Achto nimechijlis kenon otlamito yejuin, kachtopa nikneki nimechijlis tleka oniknemili chikauak niktekichiuilis Jehová.

Onitlakat ipan 1942, ipan se kualtsin isla caribeña de Curazao. Notaj otlakat Surinam, san ika, onochantito Curazao pampa ompa otekitito. Ijkuak nejua onitlakat, notaj yonoapolaktijka. Ijkuak notaj niman oksekimej tokniuan opeujkej nomachtiaj Biblia, xonkatka se tlanechikojli, kuakon, yejuamej akin kachtopa onochiujkej iteixpantijkauan Jehová ne Curazao. a Nochi semanas notaj nechmachtiaya imiuan nokniuan, akin timakuiltin katkaj, maski xmás tikuelitayaj tomachtiskej. Ijkuak nikpiaya 14 xiuitl, notaj okinemili tokuepaskej Surinam pampa kinekiya kitlajpiyas inan, akin iueyi katka.

Ne Surinam, opeuj ninouika imiuan tokniuan telpokamej niman ichpokamej akin chikauak kitekichiuiliayaj Jehová. Yejuamej más iuejueyimej katkaj niman precursores regulares katkaj. Ijkuak yejuamej tlajtouayaj itech tlen inpan opanok ijkuak ontenojnotsayaj, nesiya ika melak pakiyaj. Ijkuak tlamiyaj totlanechikoluan, tikuelitayaj titlajtoskej itech Biblia, miyekpa ijkon tikchiuayaj ijkuak onkatkaj miyekej sitlalimej. Pampa kuajli onikintlapejpeni noamigos, onikmat tlenon niknekiya nikchiuas: niknekiya niktekichiuilis Jehová. Ika yejon, oninoapolakti ijkuak nikpiaya 16 xiuitl, niman ijkuak onikajxilti 18 oninochiuj precursor regular.

Tlen oniuel ijkuak niprecursor katka melak onechpaleui ijkuak onechmakakej okseki tekitl ipan ikalpan Jehová. Ijkuak kemach opeuj nitlapaleuiya ken precursor, oniuel ika melak noneki tikinmachtiskej tokniuan. Ijkuak oninochiuj precursor, se misionero akin itoka Willem van Seijl onechititi ika kinekiya nechpaleuis. b Yejua  onechmachti kenon nikchiuas notekiyo ipan tlanechikojli. Ijkuakon xnikasikamatiya kenon melak nechpaleuiskia tlen yejua nechmachtijtoya. Uajsextli onechtlalijkej ken precursor especial, niman ononek uejka nias nontlapaleuis ipan grupos tlen onkatkaj ipan selva de Surinam. ¡Melak nikintlasojkamachilia tokniuan nochi tlen onechmachtijkej! Desde ijkuakon, noijki ninokojtilia nikinmachtis oksekimej ijkon ken nouan okichiujkej.

Ijkuak niprecursor katka, noijki oniuel ika melak kuajli tla tinemij san ika achijtsin niman ika noneki kuajli tiktekitiltiskej totomintsin. Nejua ninemiya iuan okse precursor especial, niman ijkuak peuaya metstli, yejua niman nejua tikitayaj tlenon tikuiskej ipan yejon metstli. Sakin, san se yaya ipan kalpan kampa tlanemakayaj niman kikouaya nochi tlen tikuiskiaj. Nonekiya kuajli tiktekitiltiskej totomintsin niman nochi tlen tikpiayaj para matechaxili nochi metstli. Tla kemantika itlaj tiktlamiayaj ipan selva kampa titlapaleuijtoyaj, ouijtika katka ika yakaj matechmakati tlen techpolouaya. Pampa ijkuak nitelpochtli katka oniuel ika noneki tinemiskej ika san achijtsin niman ika noneki kuajli tiktekitiltiskej totomintsin, yonechpaleui nochipa kuajli maniktekichiuili Jehová.

Noijki oniuel ika más kuajli tla tikinmachtiaj tlaltikpakchanejkej ika intlajtol. Desde nipitentsin, nitlajtoua holandés, inglés niman papiamento. Noijki ueli nitlajtoua surinamés (noijki kixmatij ken sranan), yejuin tlajtojli melak tlajtouaj ne Surinam. San ika, onikitak ika ne ipan selva kampa titlapaleuijtinemiyaj, tlaltikpakchanejkej más kuajli techkakiyaj ijkuak tikinnojnotsayaj ika intlajtol. Ouijtika nikitaya nitlajtos seki tlajtoltin, ken saramacano. Pampa oninokojtili nitlajtos intlajtol tlaltikpakchanejkej, ouel miyekej onikinpaleui makixmatikan Jehová.

Miyekpa oninopopolo niman oninopijpinaujti ijkuak ninomachtijtoya seki tlajtoltin. Sejpa, oniktlajtolti kenon nomachiliaya se siuatsintli akin kemach nomachtijtoya Biblia niman tlajtouaya saramacano, pampa onechijlika ika kikokouaya ijti. San ika, pampa xmás niueliya itlajtol, oniktlajtolti tla koneua katka. Niman yejua xokuelitak tlen oniktlajtolti. Maski miyekpa oninopopolo, nochipa oninokojtili nikinnojnotsas tlaltikpakchanejkej ika intlajtol.

Ipan 1970 opeuj nitlapaleuiya ken tlayekanketl ipan circuito. Ipan yejon xiuitl onikpanoltito se tlamachtijli ipan miyek grupos tlen onkatkaj ipan selva. Yejon tlamachtijli itoka katka: “Visitando la central mundial de los testigos de Jehová”. Noijki, ipan yejuin tlamachtijli onikteititi miyek tlaixkopinaltin. Ijkuak tikomintlajpalouayaj yejuin grupos, sekimej tokniuan niman nejua tiayaj ipan atentin ipan se lancha de madera. Ipan selva tikitkiyaj se generador eléctrico, se tanque de gasolina, lámparas de queroseno niman nochi tlen nonekiya para tikinteititiskej yejon tlaixkopinaltin. Ijkuak tajsiyaj kampa tiknekiyaj, nochi tomamaltiayaj hasta tajsiskiaj kampa tikpanoltiskiaj tlamachtijli. Xkeman nikilkauas kenon tlaltikpakchanejkej melak kitlasojkamatiyaj ijkuak kikakiyaj yejuin tlamachtijli. Melak nipakiya pampa nikinpaleuiaya tlaltikpakchanejkej makixmatikan Jehová niman ikalpan. Ijkuak nikitaya kenon tlaltikpakchanejkej nonisiuiayaj itech Jehová, melak  niyolpakiya pampa nikchiuaya yejuin tekitl maski kemantika ouijtika katka.

Nejua nikmatstoya ika xmás ouijtika nikitaya nikchiuas notekiyo ipan circuito pampa xninonamiktiaya. Maski ijkon, niknekiya niknextis yakaj akin ueliskia nochipa iuan ninemis. Kuakon, opeuj niktlajtlanilia Jehová manechpaleui maniknexti se nosiuauj akin ueliskia nouan kitekichiuilijtinemis Jehová ipan selva niman makuelita yejuin tekitl tlen nikpiaya, maski kemantika ouijtika katka. Se xiuitl sakin, opeuj iuan ninonotsa Ethel, se precursora especial akin chikauak kitekichiuilijtoya Jehová, maski kemantika ouijtika kitaya. Desde ijkuak pitentsin katka, Ethel melak kuelitaya kenon apóstol Pablo chikauak okitekichiuili Jehová niman yejua noijki kinekiya ijkon kichiuas. Otonamiktijkej ipan septiembre de 1971 niman san sekan opeuj titlapaleuiyaj ipan circuito.

Ifamilia Ethel xmiyek tlemach kipiayaj, ika yejon, xouijtika okitak nouan tlapaleuis ipan circuito maski tinemiyaj ipan selva. Ijkuak tontetlajpalouayaj ipan selva kampa más uejka, xmiyek tlemach tikitkiyaj. Titlapakayaj niman taltiayaj apan. Tijkuayaj nochi tlen tokniuan techmakayaj ken iguanas, pirañas noso san tlenon tlen kajsiyaj. Ijkuak xonkatkaj platos, titlakuayaj ipan polanxiujtli. Niman, ijkuak xonkatkaj cucharas, san ika toma titlakuayaj. Ethel niman nejua yotikitakej ika pampa chikauak yotiktekichiuilijkej Jehová, yotochiujkej ken “sen mekatl de yeyi tlamalintli” (Ecl. 4:12). ¡Melak otikuelitakej nochi tlen topan opanok!

Aman manitlamiti tlen nimechijlitoya ijkuak opolak tolancha, tlen onimechijli ijkuak opeuj yejuin tlamachtijli. Yejuin opanok ijkuak tinemiyaj selva niman itokueptoyaj tochan. Ijkuak otipanokej kampa chikauak notlalojtoya atl, kuajli otipolajkej, san ika, nimantsin otikisakoj. Melak kuajli ika tikitkiyaj tochaleco salvavidas niman xotiuetsitoj ipan atl. San ika, melak okalak atl ipan tolancha. Ika yejon, ononek tiktlajkaliskej tlakuajli tlen tikitkiyaj ipan totrastes, pampa ika yejon trastes tikijkixtiskiaj atl tlen okalak ipan lancha.

 Opeuj timichajsij pampa xok tikpiayaj tlen tijkuaskej, san ika, xtlaj tikasiyaj. Ika yejon, otikchiuilijkej teoyotl Jehová niman otiktlajtlanilijkej matechmaka tlen tijkuaskej ipan yejon tonajli. Ijkuak otitlankej tikchiuaj teoyotl, se tokniuj okontlajkal ianzuelo niman okajsik se ueyi michin. Ipan lancha timakuiltin tiayaj niman tinochimej otixuikej ika yejon michin.

Ijkuak itikpiayaj makuijli xiuitl ika titlapaleuijtinemiyaj ipan circuito, Ethel niman nejua otikmatkej ika tikpiyaskiaj se tokoneuj. Nejua melak oniyolpak, san ika, xnikmatiya tlenon panoskia. Ethel niman nejua ok tiknekiyaj chikauak tiktekichiuiliskej Jehová. Ipan 1976 onemiko tokoneuj, Ethniël, niman ome xiuitl iuan tlajko sakin, otikpixkej okse tokoneuj, Giovanni.

Ipan yejon tonaltin, onkatka miyek tekitl ipan ikalpan toTajtsin ne Surinam, niman sucursal onechijli ok manitlapaleuijto ken tlayekanketl ipan circuito. Ijkuak nokoneuan pipitikej katkaj, nikomintlajpalouaya circuitos kampa xmás onkatkaj tlanechikoltin. Ipan se metstli, ueliya nitlapaleuiaya ome semana ipan circuito niman okse ome semana nitlapaleuiaya ipan notlanechikol ken precursor. Ethel niman nokoneuan nouan yayaj ijkuak nikomintlajpalouaya tlanechikoltin tlen nisiuj nokauayaj. San ika, ijkuak niaya ipan uejueyimej tlanechikoltin noso nikomintlajpalouaya tokniuan ipan selva, san noselti niaya.

Nonekiya kuajli niktekitiltis notiempo pampa nikpiaya miyek tekitl. Nochi semanas nikinmachtiaya nofamilia, san ijkuak xompa ninemiya pampa nikomintlajpalouaya tlanechikoltin ipan selva, nosiuauj Ethel nomachtiaya imiuan tokoneuan. Nochipa ijkuak tiueliyaj, tikitayaj kenon ueliskia san sekan tauiltiskej noso kanaj tonpaxaloskej. Kemantika melak itlayoua nikochiya pampa nonekiya nikchiuas seki tekitl tlen nikpiaya ipan ikalpan toTajtsin. Niman nosiuatsin Ethel melak yonechpaleui, yejua kichiua ken kijtoua Proverbios 31:15. Ijkuak tokoneuan yayaj escuela, nosiuauj saniman nokuiteuaya niman ijkon san sekan tikpouayaj texto niman san sekan titlakuayaj. Melak niktlasojkamati ika nikpiya se nosiuauj akin kinektika nechpaleuis niman ijkon uelis nikchiuas tekitl tlen yonechmakak ikalpan Jehová.

Ethel niman nejua otokojtilijkej tikinmachtiskej tokoneuan makitlasojtlakan Jehová niman chikauak makitekichiuilikan. Tejuamej xtiknekiyaj ika tokoneuan makitekichiuilikan Jehová san pampa  tejuamej tikimijliayaj, yej tiknekiyaj makitekichiuilikan pampa ijkon kisaya ipan inyojlo. Nochipa tikimijliayaj kenon melak tiyolpakis ijkuak tiktekichiuilis Jehová. Maski tikimijliayaj tlen ouijtika topan onochiuj, noijki tikimijliayaj kenon Jehová otechpaleui niman kenon otechteochiuj. Noijki, tikinpaleuiayaj tokoneuan manouikakan imiuan tokniuan akin chikauak kitekichiuiliayaj Jehová.

Nejua nochipa oninokojtili nikinmakas nofamilia tlen kinpolouaya. San ika, melak niktlasojkamachilia Jehová ika nochipa otechmakak tlen techpolouaya. Ijkuak nitlapaleuiaya ken precursor niman xininonamiktiaya, miyek tlen nopan onochiuj ipan selva, niman yejon onechmachti kuajli manitlanemili niman kuajli maniktekitilti notomin. Kuajli nikmatstok ika ijkuakon Jehová otechpaleui. Ken ijkuak opanok se guerra ne Surinam, ipan 1986-1992, nikilnamiki ika ouijtika katka tikpiyaskej nochi tlen techpolouaya. Niman kemantika maski melak tokojtiliayaj, xtechajxiliaya totomintsin. San ika, ijkuakon Jehová nochipa otechpaleui (Mat. 6:32).

Jehová xkeman otechkauj niman yotechpaleui matiyolpakikan. Melak tiyolpakij pampa Jehová otechmakak ome tokoneuj niman melak tiktlasojkamatij pampa ouel otikimititijkej makitlasojtlakan Jehová. Melak tiyolpakij pampa nochimej omemej tokoneuan okinemilijkej chikauak kitekichiuiliskej Jehová. Ethniël niman Giovanni oyajkej ipan escuelas tlen aman noixmati ken Tlamachtijli tlen kiseliaj akin Tenojnotsaj itech iTekiuajyo toTajtsin, niman aman tlapaleuijtokej ipan sucursal de Surinam imiuan insiuauan.

Ethel niman nejua itiuejueyimej, maski ijkon, ok chikauak tiktekichiuilijtokej Jehová ken precursores especiales. Melak miyek tekitl tikpiyaj niman hasta aman xninajxilia para niuelis niapanos. San ika, xninoyolkuepa, pampa ijkuak nitlanemilia itech nochi tlen nopan yonochiuj, ika nochi noyojlo ueli nikijtoua ika ijkuak nitelpochtli katka oniktlapejpeni tlen más kuajli: chikauak niktekichiuilis Jehová.