1. ¿Kanaj tlenon totlajtoltianij?

 ¿TIMOMOJTIA ijkuak tiknemilia kenon kinpopoloskej tlaneltokiltin tlen xmelajkej, techixnamikis Gog de Magog niman peuas Armagedón? ¿Kemantika timotlajtoltia tla uelis tiyolmelajkanemis ijkuak nochiuas nochi yejuin? Tla kema, melak mitspaleuis tlen Jesús okijto ipan Juan 14:1. Ompa, Jesús okimijli inomachtijkauan: “Maka xmoyolajmanakan. Xneltokakan Dios”. Tla chikauak tikpiyaj totlaneltok, uelis tikxikoskej maski san tlenon tikixnamikiskej ika tlayekapan.

2. ¿Tlenon techpaleuis matikchikauakan totlaneltok, niman tlenon tikitaskej ipan yejuin tlamachtijli?

² ¿Tlenon techpaleuis matikchikauakan totlaneltok para uelis tikxikoskej tlen tikixnamikiskej ika tlayekapan? Tla aman tikitaj kenon totlaneltok techpaleuiya matikxikokan tlen ouijtika. Yejuin techpaleuis matikitakan tla noneki más tikchikauaskej totlaneltok. Totlaneltok más chikaujtiuj ijkuak tejuamej tikxikouaj itlaj tlen ouijtika. Niman yejuin techpaleuis matikxikokan tlen sakin tikixnamikiskej. Ipan yejuin tlamachtijli, tikitaskej naujkan kampa inomachtijkauan Jesús okiteititijkej ika xmás chikaujtoya intlaneltok. Noijki, tikitaskej kenon uelis titlaxikoskej ijkuak tikixnamikiskej seki tlen yejuamej okixnamijkej, niman kenon yejon techpaleuis ika tlayekapan.

3. Itech tlen kijtoua Mateo 6:30, 33, ¿tlenon okijto Jesús itech totlaneltok?

³ Se tajtli nokojtilia kinmakas tlen kikuaskej, tlen ika notlakentiskej niman kampa chantiskej isiuauj niman ikoneuan. Ipan yejuin tonaltin, kemantika ouijtika. Sekimej tokniuan yokipolojkej intekiyo niman, maski kitejtemouaj, xkinextiaj okse. Oksekimej, xkiseliaj se tekitl tlen kimijliaj pampa ompa nochiua itlaj tlen Jehová xkuelita. Ijkuak tejuamej yejon tikixnamikij, melak noneki matikneltokakan ika Jehová techmakas nochi tlen techpoloua. Ipan tlamachtijli ipan tepetl, Jesús kuajli okimijli inomachtijkauan ika Jehová nochipa kinpaleuiskia (xpoua Mateo 6:30, 33). Tla kuajli tikneltokaj ika Jehová nochipa techpaleuis, san tiknemilijtoskej kenon más chikauak tiktekichiuiliskej. Ijkuak tikitaskej kenon Jehová techmaka nochi tlen techpoloua, más tiknisiuiskej niman totlaneltok más chikauis.

4, 5. ¿Tlenon kinpaleuiya sekimej tokniuan maka sajnoye manajmanakan maski xkipiyaj tlen ika nopanoltiskej?

⁴ Matikitakan tlenon inpan onochiuj tokniuan Castro, akin chantij Venezuela. Yejuamej kuajli yokitakej kenon Jehová yokinpaleui makinextijtiakan tlen ika nopanoltiskej. Yejuamej kipiayaj se tlajli kampa tlatokayaj niman tlen ompa kikixtiayaj kimajxiliaya para kuajli nemiskej. San ika, se tonajli, sekimej xkuajkualtin tlakamej okinkuilijkej intlal niman okintotokakej. Tokniuj Miguel, akin tajtli, kijtoua: “Aman sa topanoltijtiuej ika tlen tiktokaj ipan se pitentsin tlajli tlen otechtlanejtijkej. Mojmostla niktlajtlanilia Jehová matechmaka tlen ika topanoltiskej ipan yejon tonajli”. Melak ouijtika tlen kixnamiktokej tokniuan Castro, san ika, yejuamej kuajli kineltokaj ika Jehová mojmostla kinmakas tlen kinpoloua. Yejua ika, yejuamej nochipa yauej tlanechikojli niman tenojnotsaj. Yejuamej nokojtiliaj chikauak kitekichiuiliskej Jehová, niman yejua kintlajpiya.

⁵ Miguel niman isiuauj, Yurai, xsan tlanemilijtokej itech nochi tlen xkuajli kixnamiktokej, yej tlanemiliaj itech kenon Jehová kintlajpixtika. Kemantika, Jehová yokintekitilti tokniuan para makinmakakan tlen kinpoloua noso para makipaleuikan tokniuj Miguel makinexti se tekitl. Niman kemantika, Jehová yokinpaleui yejuin tokniuan itechkopa tlen kontitlani sucursal. Yejua xkeman san inselti kinkaua. Ika yejon, intlaneltok yejuin tokniuan más yochikauj. Sakin ika Yoselin, imichpoch akin más iueyi, okiteneuj kenon Jehová yokinpaleui, yejua kijtoua: “Melak nechyolchikaua niman hasta nichoka ijkuak nikita kenon Jehová techpaleuiya. Yejua noamigo niman nikmati ika nochipa nechpaleuis”. Noijki kijtoua: “Nochi tlen yotikixnamijkej yotechpaleui para uelis tikxikoskej nochi tlen tikixnamikiskej ika tlayekapan”.

6. ¿Kenon uelis tikchikauas motlaneltok tla ouijtika tikita tiknextis tlen ika timopanoltis?

⁶ ¿Tejua noijki ouijtika tikita tiknextis tlen  ika timopanoltis? Tla kema, tikmatstokej ika melak teajman tlen tikixnamiktok. Maski ijkon, uelis tiktekitiltis yejuin tiempo niman ijkon más tikchikauas motlaneltok. Xchiuili teoyotl Jehová, xpoua tlen Jesús okijto ipan Mateo 6:25-34 niman xtlanemili itech tlen ompa kijtoua. Xkita kenon ipan yejuin tonaltin Jehová kintlajpixtika itekipanojkauan akin chikauak kitekichiuilijtokej (1 Cor. 15:58). Yejon mitspaleuis xneltoka ika, ijkon ken Jehová yokinpaleui oksekimej, noijki mitspaleuis. Yejua kimati tlenon mitspoloua niman noijki kimati kenon mitsmakas. Ijkuak tikitas kenon Jehová mitspaleuiya, más chikauis motlaneltok niman uelis tikxikos tlen tikixnamikis ika tlayekapan (Hab. 3:17, 18).

7. Itech tlen kijtoua Mateo 8:23-26, ¿tlenon okiteititijkej inomachtijkauan Jesús ijkuak opeuj chikauak ajakakiyaui?

⁷ Se tonajli, Jesús niman inomachtijkauan yayaj ipan se barco niman opeuj chikauak ajakakiyaui. Ijkuakon, Jesús okinpaleui inomachtijkauan makitakan ika nonekiya más kichikauaskej intlaneltok (xpoua Mateo 8:23-26). Pampa melak chikauak ajakakiyaujtoya, atl okalak ijtik barco. San ika, Jesús ika iyojlo kochtoya. Inomachtijkauan Jesús melak onomojtikej niman okitlajtlanilitoj makinpaleui. Ika tlasojtlalistli, Jesús okimijli: “¿Tline sanoyej nemomojtiaj? ¡Nemejuamej semi achijtsin nenkipiyaj nenmotlaneltok!”. Yejuamej, nonekiya kimatstoskiaj ika Jehová ueliskia kipaleuis Jesús niman akin imiuan nemiya. ¿Tlenon techmachtia yejuin? Ika tla chikauak tikpiyaj totlaneltok uelis tikxikoskej nochi tlen ouijtika.

8, 9. ¿Tlenon ipan onochiuj tokniuj Anel, niman tlenon okipaleui?

⁸ Matikitakan kenon tokniuj Anel, akin chanti Puerto Rico niman xkipiya iueuentsin, más ochikauj itlaneltok ijkuak okixnamik itlaj tlen ouijtika. Ne Puerto Rico, ipan 2017, otlaixpolo ajakakiyaujtli María. Tokniuj Anel, oxoxoton ikal niman xok kipiaya tekitl. Yejua kijtoua: “Ijkuak oajakakiyauj, melak oninomojti. Tlen nopan onochiuj onechpaleui manikita ika melak nonekiya niknotsas Jehová niman ika xnonekiya nimojkamikis”.

⁹ Anel kijtoua ika pampa yejua otetlakamat noijki okipaleui makixiko tlen kixnamiktoya. Yejua kijtoua: “Pampa onikchiuj tlen ikalpan Jehová nechtlajtlaniliaya, onechpaleui maka sajnoye maniajmankamiki. Kuajli onikitak kenon Jehová onechpaleui pampa tokniuan onechyolchikaujkej ika Biblia niman onechmakakej tlen nechpoloua”. Noijki kijtoua: “Jehová onechmakak más de on tlen niktlajtlaniliaya, niman melak ochikauj notlaneltok”.

10. ¿Tlenon uelis tikchiuas tla tikixnamiktika itlaj tlen melak ouijtika?

¹⁰ ¿Tikixnamiktika itlaj tlen melak ouijtika? Kanaj yotlaixpoliuj kampa tichanti noso kanaj tikualo niman xtikmati tlenon tikchiuas. Maski kanaj kemantika melak timajmana, nochipa  xtlaneltoka itech Jehová. Xkijli Jehová nochi tlen tikmachilia. Uelis más tikchikauas motlaneltok tla tiknemilia kenon yomitsuajpaleuijtia Jehová (Sal. 77:11, 12). Uelis kuajli tikmatstos ika Jehová xkeman mitskauas.

11. ¿Tleka noneki tikintlakamatiskej akin Jehová yokintekitlali?

¹¹ ¿Tlenon más mitspaleuis xtlaxiko? Tla titetlakamati, ijkon ken okijto Anel. Xtlaneltoka intech akin Jehová niman Jesús tlaneltokaj. Kanaj kemantika, akin yokintekitlalijkej para matechyekanakan, techijliskej matikchiuakan itlaj tlen nesiskia kentla xtechpaleuis. San ika, xkilnamiki ika Jehová kinteochiua akin tetlakamatij. Biblia niman tlen inpan yonochiuj sekimej tokniuan akin yoyolmelajkanenkej techititiaj ika, tla titetlakamatij, uelis timakisaskej (Éx. 14:1-4; 2 Crón. 20:17). Xtlanemili itech tlen yejuamej okichiujkej, niman ijkon ika moyojlo tiknekis tiktlakamatis tlen ikalpan Jehová technauatis aman niman ika tlayekapan (Heb. 13:17). Tla ijkon tikchiua, xmitsmojtis tlen tikixnamikiskej ika tlayekapan (Prov. 3:25).

12. Itech tlen kijtoua Lucas 18:1-8, ¿kenon techpaleuis matikxikokan tlen xkuajli texchiuiliaj tla chikauak tikpiyaj totlaneltok?

¹² Jesús kuajli kimatstoya ika inomachtijkauan nonekiya chikaujtos intlaneltok para kixikoskej tlen xkuajli kinchiuiliskiaj. Pampa kinekiya ika inomachtijkauan matlaxikokan okimijli tlen kijtoua ipan Lucas 18:1-8. Ompa, otlajto itech se siuakauajli akin miyekpa kontlajtlaniliaya “sen juez teyolkuitijketl” ika makipaleui. Yejua kimatstoya ika, tla xnosiaujkauaya, yejon tlakatl kipaleuiskia. Niman kema okipaleui. ¿Tlenon techmachtia yejuin? Ika Jehová nochipa tepaleuiya. Yejua ika, Jesús okijto: “Aman tej, ¿Dios xno kimpaleuis on yejuan okintlapejpenij tla ikan tonajli niman yeuajli itech noueyikatsajtsilijtokej?” (xpoua Lucas 18:1-8). Sakin, Jesús okijto: “Pero ijkuak nejua yejuan oninochiu Tlakatl niuajlas, ¿Nikinuajnextis ipan in tlaltikpaktli sanken tlaneltokaj on tlakamej?”. Ijkuak texchiuiliaj itlaj tlen xkuajli, uelis tikteititiskej ika chikauak tikpiyaj totlaneltok ijkon ken on siuakauajli tla titlamachiaj niman xtikajkauaj ika tiktlajtlaniliaj Jehová matechpaleui. Tla chikauak tikpiyaj totlaneltok, kuajli tikmatstoskej ika Jehová techpaleuis. Noijki, noneki tikilnamikiskej ika teoyotl melak tepaleui. Kemantika, Jehová technankilia ken nion xtikchiayaj.

13. ¿Kenon teoyotl okipaleui tokniuj Vero niman ichanejkauan ijkuak kinchiuilijtoyaj tlen xkuajli?

¹³ Matikitakan tlenon ipan onochiuj tokniuj Vero. Yejua chanti República Democrática del Congo iuan iueuentsin akin xiteixpantijkauj Jehová niman iichpokatsin akin kipiya 15 xiuitl. Ijkuak sekimej soldados okichiuatoj tlen xkuajli ipan kalpan kampa chantiyaj, yejuamej ononek choloskej. Ijkuak iyajtoyaj, sekimej soldados okintsakuilijkej ipan ojtli niman okimijlikej ika kinmiktiskiaj. Tokniuj Vero opeuj  choka, san ika, pampa iichpokatsin kinekiya kiyolchikauas opeuj chikauak kichiua teoyotl niman miyekpa okiteneuj itoka Jehová. Ijkuak otlan kichiua teoyotl, akin kinyekantoya soldados okitlajtolti: “¿Akinon omitsmachti tikchiuas teoyotl?”. Yejua okinankili: “Nonan onechmachti manikchiua teoyotl ijkon ken kijtoua Mateo 6:9-13”. On tlakatl okijli: “Ichpokatsin, uelis nenyaskej, niman Jehová nemoTajtsin mamechtlajpiya”.

14. ¿Kemanon noneki tikteititiskej ika chikauak tikpiyaj totlaneltok, niman tlenon techpaleuis matitlaxikokan?

¹⁴ Maka keman matikilkauakan ika melak tepaleui tla tikchiuaj teoyotl. San ika ¿tlenon uelis tikchiuaskej tla Jehová xnimantsin kinnankilia toteoyouan? Ijkon ken on siuakauajli akin Jesús okiteneuj, maka xkajkaua ika tikchiua teoyotl. Niman nochipa xneltoka ika yejua xmitstlalkauis niman ika kinankilis moteoyouj ijkuak kitas ika inoneki. Xtlajtlanili Jehová mamitsmaka iespíritu santo (Filip. 4:13, TNM). Xkilnamiki ika sa achijtsin poliui para Jehová mitsteochiuas, niman hasta tikilkauas kenon otitlajyoui. Maka keman xkilkaua ika Jehová mitspaleuis xxiko tlen aman tikixnamiki niman tlen tikixnamikis ika tlayekapan (1 Ped. 1:6, 7).

15. Itech tlen kijtoua Mateo 17:19, 20, ¿tleka inomachtijkauan Jesús xouelkej okitekixtilijkej se xkuajli espíritu?

¹⁵ Jesús okimijli inomachtijkauan ika tla chikauak kipiyaj intlaneltokil uelis kixikoskiaj nochi tlen ouijtika (xpoua Mateo 17:19, 20). Maski yejuamej miyekpa yokintekixtilijkaj xkuajkualtin espíritus, sejpatipan, xouel okichiujkej. ¿Tleka? Jesús okimijli ika nonekiya más tlaneltokaskej. Okimijli ika tla chikauak kipiayaj intlaneltok ueliskia kixikoskej nochi tlen ouijtika niman hasta ueliskiaj kimejkuaniskiaj tepemej. Ipan yejuin tonaltin, tejuamej noijki uelis tikxikoskej tlen tiknemiliaj ika xtiuelij tla chikauak tikpiyaj totlaneltok.

16. ¿Kenon itlaneltok Geydi kipaleuiya makixiko tlen xkuajli ipan onochiuj?

¹⁶ Matikitakan tlenon ipan onochiuj se tokniuj siuatl akin itoka Geydi, akin ualeua Guatemala. Iueuentsin, Edi, okimiktijkej ijkuak yejuamej uajnokueptoyaj itech se tlanechikojli. Tokniuj Geydi kijtoua kenon yokipaleui itlaneltok makixiko nochi yejuin: “Ijkuak niknotsa Jehová, nikijlia nochi tlen nechajmana niman yejon nechyolseuiya. Nikita kenon Jehová nechtlajpiya itechkopa nochanejkauan niman tokniuan akin nemij ipan tlanechikojli. Pampa chikauak niktekichiuilia Jehová yejon nechpaleuiya maka melak maninoyolkoko niman maka melak maninajmana ipampa tlen uelis panos ika tlayekapan. Tlen yonikixnamik yonechpaleui manikita ika, maski san tlenon nikixnamikis, uelis nikxikos pampa Jehová, Jesús niman ikalpan nechpaleuiyaj”.

17. ¿Tlenon uelis tikchiuaskej ijkuak tikixnamiktoskej itlaj tlen melak ouijtika?

¹⁷ ¿Yomik yakaj akin melak tiktlasojtla? Xpoua  ipan Biblia intech akin okinyolitijkej, yejon mitspaleuis más xneltoka ika yoliuiskej akin yomijkej. ¿Timoyolkokoua pampa se mochanejkauj yokikixtijkej itech tlanechikojli? Xmomachti, para tikitas ika Jehová okimelajkatlali mochanejkauj pampa kitlasojtla. Maski san tlenon tikixnamiktika, xkita kenon uelis más kuajli tikchikauas motlaneltok. Xkijli Jehová nochi tlen tikmachilia niman maka keman xkintlalkaui tokniuan (Prov. 18:1). Maski melak mitsajmana noso hasta tichoka ipampa tlen tikixnamiktok, xmokojtili chikauak tiktekichiuilis Jehová, yejon mitspaleuis xtlaxiko (Sal. 126:5, 6). Nochipa xuiya tlanechikoltin, xtenojnotsa, xpoua moBiblia niman xtlanemili itech tlen Jehová yokijto mitsmakas. Tejua más titlaneltokas itech Jehová ijkuak tikitas kenon mitspaleuijtika.

18. ¿Tlenon uelis tikchiuas tla tikita ika xmás chikaujtok motlaneltok?

¹⁸ Maka xmajmana tla tikita ika, tlen yeuejkaui mopan onochiuj noso tlen aman mopan nochiujtok kiteititia ika xmás chikauak tikpiya motlaneltok, yej xkita kenon uelis más tikchikauas motlaneltok. Ijkon ken okichiujkej inomachtijkauan Jesús, xtlajtlanili Jehová: “Xtechpaleui más ma titlaneltokakan” (Luc. 17:5). Noijki, xtlanemili itech tlen aman otikonitakej ipan yejuin tlamachtijli. Ijkon ken Miguel niman Yurai, xkilnamiki kenon Jehová desde yeuejkaui yomitsuajpaleuijtia. Ijkon ken iichpokatsin Vero niman ken tokniuj Anel, xkijli Jehová nochi tlen tikmachilia niman más ijkuak tikixnamiktos tlen ouijtika. Ijkon ken Geydi, xmokauili mamitspaleui Jehová itechkopa mochanejkauan niman tokniuan. Tla tijkauilia Jehová mamitspaleui ika tlen aman tikixnamiktika, más tikneltokas ika noijki mitspaleuis ika tlayekapan.

19. ¿Tlenon kuajli kimatstoya Jesús, niman tlenon uelis kuajli tikmatstos?

¹⁹ Jesús okimijli inomachtijkauan ika nonekiya más kichikauaskej intlaneltok. San ika, kuajli kimatstoya ika Jehová kinpaleuiskia makixikokan tlen kixnamikiskiaj ika tlayekapan (Juan 14:1; 16:33). Noijki, kimatstoya ika nemiskiaj miyekej akin chikauak kipiyaskiaj intlaneltok niman ika yejuamej makisaskiaj itech ueyi tlajyouilistli (Apoc. 7:9, 14). ¿Teuan ompa tinemis? Tla timokojtilia más tikchikauas motlaneltok niman tla Jehová kineki, teuan timakisas (Heb. 10:39).