1. ¿Kenijki kimitaya apóstol Pablo tlapaleuijkej?

 TLAPALEUIJKEJ, noso, siervos ministeriales, melak tlapaleuiyaj ipan tlanechikoltin. Kuajli nesi ika apóstol Pablo melak kintlasojtlaya yejuin tlakamej akin melajkanemiyaj. Ijkuak okintlajkuilouili tokniuan Filipos, ipan icarta okomontlajpalo tlapaleuijkej niman tlayekankej (Filip. 1:1).

2. ¿Kenijki nomachilia Luis pampa tlapaleuijketl?

² Miyekej tokniuan tlakamej akin yonoapolaktijkej melak yolpakij pampa tlapaleuijkej. Uelis yeskej tlapaleuijkej maski ok telpokamej noso maski yeuejueyimej. Devan kipiaya 18 xiuitl ijkuak okitlalijkej ken tlapaleuijketl. Niman Luis yekipiaya ipantsin 50 xiuitl ijkuak okitlalijkej ken tlapaleuijketl. Yejuin tokniuj kijtoua: “Melak nikuelita nitlapaleuijketl yes, niman más ijkuak nikonnemilia kenijki tokniuan ipan tlanechikojli yonechititijkej ika nechtlasojtlaj”. Miyekej tokniuan tlapaleuijkej noijki ijkon nomachiliaj.

3. ¿Tlenon tiknankiliskej ipan yejuin tlamachtijli?

³ Tla titlakatl niman yotimoapolakti niman xetitlapaleuijketl, ¿uelis timokojtilis timochiuas tlapaleuijketl? ¿Tlenon noneki mitsyolmapeuas niman ijkon timochiuas tlapaleuijketl? ¿Niman tlenon mitstlajtlanilia Biblia niman ijkon timochiuas tlapaleuijketl? Ipan yejuin tlamachtijli yejon tlen tikinnankiliskej. San ika, kachtopa matikitakan tlenon kichiuaj tlapaleuijkej.

¿TLENON KICHIUA SE TLAPALEUIJKETL?

4. ¿Tlenon kichiuaj tlapaleuijkej? (Noijki xkita tlaixkopinajli).

⁴ Tokniuan tlakamej akin yonoapolaktijkej uelis yeskej tlapaleuijkej. Yejuamej kintlaliaj ika espíritu santo niman ijkon  makinpaleuikan tlayekankej makichiuakan tekitl ipan tlanechikojli. Sekimej kimijliaj tokniuan kanon tenojnotsaskej niman kintlajtlanij toamatlajkuiloluan tlen tikintemakaj kampa titenojnotsaj. Niman sekimej tlapaleuiyaj ijkuak tlachipaualo niman tlayektlalilo ipan Kajli kampa tosentlaliaj. Sekimej teseuiyaj noso kintlaliaj tlakuikaltin niman videos ipan tlanechikoltin. Yejuamej kichiuaj miyek tekitl, san ika, noijki melak chikauak kipiyaj intlaneltok. Melak kitlasojtlaj Jehová niman kintlakamatij itlanauatiluan. Niman xsan yejon, yejuamej noijki melak kintlasojtlaj tokniuan (Mat. 22:​37-39). ¿Tlenon noneki kichiuas se tokniuj tlakatl akin yonoapolakti niman ijkon tlapaleuijketl yes?

5. ¿Tlenon noneki tikchiuas niman ijkon uelis titlapaleuijketl yes?

⁵ Ipan Biblia kijtoua tlenon noneki kichiuas se akin kineki tlapaleuijketl yes (1 Tim. 3:​8-10, 12, 13). ¿Tlenon uelis tikchiuas niman ijkon uelis tlapaleuijketl yes? Tla timomachtia yejuin tlaxeloltin niman timokojtilia tikchiuas tlen ompa kijtoua. Aman tej, kachtopa noneki kuajli tikitas tleka tikneki timochiuas tlapaleuijketl.

¿TLENON NONEKI MITSYOLMAPEUAS MÁS XTEPALEUI?

6. ¿Tlenon noneki mitsyolmapeuas xtepaleui? (Mateo 20:28; noijki xkita tlaixkopinajli).

⁶ Matontlanemilikan itech Jesucristo. Yejua melak tetlasojtlaya: melak kitlasojtlaya iTaj niman melak kintlasojtlaya tlaltikpakchanejkej. Ika yejon, nochipa otepaleui niman kinchiuaya tekitsitsintin tlen kinchiuayaj akin xuejueyixtoyaj (xpoua Mateo 20:28; Juan 13:​5, 14, 15). Tla tejua noijki tikneki timochiuas tlapaleuijketl pampa titetlasojtla, Jehová mitsteochiuas niman mitspaleuis xmochiua tlapaleuijketl (1 Cor. 16:14; 1 Ped. 5:5).

7. ¿Tleka se tokniuj tlakatl xnoneki san itech tlanemilis?

⁷ Ipan tlaltikpaktli kinueyiteneuaj tlaltikpakchanejkej akin san no yejuamej noueyiteneuaj. San ika, ipan ikalpan Jehová xijkon nochiua. Tla se tokniuj tetlasojtla ken Jesús, xkichia ueyixtos nion xkichia san tlanauatijtos. Tla kitlaliaj ken tlapaleuijketl noso ken tlayekanketl yakaj akin san kineki tlanauatijtos noso ueyixtos, kanaj xkinekis kinchiuas seki tekitsitsintin tlen nonekij nochiuaskej para kuajli kintlajpiyaskej iborreguitos  Jehová. Ueliskia kinemilis ika xkimelaua kinchiuas yejon tekitsitsintin pampa ueyixtika (Juan 10:12). San ika, Jehová xkeman kiteochiuas tlen kichiuaj akin noueyimatij noso akin san intech tlanemiliaj (1 Cor. 10:​24, 33; 13:​4, 5).

8. ¿Tlenon okimijli Jesús iapóstoles?

⁸ Hasta itlasojkaikniuan Jesús kinekiyaj kipiyaskej se tekitl san pampa kinekiyaj uejueyixtoskej. Yejon tlen inpan onochiuj omemej iapóstoles Jesús: Santiago niman Juan. Yejuamej okitlajtlanilijkej Jesús makinmaka se ueyi tekitl ipan iTekiuajyo. San ika, Jesús xokimijli tla kuajli ika kinekiyaj se ueyi tekitl, yej ijkin okimijli on 12 iapóstoles: “Akin kinekis ueyixtias nemotsajlan ika onkaj kintekichiuilis oksekimej. San akinon de nemejuamej yejuan kinekis tlayekanas, ika onkaj yejua tepaleuis ken sen esclavo” (Mar. 10:​35-37, 43, 44). Tokniuan akin nokojtiliaj kipiyaskej se tekitl ipan tlanechikojli pampa kinekij kinpaleuiskej tokniuan melak kuajli tekitl kichiuaskej ipan tlanechikojli (1 Tes. 2:8).

¿TLENON UELIS TIKCHIUAS PARA MÁS TITEPALEUISNEKIS?

9. ¿Tlenon uelis tikchiuas niman ijkon tiknekis más titepaleuis?

⁹ Kuajli tikmatstokej ika tejua melak tiktlasojtla Jehová niman tikneki tikinpaleuis tokniuan. Maski ijkon, kanaj xtikneki titlapaleuijketl yes pampa kanaj tiknemilia ika melak miyek tekitl kichiuaj. ¿Tlenon uelis tikchiuas niman ijkon tiknekis más titepaleuis ipan tlanechikojli? Uelis tikonnemilis kenijki melak mitsyolpaktis tla tikinpaleuiya tokniuan. Yejon tlen okijto Jesús: “Más paki yejuan kitemaka xken on yejuan kiselia” (Hech. 20:35). Pampa yejua ijkon okichiuj, melak kiyolpaktiaya tepaleuis. Tla tejua noijki ijkon tikchiua, melak tiyolpakis.

10. ¿Kenijki okiteititi Jesús ika melak kiyolpaktiaya tepaleuis? (Marcos 6:​31-34).

¹⁰ Matikitakan se neskayotl tlen techititia kenijki Jesús melak yolpakiya pampa kinpaleuiaya oksekimej (xpoua Marcos 6:​31-34). Sejpa katka, ijkuak Jesús niman iapóstoles melak yosiaujkaj, oyajkej kampa ueliskia noseuiskej. San ika, miyekej tlaltikpakchanejkej kachtopa oajsikej pampa kinekiyaj kikakiskej Jesús. Yejua ueliskia xkinmachtis pampa yejua niman inomachtijkauan “nion xkipiyayaj tiempo para tlakuaskej”. Noso ueliskia san totoka kinmachtis niman sakin kintotokas. San ika, Jesús “opeu kinmachtia miyek tlajtlamach” pampa melak kintlasojtlaya, niman pampa ouejkauj, sa okitak melak yoteotlaktilijkaj (Mar. 6:35). Yejua xsan okinmachti tla pampa ijkon nonekiya kichiuas, yejua okinmachti pampa “sanoyej okinmiknelij”. Kinekiya kinmachtis pampa kintlasojtlaya. Kema, melak kiyolpaktiaya tepaleuis.

11. ¿Kenijki okinpaleui Jesús akin kinmachtiaya? (Noijki xkita tlaixkopinajli).

¹¹ Jesús xsan okinmachti tlaltikpakchanejkej, yejua noijki okinmakak tlen kinpolouaya. Ika se milagro, okimiyekili tlakuajli niman inomachtijkauan okixexelojkej (Mar. 6:41). Ijkon okinmachti inomachtijkauan tlenon kijtosnekiya tikinpaleuis oksekimej. Noijki okimititi ika tla kinchiuaj tekitsitsintin, ken tlen kinchiuaj tlapaleuijkej, noijki ueyi kijtosneki. ¡San xkonnemili kenijki melak oyolpakkej apóstoles! Ouel okipaleuijkej Jesús ijkuak okixexelojkej tlakuajli hasta ijkuak “nochimej otlakuajkej, niman kuajli oixuikej” (Mar. 6:42). Aman tej, Jesús xsan ijkuakon otepaleui maski kinekiya kichiuas okseki tlemach, yejua okinpaleui oksekimej nochi tiempo tlen onen ipan tlaltikpaktli (Mat. 4:23; 8:16). Jesús ika yolyemanilistli kinmachtiaya niman kinpaleuiaya oksekimej, niman yejon melak kiyolpaktiaya.  Tejua noijki uelis ijkon tiyolpakis tla timochiua tlapaleuijketl para tikinpaleuis oksekimej.

12. ¿Tleka xnoneki tiknemiliskej ika xtlaj ueli tikchiuaj niman ijkon titepaleuiskej ipan tlanechikojli?

¹² Tla tejua tiknemilia ika xtlaj ueli tikchiua, maka xmajmana. Tikmatstokej ika tikinpiya kualtsitsintin kualneskayomej tlen uelis mitspaleuiskej xtepaleui ipan tlanechikojli. Melak mitspaleuis tla tikchiua teoyotl niman sakin tikamapoua tlen kijtoua 1 Corintios 12:​12-30. Ompa Pablo kijtoua ika tejua niman oksekimej itekipanojkauan Jehová melak nentlapaleuiyaj niman melak noneki xnemikan ipan tlanechikojli. Kuakon, maka xmosiaujkaua tla xeueli timochiua tlapaleuijketl. Xmokojtili chikauak xtekichiuili Jehová niman xkinpaleui mokniuan. Tlayekankej kachtopa kitaskej tlen ueli tikchiua niman ijkon mitsmakaskej seki tekitl (Rom. 12:​4-8).

13. ¿Tleka tikijtouaj ika xouijtika tlen kintlajtlaniliaj akin kinekij tlapaleuijkej yeskej?

¹³ Noijki xontlanemili itech yejuin: miyek kualneskayomej tlen noneki kinpiyas se tlapaleuijketl, tinochimej akin tiktekichiuiliaj toTajtsin noneki tikinpiyaskej. Tinochimej noneki tonisiuiskej itech Jehová, ika toyojlo titepaleuiskej niman tinemiskej ken toTajtsin kuelita. Kuakon, kanaj tejua yetikinpiya kualneskayomej tlen noneki kinpiyas se tlapaleuijketl. San ika ¿tlenon noneki kichiuaskej tokniuan tlakamej akin kinekij más kiseliskej tekitl ipan tlanechikojli?

TLEN KINTLAJTLANILIAJ TLAPALEUIJKEJ

14. ¿Tlenon kijtosneki ika tlapaleuijkej “noneki kichiuaskej intech matlaneltokakan”? (1 Timoteo 3:​8-10, 12, TNM).

¹⁴ Matikitakan tlenon noneki kichiuaskej akin kinekij yeskej tlapaleuijkej ipan 1 Timoteo 3:​8-10, 12, TNM (xpoua). a Tlapaleuijkej “noneki kichiuaskej intech matlaneltokakan”. Yejuin xkijtosneki tla xnoneki uetskaskej noso tla xnoneki kamanaloskej (Ecl. 3:​1, 4). San ika, kema noneki nochipa kuajli kichiuaskej tekitl tlen kinmakaj niman ijkon tokniuan intech tlaneltokaskej niman kintlakaitaskej.

15. ¿Tlenon kijtosneki “xnoneki tekajkayauaskej” niman “xnoneki kitekuiliskej tomin”?

 ¹⁵ “Xnoneki tekajkayauaskej”. Yejuin kijtosneki ika noneki nochipa kijtoskej tlen melauak, kichiuaskej intech matlaneltokakan niman xakaj noneki kikajkayauaskej (Prov. 3:32). Noijki “xnoneki kitekuiliskej tomin”. Yejuin kijtosneki ika xnoneki tekajkayauaskej ijkuak kitaskej kenijki kinotlaniliskej tomintsin nion xnoneki kixpachoskej itomintsin tlanechikojli. Niman noijki xnoneki kinemiliskej ika aman uelis melak notomintiskej pampa miyekej tokniuan kimixmatstokej.

16. a) ¿Tlenon kijtosneki “xnoneki [ . . . ] koniskej miyek vino”? b) ¿Niman tlenon kijtosneki kipiyaskej “intlamachilis chipauak”?

¹⁶ “Xnoneki [ . . . ] koniskej miyek vino”. Yejuin kijtosneki ika xnoneki sajnoye miyek alcohol koniskej noso kimixmatiskej ika melak tlaoninij. Noijki noneki kipiyaskej “intlamachilis chipauak” pampa kintlakamatij itlanauatiluan Jehová. Melauak ika tinochimej titlajtlakolejkej, san ika, uelis kuajli tomachiliskej tla kuajli touikaj iuan toTajtsin.

17. ¿Kenijki uelis kitaskej tlen ueli kichiua se tokniuj? (1 Timoteo 3:​10, TNM; noijki xkita tlaixkopinajli).

¹⁷ “Noijki, kachtopa noneki noitas tlen ueli kichiuaj”. Yejuin kijtosneki ika noneki kiteititiskej ika uelis kinmakaskej se tekitl pampa intech tlaneltokaj. Ika yejon, ijkuak tlayekankej itlaj kinnauatiskej, noneki kichiuaskej ijkon ken kinnauatiaj niman kichiuaskej ijkon ken ikalpan Jehová kijtoua. Noneki kuajli kitaskej kenijki kichiuaskej yejon tekitl niman kemanon nonekis tlamiskej. Tla nokojtiliaj kuajli kichiuaskej intekiyo, tokniuan ipan tlanechikojli kitaskej ika kuajli tekititokej niman ika uelis más kintekitiltiskej. Tlayekankej, xkimitakan tlakamej akin yonoapolaktijkej akin uelis nenkinmajmachtiskej (xpoua 1 Timoteo 3:​10, TNM). b ¿Ipan nemotlanechikol nemij telpokamej noso telpochkokonej akin yonoapolaktijkej? ¿Kuajli nomachtiaj san inselti? ¿Tlanankiliaj ipan tlanechikojli niman nochipa ontenojnotsaj? Tla ijkon, uelis nenkinmakaskej seki tekitsitsintin, yejon mechpaleuis xkitakan tlen ueli kichiuaj. Niman tla yotelpochtiakej, yeuelis kintlaliskej ken tlapaleuijkej.

18. ¿Tlenon kijtosneki ika noneki noitas tla tlapaleuijkej “xtlaj kimijtouiliaj”?

¹⁸ Noijki noneki noitas tla tlapaleuijkej “xtlaj kimijtouiliaj”. Yejuin kijtosneki ika  xnoneki kichiuaskej itlaj tlen makichiua ika oksekimej makinemilikan ika yokichiujkej se ueyi tlajtlakojli. Tikmatstokej ika kemantika akin kichiuaj ken Cristo uelis kintlajtolchijchiuiliskej. Hasta Jesús okitlajtolchijchiuilijkej niman okijto ika akin kichiuaskiaj ken yejua noijki kintlajtolchijchiuiliskiaj (Juan 15:20). Maski ijkon, tla tokniuan nokojtiliaj kichiuaskej ken Jesús, tokniuan ipan tlanechikojli kuajli kimitaskej (Mat. 11:19).

19. ¿Tlenon kijtosneki ika tlapaleuijkej noneki kipiyaskej “san se insiuauj”?

¹⁹ Akin kinekij yeskej tlapaleuijkej niman yononamiktijkej noneki kipiyaskej “san se insiuauj”. Noneki kitlakamatiskej tlen Jehová okijto: se tlakatl noneki san se isiuauj kipiyas (Mat. 19:​3-9). Akin kichiuaj ken Cristo xnoneki auilnemiskej (Heb. 13:4). San ika, se tlakatl akin kitekichiuilia toTajtsin noneki okse itlaj kichiuas: xnoneki kikajkayauas isiuauj niman xnoneki kinmitstinemis oksekimej siuamej (Job 31:1).

20. ¿Kenijki kuajli kinyekana ichanejkauan se tlakatl?

²⁰ Tlapaleuijkej noijki noneki “kuajli kinyekanaskej inkoneuan niman inchanejkauan”. Akin kinyekanaj inchanejkauan noneki kuajli kichiuaskej intekiyo. Noneki sejse semana nomachtiskej imiuan inchanejkauan, nochipa san sekan ontenojnotsaskej niman kinpaleuiskej inkoneuan kuajli manouikakan iuan Jehová (Efes. 6:4). Se tlakatl akin kuajli kintlajpiya ichanejkauan kiteititia ika uelis kuajli kitlajpiyas tlanechikojli (uelis tikitas 1 Timoteo 3:5).

21. ¿Tlenon uelis tikchiuas tla xetitlapaleuijketl?

²¹ Tla tejua xetitlapaleuijketl, timitsyolchikauaj xchiuili teoyotl Jehová niman oksejpa xmomachti yejuin tlamachtijli. Xkita tlenon uelis tikchiuas niman ijkon titlapaleuijketl yes niman xmokojtili xchiua tlen noneki. Xkonnemili kenijki melak tiktlasojtla Jehová niman kenijki melak tikintlasojtla tokniuan. Más xneki titepaleuis (1 Ped. 4:​8, 10). Tla ijkon tikchiua, melak mitsyolpaktis tikinpaleuis mokniuan. ¡Jehová makiteochiua nochi kech timokojtilijtika para timochiuas tlapaleuijketl! (Filip. 2:13).