TLAMACHTIJLI 48
Nochipa matitlanemilijtokan itech tlen nochiuas ika tlayekapan
“Nochipa xtlachixtiu melajki moyakapan. Maka xkixkaua on tlen onkaj moyakapan” (PROV. 4:25).
TLAKUIKAJLI 77 Se tlauijli kampa tlayouatikak
TLEN TIKITASKEJ *
1, 2. ¿Kenon uelis tikchiuaskej tlen kijtoua Proverbios 4:25? Xkijto se neskayotl.
MATONTLANEMILIKAN itech tlen inpan nochiua yeyimej tokniuan. Se tokniuj lamajtsin peua tlanemilia itech tlen kualtsin ipan onochiuj ijkuak ichpochtli katka. San ika, maski aman kixnamiki tlen ouijtika, ok chikauak kitekichiuilijtika Jehová (1 Cor. 15:58). Yejua mojmostla kinemilia kenon kualtsin nemis ipan xochitlalpan imiuan ichanejkauan niman iamigos. Okse tokniuj siuatl kilnamiki kenon se tokniuj okiyolkoko, san ika, yejua kitlapejpenia kitlapopoluis (Col. 3:13). Niman se tokniuj tlakatl noyolkokoua ipampa tlen xkuajli okichiuj yeuejkaui, san ika, nokojtilia melajkanemis itech Jehová (Sal. 51:10).
2 Tla tikitaj, nochimej yejuin tokniuan kilnamikij tlen yeuejkaui inpan onochiuj, san ika, xsan itech yejon tlanemilijtokej. Yejuamej nochipa tlanemiliaj itech tlen nochiuas ika tlayekapan (xpoua Proverbios 4:25).
3. ¿Tleka melak noneki matitlanemilijtokan itech tlen nochiuas ika tlayekapan?
3 ¿Tleka melak noneki matitlanemilijtokan itech tlen nochiuas ika tlayekapan? Matikonnemilikan yejuin, xakaj uelis melajkanejnentias tla san ontlachixtika ikuitlapan. Noijki ijkon, tejuamej xuelis kuajli tiktekichiuiliskej Jehová tla san nochipa titlanemilijtokej itech tlen yeuejkaui opanok (Luc. 9:62).
4. ¿Tlenon tikitaskej ipan yejuin tlamachtijli?
4 Ipan yejuin tlamachtijli, tikitaskej yeyi tlemach tlen uelis kichiuas san matitlanemilijtokan itech tlen yeuejkaui opanok. * Kachtopa, ijkuak melak tajmanaj. Ika ome, ijkuak xtiknekij titetlapopoluiskej. Niman, ika yeyi, ijkuak melak totlajtlakoltiaj. Tikimitaskej seki tlaxeloltin tlen techpaleuiskej matitlanemilijtokan itech “tlen onkaj tlayakapan” niman maka san itech tlen yonokauj “tlakuitlapan” (Filip. 3:13).
IJKUAK MELAK TAJMANAJ
¿Tlenon uelis kichiuas maka matitlanemilikan itech tlen panos ika tlayekapan? (Xkimita párrafos 5, 9 niman 13). *
5. ¿Tlenon techasikamachiltia Eclesiastés 7:10?
5 (Xpoua Eclesiastés 7:10). Tla tikitaj, yejuin tlaxelojli xkijtoua tla xkuajli tla totlajtoltiaj tleka on tlen youajpanok kuajli katka. Yej kijtoua maka matotlajtoltikan tleka “on tlen achtopa onochiu más kuajli katka xken aman”. Matikilnamikikan ika Jehová yejua kichiua maka matikilkauakan nochi tlen kuajli topan yonochiuj. Kuakon, Biblia techasikamachiltia maka matiknemilikan ika aman xuelis tinemiskej ika toyojlo san pampa xok tinemij ijkon ken yeuejkaui tinemiyaj.
¿Tlenon okichiujkej israelitas sakin ika ouajkiskej itech Egipto? (Xkita párrafo 6).
6. ¿Tleka xkuajli tla san nochipa tiknemilijtokej ika yeuejkaui más kuajli tinemiyaj xijkon ken aman? Xkijto se neskayotl.
6 ¿Tleka xkuajli tla san nochipa tiknemilijtokej ika yeuejkaui más kuajli tinemiyaj xijkon ken aman? Pampa yejuin uelis kichiuas melak matajmanakan. Niman ijkuak yakaj ijkon nomachilia, kemantika san kilnamiki tlen kuajli ipan onochiujka niman kilkaua on tlen xkuajli okixnamijka. Matitlanemilikan itech tlen yeuejkaui inpan onochiuj israelitas: ijkuak san kemach okiskej itech Egipto, san kilnamiktoyaj kenon kuajli tlakuayaj niman okilkaujkej kenon melak kintlajyouiltiayaj. Kijtouayaj: “Tikelnamikij on michimej yejuan tikinkuayaj ne Egipto, niman xtikintlaxtlauayaj. Niman no tikuayaj pepinos, melones, puerros, xonakatl niman ajo” (Núm. 11:5). ¿Melauak xitlaj kitlaxtlauayaj? Ka. Maski kikuayaj nochi yejon, yejuamej melak tlajyouiayaj ne Egipto pampa chikauak kintekitiltiayaj (Éx. 1:13, 14; 3:6-9). San ika, nimantsin okilkaujkej kenon tlajyouiayaj niman oksejpa kinekiyaj nemiskej ken yeuejkaui. Yejuamej xkinekiyaj kitaskej kenon Jehová yokinmakixtijka, san tlanemilijtoyaj itech ken nemiyaj yeuejkaui. ToTajtsin xokuelitak ika ijkon okichiujkej (Núm. 11:10).
7. ¿Tlenon okipaleui se tokniuj siuatl maka melak manajmana?
7 ¿Tlenon techpaleuis maka melak matajmanakan? Matikitakan tlenon ipan onochiuj se tokniuj siuatl. Ipan 1945, yejua opeuj tlapaleuiya Betel tlen onkatka Brooklyn. Sakin, ononamikti iuan se tokniuj akin noijki betelita katka, niman omemej otlapaleuijkej Betel miyek xiujtin. Ipan 1976, iueuentsin okualok. Achto mikiskia, yejua okijli isiuatsin tlen ueliskia kichiuas niman ijkon maka melak najmanas. Okijli: “Melak kualtsin san sekan yotinenkej. Miyekej akin yononamiktijkej xueli yolpakij ijkon ken tejuamej”. Niman noijki okijli: “Maka san xnemilijto tlen yopanok. Ika yolik tikilkaujtias nochi tlen teajman. Maka san xmajmanto niman maka san motech xtlanemili. Xtlasojkamachili Jehová ipampa nochi tlen otikchiujkej ipan ikalpan. Ajsis se tonajli ijkuak mitsyolpaktis tikilnamikis nochi tlen san sekan otikchiujkej. ToTajtsin yejua akin kichiua maka matikilkauakan yejuin”. ¡Melak kualtsin tlen okijli!
8. ¿Tleka melak kuajli ika tokniuj siuatl xsan otlanemili itech tlen yeuejkaui ipan onochiujka?
8 Tokniuj okichiuj ijkon ken okijli iueuentsin. Tokniuj chikauak okitekichiuili Jehová hasta ijkuak omik, ijkuak kipiaya 92 xiuitl. Ijkuak ximikiya, yejua okijto: “Ijkuak nikilnamiki kenon chikauak yoniktekichiuili Jehová yejuin 63 xiuitl, kuajli nikita ika melak yoniyolpak”. ¿Tleka ijkon okijto? Yejua okijto: “Ueli niyolpaki pampa ninemi ipan ikalpan toTajtsin niman pampa uelis ninemis imiuan tokniuan ipan se kualtsin xochitlalpan. Ompa nochipa tiktekichiuiliskej toTajtsin Jehová akin otexchijchiuj”. * Matikchiuakan ijkon ken yejuin tokniuj akin nochipa otlanemili itech tlen nochiuas ika tlayekapan.
IJKUAK XTIKNEKIJ TITETLAPOPOLUISKEJ
9. Ijkon ken kijtoua Levítico 19:18, ¿kanaj kemanon uelis ouijtika tikitaskej titetlapopoluiskej?
9 (Xpoua Levítico 19:18). Melak ouijtika tikitaj titetlapopoluiskej tla akin techyolkokoua se tokniuj, se tochanejkauj noso se toamigo. Sejpatipan, se tokniuj siuatl okinemilijka ika okse tokniuj siuatl yokichtekilijka tomin, san ika, yejon xmelauak katka. Sakin okitlajtlanili makitlapopolui, san ika, on okse tokniuj melak yonoyolkokojka niman xueliya kilkauaya tlen opanoka. Kanaj tejuamej xkeman ijkon topan yonochiuj, san ika, kanaj kema ouijtika yotikitakej tiktlapopoluiskej yakaj akin melak otechyolkoko.
10. ¿Tlenon techpaleuis matitetlapopoluikan?
10 ¿Tlenon techpaleuis matitetlapopoluikan? Tla tikilnamikij ika Jehová nochi ueli kita. Yejua kita nochi tlen tikixnamikij niman tlen xkuajli texchiuiliaj oksekimej (Heb. 4:13). Noijki, najmana ijkuak kita ika titlajyouiyaj (Is. 63:9, TNM). Niman techijlia ika ajsis se tonajli ijkuak xok toyolkokoskej pampa yejua kipopolos nochi tlen techtlajyouiltia (Apoc. 21:3, 4).
11. ¿Kenon techpaleuis tla titetlapopoluiyaj?
11 Noijki noneki tikilnamikiskej ika tla titetlapopoluiyaj, más kuajli tomachiliskej. Ijkon onomachili tokniuj akin okitlajtolchijchiuilijkaj. Sakin, yejuin tokniuj ouel okitlapopolui akin ijkon okichiuilijka. Okasikamat ika tla tejuamej titetlapopoluiyaj, Jehová noijki techtlapopoluis (Mat. 6:14). Yejua kimatstoya ika tokniuj xkuajli tlen okichiuilijka, maski ijkon, okinek kitlapopoluis. Yejuin okipaleui más mayolpaki niman más kuajli makitekichiuili Jehová.
IJKUAK MELAK TOTLAJTLAKOLTIAJ
12. ¿Tlenon techmachtia 1 Juan 3:19, 20?
12 (Xpoua 1 Juan 3:19, 20). Kemantika kanaj totlajtlakoltiaj pampa otikchiujkej itlaj tlen xkinamikiya. Kanaj ijkuak xitikixmatiyaj Jehová otikchiujkej itlaj tlen xkuajli noso kanaj otopopolojkej sakin ika yotoapolaktijkaj, ika yejon, kanaj kemantika xkuajli tomachiliaj. Tinochimej ijkon tomachilianij (Rom. 3:23). Melauak, maski melak tokojtiliaj tikchiuaskej tlen kuajli, “tinochimej tikchiuaj miyek tlajtlamach tlen xkuajli” (Sant. 3:2; Rom. 7:21-23). Maski tajmanaj ijkuak totlajtlakoltiaj, yejon tlen tikmachiliaj uelis techpaleuis. ¿Tleka? Pampa uelis kichiuas matikasikamatikan ika noneki toyektlaliskej niman ika noneki tokojtiliskej xok ijkon tikchiuaskej (Heb. 12:12, 13).
13. ¿Tleka xnoneki melak totlajtlakoltiskej?
13 San ika, kanaj xueli tijkajkauaj ika melak totlajtlakoltiaj maski yotoyolkuepkej niman maski Jehová yotechititi ika yotechtlapopolui. Yejuin tlen tikmachiliaj, uelis melak techijtlakos (Sal. 31:10; 38:3, 4). ¿Tleka ijkon tikijtouaj? Matikitakan kenon nomachiliaya se tokniuj siuatl akin melak notlajtlakoltiaya ipampa tlen yeuejkaui okichiujka. Yejua kijtoua: “Niknemiliaya ika kanaj Jehová xok kinekiskia nechmakixtis, ika yejon, niknemiliaya ika xtlaj ika nechpaleuiskia tla ninokojtiliaya niktekichiuilis”. Kanaj kemantika noijki ijkon yotomachilijkaj. San ika, noneki totlajpiyaskej maka ijkon titlanemiliskej. Satanás kuelitaskia matiknemilikan ika toTajtsin xok techtlasojtla, maski Jehová kema techtlasojtla niman yotechtlapopolui (uelis tikitas 2 Corintios 2:5-7, 11).
14. ¿Kenon uelis kuajli tikmatstoskej ika Jehová yemelak techtlapopoluis?
14 Maski ijkon, kanaj totlajtoltiaj: “¿Kenon uelis kuajli nikmatis ika Jehová yemelak nechtlapopoluis?”. Pampa ijkin totlajtoltiaj, kiteititia ika tiknekij touikaskej iuan Jehová niman ika yejua uelis techtlapopoluis. ¿Tleka ijkon tikijtouaj? Yeuejkaui, se revista La Atalaya okijto: “Kanaj ijkuak xitiktekichiuiliayaj toTajtsin tikchiuayaj itlaj tlen xkinamikiya. Niman aman tajmanaj pampa kemantika oksejpa tikchiuaj tlen xkinamiki, niman tikitaj ika xueli tijkajkauaj”. Noijki kijtouaya: “Maka xmosiaujkaua. Maka xnemili ika Jehová xkeman uelis mitstlapopoluis. Yejon tlen Satanás kuelitaskia xnemili. Pampa timajmana niman timotlajtlakoltia, kiteititia ika tejua kema tiyolkuajli niman ika toTajtsin uelis mitstlapopoluis. Ika yolyemanilistli niman ika nochi moyojlo xtlajtlanili toTajtsin mamitstlapopolui, mamitspaleui kuajli xmomachili niman mamitspaleui maka oksejpa ijkon tikchiuas. Xnotsa toTajtsin ijkon ken se konetl kinotsa itaj ijkuak kixnamiki itlaj tlen ouijtika, maski tejua kanaj miyekpa ijkon yotikchiujka. Jehová ika iyojlo kinektos mitspaleuis pampa yejua se toTajtsin akin melak teiknelia”. *
15, 16. ¿Kenon nomachiliaj sekimej tokniuan ijkuak kasikamatij ika Jehová ok kintlasojtla?
15 Miyekej tokniuan yolseuij ijkuak kimatij ika Jehová uelis kintlapopoluis. Ipan se revista La Atalaya, itech sección “La Biblia les cambió la vida”, se tokniuj siuatl okijto ika xueliya kineltokaya tla Jehová ueliskia kitlasojtlas, pampa melak miyek tlen xkuajli yokichiujka. Maski youejkaujka ika yonoapolaktijka, yejua ok ijkon nomachiliaya. San ika, opeuj tlanemilia itech tlen Jesucristo okichiuj topampa niman yejon melak okipaleui. *
16 Se tokniuj tlakatl melak okipaleui tlen okipouj ipan yejuin revista. ¿Kenon okipaleui? Yejua kijtoua: “Ijkuak nitelpochtli katka melak nikitaya pornografía, san ika, ouel onijkajkauj. Melak ninoyolkokoua pampa san kemach oksejpa ijkon onikchiuj. Onikintlajtlanili tokniuan tlayekankej manechpaleuikan, niman yonikchiuj tlen onechijlikej. Yejuamej nechijliaj ika toTajtsin nechtlasojtla niman nechiknelia. Maski ijkon, kemantika niknemilia ika xtlaj ika nitepaleui niman ika toTajtsin xuelis nechtlasojtlas. San ika, tlen onikpouj ipan revista melak onechpaleui. Aman yonikasikamat ika, ijkuak niknemilia ika Jehová xkeman uelis nechtlapopoluis, kentla nikijtojtoskia ika xtlaj ika tepaleui tlen okichiuj Jesús topampa. Onikejyeuj yejuin tlamachtijli niman ijkon nikamapouas niman itech nitlanemilis ijkuak nikmachilis ika Jehová xnechtlasojtla”.
17. ¿Tlenon okipaleui Pablo maka melak manotlajtlakolti?
17 Ijkuak tikitaj kenon nomachiliaj yejuin tokniuan, tikilnamikij apóstol Pablo. Yejua okichiuj miyek tlemach tlen xkuajli achto nochiuaskia inomachtijkauj Cristo. Maski kilnamikiya tlenon okichiujka, xsan itech yejon tlanemilijtoya (1 Tim. 1:12-15). Yejua kimatstoya ika Jehová melak kitlasojtlaya pampa hasta okuajtitlan iKoneuj ken tlaxtlauijli niman ijkon ueliskia kitlapopoluis (Gál. 2:20). Yejon okipaleui maka melak manotlajtlakolti. Niman chikauak okitekichiuili Jehová.
MATITLANEMILIJTOKAN ITECH TLEN NOCHIUAS IKA TLAYEKAPAN
Nochipa matitlanemilikan itech tlen panos ika tlayekapan. (Xkimita párrafos 18 niman 19). *
18. ¿Tlenon yotiuelkej ipan yejuin tlamachtijli?
18 ¿Tlenon yotiuelkej ipan yejuin tlamachtijli? Kachtopa, ika Jehová yejua kichiua maka matikilkauakan nochi tlen kuajli topan yonochiuj; san ika, maski melak kuajli tlen topan onochiuj yeuejkaui, más kuajli yes tlen topan nochiuas ika tlayekapan. Ika ome, oksekimej kanaj techyolkokoskej, san ika, tla tejuamej tikintlapopoluiyaj, melak kuajli tiktekichiuiliskej Jehová. Ika yeyi, tla melak totlajtlakoltiaj, uelis kichiuas maka matechyolpakti tiktekichiuiliskej Jehová. Yejua ika, ijkon ken Pablo, noneki tikneltokaskej ika Jehová yotechtlapopolui.
19. ¿Kenon tikmatij ika ipan xochitlalpan xok tikilnamikiskej tlen xkuajli topan onochiuj?
19 Ipan xochitlalpan, kampa tikpiyaskej se nemilistli tlen xkeman tlamis, xok keman tikilnamikiskej nochi tlen xkuajli topan onochiuj. Biblia kijtoua ika, ijkuakon, “on tlen yonochiu, nochimej kelkauaskej” (Is. 65:17). Kanaj tejuamej youejkauj ika tiktekichiuilijtokej Jehová niman aman yotiueuentsintiakej; san ika, xkonnemili kenon ipan xochitlalpan oksejpa titelpochtiaskej (Job 33:25). Ika yejon, maka san matitlanemilijtokan itech tlen yopanok, yej matitlanemilikan itech tlen nochiuas ika tlayekapan.
TLAKUIKAJLI 142 Maka matikmakauakan totlamachialis
^ párr. 5 Melak kuajli tla tikilnamikij tlen yeuejkaui topan onochiuj. San ika, tla san nochipa itech yejon titlanemilijtokej, kanaj xok kuajli tiktekichiuiliskej Jehová ipan yejuin tonaltin niman xok titlanemiliskej itech tlen yejua kichiuas ika tlayekapan. Ipan yejuin tlamachtijli, tikitaskej yeyi tlemach tlen noneki tikmapeuaskej tla xtiknekij ijkon topan manochiua. Tikimitaskej seki textos niman noijki tlen yokichiujkej sekimej tokniuan.
^ párr. 4 TLEN NONEKI MATIKMATIKAN: Yakaj akin san nochipa tlanemilijtika itech tlen yeuejkaui opanok, san nochipa itech yejon tlajtotika niman kinemilia ika ijkuakon más kuajli nemiya xijkon ken aman.
^ párr. 14 Xkita La Atalaya del 1 de julio de 1954, página 410.
^ párr. 59 TLEN NESI IPAN TLAIXKOPINAJLI: Tla melak tajmanaj, tla xtiknekij titetlapopoluiskej niman tla melak totlajtlakoltiaj, uelis kichiuas maka kuajli matinejnentiakan ipan yejon ojtli tlen teuika ipan nemilistli.
^ párr. 66 TLEN NESI IPAN TLAIXKOPINAJLI: Ijkuak xtijkauiliaj ika nochi yejuin matechijtlako, tiyolpakij niman ueli titlanemiliaj itech tlen panos ika tlayekapan.
