LIBRO de Ester tlen onka ipan Biblia melak tlajtoua itech Mardoqueo. Yejua judío katka niman tekitiya kampa chantiya tekiuaj de Persia, yejua ompa otekit “ipan on tonaltin ijkuak on rey Asuero tlamandarouaya”, yejuin tekiuaj opeuj tlanauatia ipan xiuitl 496 i.x.x. 1 (miyekej kinemiliaj ika tekiuaj Asuero sa no yejua tekiuaj Jerjes I). Mardoqueo okiteijli ika sekimej tlakamej kinekiyaj kimiktiskej tekiuaj. Tekiuaj melak okitlasojkamachili Mardoqueo niman okimijli nochimej ika makiueyiteneuakan Mardoqueo. Sakin, ijkuak omik Hamán, itlauelikniuj Mardoqueo niman intlauelikniuj sekimej judíos, tekiuaj Asuero okitlali Mardoqueo para makinnauati sekimej. Yejon melak otepaleui pampa Mardoqueo okitlali se tlanauatijli tlen okichiuj ika judíos mamakisakan (Est. 1:1; 2:5, 21-23; 8:1, 2; 9:16).

Ipeujyan siglo veinte, sekimej ixtlamatkej okijtokej ika xmelauak tlen kijtouaya libro de Ester niman ika Mardoqueo xkeman onen. San ika, ipan 1941 sekimej ixtlamatkej okinextijkej itlaj tlen kiteititiaya ika melauak tlen kijtoua Biblia itech Mardoqueo. ¿Tlenon okinextijkej?

Okinextijkej se tetl kampa ijkuiliujtoya itoka se tlakatl ika persa: Marduka (Mardoqueo ika náhuatl). Ompa kijtoua ika yejuin tlakatl kipiaya se ueyi tekitl ipan kalpan Susa, kanaj contador katka. Ijkuak ononexti yejon tetl, Arthur Ungnad, akin nomachtia ihistoria yejon kalpamej, okijto ika itoka Mardoqueo san nesi ipan Biblia niman ipan yejon tetl tlen kemach yokinextijkaj.

Desde ijkuak Arthur Ungnad okijto yejuin, opeuj notlajtolkuepaj miyek textos tlen ijkuiliujtokej ipan temej ika persa, ken tablillas de Persépolis. Yejuin temej ononextijkej kampa onkatka tesorería, nisiuj itepanuan ueyikalpan Persia. Yejuin temej tlen ononextijkej onochijchiujkej ijkuak tekiuajtitoya Jerjes I. Ipan yejuin temej otlajkuilojkej ika tlajtojli elamita niman kinteneua seki tokayomej tlen noijki kinteneua libro de Ester. a

Seki tablillas de Persépolis tlajtouaj itech yakaj akin itoka katka Marduka, yejua katka escriba ipan palacio de Susa niman ompa tekitiya ijkuak Jerjes I tekiuajtitoya. Se tetl kijtoua ika Marduka tlajtolkuepayaj. Niman yejuin kuajli kinamiki ika tlen Biblia kijtoua itech Mardoqueo. Biblia kijtoua ika tekiuaj Asuero (Jerjes I), okitlali Mardoqueo para matlayekana ipan ipalacio, tlajtouaya ome tlajtojli noso más niman nochipa notlaliaya ipan ipuerta palacio ne Susa (Est. 2:19, 21; 3:3). Yejuin puerta melak uejkapan katka niman ompa tekitiyaj akin kipaleuiayaj tekiuaj.

Ken tikitaj, melak nonamiki tlen noijtoua itech Marduka ipan tablillas de Persépolis niman tlen noijtoua itech Mardoqueo ipan libro de Ester tlen onka ipan Biblia. Onenkej ijkuak tekiuajtitoya tekiuaj Asuero, chantiyaj Persia niman tekitiyaj palacio. Nochi yejuin techititia ika Marduka sa no yejua Mardoqueo.