1, 2. a) ¿Tlenon tikitaskej ipan yejuin tlamachtijli? b) ¿Tleka tikijtouaj ika Jehová kinektika techpaleuis?

 JEHOVÁ uelis techpaleuis matitlaxikokan ijkuak tikpiyaskej tlauejli niman matipakikan ijkuak tiktekichiuiliskej. Ipan yejuin tlamachtijli, tikitaskej kenon techpaleuiya Jehová niman tlenon uelis tikchiuaskej tla tiknekij más matechpaleui. San ika, kachtopa matiknankilikan yejuin: “¿Yemelak kinektika Jehová techpaleuis?”.

² Uelis tiknankiliskej yejuin tla tikitaj tlen okijto apóstol Pablo ijkuak okintlajkuilouili hebreos. Yejua okijkuilo: “NoTEKO [Jehová] yejua nechpaleuiya. Yejua ika, xnikmakajsis on tlen uelis nechchiuilis yakaj tlakatl” (Heb. 13:6). Seki diccionarios tlen techpaleuiyaj más kuajli matikasikamatikan Biblia, kijtouaj ika tlajtojli “nechpaleuiya” ipan yejuin tlaxelojli kijtosneki yakaj akin notlaloua konpaleuiya akin kineki makipaleuikan. San matikonnemilikan kenon Jehová notlaloua para konpaleuis yakaj akin kixnamiktika tlen ouijtika. Yejuin techititia ika Jehová yemelak kinektika techpaleuis. Tla Jehová touan nemi, uelis titlaxikoskej niman noijki uelis tiyolpakiskej.

3. ¿Kenon techpaleuiya Jehová matitlaxikokan ika pakilistli?

³ ¿Kenon techpaleuiya Jehová matitlaxikokan ika pakilistli? Libro de Isaías technankilia yejon. Miyekej teotlajtoltin tlen Isaías okimijkuilo, kinpaleuiya itekipanojkauan toTajtsin akin  nemij ipan yejuin tonaltin. Noijki, Isaías miyekpa tlajtoua itech Jehová niman kinkui tlajtoltin tlen nimantsin ueli tikinmasikamatij. Matikonteneuakan yejuin, ipan capítulo 30 melak kualtsin techijlia kenon Jehová kitlajpiya ikalpan. Ompa kijtoua ika Jehová 1) kuajli techkaki niman kinnankilia toteoyouan, 2) techyekana niman 3) techteochiua aman niman techteochiuas ika tlayekapan. Aman matomachtikan tlen yotikonteneujkej.

4. a) ¿Tlenon okijto Jehová itech judíos akin nemiyaj ipan itonaluan Isaías, niman tlenon okitekauili inpan manochiua? b) ¿Tlenon okijto Jehová ika inpan nochiuaskia judíos akin kichiuayaj tlen kuajli? (Isaías 30:18, 19).

⁴ Kampa peua capítulo 30 de Isaías, Jehová okijto ika judíos xkinekiyaj kitlakamatiskej niman ika melak tlajtlakouayaj. Sakin okijto: “In israelitas xipan teitaj […]; xkinekij kakiskej itemachtiluan toTEKO” (Is. 30:1, 9). Pampa xkitlakamatiyaj, Isaías okijto ika Jehová kitekauiliskia inpan manochiua tlen xkuajli (Is. 30:5, 17; Jer. 25:8-11). Niman kema inpan onochiuj tlen xkuajli pampa okinuikakej Babilonia. San ika, noijki nemiyaj sekimej judíos akin kichiuayaj tlen kuajli, niman teotlajtoketl Isaías okijto itlaj tlen melak kualtsin: ika se tonajli Jehová kichiuaskia ika oksejpa manokuepakan Jerusalén (xpoua Isaías 30:18, 19). Niman kema onochiuj tlen Isaías okijto, pampa Jehová okimakixti ikalpan. San ika, xnimantsin okichiuj. Isaías okijto: “ToTEKO mechcha, para mechiknelis”. Yejuin techititia ika nonekiya panos tiempo para Jehová kimakixtis ikalpan. Opanok 70 xiuitl hasta ijkuak Jehová okitekauili ika sekimej judíos manokuepakan Jerusalén (Is. 10:21; Jer. 29:10). Ijkuak judíos nemiyaj Babilonia, melak najmanayaj, san ika, ijkuak onokuepkej Jerusalén, melak oyolpakej.

5. ¿Tlenon techijlia Isaías 30:19?

⁵ Aman, noijki melak techyolchikauaj yejuin tlajtoltin: “ToTEKO mechiknelis ijkuak nenkiueyikatsajtsiliaj para ma mechpaleui” (Is. 30:19). Isaías techijlia ika Jehová kuajli techkakis ijkuak tiknotsaskej niman ika nimantsin technankilis. Isaías noijki okijto: “Ijkuak mechkakis, nimantsin mechnankilis”. Yejuin tlajtoltin tlen okijto Isaías, techilnamiktia ika toTajtsin ika nochi iyojlo kinektok kinpaleuis akin kitlajtlaniliaj makinpaleuikan. Tla nochipa tikilnamiktokej yejuin, titlaxikoskej ika pakilistli.

6. Ijkon ken kijtoua Isaías 30:19 ika tlajtojli hebreo, ¿kenon tikmatij ika Jehová inseselti kinkaki itekipanojkauan?

⁶ Yejuin tlaxelojli noijki techijlia ika Jehová toseselti techkaki ijkuak tiknotsaj. ¿Tleka ijkon tikijtouaj? Ijkuak peua Isaías capítulo 30, Jehová kiminotsa nochimej itekipanojkauan. San ika, ika tlajtojli hebreo tikitaj ika ipan tlaxelojli 19 kijtoua ika Jehová kinnotstoya inseselti itekipanojkauan. Ika tlajtojli hebreo, Isaías ijkin okimijli: “tejua xok tichokas”, “yejua mitsiknelis”, “yejua mitsnankilis”. Jehová melak tetlasojtla. Ika yejon, ijkuak se ikoneuj najmana, yejua xkijlia: “Noneki tiyolchikauak yes ijkon ken mokniuj”. Ka, yejua toseselti techpaleuiya niman toseselti techkaki (Sal. 116:1; Is. 57:15).

7. ¿Kenon techititia Isaías niman Jesús ika noneki miyekpa tiknotsaskej toTajtsin?

⁷ Ijkuak tiknotsaj toTajtsin itech itlaj tlen techajmana, yejua kanaj kachtopa kichiuas matikxikokan tlen tikixnamiktokej. Niman tla xnimantsin popoliui tlen tikixnamiktokej, kanaj nonekis miyekpa tiknotsaskej para matechpaleui matitlaxikokan. Niman yejon tlen yejua techijlia matikchiuakan. Ipan Isaías 62:7 teotlajtoketl Isaías okijto: “Maka xkauilikan ma noseui [Jehová]”.  ¿Tlenon kijtosneki yejuin? Ika noneki melak miyekpa tiknotsaskej Jehová, kentla xtikauiliskiaj manoseui. Yejuin techilnamiktia itlaj tlen okijto Jesús itech toteoyouan ipan Lucas 11:8-10, 13. Ika tlen Jesús okijto ipan yejuin tlaxeloltin, otechyolchikauj miyekpa matiknotsakan toTajtsin niman maka matipinauikan itlaj tiktlajtlaniliskej niman nochipa matiktlajtlanilikan espíritu santo. Noijki matiktlajtlanilikan matechyekana para ijkon tiktlapejpeniskej tlen kuajli.

8. ¿Kenon onochiuj tlen kijtoua Isaías 30:20, 21?

⁸ (Xpoua Isaías 30:20, 21). Babilonios okiyeualojkej Jerusalén se xiuitl iuan tlajko. Ipan yejon tonaltin, judíos nochipa tlajyouijtoyaj. San ika, ijkon ken kijtoua tlaxeloltin 20 niman 21, Jehová okimijli ika kinmakixtiskia tla noyolkuepayaj niman nopatlayaj. Isaías okijto: “[Jehová] yejua akin nemotemachtijkau”. Niman noijki, Isaías okimijli judíos ika Jehová kinmachtiskia makiueyichiuakan ijkon ken yejua kineki. Niman yejon onochiuj ijkuak judíos onokuepkej Jerusalén. Ijkon, Jehová okiteititi ika yejua katka inUeyi Tlamachtijkauj. Judíos opeujkej kiueyichiuaj Jehová ijkon ken yejua kuelita pampa Jehová okinyekan. Aman, Jehová noijki toUeyi Tlamachtijkauj niman yejon melak techyolpaktia.

9. ¿Kenon techyekana Jehová ipan yejuin tonaltin?

⁹ Ipan yejuin tlaxeloltin, Isaías kijtoua ika tejuamej tiinomachtijkauan Jehová. Kachtopa, Isaías kijtoua: “Kuajli nenkitaskej ikan nemixtololojuan”. Nikan Isaías kijtojtoya ika Jehová kentla notelketstoskia imixpan inomachtijkauan. ¿Kenon techmachtia Jehová ipan yejuin tonaltin? Techmachtia itechkopa ikalpan. Jehová kintekitiltia tlanechikoltin, uejueyimej tlanechikoltin, amatlajkuiloltin, videos de JW Broadcasting^® niman okseki tlemach para ijkon techmachtis. Melak tiktlasojkamachiliaj Jehová pampa ikalpan melak kualtsin techmachtia. Ken Jehová techyekana, techpaleuiya matitlaxikokan ika pakilistli ijkuak tikixnamikiskej tlen ouijtika.

10. ¿Kenon tokuitlapan tikaktiuej itlajtol toTajtsin?

¹⁰ Isaías noijki okijto: “Nemokuitlapan nenkakiskej itlajtol”. Nikan Isaías kijtojtoya ika Jehová kentla yaskia inkuitlapan inomachtijkauan para kinyekantias niman kimilijtias kanon noneki yaskej. ¿Kenon tokuitlapan tikaktiuej itlajtol toTajtsin ipan yejuin tonajli? Tla tikpouaj Biblia, pampa desde yeuejkaui ompa ijkuiliujtika iTlajtol toTajtsin. Kuakon, ijkuak  tikpouaj Biblia kentla Jehová technotstoskia tokuitlapan (Is. 51:4).

11. ¿Tlenon noneki tikchiuaskej tla tiknekij titlaxikoskej ika pakilistli, niman tleka?

¹¹ ¿Tlenon noneki tikchiuaskej tla tiknekij ika Jehová más kuajli matechyekana itechkopa ikalpan niman iTlajtol? Isaías okiteneuj ome tlemach. Kachtopa okijto “In yejua kuajli ojtli”, niman ika ome, “Maka xtlalkauikan” (Is. 30:21). Kuakon, xsan noneki tikixmatiskej “ojtli”, noijki noneki ompa tiaskej niman xtiktlalkauiskej. Jehová kitekitiltia iTlajtol niman ikalpan para techijlis tlen kineki matikchiuakan niman noijki techijlia kenon uelis tikchiuaskej tlen yejua techmachtia. Noneki tikchiuaskej yejuin ome tlemach tla tiknekij titlaxikoskej ika pakilistli ijkuak tiktekichiuiliskej Jehová. San ijkon kuajli tikmatstoskej ika Jehová techteochiuas.

12. Ijkon ken kijtoua Isaías 30:23-26, ¿kenon Jehová kiteochiuaskia ikalpan?

¹² (Xpoua Isaías 30:23-26). ¿Kenon onochiuj yeuejkaui yejuin teotlajtojli? Jehová melak okinteochiuj judíos akin onokuepkej Jerusalén pampa okinmakak miyek tlen ika nopanoltiskiaj niman okinpaleui para ueliskiaj kitekichiuiliskej. Jehová okinmakak miyek tlen kikuaskiaj. San ika, noijki okinmakak okse itlaj tlen ueyi kijtosneki. Okinmakak nochi tlen nonekiya para ijkon yejuamej ueliskiaj itech nonisiuiskej niman oksejpa kiueyichiuaskej ijkon ken yejua kuelita. Itekipanojkauan Jehová akin nemiyaj ipan yejon tonaltin xkeman kitayaj ika Jehová ijkon makinteochiua. Ken kijtoua tlaxelojli 26, Jehová okichiuj ika kuajli makasikamatikan iTlajtol (Is. 60:2). Pampa Jehová kiteochiujtoya, ikalpan yolpakiya, kualtsin kitekichiuilijtoya niman ika iyojlo nemiya (Is. 65:14).

13. Isaías okijto ika oksejpa kiueyichiuaskiaj Jehová ken yejua kuelita, ¿kenon yonochiuj yejuin?

¹³ Isaías okijto ika oksejpa kiueyichiuaskiaj Jehová ken yejua kuelita. ¿Yonochiuj yejuin teotlajtojli ipan yejuin tonaltin? Kema. Desde 1919 melak miyekej tlaltikpakchanejkej yokiskej itech Ueyixtika Babilonia, tlen kijtosneki tlaneltokiltin xmelajkej. Niman Jehová yokinuikak kampa más kualtsin nemij xijkon ken tlajli tlen okinmakak israelitas, yokinuikak kampa uelij ika inyojlo kiueyichiuaj niman kichiuaj ken yejua kuelita (Is. 51:3; 66:8).

14. ¿Kenon Jehová yokinteochiuj tokniuan tlapejpeniltin niman “oksekimej borregos”, niman tlenon yononek kichiuaskej para Jehová makinteochiua?

¹⁴ Desde 1919, tokniuan tlapejpeniltin san  sekan kuajueyichiujtiuej Jehová, sakin, “oksekimej borregos” akin kichiaj nemiskej ipan tlaltikpaktli noijki opeujkej nemij kampa san sekan kiueyichiuaj Jehová imiuan tlapejpeniltin. Ikalpan toTajtsin kinmachtia tlen melauak niman xkinmachtia tlen kineltokaj okseki tlaneltokiltin tlen xmelajkej. Noijki, kipiyaj se kualtsin tekitl tlen kuelitaj kichiuaskej: tenojnotsaskej itech iTekiuajyo toTajtsin. Tinochimej ueli kuajli touikaj iuan Jehová, niman noijki ueli kuajli touikaj imiuan tokniuan, niman yejon tokniuan techpaleuiyaj matitlaxikokan ika pakilistli ijkuak tikixnamikij tlen ouijtika. Niman opeuj tinemij kampa nochiua nochi yejuin ijkuak opeuj tikueyichiuaj Jehová ken yejua kuelita niman ijkuak opeuj tokojtiliaj tikchiuaskej ken yejua.

15. ¿Kanon nemij tokniuan akin san sekan kiueyichiuaj Jehová?

¹⁵ Ipan nochi tlaltikpaktli nemij tokniuan akin san sekan kiueyichiuaj Jehová. Kuakon, uelis kuajli tikmatstoskej ika maski san kanon tichantiskej, tla tiktekichiuiliaj Jehová ika nochi toyojlo, san sekan tikueyichiuaskej toTajtsin imiuan tokniuan.

16. ¿Tlenon noneki tikchiuaskej tla tiknekij nochipa tikitaskej kenon melak kualtsin ikalpan toTajtsin?

¹⁶ ¿Tlenon noneki tikchiuaskej para nochipa san sekan tikueyichiuaskej Jehová imiuan tokniuan? Noneki tikpatiojkaitaskej ikalpan toTajtsin. Niman uelis tikpatiojkaitaskej tla tiknemiliaj tlen kuajli kichiuaj akin ompa nemij niman tla xsan tikitstokej kenon nopopolouaj (Juan 17:20, 21). ¿Niman tleka melak noneki matikitakan tlen kuajli kichiuaj akin nemij ipan ikalpan Jehová? Matitlanemilikan itech yejuin. Kampa melak kojyo uelis tikinnextiskej tlatlamantikej noso sesejnekamej kojtin. Noijki, ipan ikalpan Jehová nemij tlatlamantikej noso sesejnekamej tokniuan akin yeskiaj kentla kojtin (Is. 44:4; 61:3). Matikitakan kenon melak tlakualtsinkan kampa “kojyo” niman maka san matikitakan kenon seki “kojtin” xmás kualtsitsintin. Yejuin kijtosneki ika noneki tikitaskej kenon ikalpan toTajtsin melak kualtsin niman xsan tikitstoskej kenon topopolouaj noso kenon nopopolouaj tokniuan.

17. ¿Tlenon uelis tikchiuaskej tla tiknekij san sekan tikueyichiuaskej Jehová imiuan tokniuan?

¹⁷ ¿Tlenon uelis tikchiuaskej tla tiknekij san sekan tikueyichiuaskej Jehová imiuan tokniuan?  Noneki tokojtiliskej niman ijkon imiuan tiyolseujtoskej (Mat. 5:9; Rom. 12:18). Ijkuak tokojtiliaj más kuajli touikaskej imiuan tokniuan, tikualtsintiliaj ikalpan Jehová. Matikilnamikikan ika nochimej tokniuan akin nemij ipan ikalpan Jehová yejua akin okinuajuikak (Juan 6:44). Matikonnemilikan kenon Jehová melak yolpaki ijkuak kita ika tokojtiliaj kuajli touikaskej niman tiyolseujtoskej imiuan tokniuan, akin yejua melak kintlasojtla (Is. 26:3; Ageo 2:7).

18. ¿Itech tlenon noneki nochipa titlanemiliskej, niman tleka?

¹⁸ ¿Tlenon noneki tikchiuaskej tla tiknekij matechpaleui nochi tlen Jehová techmaka? Noneki kuajli titlanemiliskej itech tlen tomachtiaj ipan iTlajtol toTajtsin niman ipan toamatlajkuiloluan. Tla tomachtiaj niman titlanemiliaj, techpaleuis matikinpiyakan kualneskayomej tlen kichiuas matotlasojtlakan “ken iknitin” (Rom. 12:10). Ijkuak titlanemiliaj itech ken Jehová techteochiua aman, más kuajli iuan touikaj. Niman ijkuak titlanemiliskej itech ken Jehová techteochiuas ika tlayekapan, uelis tikneltokaskej ika nochi toyojlo ika ajsis se tonajli ijkuak uelis nochipa tiktekichiuiliskej. Nochi yejuin kichiuas más ika toyojlo matiktekichiuilikan Jehová.

19. a) Ken kijtoua Isaías 30:18, ¿tlenon uelis kuajli tikmatstoskej? b) ¿Tlenon techpaleuis matitlaxikokan ika pakilistli?

¹⁹ Jehová techmakixtis ijkuak kinpopolos akin kichiuaj tlen xkuajli (Is. 30:18). Kuajli tikmatstokej ika pampa Jehová “sen Dios yejuan kichiua tlen melajki”, xkitekauilis ika akin kichiuaj ken Satanás mauejkauikan manemikan (Is. 25:9). Jehová san kichiatika tonajli ijkuak techmakixtis niman tejuamej noijki san tikchiatokej tonajli ijkuak yejua techmakixtis. Chika tikchiaj yejon tonajli, matiknotsakan toTajtsin, matomachtikan iTlajtol niman matikchiuakan tlen ompa tiuelij, niman matitlanemilikan itech ken yejua yotechteochiuj. Tla tikchiuaj nochi yejuin, Jehová techpaleuis matitlaxikokan ika pakilistli ijkuak tiktekichiuiliskej.