“MELAK ninomojtiaya ijkuak oninopatlak ipan yejuin tlanechikojli. Xnikmatiya tla nikiminextiskia akin inuan ninouikaskia noso tla nechseliskiaj”, kijtoua Allen. * Yejua tepaleuijtika ipan se yenkuik tlanechikojli tlen uejka kanaj 1,400 kilómetros itech ichan.

Tla tejua yotimopatlak ipan okse tlanechikojli, kanaj noijki timomojtia achijtsin. ¿Tlenon uelis mitspaleuis xmomati? ¿Tlenon uelis tikchiuas tla melak mitstekiyomakatika xsan ijkon ken tikchiaya? Niman maski tla tejua xtimopatla ipan okse tlanechikojli, ¿kenon uelis tikinpaleuis akin yoyejkokej ipan motlanechikol?

Xtlanemili itech yejuin: Ijkuak kojtin kinuiuitlaj niman oksekan kintlalaktiaj, uakisnekij. Ijkuak kiuiuitlaj se kojtli, kitekiliaj miyek ineluayo niman ijkon kuajli kitkiskej. Niman ijkuak yokitlalaktijkej, aman yejuin kojtli kipiya nimantsin noneluayotis oksejpa. Noijki ijkon, tias okse tlanechikojli uelis kichiuas xajmankamiki. Tejua kentla yotimoneluayotijka ipan okse tlanechikojli kampa tinemiya, pampa itikinpiaya akin kuajli inuan timouikaya niman itikmatiya kemanon timomachtis itech toTajtsin. Aman, oksejpa noneki timoneluayotis niman ijkon timomatis ipan yenkuik tlanechikojli. ¿Tlenon uelis mitspaleuis? Tikchiuas ken kijtouaj tlajtolyekanalistin itech Biblia. Matikimitakan seki.

Akin mojmostla kipoua iTlajtol toTajtsin yejua “kentla se kojtli tlen inakastlan panoua atl, tlen tlaki ijkuak ajsi tonajli niman ixiujyo xkeman pilini, niman nochi tlen kichiua kuajli onkisas” (Sal. 1:1-3).

Ijkon ken se kojtli nochipa kipoloua atl niman ijkon kuajli onias, se akin kichiua ken Cristo noneki notlakualtis mojmostla ika iTlajtol toTajtsin niman ijkon chikaujtos itlaneltokil. Yejua ika, mojmostla xpoua iTlajtol toTajtsin, nochipa xuiya tlanechikoltin niman xueyichiua toTajtsin iuan mochanejkauan niman xmomachti moselti. Xkilnamiki, ok noneki tikchiuas nochi tlen tikchiuaya kachtopa niman ijkon kuajli timouikas iuan Jehová.

“Akin kinyolseselia oksekimej, yejua noijki kiyolseseliskej” (Prov. 11:25).

Kuajli timomachilis niman totoka timomatis tla miyekpa tontenojnotsa. “Tochiuaskej precursores auxiliares ijkuak san kemach otajsikej ipan yenkuik tlanechikojli, yejon tlen melak onechpaleui nejua niman nosiuauj”, kijtoua Kevin, akin tepaleuiya ken tlayekanketl. Niman noijki kijtoua: “Nimantsin otikimixmatkej tokniuan, precursores niman kampa notenojnotsa”. Roger, akin onochanpatlak kanaj 1,600 kilómetros ika uejka itech ichan, kijtoua: “Miyekpa tikisas tontenojnotsas, yejon tlen mitspaleuis nimantsin xmomati ipan se yenkuik tlanechikojli. Noijki uelis tikimijlis tlayekankej ika tikneki titlapaleuis kampa nonekis, uelis tikchipauas Kajli kampa Tosentlaliaj, tiktekikixtis se tokniuj ika se tlamachtijli noso tikteijlis ika uelis tikuikas se tokniuj ipan tlanechikojli. Tla tokniuan kitaj ika tikuelita titlapaleuis, nimantsin mitsseliskej”.

“Xtlapokan nemoyojlo” (2 Cor. 6:13).

Melak noneki tikteititiskej ika tikintlasojtlaj nochimej tokniuan. Ijkuak Melissa niman ichanejkauan onopatlakej ipan se yenkuik tlanechikojli, nimantsin okitejtemojkej akin inuan nouikaskej. Yejua kijtoua: “Ijkuak xipeuayaj noso yotlankaj tlanechikoltin ompa tokauayaj inuan tokniuan. Ijkon tiueliyaj kuajli inuan tonojnotsayaj niman xsan totlajpalouayaj”. Yejuin noijki okinpaleui nimantsin makintsontekontlalikan  intokayo tokniuan. Noijki, kuajli kinseliayaj tokniuan, niman yejon okichiuj kuajli inuan manouikakan. Melissa noijki kijtoua: “Otopanoltilijkej números de teléfono. Ijkon ijkuak san sekan miyekej nomachtiskiaj noso san nosentlaliskiaj, ueliskiaj technotsaskej niman teuan techpouaskej”.

Tla kanaj mitstekiyomaka tikimixmatis oksekimej, uelis tipeuas ika achijtsin. Se neskayotl, uelis titeixuetskilis, maski kachtopa kanaj nion xtiknekis. Pampa tla titeixuetskilia uelis kichiuas makinekikan mitsnisiuiskej. Biblia kijtoua ika ixtololojtin tlen petlanij, noso titeixuetskilis yejon teyolpaktia (Prov. 15:30). Rachel, akin oyaj uejka itech kampa onoskalti, kijtoua: “Nejua niijkon san nipijpinaui”. Niman noijki kijtoua: “Kemantika noneki ninochiualtis nitlajtos inuan tokniuan ipan yenkuik tlanechikojli. Nikchiua yejuin, niktejtemoua yakaj akin yeuatok niman xakaj iuan tlajtotika. Kanaj yejua noijki san pijpinaui ken nejua”. ¿Tleka xtikinpatlatiuj akin iuan titlajtoua kachtopa ika peuas niman ijkuak tlamis tlanechikojli?

Uelis panos ika ipan kachtopa semanas melak tiyolpaktos ika tikimixmatis oksekimej. San ika, uelis ika yejon pakilistli tlen kachtopa tikmachiliaya ika yolik popoliujtias. Tla ijkon mopan nochiua, noneki xtikajkauas ika tikintejtemos akin inuan timouikas.

Seki kojtin tlen oksekan okintlalaktijkej melak uejkauij noneluayotiskej niman oksekimej ka. Noijki ijkon, xnochimej tlaltikpakchanejkej nimantsin nomatij ipan se yenkuik tlanechikojli. Tlajtolyekanalistin tlen aman tikimitaskej mitspaleuiskej tla achijtsin kipiya ika otimopatlak ipan se yenkuik tlanechikojli niman xikuajli timomati:

“Niman ma ka tisiauikan para tikchiuaskej on tlen kuajli, pampa ijkuak ajsis on tonajli para tipixkaskej, tikpixkaskej on kuajli xinachtli tla xtiksiaukauaskej” (Gál. 6:9).

Xseli ika ok nonekis tiuejkauis timomatis xijkon ken yotiknemilijka. Se neskayotl, miyekej misioneros akin yoyajkej ipan iTlamachtil Galaad niman yokintitlankej ipan okseki países, yejuamej ompa youejkaujkej seki xiujtin achto oksejpa kontlajpaloskej inpaís kampa ualeuaj. Yejuin kinpaleuiya nouikaskej iuan tokniuan akin ompa chantij niman nomatiskej kenon ompa chantilo.

Alejandro miyekpa yonochanpatlak niman kimatstok ika xuelis tikchiuas nimantsin xmomati. Yejua kijtoua: “Ijkuak sa iyeka otochanpatlakej, nosiuauj okijto: ‘¡Nochimej akin inuan ninouika nemij ipan okse tlanechikojli!’”. Kuakon okilnamikti ika yopanoka ome xiuitl, ijkuak onopatlakej ipan yejon tlanechikojli, niman noijki okijtoka yejon. San ika, ipan yejon ome xiuitl isiuauj okimititi tlasojtlalistli oksekimej, niman akin kachtopa xkimixmatiya onochiujkej akin melak kuajli inuan nouikaya.

“Maka xkijto: ‘¿Tleka tonaltin tlen yopanokej kuakualtin katkaj xijkon ken aman?’, pampa xtikteititia tlamachilistli titetlajtoltis yejuin” (Ecl. 7:10).

Maka xnemili ika tlanechikojli kampa tinemiya san noijki yes ken kampa aman tinemi. Kanaj tokniuan akin nemij ipan yenkuik tlanechikojli xmelak tlajtouaj, noso kanaj mixko nimantsin mitsijliskej itlaj. San kenon, xkita inkualneskayouan, ijkon ken tikuelitaskia motech makichiuakan. Sekimej tokniuan akin yonopatlakej ipan se yenkuik tlanechikojli yokasikamatkej ika noneki notlajtoltiskej: “¿Yemelak nikintlasojtla nochimej tokniuan?” (1 Ped. 2:17).

 “Xtlajtlanilikan Dios on tlen mechpoloua, niman yejua mechmakas” (Luc. 11:9).

Nochipa xtlajtlanili Jehová mamitspaleui. Se tlayekanketl itoka David kijtoua: “Maka xyejyeko san moselti tikchiuas”. Niman noijki kijtoua: “Onka miyek tlemach tlen uelis tikchiuaskej san ika itlapaleuilis Jehová. Kuakon, xchiua teoyotl itech yejon”. Rachel, akin itech yotitlajtokaj, noijki ijkon kinemilia. Yejua kijtoua: “Tla noueuentsin niman nejua tikmachiliaj ika xnisiuj tinemij iuan tokniuan, tiknotsaj Jehová itech yejuin niman tiktlajtlaniliaj matechpaleui matikitakan tla itlaj tikchiujtokej tlen ika tokniuan xok kinekij technisiuiskej. Kuakon, tokojtiliaj inuan tosentlaliskej”.

Tajtin, tla nemokoneuan kintekiyomakatika inuan nouikaskej tokniuan, inuan xchiuakan teoyotl itech yejuin. Xtejtemouilikan kenon uelis nemiskej inuan tokniuan, niman ijkon kinnextiskej akin yenkuikej inuan nouikaskej niman kinpaleuiskej.

¿Tlenon uelis tikchiuas inpampa akin kemach yoyejkokej ipan motlanechikol? Nochipa xmokojtili ika oksekimej makinekikan mouan nouikaskej. Xnemili tlenon tiktlasojkamatiskia makichiuakan mopampa tla kemach tajsiskia ipan se yenkuik tlanechikojli, niman xchiua yejon (Mat. 7:12). ¿Ueliskia tikiminotsas akin yenkuikej ijkuak tikueyichiuas toTajtsin iuan mochanejkauan noso nenkitaskej JW Broadcasting tlen kisa nochi metstin? ¿Tleka xinuan tikisa tontenojnotsa? Niman tla tikiminotsa mouan matlakuatij, uejkaujtipan kilnamikiskej kenon melak kuajli otikinseli. ¿Tlenon okseki uelis tikchiuaskej tlen ika tikinpaleuiskej?

“Ijkuak otejkokej ipan yenkuik tlanechikojli”, kijtoua Carlos, “se tokniuj siuatl otechijkuilouili kanon tlatemotok tlanemakayaj. Yejon melak otechpaleui”. Kanaj akin ualeuaj oksekan kitlasojkamatiskej makimititikan kenon notlakentiskej kampa tona, noso seua noso melak kiyaui. Tla tikinpouilia achijtsin itech tlenon onochiuj ipan yejon kalpan noso tlaneltokiltin tlen kinpiyaj, uelis kinpaleuis melak kuajli matenojnotsakan.

Allen, itech akin kachtopa otitlajtokej, ikipiya ipantsin se xiuitl ika nemi ipan yenkuik itlanechikol, niman aman kijtoua: “Kachtopa ononek ninochiualtis nikimixmatis tokniuan. San ika, aman nikmachilia kentla nochanejkauan yeskiaj, niman melak nipaki”. Allen kiselia ika kipatlas itlanechikol xokichiuj makinpolo akin inuan nouikaya. Okichiuj makinnexti oksekimej, niman kuajli kimatstok ika inuan nouikas nochipa.