1. ¿Tlenon ueli tikchiuaj ika tlakuikaltin?

SE TONAJLI se tlakatl akin kijkuiloua tlakuikaltin okijto ika tlajtoltin kichiua matitlanemilikan, niman tlatsotsonajli kichiua matikmachilikan, san ika, tlakuikaltin kichiua matikmachilikan tlen tiknemiliaj. Xonka itlaj melak kuajli ken “tikmachiliskej” tlen tiknemiliaj itech toTajtsin iluikakchane, Jehová, ijkuak ika tlakuikaltin tikueyichiuaj niman tikijliaj ika tiktlasojtlaj. Itekipanojkauan toTajtsin tikmatij ika tokuikatiskej melak ueyi kijtosneki ijkuak tikueyichiuaj, maski tla tikchiuaj toselti noso iuan tokniuan ipan tlanechikojli.

2, 3. a) ¿Kenon kimachiliaj sekimej nokuikatiskej chikauak ipan tlanechikojli? b) ¿Tlenon tiknankiliskej ipan yejuin tlamachtijli?

² Aman tej, ¿tikuelitaj chikauak tokuikatiskej ipan tlanechikojli, noso tipinauij? Miyekan, sekimej tlakamej xkuelitaj nokuikatiskej imixpan oksekimej. Yejuin uelis kijtlakos nochi tlanechikojli, niman ueyi yes tla tlayekankej xnokuikatiaj ika nochi inyojlo noso kichiuaj okseki tlemach ijkuak nochimej tokniuan nokuikatijtokej (Sal. 30:12).

³ Tla yemelak tikasikamatij ika ijkuak tokuikatiaj noijki ijkon tikueyichiuaj toTajtsin, xtopolouiliskej yejuin ipan totlanechikol. Matotlajtoltikan: “¿Tlenon niknemilia itech tokuikatiskej ipan totlanechikoluan? ¿Kenon uelis niktlanis tlen nechmojtia niman xnechkauilia maninokuikati ika pakilistli? ¿Tlenon uelis nikchiuas niman ijkon niktemachiltis nochi tlen nikmachilia itech tlen kijtouaj totlakuikaluan?”.

4, 5. ¿Tleka uelis tikijtoskej ika tlakuikajli melak ueyi okijtosnek ipan ken Israel kiueyichiuaya Jehová?

⁴ Itekipanojkauan Jehová miyek xiujtin yokitekitiltijkej tlakuikajli ika kiueyiteneuaj toTajtsin. Kuajli tikitaj ika ijkuak israelitas melajkanemiyaj itech Jehová, tlakuikajli melak ueyi kijtosnekiya itech ken kiueyichiuayaj. Xnemili yejuin, ijkuak tekiuaj David okitlali ken nochiuas tekitl ipan teopan, okintekitlali 4,000 levitas ika makiueyiteneuakan Jehová ika tlatsotsonajli. Itech yejuamej, 288 melak ueliyaj kikuikatiliayaj Jehová (1 Crón. 23:5; 25:7).

⁵ Tlatsotsonajli niman tlakuikatilistli melak ueyi okijtosnek ijkuak onopeualti notekitiltia teopan. Biblia kijtoua: “Kuakon ijkuak tlapitskej niman akin nokuikatiaj kiueyichiujtoyaj niman kitlasojkamachilijtoyaj Jehová san sekan, niman ijkuak tlatsotsonajli opeuj chikauak kakisti intech trompetas, címbalos niman okseki tlen ika tlatsotsonaj ijkuak kiueyichiujtoyaj Jehová, [...] iueyilis Jehová okitemilti ikal toTajtsin akin melauak”. Kuajli tikmatij ika ijkuak onochiuj yejuin melak okinchikauili intlaneltokil israelitas (2 Crón. 5:13, 14; 7:6).

6. ¿Kenon onotekitilti tlatsotsonajli niman tlakuikajli ijkuak Nehemías tlanauatijketl katka ipan Jerusalén?

⁶ Ijkuak israelitas yolmelaujkej oksejpa okinchijchiujkej itepanuan Jerusalén, tlanauatijketl Nehemías okichiuj ika manemikan levitas akin nokuikatijtoskiaj niman tlatsotsontoskiaj. Ijkuak otlankej kinchijchiuaj tepantin, tlatsotsonajli okichiuj ika nochimej melak mapakikan. Onotlalijkej “ome coros akin tetlaxtlauilmakayaj”. Nochimej tlatlamantik ojtli okajsikej ikuatipan yejon tepantli niman ononamijkej inisiuj teopan. Melak chikauak nokuikatiayaj niman uejka kakistiyaj (Neh. 12:27, 28, 31, 38, 40, 43). Kuajli tikmatstokej ika Jehová melak okiyolpakti kikakis ika itekipanojkauan kikuikatiliayaj ika miyek pakilistli.

7. ¿Kenon okiteititi Jesús ika inomachtijkauan noneki nokuikatiskej niman ijkon kiueyichiuaskej toTajtsin?

⁷ Ipan itonaluan Jesús, tlatsotsonajli ok melak nonekiya ipan tlaneltokijli melauak. Sakin ika okiteijli manoilnamiki iTlakualis toTeko, ipan yejuin yeuajli tlen melak ueyi kijtosneki, Jesús onokuikati tlakuikaltin inuan inomachtijkauan (xpoua Mateo 26:30).

8. ¿Tlen neskayotl otechmakakej akin kichiuayaj ken Cristo ipan kachtopa siglo?

⁸ Akin kichiuayaj ken Cristo ipan kachtopa siglo otechmakakej se neskayotl pampa san sekan kikuikatiliayaj toTajtsin ijkuak kiueyichiuayaj. Melauak ika xok nosentlaliayaj ipan teopan, yej san techan. Maski ijkon, yejuin xokintelti ika manokuikatikan ika pakilistli. ToTajtsin okichiuj ika apóstol Pablo makimijli ikniuan ipan tlanechikojli: “Xmomachtikan niman xmoyoleuakan iuan oksekimej ikan nochi tlamatkilistli. Xtlakuikatikan itech Dios ikan tlaxtlauijli” (Col. 3:16). Ijkon noneki tokuikatiskej “tlakuikalmej itech Dios” tlen tikinpiyaj ipan toamox ika tlakuikaltin. Yejuin tlakuikaltin noijki tlakuajli tlen techmaka “tekitketl” yolmelauak niman akin “kipia kuajli itlamachilis” (Mat. 24:45).

9. a) ¿Tleka sekimej nomojtiaj chikauak nokuikatiskej ipan tlanechikojli niman ipan uejueyimej tlanechikoltin? b) ¿Kenon kipiya tijkuikatiliskej Jehová, niman akinomej noneki temakaskej neskayotl? (Xkita tlaixkopinajli kampa peua tlen tomachtijtokej).

⁹ Uelis panos ika sekimej tomojtiaj tokuikatiskej pampa yejuin xnochiua tochan  noso kampa otoskaltijkej. Noso uelis ika ijkuak tikinkakij akin ueltokej nokuikatiaj ipan radio noso televisión, tipinauij niman tikmachiliaj ika xtiuelij tokuikatiaj. San ika, yejuin xkipiya techteltis ika matijkuikatilikan Jehová ken noneki. Kuakon, tlakpak matikteketsakan toamox ika tlakuikaltin, matijkuiteuakan totsontekon niman matokuikatikan ika toyojlo (Esd. 3:11; xpoua Salmo 147:1). * Ipan yejuin tonaltin, ipan miyek Kaltin kampa Tosentlaliaj kipiyaj pantallas kampa nesi letra itech tlen tokuikatiaj. Yejuin uelis techpaleuis chikauak matokuikatikan. Niman noijki, aman ipan Tlamachtijli itech iTekiyo Tekiuajyotl tlen kiseliaj tlayekankej noijki nokuikatiaj tlakuikaltin itech Tekiuajyotl. Yejuin kuajli techititia ika melak noneki ika tlayekankej makitemakakan se kuajli neskayotl ijkuak nokuikatiskej ipan tlanechikojli.

10. ¿Tlenon kipiya tikilnamikiskej tla xtoyolchikauaj tokuikatiskej chikauak?

¹⁰ Oksekimej tokniuan xnoyolchikauaj nokuikatiskej chikauak pampa pinauij makinkakikan noso pampa xkuelitaj ken nokuikatiaj. San ika, matiknemilikan yejuin. Ijkuak titlajtouaj, miyekpa topopolouaj, san ika, xtijkajkauaj titlajtouaj ipampa yejon (Sant. 3:2). Noijki ijkon, xtijkajkauaskej tijkuikatiliskej Jehová san pampa xsajnoye kualtsin tokuikatiaj.

11, 12. ¿Tlenon techpaleuis matikyektlalikan ken tokuikatiaj?

¹¹ Kanaj tomojtiaj tokuikatiskej pampa xtikmatij kenon tikchiuaskej. Matikitakan seki tlen techpaleuis matikyektlalikan ken tokuikatiaj.

¹² Itlaj tlen techpaleuis chikauak matokuikatikan yejua tla kuajli tijyotiaj. Ijkon ken electricidad kichiua kuajli matlikui se foco, timijyotis noijki kichiua chikauak matitlajtokan niman matokuikatikan. Kinamikiskia ika ijkon ken chikauak  titlajtouaj noijki ijkon matokuikatikan. * Niman Biblia kimijlia itekipanojkauan toTajtsin matsajtsikan ika pakilistli ijkuak kikuikatiliaj tlakuikaltin (Sal. 33:1-3).

13. Xkijto tlenon noneki tikchiuaskej niman ijkon tokuikatiskej ika toyojlo.

¹³ Ijkuak tikueyichiuaskej toTajtsin iuan tochanejkauan noso toselti tinemiskej, matikchiuakan yejuin: matiktlapejpenikan ipan toamox ika tlakuikaltin se tlakuikajli tlen tikuelitaj niman chikauak matikpouakan tlen ijkuiliujtika; sakin, matitijyotikan niman ika yejon tijyo chikauak matikijtokan tlajtoltin niman matikisatij; sakin, ijkon chikauak matokuikatikan ken yotikpoujkej (Is. 24:14). Totlajtol chikauak kakistis, niman yejon kuajli. Maka matechmojti nion matipinauikan.

14. a) ¿Tleka melak noneki matiktlapokan tokamak ijkuak tokuikatiskej? (Xkita recuadro “ Kenon kuajli timokuikatis”). b) Xkijto seki tlen techpaleuis chikauak makakisti totlajtol.

¹⁴ Tla tiknekij ika totlajtol chikauak makakisti, kipiya ika tiktlaposkej tokamak. Kuakon okse tlen techpaleuis ijkuak tokuikatiskej yejua tiktlaposkej tokamak xsan ijkon ken ijkuak titlajtouaj. ¿Niman tla tiknemiliaj ika totlajtol nion xkojtik niman pitsauak? Tiknextiskej kenon tikyektlaliskej yejuin ipan página 184 itech amoxtli Benefíciese de la Escuela del Ministerio Teocrático, ipan recuadro “Cómo superar problemas específicos”.

15. a) ¿Tlenon onoijto ipan se tlanechikojli tlen onochiuj ipan octubre xiuitl 2016? b) ¿Tleka nonekiya manoyektlali toamox ika tlakuikaltin?

¹⁵ Ipan tlanechikojli tlen kipiyaj iteixpantijkauan Jehová nochi xiujtin ipan octubre xiuitl 2016, onoteneuj itlaj tlen melak oteyolpakti. Tokniuj Stephen Lett, akin tekiti ipan Grupo akin Tlayekana ipan nochi tlanechikoltin, okijto ika oniaskia se yenkuik toamox ika tlakuikaltin. Kitokayotiskiaj Xkuikatili Jehová ika pakilistli. Tokniuj Lett okitetomili ika se tlen ika onoyektlali yejuin amoxtli yejua  ika aman noijkuiloskia ken ijkuiliujtika Traducción del Nuevo Mundo de las Santas Escrituras ika inglés itech 2013, tlen onoyektlali. Niman ononek nopopolos noso nopatlas seki tlajtoltin tlen xok nesij ipan yejuin Biblia tlen onoyektlali. Noijki, onotlalijkej yenkuikej tlakuikaltin tlen tlajtouaj itech tenojnotsalistli niman tlen kijtouaj ika tiktlasojkamatij tlaxtlauijli. Noijki, pampa tlakuikatilistli melak noneki ijkuak tikueyichiuaj Jehová, Grupo akin Tlayekana ipan nochi tlanechikoltin okinek ika yejon amoxtli melak kuajli manochijchiua, niman matlachia ijkon ken Traducción del Nuevo Mundo tlen okiyektlalijkej.

16, 17. ¿Tlenon onoyektlali ipan yenkuik amoxtli ika tlakuikaltin?

¹⁶ Tlakuikaltin onosepantlalijkej ipampa ken intoka niman ijkon xtechtekiyomakas tiktekitiltiskej. Se neskayotl, kachtopa 12 tlakuikaltin tlajtouaj itech Jehová, niman okseki 8 tlajtouaj itech Jesús niman tlaxtlauijli, niman okseki noijki ijkon. Kampa peua amoxtli ijkuiliujtika nochi itech tlen tlajtouaj tlakuikaltin. San se neskayotl ken tepaleuiya yejua ijkuak notlapejpenia tlen tlakuikajli kinamiki se tlamachtijli.

¹⁷ Aman onoijkuilojkej totlakuikaluan ken nimantsin tikinmasikamatis niman timokuikatis, niman ijkon techpaleuiya matokuikatikan ika nochi toyojlo. Onopatlak ken itoka katka niman tlen kijtouaya tlakuikajli “Protege tu corazón”, tlen aman itoka “Cuidemos nuestro corazón”. Yejuin onochiuj pampa tikintlakaitaj tokniuan siuamej, telpokamej, akin kemach nomachtijtokej noso akin yauej tlanechikoltin niman uejueyimej tlanechikoltin. Ijkuak nokuikatiayaj yejuin tlakuikajli, yejuamej kentla kimijlitoskia oksekimej tlen nonekiya kichiuaskej, niman kanaj yejuin kichiuaya maka kuajli manomachilikan.

18. ¿Tleka kipiya kuajli tikimixmatiskej tlakuikaltin itech yenkuik amoxtli ika tlakuikaltin? (Xkita nota).

¹⁸ Miyek tlakuikaltin itech Xkuikatili Jehová ika pakilistli ijkuiliujtokej kentla yeskiaj se teoyotl tlen tikchiuilijtoskiaj toTajtsin. Yejuin techkauilia matikijlikan tlen tikmachiliaj. Okseki tlakuikaltin kichiua matikinyoleuakan tokniuan matetlasojtlakan niman makichiuakan tlen kuajli (Heb. 10:24). Ika yejon, kinamiki kuajli matikixmatikan tlatsotsonajli, kenon tokuikatiskej niman tlen kijtouaj tlakuikaltin. Tla ipan tochan tomajmachtiaj tlakuikaltin, tiueliskej tokuikatiskej chikauak niman ika nochi toyojlo. *

19. ¿Kenon uelis tinochimej ipan tlanechikojli tikueyichiuaskej Jehová?

¹⁹ Matikilnamikikan ika tokuikatiskej melak noneki itech ken tikueyichiuaj toTajtsin. Ijkin ueli kuajli tikititiaj Jehová ika tiktlasojtlaj niman tiktlasojkamachiliaj (xpoua Isaías 12:5). * Ijkuak tokuikatiaj ika pakilistli niman ika nochi toyojlo, tikinyolchikauaj oksekimej noijki ijkon makichiuakan. Tinochimej ipan tlanechikojli maski tla titelpokamej, tiuejueyimej noso kemach tomachtijtokej, uelis ijkin tikueyichiuaskej toTajtsin. Ika yejon, maka okpa matiknemilikan tijkuikatiliskej ika nochi toyojlo. Matiktlakamatikan yejuin tlanauatijli: “Xkuikatilikan Jehová”. Kema, ¡matijkuikatilikan Jehová ika pakilistli! (Sal. 96:1).