¿Itikmatiya?
¿Tlenon ipan onochiuj Nínive sakin ika omik Jonás?
KANAJ ipan xiuitl 670, ijkuak xpeuaya xiuitl 1, kalpan Asiria más ueyixtoya itech nochi tlaltikpaktli. Ipan página de internet de Museo Británico onoijto ika Asiria tekiuajtiya desde Chipre hasta Irán niman ipan seki xiujtin hasta otekiuajtik Egipto. Ipan yejon tonaltin, Nínive, icapital Asiria, más ueyi katka itech nochi tlaltikpaktli. Ne Nínive yokichijchiujkaj miyek tlemach tlen temojkatlachialti, kipiayaj uejueyimej jardines, kualtsitsintin kaltin niman bibliotecas. Noijki, seki tlen okijkuilojkej ipan tepantin tlen yeuejkaui onochijchiujkej ne Nínive, kiteititia ika tekiuaj Asurbanipal san no yejua onotokayoti ken “tekiuaj itech nochi tlaltikpaktli”. Yejuin itlaj tlen noijki okichiujkej oksekimej tekiuajkej asirios. Ipan yejon tonaltin, nesiya ika xakaj ueliskia kintlanis Asiria niman Nínive.
Asiria más ueyixtoya itech nochi tlaltikpaktli ipan yejon tonaltin.
San ika, ijkuak Asiria melak ueyixtoya, teotlajtoketl Sofonías okijto tlenon kichiuaskia Jehová: “Yejua [...] kipopolos Asiria. Kixoxotonis Nínive; kikauas ken se tlaluaktli”. Noijki, okse iteotlajtokauj Jehová, akin itoka katka Nahúm, okijto: “¡Xkixtilikan Plata! ¡Xkixtilikan oro! [...] ¡Ipan kalpan xok yakaj nemi, yonokauj ken tlaluaktli niman yoxoxoton! [...] Akin mitsitas cholojtikisa niman kijtos: ‘¡Nínive yokixoxotonijkej!’” (Sof. 2:13, TNM; Nah. 2:9, 10; 3:7, TNM). Akin okinkakkej yejon teotlajtoltin, kanaj onotlajtoltijkej: “¿Yemelak nochiuas? ¿Yakaj uelis kipopolos Asiria?”. Kanaj xueliya kineltokayaj.
Nínive onokauj ken se tlaluaktli niman xok yakaj ompa ochantik.
San ika, onochiuj tlen yonoijtoka. Kanaj ipan xiuitl 600, ijkuak xpeuaya xiuitl 1, babilonios niman medos yokinotlatkitijkaj Asiria. Sakin, nochimej akin chantiyaj Nínive opeuj yauej niman xok keman yakaj ompa ochantik. Ipan se iamatlajkuilol Museo de Arte Metropolitano de Nueva York, kijtoua ika yejuin kalpan ika yolik otlalpachiujtia, niman tlaltikpakchanejkej san kixmatiyaj Nínive tlen Biblia kiteneua. Biblical Archaeology Society, kijtoua ika, ipeujyan siglo diecinueve, xakaj kimatiya tla icapital Asiria yemelak onkatka. San ika, ipan xiuitl 1845, ixtlamatki Austen Henry Layard opeuj tlachkua niman okinexti ueyikalpan Nínive. Tlen okinextijkej okiteititi ika Nínive melak ueyixtoya.
Ijkuak tikitaj ika onochiuj nochi tlen onoijtoka itech Nínive, techpaleuiya más machikaui totlaneltokil. Pampa yejuin techititia ika, ijkon ken yonoijto ipan Biblia, noijki ajsis on tonajli ijkuak kinpopoloskej tekiuajkej akin aman nemij (Dan. 2:44; Apoc. 19:15, 19-21).
