¿Topaleuijtokej itech Jehová?
“Jehová kinmakixtijtika innemilis itekipanojkauan; nion se akin itech nopaleuijtokej xkitaskej ken tlajtlakole” (SAL. 34:22).
TLAKUIKALTIN: 8, 54
1. ¿Kenon nomachiliaj miyekej itekipanojkauan toTajtsin akin yolmelaujkej ipampa tlajtlakojli?
SE TONAJLI, apóstol Pablo melak noyolajmanaya niman okijto: “¡Lástima de nejua!” (Rom. 7:24). Ipan yejuin tonajli, miyekej itekipanojkauan toTajtsin akin yolmelaujkej nomachiliaj ijkon ken yejua. Maski akin tikchiuaj ken Cristo tikyejyekouaj tikyolpaktiskej Jehová, tinochimej topopolouaj pampa otechpanoltilijkej tlajtlakojli. Niman sekimej akin yokichiujkej se ueyi tlajtlakojli kinemiliaj ika Jehová xkeman uelis kintlapopoluis.
2. a) Itech tlen kijtoua Salmo 34:22, ¿tleka itekipanojkauan toTajtsin xkipiya ika melak notekipachoskej ipampa intlajtlakol? b) ¿Tlenon tikitaskej ipan yejuin tlamachtijli? (Xkita recuadro “ Techmachtia itlaj noso kijtosneki itlaj”).
2 Biblia kuajli techijlia ika akin nopaleuiyaj itech Jehová xkipiya ika melak notekipachoskej ipampa intlajtlakol (xpoua Salmo 34:22). * ¿Tlenon kijtosneki timopaleuis itech Jehová? ¿Tlenon noneki tikchiuaskej niman ijkon Jehová matechikneli niman matechtlapopolui? Tiknankiliskej yejuin ijkuak tikitaskej tleka okintlalijkej uejueyimej kalpamej kampa nopaleuiayaj, tlen kiteneua Tlanauatijli tlen yeuejkaui okiseli kalpan Israel. Melauak ika tlajtolkaualistli itech Tlanauatijli okipatlakej ipan iluitl Pentecostés ipan xiuitl 33. San ika, matikilnamikikan ika Jehová yejua akin okitemakak tlanauatijli. Ika yejon, tlen ompa noijtouaya itech yejuin uejueyimej kalpamej kampa nopaleuiayaj techmachtia tlenon kinemilia Jehová itech tlajtlakojli, itech akin tlajtlakouaj niman itech akin noyolkuepaj. Matipeuakan matikitakan tleka onkatkaj yejuin uejueyimej kalpamej niman kenon tepaleuiayaj.
“XKINTLAPEJPENIKAN UEJUEYIMEJ KALPAMEJ KAMPA NEMOPALEUISKEJ”
3. Ipan Israel, ¿tlenon nonekiya kinchiuiliskej akin temiktiayaj?
3 Ixpan Jehová se ueyi tlajtlakojli katka ijkuak se israelita temiktiaya. Tla yejuin panouaya, se ichanejkauj tlakatl akin okimiktijkej, akin noixmatiya ken “akin tetlakuepiltis ipampa yestli”, kipiaya ika kimiktis akin otemikti (Núm. 35:19). Ijkon, yejon temiktijketl kitlaxtlauaya ika inemilis yejon yestli tlen okitoyauj. Tetlakuepiltijketl ipampa yestli nonekiya totoka kichiuas yejuin niman ijkon xtsokuilouiskia Tlajli tlen toTajtsin yokijtoka kinmakas, pampa Jehová yokijtoka ika tiktoyauas iyesyo oksekimej “kijtlakoua tlajli”. Niman yotlanauatijka: “Xkipiya ika nenkijtlakoskej tlajli kampa nennemij” (Núm. 35:33, 34).
4. ¿Tlenon panouaya ijkuak se israelita kimiktiaya yakaj maski xkinekiya?
4 ¿Tlenon panouaya ijkuak se israelita kimiktiaya yakaj maski xkinekiya? Maski ijkon, temiktijketl kipiaya tlajtlakojli pampa okitoyauj iyesyo se akin xtlaj okichiuili (Gén. 9:5). San ika, pampa xsan okinek okichiuj, Jehová kitekauiliaya makiknelikan. Akin otemikti ueliskia cholos ipan se kalpan kampa nopaleuiayaj, ompa akin tetlakuepiltia ipampa yestli xueliskia kimiktis. San ika, xueliskia kisas itech yejon kalpan hasta ijkuak mikiskia ueyi teopixki (Núm. 35:15, 28).
5. ¿Kenon kalpamej kampa nopaleuiayaj uelis techpaleuiskej kuajli matikasikamatikan Jehová?
5 Jehová okijli Josué makintlapejpeni yejuin kalpamej ika yejuin tlajtoltin: “Xkintlapejpenikan uejueyimej kalpamej kampa nemopaleuiskej”. Ijkon tej, toTajtsin yejua akin otlanauati makinxelokan yejuin kalpamej kampa nopaleuiskiaj, kijtosneki, makinchipaujkateneuakan (Jos. 20:1, 2, 7, 8). Ika yejon, uelis totlajtoltiskej: “¿Kenon techpaleuiyaj yejuin kalpamej kampa nopaleuiayaj kuajli matikasikamatikan iteiknelilis toTajtsin? Niman, ¿kenon techmachtiaj matopaleuikan itech Jehová ipan yejuin tonajli?”.
TEMIKTIJKETL NONEKIYA “KIMIJLIS TLEN OPANOK TLAYEKANKEJ”
6, 7. a) ¿Tlenon nonekiya kichiuaskej tlayekankej ijkuak yakaj temiktiaya san ika xpampa kinekiya kichiuas? (Xkita tlaixkopinajli kampa peua tlen tomachtijtokej). b) ¿Tleka kipaleuiaya temiktijketl tlajtos inuan tlayekankej?
6 Ijkuak se israelita temiktiaya, san ika, xpampa kinekiya kichiuas, nonekiya cholos itech se kalpan kampa nopaleuiayaj, niman kampa ipuerta kalpan “kimijlis tlen opanok tlayekankej”. Yejuamej nonekiya kuajli kiseliskej (Jos. 20:4). Seki tonaltin sakin, nonekiya kititlaniskej kampa otemiktijka niman ijkon tlayekankej itech yejon kalpan makitlajtlakolmakakan (xpoua Números 35:24, 25). * Tla yejuamej kitayaj ika yemelak xsan okinek otemikti, kikauiliayaj manokuepa kalpan kampa nopaleuiayaj.
7 ¿Tleka temiktijketl nonekiya tlajtos inuan tlayekankej? Pampa yejuamej nonekiya kipiyaskej chipauak kalpan Israel niman kipaleuiskej temiktijketl makiseli iteiknelilis Jehová. Se akin ixtlamatki itech Biblia otetomili ika, tla akin temiktiaya xtlajtouaya inuan tlayekankej, kinotejtemouiliaya makimiktikan. Niman noijki okijto ika itlajtlakol yeskia kipolos inemilis pampa xonopaleui itech tlen toTajtsin kimakatika ika manomanaui. Temiktijketl akin xsan okinek otemikti kipiaya tlen ika nopaleuis, san ika, nonekiya kitejtemos niman kiselis. Tla xnopaleuiaya ipan yejuin kalpamej, yejon tetlakuepiltijketl ipampa yestli ueliskia kimiktis.
8, 9. ¿Tleka akin kichiua ken Cristo niman yokichiuj se ueyi tlajtlakojli kipiya kintlajtlanilis tlayekankej makipaleuikan?
8 Ipan yejuin tonajli, se akin kichiua ken Cristo niman yokichiuj se ueyi tlajtlakojli noneki kitejtemos makipaleuikan tlayekankej itech tlanechikojli. ¿Tleka melak noneki makichiua? Kachtopa, pampa Jehová yejua akin kijtoua ipan iTlajtol ika tlayekankej makinpaleuikan akin otlajtlakojkej (Sant. 5:14-16). Ika ome, pampa tlayekankej yokintlalijkej makinpaleuikan tlajtlakolejkej akin yonoyolkuepkej oksejpa kuajli manemikan iuan toTajtsin niman makikajkauakan tlajtlakojli (Gál. 6:1; Heb. 12:11). Niman ika yeyi, pampa tlayekankej kintlaliaj niman kinmachtiaj makinpaleuikan tlajtlakolejkej akin yonoyolkuepkej maka sa melak manoyolkokokan niman maka sa melak manotekipachokan. Jehová kijtoua ika tlayekankej kentla yeskiaj “kampa nopaleuiyaj ijkuak ajakakiyaui” (Is. 32:1, 2). ¿Xmelak ika nochi yejuin techititia iteiknelilis toTajtsin?
9 Miyekej itekipanojkauan toTajtsin melak yonoyolseuijkej ijkuak otlajtokej inuan tlayekankej niman okiselijkej intlapaleuilis. Se neskayotl, se tokniuj itoka Daniel okichiuj se ueyi tlajtlakojli, san ika, ipan miyek metstli xonoyolchikauj kimijlis tlayekankej. Yejua kijtoua: “Pampa youejkaujka, niknemiliaya ika xok itlaj ueliskiaj kichiuaskej nopampa”. Daniel nochipa kimojtiaya ika yakaj makimati tlen okichiujka. Niman, nochipa ijkuak kichiuaya teoyotl, kimachiliaya ika kachtopa nonekiya peuas kitlajtlanilis Jehová makitlapopolui. Kuakon, okitejtemo intlapaleuilis tlayekankej. Itech tlen opanok, kijtoua: “Melauak ika ninomojtiaya imiuan nitlajtos. San ika, sakin ika onikchiuj, onikmachili kentla onechkixtilijkej tlen yetik nikmamajtinemiya. Aman nikmachilia ika uelis nikchiuilis teoyotl Jehová niman xitlaj nechtsakuilia”. Aman, Daniel xtlaj kitlamachilispajsoloua, niman xiuejkaui okitokayotijkej tlapaleuijketl ipan tlanechikojli.
“KIPIYA IKA CHOLOS IPAN SE ITECH YEJUIN UEJUEYIMEJ KALPAMEJ”
10. ¿Tlenon nonekiya kichiuas akin otemikti tla kinekiya makiknelikan?
10 Tla se akin xsan okinek otemikti kinekiya makiknelikan, nonekiya nimantsin itlaj kichiuas niman cholos itech se kalpan kampa nopaleuiayaj tlen nisiuj onkatka (xpoua Josué 20:4). * San ueliskia makisaskia tla nimantsin ajsiya ipan yejon kalpan niman ompa nokauaya hasta ijkuak mikiskia ueyi teopixki. Yejuin kijtosnekiskia kikauas miyek tlemach, ken itekiyo, ken nemiya ichan, niman ika ueliya miyekan kistinemiya (Núm. 35:25). * Maski ijkon, yejuin tlen kikauaskia kipaleuiskia. Tla akin otemikti kisaya itech kalpan kampa nopaleuiayaj, kiteititiaya ika ixpan xtlaj kijtosnekiya ika okikuili inemilis okse tlaltikpakchane, niman ueliskia kipolos inemilis.
11. ¿Tlenon uelis kichiuas se akin kichiua ken Cristo niman ijkon kiteititis ika xkinemilia tla toTajtsin nimantsin kiknelis?
11 Ipan yejuin tonajli, akin tlajtlakoua niman noyolkuepa noijki kipiya ika itlaj kichiuas niman ijkon toTajtsin makikneli. Kipiya kuajli kikajkauas tlajtlakojli tlen kichiujtika, san ika, noijki kipiya kitlalkauis nochi tlen uelis kichiuas matlajtlako. ToTajtsin okichiuj ika apóstol Pablo makijkuilo ika akin kichiuayaj ken Cristo ipan Corinto niman yonoyolkuepkaj intech intlajtlakoluan yejuamej najmantoyaj niman yejuin okichiujka ika yejuamej manochipauakan, makualanikan, manomojtikan, melak makinekikan, melak chikauak matekitikan, makiyektlalikan tlen xkuajli (2 Cor. 7:10, 11). Tla tejuamej noijki tikchiuaj nochi tlen tiuelij ika tijkajkauaskej se ueyi tlajtlakojli, tikititiskej Jehová ika melak techajmana tlen topan nochiujtika niman ika xtiknemiliaj ika nimantsin techiknelis.
12. ¿Tlenon kanaj nonekis kikajkauas se akin kichiua ken Cristo niman ijkon toTajtsin ok kiknelis?
12 ¿Tlenon kanaj nonekis kikajkauas se akin kichiua ken Cristo niman ijkon toTajtsin ok kiknelis? Noneki kinektos kikajkauas hasta yejon tlen kuelita tla yejuin uelis kichiuas matlajtlako (Mat. 18:8, 9, TNM). Se neskayotl, tla akin inuan touikaj techyolchikauaj matikchiuakan tlen xkuelita Jehová, ¿tijkajkauaskej ika imiuan touikaskej? Tla ouijtika tikmatij toteltiskej itech alcohol, ¿tiknektokej tijkajkauaskej tlen uelis kichiuas matiknekikan miyek tikoniskej? Tla tokojtilitokej tikteltiskej ileuilistli itech auilnemilistli, ¿tikmapeuaj películas, páginas ipan Internet niman nochi tlen kichiua matikpiyakan xkuajli ileuilistin? Matikilnamikikan ika nochi tlen tijkauaskej niman ijkon timelajkanemiskej itech Jehová melak techpaleuis. Xtlaj melak teyolkoko ken tikmachiliskej ika toTajtsin xok touan nemi. San ika, xtlaj melak techyolpaktia ken tikmachiliskej ika tikpiyaj itlasojtlalis tlen xkeman tekaua (Is. 54:7, 8).
“NIMAN YEJUIN KIPIYA MECHPALEUISKEJ”
13. ¿Tleka akin otemikti ueliskia nemis ika iyojlo niman pakiskia ipan kalpan kampa nopaleuiayaj?
13 Tla akin otemikti inemiya ipan yejuin ueyikalpan, kijtosnekiya ika yomakiska. Jehová okijto itech yejuin kalpamej: “Niman yejuin kipiya mechpaleuiskej” (Jos. 20:2, 3). Jehová xok kitlajtlaniya oksejpa makiyolkuitikan akin otemikti ipampa tlen yokichiujka. Niman yejon tetlakuepiltijketl ipampa yestli xkikauiliayaj makalaki ipan kalpan niman makimikti. Tla akin otemikti nemiya ijtik yejon kalpan, ompa toTajtsin kitlajpiaya niman xkipiaya itlaj kimakasis. Yejua xtsauktoya, pampa ueliskia tekitis, kinpaleuis oksekimej niman kitekichiuilis Jehová ika yolseuilistli. Ueliskia nemis ika iyojlo niman yolpakis.
Kuajli xmatsto ika Jehová yomitstlapopolui. (Xkita párrafos 14-16).
14. ¿Tlenon uelis kuajli kimatstos akin kichiua ken Cristo akin yonoyolkuep itech se ueyi tlajtlakojli?
14 Nemij itekipanojkauan toTajtsin akin yonoyolkuepkej itech se ueyi tlajtlakojli san ika ok kintekipachoua tlen okichiujkej. Sekimej hasta kinemiliaj ika Jehová nochipa kitstos itlaj tsokuiltik ipan yejuamej. Tla tejua ijkon timomachilia, uelis kuajli tikmatstos ika Jehová yomitsikneli niman kuajli yomitstlapopolui. Ika yejon, xtlaj kipiya tikmakasis. Daniel akin otikteneujkej ipan párrafo 9, kuajli okitak ika yejuin melauak. Sakin ika tlayekankej okiyektlalijkej niman okipaleuijkej oksejpa makipiya chipauak itlamachilis, kuakon okimachili ika aman ika iyojlo nijyotiaya. Okijto: “Xok kipiaya nechtekipachos tlen onikchiuj. Ijkuak tlajtlakojli yoyaj, xok nokuepa. Ken Jehová kijtoua, yejua kimitki totlamamaluan niman uejka kominkaua. Xok oksejpa tikimitaskej”. Achtopa otikijtokej ika, ijkuak akin otemikti nemiya ijtik kalpan kampa nopaleuiayaj, xok kipiaya kimakasis tetlakuepiltijketl ipampa yestli. Noijki ijkon, ijkuak Jehová yotechtlapopoluili totlajtlakol, xok kipiya tikmakasiskej ika oksejpa matechilnamikti noso matechyolkuiti ipampa yejuin (xpoua Salmo 103:8-12). *
15, 16. ¿Kenon techpaleuiya ipan tonemilis tikmatiskej ika Jesús okitemakak inemilis topampa niman ika yejua toUeyi Teopixkauj?
15 Kema, tejuamej tikpiyaj miyek tlen ika titlaneltokaskej ipan iteiknelilis Jehová xsan ijkon ken israelitas. Ken otikitakej ipeujyan tlamachtijli, Pablo okijto ika xkuajli nomachiliaya niman noyolajmanaya pampa xueliya kitlakamatiya Jehová ken kinamikiya. San ika, maski noxixikouaya iuan tlajtlakojli niman ika tlen okichiujka yeuejkaui, okijto: “Nikmaka tlaxtlauijli Dios ika san itechkopa toTeko Jesucristo ueli nechmakixtia” (Rom. 7:25). Pampa yonoyolkuepka, kuajli kimatstoya ika Jehová yokitlapopoluijka itechkopa Jesús. Cristo okitemakak inemilis topampa, niman ijkon kichipaua totlamachilis niman techmaka yolseuilistli (Heb. 9:13, 14). Niman pampa yejua toUeyi Teopixkauj, “yejua ueli kinmakixtia para nochipa on yejuan yejua itechkopa kinisiuiyaj Dios, pampa yejua nochipa nemi para inka kitlajtlanilijtikaj Dios ma kimpaleui” (Heb. 7:24, 25). Yeuejkaui, itekiyo ueyi teopixki kinmachiltiaya israelitas ika Jehová kintlapopoluiskia intlajtlakoluan. Ipan yejuin tonajli, itekiyo Jesús ken toUeyi Teopixkauj techmaka miyek tlen ika uelis kuajli tikmatstoskej ika tikseliskej teiknelilistli niman “iueyi tetlajsojtlalis yejuan techpaleuis ijkuak itlaj techpolos” (Heb. 4:15, 16).
16 Ijkon tej, tla tikneki timopaleuis itech Jehová, xpiya tlaneltokijli ipan tlaxtlauijli tlen okichiuj Jesús. Maka xnemili ika tlaxtlauijli san kinpaleuiya oksekimej tlaltikpakchanejkej. Xpiya tlaneltokijli ika tlaxtlauijli tejua mitspaleuiya (Gál. 2:20, 21, TNM). Xpiya tlaneltokijli ika tlaxtlauijli yejua tlen kichiua ika toTajtsin makintlapopolui tlajtlakoltin tlen tejua otikinchiujka. Xpiya tlaneltokijli ika tlaxtlauijli tejua mitsmaka tlamachialistli ika tinemis nochipa. Tlaxtlauijli tlen okichiuj Jesús se tetlayokolijli tlen Jehová yomitsmakak tejua.
17. ¿Tleka tikneki timopaleuis itech Jehová?
17 Uejueyimej kalpamej kampa nopaleuiayaj kiteititiaj iteiknelilis Jehová. Intechkopa, toTajtsin kuajli okiteititi ika nemilistli melak tlasojti. San ika, noijki okiteititi kenon tlayekankej techpaleuiyaj, tlenon kijtosneki melauak timoyolkuepas niman tleka uelis tikmatstoskej ika yejua techtlapopoluiya. ¿Topaleuijtokej itech Jehová? San itech yejua melak kuajli topaleuiskej (Sal. 91:1, 2). Ipan okse tlamachtijli, tikitaskej kenon uejueyimej kalpamej kampa nopaleuiayaj techpaleuiya matikixkopinakan Jehová, akin techmaka ueyi neskayotl itech melajkayotl niman teiknelilistli.
^ párr. 2 Salmo 34:22: “Jehová kinmakixtijtika innemilis itekipanojkauan; nion se akin itech nopaleuijtokej xkitaskej ken tlajtlakole”.
^ párr. 6 Números 35:24, 25: “Kuakon tlanechikojli kipiya tetlajtlakolmakas itech akin otekoko niman akin tetlakuepiltis ipampa yestli, ken kijtouaj yejuin tlanauatiltin. Kuakon tlanechikojli kipiya kimakixtis akin otemikti itech ima akin tetlakuepiltis ipampa yestli niman kikuepaskej kalpan kampa timopaleuis kampa ocholojka, niman yejua kipiya ika ompa chantis hasta ijkuak mikis ueyi teopixki akin okitlapejpenkej ika chiauak tlen chipauak”.
^ párr. 10 Josué 20:4: “Yejua kipiya ika cholos ipan se itech yejuin uejueyimej kalpamej niman notelketsas ipan puerta kampa peua ueyikalpan niman kimijlis tlen opanok tlayekankej itech yejon ueyikalpan”.
^ párr. 10 Miyekej amoxtin Judíos kijtouaj ika inisiujchanejkauan yejon tlakatl akin xsan okinek otemikti kanaj iuan onchantiyaj ipan kalpan kampa nopaleuiayaj.
^ párr. 14 Salmo 103:8-12: “Jehová teikneliani niman tepaleuiya, xnimantsin kualani niman nochipa kitemaka tlen kuajli ika ueyi tetlasojtlalistli. Xnochipa kitstos tlen xkuajli nochiua, nion xnochipa kualantinemis. Xkichiua matiktlaxtlauakan ijkon ken yotitlajtlakojkej; nion xkichiua tlen kinamiki ipampa tlen xkuajli tikchiuaj. Pampa ijkon ken iluikamej melak uejkapamej xijkon ken tlaltikpaktli, ijkon ueyi itlasojtlalis tlen xtekaua itech akin kimojkaitaj. Ken uejka nokaua kampa kisa niman kampa kalaki tonajli, ijkon ika uejka yokintlali tlen xkuajli yotikchiujkej”.
