititi Pablo ika kitaya nemilistli ijkon ken Jehová kita? b) ¿Tlenon techpaleuis noijki matikitakan tenojnotsalistli ken kitaya Pablo?

 ¹¹ Tla tiknekij titlanemiliskej ijkon ken Jehová niman xken yejon escribas niman fariseos, kipiya tiktlakaitaskej niman tikpatiojkaitaskej nemilistli tlen otechtlayokolijkej. Yejon tlen okichiuj apóstol Pablo, akin okinnojnots nochimej kech ouel. Ika yejon ouel okijto: “Xok nikpias tlajtlakojli tla yakaj ixpoliuis” (xpoua Hechos 20:26, 27). Yejua xtenojnotsaya san pampa xkinekiya nomachilis tlajtlakole noso pampa Jehová okinauatijka. Kichiuaya pampa kintlasojtlaya tlaltikpakchanejkej niman kipatiojkaitaya innemilis (1 Cor. 9:19-23). Tejuamej noijki kipiya ika tokojtiliskej tikitaskej nemilistli ken kita Jehová, akin “kineki para nochimej ma noyolpatlakan” (2 Ped. 3:9). ¿Tejua noijki tikneki yejuin? Tla tikyejyekouaj tikteititiskej teiknelilistli, chikauak titenojnotsaskej niman melak tiyolpakiskej.

12. ¿Tleka itekipanojkauan toTajtsin kitaj ika melak ueyi kijtosneki notlajpiyaskej?

¹² Okse ken tikteititiaj ika tikitaj nemilistli ken Jehová kita yejua ijkuak tiktlakamatij tlanauatiltin itech kenon totlajpiyaskej. Noneki kuajli matikitakan ika ijkuak tikinuikaskej carros niman ijkuak titekitiskej maka tokokoskej, niman noijki ijkuak titekitiskej kampa kalchijchiualo noso kampa tlayektlalilo, niman ijkuak tiaskej ipan se tlanechikojli noso ueyi tlanechikojli. Totlajpiyaskej niman kuajli tinemiskej, melak ueyi kijtosneki xijkon ken miyek tikchiuas, tomintsin noso nimantsin titlamis. ToTajtsin nochipa kichiua tlen kuajli niman tlen kinamiki, niman tejuamej tiknekij tiyeskej ijkon ken yejua. Tlayekankej akin kachtopa kipiya kuajli notlajpiyaskej niman noijki akin nemij inyeualiyan (Prov. 22:3). Ika yejon, tla se tlayekanketl techilnamiktia kenon noneki totlajpiyaskej, kipiya tijkakiskej (Gál. 6:1). Tla tikitaj nemilistli ijkon ken Jehová kita, xtikpiyaskej “tlajtlakojli ipampa yestli”.

13, 14. ¿Tlenon nonekiya kichiuaskej tlayekankej itech Israel niman ijkon kiteititiskej imelajkayo Jehová?

¹³ Jehová okinnauati tlayekankej itech Israel makixkopinakan itlanauatiluan itech melajkayotl. Tlen kachtopa nonekiya kichiuaskiaj yejua kuajli kitaskej tlen yemelak opanok. Sakin, ijkuak kitaskiaj tla kikneliskej noso ka yejon tlakatl akin otemikti, kipiaya kuajli kitaskej tleka ijkon okichiuj, kenon tlanemiliaya niman kenon nemiya. Tla kinekiyaj kiteititiskej imelajkayo Jehová, kipiaya kitaskej tla otemiktijka pampa tetlauelitaya niman tla tekokosnekiya (xpoua Números 35:20-24). * Niman noijki, tla kinkakiyaj teixpantijkej, nonekiya omemej yeskej niman ijkon uelis nesis ika akin otemikti melauak yejua itlajtlakol (Núm. 35:30).

¹⁴ Ken tikitaj, sakin ika kimatiyaj tlen yemelak opanoka, tlayekankej nonekiya tlanemiliskej ipan yejon tlaltikpakchane, niman xsan itech tlen okichiujka. Nonekiya kipiyaskej tlamachilistli, yejuin kijtosneki, kipiyaskej tlen kinpaleuiskia makitakan tlen xnimantsin nesi niman ijkon kasikamatiskej tleka onochiuj. San ika, noijki melak nonekiya Jehová makinmaka iespíritu santo niman ijkon ueliskiaj kiteititiskej itlamachilis, iteiknelilis niman imelajkayo (Éx. 34:6, 7).

15. ¿Kenon xsan noijki katka ken Jesús niman fariseos kimitayaj akin tlajtlakolejkej?

¹⁵ Fariseos san kitayaj tlen okichiujka akin tlajtlakole niman xtlen onkatka ipan iyojlo. Matikitakan tlen opanok ijkuak Jesús otlakuato ichan Mateo. Fariseos okintlajtoltijkej inomachtijkauan Jesús: “¿Tlika on nemotemachtijkau tlakua inuan on yejuan tlacobrarouaj  ika on impuestos niman inuan on oksekimej tlajtlakolejkej?”. Jesús otlanankili: “Para on yejuan xkualoj xkimpoloua on tepajtijketl, pero on yejuan kualoj kemaj. Xuiyan niman kuajli xkajsikamatitikan tlinon kijtosneki yejua in Yektlajkuilojli ijkuak ijkin  kijtoua: ‘Nejua nikneki teiknelilistli amo tla yej nenkinuentlaliskej on yolkej’. Ijkon kemaj nenkimatiskej ika nejua xoniuajlaj para nikinnotsas on yejuan yolmelajkej, yej para nikinnotsas on yejuan tlajtlakolejkej” (Mat. 9:9-13). ¿Kintlapopoluitoya Jesús akin tlajtlakouaj? Ka, xijkon. Yejua kinekiya manoyolkuepakan. Niman itech yejuin melak tlajtouaya ijkuak tenojnotsaya (Mat. 4:17). San ika, Jesús kipiaya tlamachilistli niman kimatiya ika sekimej itech yejuin “tlakamej yejuan tlacobrarojkej ika on impuestos niman on oksekimej yejuan tlajtlakolejkej” kinekiyaj nopatlaskej. Xoyajka ichan Mateo san otlakuato. Yej, miyekej itech yejuamej kitokayaj Jesús (Mar. 2:15). Teajman ika miyekej fariseos xkimitayaj oksekimej ken Jesús kimitaya. Kimitayaj ken tlajtlakolejkej niman ika xok uelis itlaj nochiuaskia inpampa. Yejon tlakamej xijkon katkaj ken toTajtsin yolmelaujki niman teikneliani akin yejuamej kijtouayaj kiueyichiuayaj.

16. ¿Tlenon kipiya ika kitaskej Tlayekankej akin temelajkatlaliaj?

¹⁶ Ipan yejuin tonajli, tlayekankej kipiya kuajli kitaskej ika kixkopintokej Jehová, akin “kitlasojtla melajkayotl” (Sal. 37:28). Kachtopa, kipiya ika yejuamej nochi kuajli kitaskej, tetlajtoltiskej, niman ijkon kitaskej tla onochiuj se tlajtlakojli. Niman tla nesi ika kema, kuakon kipiya ika kiyektlaliskej ijkon ken iTlajtol toTajtsin kijtoua (Deut. 13:12-14). Tlayekankej akin temelajkatlaliaj kipiya kuajli kitaskej tla tokniuj akin okichiuj se ueyi tlajtlakojli yonoyolkuep noso ka. Yejuin kemantika ouijtika tikitas. Yejuamej kipiya kitaskej kenon tlanemilia, tlenon kimachilia itech tlen okichiuj niman tlenon onka ipan iyojlo (Apoc. 3:3). Akin tlajtlakoua san uelis kititiskej teiknelilistli tla yemelak yonoyolkuep. *

17, 18. ¿Kenon uelis kimatiskej tlayekankej tla yakaj yemelak yonoyolkuep? (Xkita tlaixkopinajli kampa peua tlen tomachtijtokej).

¹⁷ Jehová niman Jesús ueli kitaj tlen onka ipan toyojlo, san ika, tlayekankej ka. Ika yejon, ¿kenon uelis kitaskej tla yakaj yemelak yonoyolkuep? Kachtopa, kipiya kitlajtlaniliskej toTajtsin tlamachilistli niman asikamatilistli (1 Rey. 3:9). Ika ome, kipiya kitekitiltiskej Biblia niman toamatlajkuiloluan tlen techmaka tekitketl yolmelauak niman ijkon kitaskej tla kajmana tlen ipan panos noso tla kajmana tlen xkuajli okichiuj ixpan toTajtsin, tlen kijtosneki yemelak timoyolkuepas (2 Cor. 7:10, 11, TNM). Kipiya kitaskej tlenon kijtoua iTlajtol toTajtsin itech tlenon kimachiliaj, kenon tlanemiliaj niman kenon nemij akin yemelak yonoyolkuepkej niman akin xnoyolkuepaj.

¹⁸ Ika yeyi, kipiya tlanemiliskej itech akin otlajtlako niman kitaskej tlen kuaujchiujtiaya, tlen okiyoleuj makichiua yejon niman tlen xueli kichiua. Biblia okijto yejuin itech tlen kichiuaskia Jesús, akin kiyekana tlanechikojli: “Yejua xteyolkuitis ipampa tlen ixtololojuan kitaj, xtechikajkanotsas san ipampa tlen inakasuan kikakij. Yejua kiyolkuitis akin yolyemanki ika melajkayotl, niman ika melajkayotl techikajkanotsas niman ijkon kinpaleuis yolyemankej akin nemij ipan tlaltikpaktli” (Is. 11:3, 4). Jesús yokintlapejpeni tlayekankej niman ijkon makitlajpiyakan itlanechikol, niman kinpaleuis mateyolkuitikan ken yejua kichiua (Mat. 18:18-20). Melak tiktlasojkamatij ika tikinpiyaj tlayekankej akin tetlasojtlaj niman kiyejyekouaj kixkopinaskej Jesús. Melauak, tinochimej tiktlasojkaitaj ueyi tekitl tlen kichiuaj niman ijkon maonia teiknelilistli niman melajkayotl ipan totlanechikoluan.

19. ¿Katlejua itech tlen techmachtiaj kalpamej kampa nopaleuiayaj tiknemilia tikchiuas tejua?

¹⁹ Itlanauatil Moisés kipiya “nochi on tlaixmachilistli niman nochi on tlen melauak” itech Jehová niman itlajtolyekanalisuan tlen melajkej (Rom. 2:20). Se neskayotl, kalpamej kampa nopaleuiayaj kinmachtia tlayekankej mateyolkuitikan “ika melauak melajkayotl”. Noijki tinochimej techmachtia matoititikan “se iuan okse tlasojtlalistli tlen xtekaua niman teiknelilistli” (Zac. 7:9). Maski xok tiktlakamatij Tlanauatijli, melajkayotl niman teiknelilistli ok melak ueyi kijtosnekij ixpan Jehová, pampa yejua xnopatla. ¡Melak ueyi tlateochiualistli tiktekichiuiliskej toTajtsin! Ika yejon, matikixkopinakan ikualneskayouan niman itech matopaleuikan.