MIYEKEJ tokniuan akin yeuejkaui chantiyaj ipan okse país aman oksejpa yonokuepkej inpaís. Pampa kitlasojtlaj Jehová niman noijki oksekimej tlaltikpakchanejkej, yotlapaleuitoj kampa nonekij más tenojnotskej (Mat. 22:37-39). ¿Tlenon ononek kichiuaskej, niman kenon yokinteochiuj Jehová? Matitlajtokan itech sekimej tokniuan akin oksejpa yonokuepkej Camerún, se país tlen onka África occidental.

Ipan xiuitl 1998, se tokniuj akin itoka Onésime okis de Camerún niman onen 14 xiuitl ipan okse país. Se tonajli, ipan itlanechikol, se tokniuj akin kitemakatoya se tlamachtijli okijto ika melak kuajli tla tontlapaleuiyaj kampa nonekij más tenojnotskej, niman okijto: “Matikonnemilikan ika omemej amigos okimajsitoj michimej, niman se más kimajsitika kampa yejua nemi. ¿Xmelak ika akin xmás kimajsitika michimej yaskia kampa nemi iamigo?”.

Ijkuak Onésime okikak yejuin, okinemili nokuepas Camerún, kampa nonekij tenojnotskej niman kampa miyekej kinekij nomachtiskej itech Biblia. San ika, kinemiliaya ika kanaj xok nomatis pampa melak youejkauj ika xok ompa chanti. Ika yejon, kachtopa san chikuasen metstli otlapaleuito Camerún, niman ipan 2012 ompa onochantito.

Onésime kijtoua: “Nikan tona niman xijkon ken kampa ninemiya. Ononek ninomatis ninotlalis ipan bancos tlen xyemankej tlen onka ipan Kajli kampa tosentlaliaj”. Maski ijkon, tokniuj yolpaki niman kijtoua: “Ijkuak más nitlanemiliaya itech tlen kipanoltijtoyaj tokniuan ipan tlanechikojli, más nikilkauaya ika ninotlalijtoya kampa xtlayemankan”.

Ipan 2013, Onésime ononamikti iuan Géraldine. Yejua ochantika chiknaui xiuitl ne Francia, san ika, oksejpa yonokuepka Camerún. ¿Kenon okinteochiuj Jehová pampa onokojtilijkej chikauak kitekichiuiliskej? Onésime kijtoua: “San sekan otikselijkej Tlamachtijli tlen kiseliaj Akin Tenojnotsaj itech iTekiuajyo toTajtsin niman aman titlapaleuiyaj Betel. Isextli, ipan totlanechikol, onoapolaktijkej 20 akin nomachtijtoyaj Biblia. Nikmachilia ika aman ninemi kampa uelis nikinnextis miyekej ‘michimej’” (Mar. 1:17, 18). Géraldine kijtoua: “Xkeman oniknemili tla Jehová melak techteochiuaskia”.

Judith, akin yonochantitoya Estados Unidos, kinekiya más tenojnotsas. Yejua kijtoua: “Nochipa ijkuak niaya Camerún niman ijkon nikomintlajpalos nochanejkauan, melak ninajmanaya ijkuak niuajnokuepaya pampa xok ueliskia nikinmachtiskia akin yopeujka nikinmachtia itech Biblia”. Maski ijkon, xnoyolchikauaya onchantis ipaís. Yejua kipiaya  se tekitl kampa kuajli kitlaxtlauiliayaj, niman ika yejon tomin kitlaxtlauaya tlen ika nopajtiaya itaj, akin chanti Camerún. San ika, otlaneltokak itech Jehová niman onochanpatlak. Yejua kijtoua ika kemantika konilnamikiya kenon chantiya ne Estados Unidos. Okitlajtlanili Jehová makipaleui manomati kampa aman tlapaleuijtoya, niman melak okipaleui tlen okijlikej se tlayekanketl ipan circuito niman isiuatsin.

¿Niman kenon yokiteochiuj Jehová? Judith kijtoua: “Melak niyolpaki pampa ipan yeyi xiuitl onikinpaleui nauimej tlaltikpakchanejkej manoapolaktikan”. Yejuin tokniuj noijki opeuj tlapaleuiya ken precursora especial. Niman aman, yejua iuan iueuentsin, Sam-Castel, komintlajpalouaj tlanechikoltin ipan circuito. ¿Niman kenon okichiuili niman ijkon kipaleuis itaj? Judith niman ichanejkauan okinextijkej se hospital tlen onka ipan okse país kampa okimijlikej ika ueliskiaj kipajtiskej itaj niman xtlaj kitlaxtlauaskej. Niman melak kuajli ken okichiuilijkej operación.

Se tokniuj akin itoka Víctor onochantitoya Canadá. Sakin ika okiamapouj se revista Amatl Tekakistilijketl kampa tlajtouaya itech universidades, opeuj tlanemilia itech tlen okipouj. Okinemili kikauas universidad niman opeuj nomajmachtia kichiuas se tekitl. Kijtoua: “Pampa ijkon onikchiuj, más nimantsin oniknexti se tekitl niman opeuj nitlapaleuiya ken precursor, itlaj tlen melak niknekiya nikchiuas”. Sakin, ononamikti iuan Caroline niman otetlajpalotoj ne Camerún. Chika ompa nemiyaj, okixmatitoj sucursal niman okinyolchikaujkej matlapaleuitij Camerún. Víctor kijtoua: “Onikitak ika kema ueliskia ijkon tikchiuaskej. Niman, pampa tikyejyekouayaj tinemiskej san ika achijtsin, otikijtokej ika kema tontepaleuiskiaj”. Niman maski Caroline achijtsin kualouaya, oyajkej otlapaleuitoj.

Víctor niman Caroline opeuj tlapaleuiyaj ken precursores regulares niman ijkon uelis miyekej kinmachtiskej. Ijkuak kemach oajsikej, yejuamej xtekitiyaj pampa yokisentlalijkaj seki intomintsin. San ika, sakin otekititoj seki metstin ne Canadá niman ijkon ok tlapaleuijtoskej Camerún ken precursores. ¿Kenon okinteochiuj Jehová? Yejuamej okiselijkej Tlamachtijli tlen kiseliaj Akin Tenojnotsaj itech iTekiuajyo toTajtsin, otlapaleuijkej ken precursores especiales niman aman tlapaleuijtokej ken siervos de construcción. Víctor kijtoua: “Pampa otijkaujkej tlen tikpiayaj, aman kuajli tikitaj kenon Jehová techpaleuiya”.

Ipan 2002, se tokniuj itoka Alain, akin nomachtijtoya universidad ne Alemania, okiamapouj amatlajkuilojli Joven, ¿qué harás con tu vida?, tlen okipaleui makinemili kenon más uelis kitekichiuilis Jehová. Ipan 2006, oyajka ipan Escuela de Entrenamiento Ministerial niman okontitlankej Camerún, kampa yejua ualeuaya.

Ne Camerún, okinexti se tekitl kampa xnonekiya mojmostla tekitis. Sakin, okinexti okse tekitl kampa más kitlaxtlauiliayaj, san ika, kinemiliaya ika yejon tekitl ueliskia kichiuas maka matenojnotsa niman matemachti ijkon ken yeuejkaui kichiuaya. Ika yejon, ijkuak okijlikej tla ueliskia tlapaleuis ken precursor especial, nimantsin okinek. Pampa ipatrón xkinekiya mauiya, okijli ika más miyek kitlaxtlauiliskia, san ika, Alain xokinek. Sakin, ononamikti iuan Stéphanie, akin yochantika seki xiujtin ne Francia. ¿Tlenon okixnamik Stéphanie ijkuak oyaj Camerún?

Stéphanie kijtoua: “Achijtsin opeuj nikualo niman opeuj nikinpiya seki alergias, san ika, oniknexti tlenon ika ninopajtis”. Jehová okinteochiuj  yejuin tokniuan. Alain kijtoua: “Ijkuak otitenojnotsatoj Katé, se pitentsin kalpan tlen uejka nokaua, otikinnextijkej miyekej akin kinekiyaj nomachtiskej Biblia. Sakin, ouel otikinmachtijkej ika teléfono. Omemej tlakamej akin tikinmachtiayaj onoapolaktijkej, niman sakin ompa onochiuj se grupo”. Stéphanie kijtoua: “Melak teyolpakti ijkuak tikinpaleuiyaj oksekimej makixmatikan Jehová niman itech manosentemakakan. Nikan ipan Camerún miyekpa ijkon yotomachilijkej”. Aman, Alain niman Stéphanie komintlajpalouaj tlanechikoltin ipan circuito.

Gisèle onoapolakti ijkuak nomachtijtoya Medicina ne Italia. Kitaya ika on precursores akin kimachtiayaj Biblia nokojtiliayaj nemiskej san ika achijtsin, niman yejua noijki kinekiya ijkon kichiuas niman más tenojnotsas. Ika yejon, onochiuj precursora regular ijkuak ok nomachtijtoya ipan escuela.

Gisèle kinekiya oksejpa nokuepas Camerún niman ijkon más tenojnotsas, san ika, kajmanaya seki tlemach. Kijtoua: “Tla niaya Camerún, nikinkaujteuaskia noamigos niman sekimej nochanejkauan akin chantiyaj Italia, niman tla niknekiya niuajnokuepas Italia, nonekiskia oksejpa nikinyenkuilis noamauan”. Maski ijkon, ipan 2016, onokuep Camerún. Sakin ononamikti iuan Léonce, niman sucursal okimijli tla ueliskia ontlapaleuiskej ipan ueyikalpan Ayos, kampa xmás miyekej tenojnotskej.

¿Niman tlenon okixnamijkej ne Ayos? Gisèle kijtoua: “Miyekpa xtikpiayaj luz, yejua ika, toteléfonos xkeman kipiayaj batería. Oniuel nitlatlatia san ika tlikojtli, niman ika tlayoua tiayaj ika tolámpara tikonkuiyaj atl ipan carretilla pampa ijkuakon xok más tojlan katka”. Gisèle kijtoua tlenon okinpaleui matlaxikokan: “Ouel otitlaxikojkej pampa Jehová otechpaleui ika iespíritu santo, pampa san sekan otopaleuijkej niman pampa tochanejkauan niman toamigos techyolchikauayaj. Noijki, pampa yejuamej kemantika techtlayokoliayaj tomintsin”.

¿Yolpaki Gisèle pampa onokuep Camerún? Yejua kijtoua: “Kema, melak niyolpaki. Ijkuak kemach otejkokej, otikixnamijkej tlen ouijtika niman kemantika tajmanayaj. San ika, sakin otikitakej ika otikchiujkej tlen nonekiya tikchiuaskej. Otitlaneltokakej itech Jehová niman otikmachilijkej ika más kuajli iuan touikayaj”. Léonce niman Gisèle okiselijkej Tlamachtijli tlen kiseliaj Akin Tenojnotsaj itech iTekiuajyo toTajtsin niman aman yejuamej precursores especiales temporales.

Akin kimajsij michimej noneki kixikoskej tlen ouijtika tla kinekij kimajsiskej miyekej michimej. Noijki ijkon, tokniuan akin nokuepaj inpaís kinektokej kixikoskej maski san tlenon pampa kinekij kinpaleuiskej miyekej tlaltikpakchanejkej makixmatikan Jehová. Kuajli tikmatstokej ika Jehová kinteochiuas yejuin tokniuan akin chikauak kitekichiuiliaj (Neh. 5:19; Heb. 6:10). Tla tejua tichanti ipan okse país niman tikmati ika kampa tejua tiualeua nonekij más tenojnotskej, ¿ueliskia timokuepas niman ijkon ompa tontlapaleuis? Tla ijkon tikchiua, kuajli xmatsto ika Jehová mitsteochiuas (Prov. 10:22).