Oninemiko ipan 1983. Ijkuak nikonetl katka, ika noyojlo ninemiya, san ika, ijkuak onikajxilti 10 xiuitl, opeuj nechkokoua nochi notlakayo. Se tonajli, ijkuak yopanoka kanaj ome xiuitl, oniuajtlachix niman xok ouel oninouiyoni. Maski melak onikyejyeko, xok ouel onikinuiyoni nokxiuan. Xok keman ouel oninejnen. On kokolistli tlen onechajsik noijki okichiuj maka sa maninoskalti. Ika yejon, nipitentsin ijkon ken se konetl.

Ijkuak yopanokaj seki metstin ika san nikaltsauktoya pampa nikualouaya, otechtlajpalokoj omemej siuamej akin iteixpantijkauan Jehová. Nochipa ijkuak yakaj techuajtlajpalouaya, niniyanaya, san ika, yejon tonajli oniknek manechnojnotsakan. Ijkuak nechnojnotstoyaj itech xochitlalpan, onikilnamik ika, ijkuak nejua nikpiaya makuijli xiuitl, se misionero itoka Jethro, akin ualeuaya Surinam, uajlaya sejse metstli nikan ipan tokalpan niman ijkon temachtis itech Biblia. Yejuin misionero noijki kimachtiaya notaj. Melak kuajli ninouikaya iuan Jethro pampa yejua kuajli nechnotsaya. Noijki, noabuelos nechuikayaj ipan seki tlanechikoltin tlen kinpanoltiayaj iteixpantijkauan Jehová nikan ipan tokalpan. Ika yejon, ijkuak Florence, se itech yejon siuamej akin iteixpantijkauan Jehová, onechtlajtolti tla niknekiya imiuan ninomachtis Biblia, onikijli ika kema.

Florence aman ouajla iuan iueuentsin, akin itoka katka Justus, niman opeuj nechmachtiaj Biblia. Okitakej ika xniueliya nitlaamapouaya, yejua ika, opeuj nechititiaj letra. Sakin, ouel san noselti nitlaamapoua. Se tonajli, onechijlikej ika komintitlaniskiaj matenojnotsatij Surinam. Melak onechajman ika xok yakaj ueliskia nechuajmachtis nikan Orealla. San ika, melak oniyolpak pampa onikitak ika Jehová xonechilkauj.

Sakin, oyejkok se precursor akin itoka katka Floyd. Onechixmat ijkuak yejua tenojnotstinemiya techajchan. Ijkuak onechijli tla niknekiya ninomachtis Biblia, oniuetskak. Yejua onechtlajtolti: “¿Tleka tiuetska?”. Onikijli ika yonechmachtijkaj ika amatlajkuilojli ¿Tlenon kineki toTajtsin matikchiuakan? niman ika yopeujkaj nechmachtiaj ipan libro El conocimiento que lleva a vida eterna. * Noijki, onikijli tleka xok yakaj nechmachtiaya. Onitlan ninomachtia libro Conocimiento iuan tokniuj Floyd, san ika, yejua noijki oksekan okititlankej matlapaleuiti. Oksejpa xok yakaj nemiya akin ueliskia nechmachtis.

 San ika, ipan 2004, oyejkokej Granville niman Joshua, akin precursores especiales katkaj. Onechnextijkej ijkuak tenojnotstinemiyaj techajchan. Ijkuak onechtlajtoltijkej tla niknekiya ninomachtis Biblia, oniuetskak. Onikintlajtolti tla ueliskia tikpeualtiskej libro Conocimiento. Niknekiya nikitas tla nechmachtiskiaj tlen oksekimej tokniuan yonechititijkaj. Granville onechijli ika nikan ipan nokalpan nochiuayaj tlanechikoltin. Maski yopanoka kanaj majtlaktli xiuitl ika xnikisaya, niknekiya nias. Kuakon, Granville onechuikak ipan se silla de ruedas ipan Kajli kampa tosentlaliaj.

Sakin, Granville onechyolchikauj manikpanolti se Tlamachtijli Kampa Tomachtiaj iTekiyo toTajtsin. Onechijli: “Yemelak ika xueli tinejnemi, san ika, kema ueli titlajtoua. Ajsis se tonajli ijkuak tiktemakas se tlamachtijli. Tikitas ika ijkon panos”. Tlen onechijli melak onechpaleui niman onechyolchikauj.

Opeuj nitenojnotsa iuan Granville. Kachtopa, nechuikaya ipan silla de ruedas, san ika, pampa melak xtlakualkan katka ipan ojtli, onikijli Granville ika más kuajli tla nechuikaya ipan se carretilla, niman melak kuajli ika ijkon otikchiujkej. Oninoapolakti ipan abril de 2005. Sakin, tokniuan onechmachtijkej manikintemaka niman manikintlajtlani amatlajkuiloltin tlen nonekiya ipan tlanechikojli, noijki onechititijkej kenon niktekitiltis sonido ipan Kajli kampa tosentlaliaj.

Melak onechyolkoko ijkuak, ipan 2007, notaj okipix se accidente ipan se barco niman omik. Nochanejkauan melak noyolkokouayaj. Granville touan kichiuaya teoyotl niman techyolchikauaya ika Biblia. Ome xiuitl sakin, opanok itlaj tlen noijki melak otechajman: Granville noijki okipix se accidente ipan se barco niman omik.

Tokniuan ipan totlanechikol melak onajmankej. Aman, sa se tlapaleuijketl nemiya ipan totlanechikol niman xok nemiya nion se tlayekanketl. Tlen ipan onochiuj Granville melak onechyolkoko, pampa melak kuajli iuan ninouikaya niman nochipa nechpaleuiaya manikchikaua notlaneltokil niman manikpiya tlen nechpolouaya. Ipan kachtopa tlanechikojli tlen otikpixkej sakin ika omik, onechijlikej tla ueliskia nikpouas revista Amatl Tekakistilijketl. San ome párrafos ouel onikinpouj, pampa sakin opeuj nichoka. Kuakon oniuajtemok pampa xueliya ninokajkauaya.

Más kuajli opeuj ninomachilia ijkuak sekimej tokniuan otechpaleuikoj nikan Orealla. Sucursal noijki okuajtitlan se precursor especial akin itoka katka Kojo. Melak onechyolpakti ika nonan niman nokniuj akin xokoyotl opeuj nomachtiaj Biblia niman ika yonoapolaktijkej. Ipan marzo de 2015, oninochiuj tlapaleuijketl ipan tlanechikojli. Niman oajsik se tonajli ijkuak oniktemakak se tlamachtijli. Ipan yejon tonajli, oniyolpak niman onichokak pampa onikilnamik tlen Granville onechijlika: “Ajsis se tonajli ijkuak tiktemakas se tlamachtijli. Tikitas ika ijkon panos”.

Ipampa tlen kisa ipan JW Broadcasting^®, yonikitak ika miyekej tokniuan noijki kixnamiktokej tlen ouijtika ijkon ken nejua. Maski xmiyek ueli kichiuaj, kitekichiuiliaj Jehová niman yolpakij. Nejua noijki niktekichiuilia Jehová hasta kampa niueli. Pampa niknekiya más niktekichiuilis toTajtsin, oninochiuj precursor regular. Melak oniyolpak ijkuak, ipan septiembre de 2019, onechijlikej manitlapaleui ken tlayekanketl ipan notlanechikol, kampa nemij kanaj 40 tenojnotskej.

Melak nikintlasojkamachilia tokniuan tlakamej niman siuamej akin onechmachtijkej tlen melauak niman akin onechpaleuijkej maniktekichiuili Jehová. San ika, más niktlasojkamati ika Jehová xkeman nechilkaua.