1. ¿Tlenon xtechmojkatlachialtia akin tikchiuaj ken Cristo, niman tlenon kuajli tikmatstokej?

 XTECHMOJKATLACHIALTIA ika sekimej techtlaueltokaj ijkuak titenojnotsaj, niman kanaj ika tlayekapan más techtlaueltokaskej (Dan. 11:44; 2 Tim. 3:12; Apoc. 16:21). San ika, kuajli tikmatstokej ika Jehová techpaleuis nochipa matitenojnotsakan. ¿Tleka ijkon tikijtouaj? Pampa yejua nochipa kinpaleuiani itekipanojkauan makichiuakan tlen kinnauatia, maski melak ouijtika tlen kimijlia makichiuakan. Aman matontlanemilikan itech teotlajtoketl Ezequiel. Jehová melak okipaleui ijkuak okinnojnots judíos akin nemiyaj Babilonia.

2. a) ¿Tlenon okijto Jehová itech judíos akin Ezequiel nonekiya kinnojnotsas? (Ezequiel 2:3-6). b) ¿Tlenon tikitaskej ipan yejuin tlamachtijli?

² ¿Kenomej katkaj judíos akin Ezequiel nonekiya kinnojnotsas? Jehová okijto ika yejuamej “yoltechikajkej” katkaj, xkinekiyaj tlakakiskej niman xkitlakamatiyaj. Yejuamej melak xkuajkualtin katkaj pampa Jehová okijli Ezequiel ika kentla nemiskia itsajlan uitstli noso kentla chantiskia intsajlan kolomej. Ika yejon, Jehová miyekpa okijli Ezequiel: “Maka xmomojti” (xpoua Ezequiel 2:3-6). Ezequiel ouel okinnojnots judíos pampa 1) Jehová yejua akin okititlan, 2) iespíritu santo Jehová okipaleui, niman 3) itlajtoluan Jehová okichikauili itlaneltok. ¿Kenon okipaleui Ezequiel yejuin yeyi tlemach, niman aman tejuamej kenon techpaleuiya?

3. ¿Tlenon okipaleui Ezequiel, niman kenon Jehová okititi ika kipaleuiskia?

³ Jehová okijli Ezequiel: “Nejua nimitsontitlanis” (Ezeq. 2:3, 4). Tlen Jehová okijli Ezequiel kanaj melak okipaleui. Niman noijki, kanaj Ezequiel okilnamik ika Jehová noijki ijkon okimijlika Moisés niman Isaías ijkuak okintlapejpeni ken teotlajtokej (Éx. 3:10; Is. 6:8). Ezequiel noijki kimatstoya ika Jehová okinpaleui yejuin teotlajtokej makichiuakan tlen okinnauatijka, maski seki melak ouijtika katka. Kuakon, ijkuak toTajtsin okpa okijli Ezequiel: “Nimitsontitlanis”, Ezequiel okasikamat ika Jehová kipaleuiskia. Noijki, ipan libro de Ezequiel tikitaj ika Ezequiel miyekpa okijto: “ToTEKO onechnots” (Ezeq. 14:2). Niman noijki miyekpa okijto: “ToTEKO oksejpa onechnots” (Ezeq. 6:1). Kuakon, Ezequiel kuajli kimatstoya ika Jehová yejua akin okititlanka. Noijki, pampa itaj teopixki katka, kanaj okimachti ika Jehová nochipa kimijliaya iteotlajtokauan ika kinpaleuiskia. Ken Isaac, Jacob, niman Jeremías, Jehová ijkin okimijlika: “Ninemi mouan” (Gén. 26:24; 28:15; Jer. 1:8).

4. ¿Kenon Jehová okiyolchikauj Ezequiel ika tlen okijli?

⁴ ¿Nochimej israelitas kikakiskiaj Ezequiel? Matikitakan tlen Jehová okijli Ezequiel: “On israelitas, maski kajsikamatij motlajtol, xkinekiskej mitskakiskej, pampa xkinekij nechkakiskej nejua” (Ezeq. 3:7). Ijkuak israelitas xkikakiyaj Ezequiel, kijtosnekiya ika xkikaktoyaj Jehová. Kuakon, tlen Jehová okijli Ezequiel melak okiyolchikauj, pampa maski judíos xkinekiyaj kikakiskej, xkijtosnekiya tla yejua xkuajli kichiujtoya itekiyo. Noijki, Jehová okijli Ezequiel ika ijkuak nochiuaskia tlen yejua yokijtojka, yejon judíos kimatiskiaj “ika intsajlan nemiya sen tiotlajtojketl” (Ezeq. 2:5;  33:33). Kuajli tikmatstokej ika tlen Jehová okijli Ezequiel melak okiyolchikauj niman okipaleui nochipa matenojnotsa.

5. ¿Tleka techyolchikaua tlen kijtoua Isaías 44:8?

⁵ Tejuamej noijki tiyolchikauij pampa tikmatij ika Jehová yejua akin techtitlani. Yejua yotechmakak se kualtsin tekitl: tiyeskej iteixpantijkauan (Is. 43:10). Ijkon ken Jehová okijli Ezequiel: “Maka xmomojti”, tejuamej noijki techijlia: “Maka xmomojtikan”. ¿Tleka xnoneki tikinmakasiskej akin techixnamikij? Pampa ijkon ken Ezequiel, Jehová yejua akin techtitlani niman techpaleuiya (xpoua Isaías 44:8).

6. a) ¿Kenon techititia Jehová ika kema techpaleuiya? b) ¿Tlenon techyolchikaua?

⁶ Jehová noijki techijlia ika yejua techpaleuis. Achto kijtos: “Nemejuamej nennotestigos”, yejua okijto: “Maski nenkipanoskej miyek tlajyouilistli, ken nenkipanoskiaj sen ueyi atl noso tlitl, nejua nochipa ninemis nemouan, niman xnenamimikiskej noso xnentlatlaskej” (Is. 43:2). Kemantika, ijkuak titenojnotsaj tikixnamikij tlen melak ouijtika tlen yeskia kentla atentli noso kentla tlitl. San ika, Jehová techpaleuiya niman ijkon maka matijkajkauakan ika titenojnotsaj (Is. 41:13). Tejuamej noijki ijkon topan nochiua ken Ezequiel: miyekej xkinekij techkakiskej. San ika, kuajli tikmatstokej ika yejon xkijtosneki tla tejuamej xkuajli tikchiujtokej totekiyo. Tikmatstokej ika Jehová yolpaki ijkuak xtikajkauaj ika titenojnotsaj niman yejon melak techyolchikaua. Apóstol Pablo okijto: “Dios kitlaxtlauilis cada se ken kitocaroua ipampa itekiu” (1 Cor. 3:8; 4:1, 2). Se tokniuj akin youejkauj tlapaleuiya ken precursora kijtoua: “Melak niyolpaki nikmatis ika Jehová techteochiua pampa tokojtiliaj tiktekichiuiliskej”.

7. ¿Kanaj kenon nomachiliaya Ezequiel ijkuak tlanemiliaya itech tlatlachalistli tlen okitak? (Xkita tlaixkopinajli tlen nesi ixpan yejuin revista).

⁷ Ezequiel okitak ika iespíritu santo toTajtsin melak kojtik. Ipan se tlatlachalistli okitak kenon espíritu santo kinpaleuiaya iluikaktekitkej niman koliniaya noso kiuiyoniaya icarro Jehová (Ezeq. 1:20, 21). Ezequiel techijlia tlenon okichiuj: “Ijkuak ijkon onikitak, oninotlakuantelkets niman oninopachoj hasta ipan tlajli”. Pampa melak omojkatlachix, hasta ouets ipan tlajli (Ezeq. 1:28). Kanaj ijkuak Ezequiel tlanemiliaya itech yejon tlatlachalistli tlen okitak, kuajli kasikamatiya ika iespíritu toTajtsin kipaleuiskia nochipa matenojnotsa.

8, 9. a) ¿Tlenon Jehová okinauati Ezequiel? b) ¿Tlenon más okichiuj Jehová para kiyolchikauas Ezequiel?

⁸ Jehová ijkin okinauati Ezequiel: “Tejua tlaltikpaktlakatl, xmotelketsa pampa nejua nimitsnotsas”. Tlen Jehová okinauati niman iespíritu toTajtsin okipaleui manokuiteua. Yejua okijkuilo: “Onikmat nopan ouajlaj ipoder Dios niman okichiu para ma ninotelketsa” (Ezeq. 2:1, 2). Niman ijkuak Ezequiel otenojnots, “ipoder toTEKO”, noso iespíritu santo, nochipa okipaleui (Ezeq. 3:22; 8:1; 33:22; 37:1; 40:1). Yejon espíritu okipaleui Ezequiel makinnojnotsa judíos akin “yoltechikajkej” katkaj niman akin “tsontekonchikajkej” katkaj (Ezeq. 3:7). Jehová okijli: “Nejua nikchiuas para tejua no xmoyoltechikaua niman xmotsontekonchikaua para tikinmixnamikis yejuamej, ijkon ken yejuamej noyoltechikauaj para mitsixnamikij. Nejua más nimitstsontekonchikauas ken chikauak on tetl diamante niman ken chikajkej on temej. Yejua ika tej, maka xmomojti ijkuak mitsitaskej ikan tlauejli” (Ezeq. 3:8, 9). Jehová kentla kijliskia Ezequiel: “Maka xmajmana tla xkinekij mitskakiskej,  nejua nimitspaleuis niman nimitskojtilis”.

⁹ Ijkuak Jehová ijkon yokijlika Ezequiel, iespíritu toTajtsin okuikak Ezequiel kampa nonekiya tenojnotsas. Ezequiel okijkuilo: “Ipoder toTEKO yejuan onkatka nopan, sanoyej kipiyaya fuerza”. Teotlajtoketl Ezequiel ouejkauj se semana para kasikamatis tlen nonekiya kiteijlis (Ezeq. 3:14, 15). Sakin, Jehová okijli mauiya “ipan on ixtlauatl” niman ompa iespíritu toTajtsin ipan okalak (Ezeq. 3:23, 24). Aman Ezequiel iueliskia tenojnotsas.

10. ¿Tlenon techpaleuis nochipa matitenojnotsakan, niman tleka?

¹⁰ ¿Tlenon techpaleuis nochipa matitenojnotsakan? Tla tiknekij tikmatiskej, oksejpa matitlanemilikan itech Ezequiel. Achto peuaskia tenojnotsas, espíritu santo okipaleui niman okikojtili. Ijkon ken Ezequiel, tejuamej xueliskia titenojnotsaskiaj tla espíritu santo xtechpaleuiskia. ¿Tleka? Pampa Satanás techixnamiki para matijkajkauakan ika titenojnotsaj (Apoc. 12:17). Sekimej ueliskia kinemiliskej ika Satanás melak kojtik niman ika xuelis tiktlaniskej. San ika, yejon xmelauak. ¿Tleka? Pampa ijkuak titenojnotsaj, tikteititiaj ika tiktlanij Satanás niman ika xtechmomojtia (Apoc. 12:9-11). Kuakon, ¿tleka uelij titenojnotsaj tla Satanás melak techixnamiki? Pampa iespíritu santo toTajtsin techpaleuijtika niman tikyolpaktijtokej Jehová (Mat. 5:10-12; 1 Ped. 4:14).

11. ¿Kenon techpaleuis espíritu santo, niman tlenon noneki tikchiuaskej tla tiknekij nochipa tikpiyaskej espíritu santo?

¹¹ Jehová okijli Ezequiel: “Xmoyoltechikaua niman xmotsontekonchikaua”. Yejuin techititia ika iespíritu santo toTajtsin noijki uelis techpaleuis matikixnamikikan tlen ouijtika ijkuak titenojnotsaskej (2 Cor. 4:7-9). Kuakon, ¿tlenon noneki tikchiuaskej tla tiknekij ika toTajtsin nochipa matechmaka iespíritu santo? Noneki nochipa tiktlajtlaniliskej ipan teoyotl niman kuajli tikmatstoskej  ika Jehová techkakis. Jesús okimijli inomachtijkauan: “xtlajtlanilikan Dios on tlen mechpoloua”, “xtejtemokan on tlen mechpoloua” niman “xtetepinikan on tsakuijlotl”. ¿Niman kema tenankilia Jehová? Kema, pampa Biblia kijtoua ika yejua “kiminmakas Espíritu Santo on yejuan kitlajtlaniliskej” (Luc. 11:9, 13; Hech. 1:14; 2:4).

12. Ken kijtoua Ezequiel 2:9-3:3, ¿kanon oualeuj yejon amatlajkuilojli mimiltik, niman tlenon kijtouaya?

¹² Ken yotikitakej, espíritu santo okipaleui niman okikojtili Ezequiel. San ika, itlajtoluan Jehová noijki melak okipaleui pampa okichikauili itlaneltok. Ipan se tlatlachalistli, Ezequiel okitak ika se matli kipiaya se amatlajkuilojli mimiltik (xpoua Ezequiel 2:9–3:3). ¿Kanon oualeuj yejon amatlajkuilojli mimiltik? ¿Tlenon kijtouaya? ¿Niman kenon okichikauili itlaneltok Ezequiel? Yejon amatlajkuilojli mimiltik ualeua itech Jehová. Itech on nauimej iluikaktekitkej akin Ezequiel okimitak, kanaj Jehová okitekitilti se para kimakas amatlajkuilojli mimiltik (Ezeq. 1:8; 10:7, 20). Yejon amatlajkuilojli mimiltik kijtouaya tlen Ezequiel nonekiya kimijlis judíos akin xkinekiyaj kitlakamatiskej Jehová (Ezeq. 2:7). Yejuin amatlajkuilojli mimiltik ijkuiliujtoya ixpan niman ikuitlapan.

13. ¿Tlenon okijlikej Ezequiel makichiua ika yejon amatlajkuilojli mimiltik, niman tleka sajnoye tsopelik katka?

¹³ Jehová okijli iteotlajtokauj: “Xtolo in amatlajkuilojli […] niman ika xixui”. Ezequiel okitlakamat niman nochi okikua. ¿Tlenon kijtosneki yejuin tlatlachalistli? Ika Ezequiel nonekiya kuajli kasikamatis tlen nonekiya kiteijlis. Yejua nonekiya kineltokas tlen Jehová yokijlika, niman yejon kipaleuiskia matenojnotsa. Ijkuak Ezequiel okikua yejon amatlajkuilojli mimiltik, opanok itlaj tlen xkichiaya, okimat ika “sanoyej tsopelik [katka] ken nekutli” (Ezeq. 3:3). ¿Tleka Ezequiel melak okuelili? Pampa yejua melak kuelitaya kiteijlis tlen Jehová kijliaya (Sal. 19:8-11). Yejua melak kitlasojkamatiya ika Jehová okitlapejpeni ken iteotlajtokauj.

14. ¿Tlenon okipaleui Ezequiel niman ijkon uelis ontenojnotsas?

¹⁴ Sakin, Jehová okijli Ezequiel: “Kuajli xkaki nochi tlinon nimitsijlis niman maka kaman tikelkauas” (Ezeq. 3:10). Jehová kijlitoya Ezequiel makilnamiki tlen ijkuiliujtoya ipan yejon amatlajkuilojli mimiltik, niman itech matlanemili. Yejon kichikauiliskia itlaneltok Ezequiel niman kipaleuiskia makasikamati tlen nonekiya kiteijlis (Ezeq. 3:11). Aman ika Ezequiel kilnamiktoya niman kasikamatiya tlen nonekiya kiteijlis, iueliskia ontenojnotsas (uelis tikitas Salmo 19:14).

15. Tla tiknekij nochipa titenojnotsaskej, ¿tlenon noneki tikseliskej ika nochi toyojlo?

¹⁵ Tla tiknekij nochipa titenojnotsaskej, noijki noneki tikchikauaskej totlaneltok ika itlajtoluan toTajtsin. Noneki tikseliskej ika nochi toyojlo tlen Jehová techijlia. Aman Jehová technotsa ika iTlajtol, Biblia. ¿Tlenon noneki tikchiuaskej tla tiknekij ika iTlajtol toTajtsin matechyolseui, matechpaleui matiknemilikan tlen kuajli niman matechpaleui matikmatikan tlenon tikpiyaj ipan toyojlo?

16. ¿Tlenon noneki tikchiuaskej ika iTlajtol toTajtsin, niman kenon uelis tikchiuaskej yejuin?

¹⁶ Ijkon ken totlalnakayo chikaui ijkuak titlakuaj, totlaneltokil noijki chikaui ijkuak tomachtiaj niman titlanemiliaj itech iTlajtol toTajtsin. Niman yejon tlen techmachtia ijkuak Ezequiel okitak yejon amatlajkuilojli  mimiltik ipan se tlatlachalistli. Jehová kineki matixuikan ika iTlajtol, noso kuajli matikasikamatikan. ¿Niman kenon uelis ijkon tikchiuaskej? Tla tiknotsaj toTajtsin, tla tomachtiaj iTlajtol niman tla titlanemiliaj itech tlen tomachtiaj. Kachtopa, tiknotsaj toTajtsin pampa tiknekij kuajli tikasikamatiskej tlen yejua kineki techijlis. Sakin, tikpouaj Biblia. Niman sa ika tlami, toteltiaj pampa tiknekij titlanemiliskej itech tlen yotomachtijkej. ¿Kenon techpaleuis tla ijkon tikchiuaj? Tla titlanemiliaj itech tlen tomachtiaj, más kuajli tikasikamatiskej iTlajtol toTajtsin.

17. ¿Tleka melak noneki matitlanemilikan ijkuak tomachtiaj Biblia?

¹⁷ ¿Tleka melak noneki matikamapouakan Biblia niman itech matitlanemilikan? Pampa tla ijkon tikchiuaj, techpaleuis matitenojnotsakan itech iTekiuajyo toTajtsin, niman tla ika tlayekapan nonekis tikteijliskej tlen inpan nochiuas akin xkinekij kitlakamatiskej toTajtsin, noijki techpaleuis. Noijki, ijkuak titlanemiliaj itech tlen kualtsin kichiua Jehová, más iuan touikaj. Niman tla touikaj iuan Jehová, tiyolseuiskej niman tomachiliskej ika toyojlo (Sal. 119:103).

18. ¿Tlenon kuajli kasikamatiskej akin tikinnojnotsaj, niman tleka?

¹⁸ Maski tejuamej xtiteotlajtokej ken Ezequiel, kema tikteijliaj iTlajtol Jehová. Tiknekij nochipa tikteijliskej iTlajtol hasta ijkuak Jehová techijlis maka sa matitenojnotsakan. Ijkuak toTajtsin teyolkuitis, tlaltikpakchanejkej xuelis kijtoskej ika toTajtsin xokimilnamik noso ika xtlaj okimijli tlenon nonekiya kichiuaskej (Ezeq. 3:19; 18:23). Yejuamej kuajli kasikamatiskej ika tejuamej kema otikiminojnotskej itech toTajtsin.

19. ¿Tlenon techpaleuis nochipa matitenojnotsakan?

¹⁹ ¿Tlenon techpaleuis nochipa matitenojnotsakan? Techpaleuis yejon yeyi tlemach tlen okiyolchikauj Ezequiel: tejuamej nochipa titenojnotsaj pampa Jehová yejua akin otechtitlan, pampa espíritu santo techpaleuiya niman pampa iTlajtol toTajtsin texchikauilia totlaneltok. Jehová techpaleuis nochipa matitenojnotsakan niman matitlaxikokan “hasta ijkuak nochi tlamis” (Mat. 24:13).