1, 2. ¿Tlenon kichiuaj tlayekankej?

 TLA yotiuejkauj ken tlapaleuijketl, kanaj miyek tlen kintlajtlaniliaj tlayekankej yetikchiujtikaj. Tekitl tlen kichiuaj tlayekankej “sanoyej kuajli” (1 Tim. 3:1). Ika yejon, ¿uelis más timokojtilis niman ijkon titlayekanketl yes?

² ¿Tlenon kichiua se tlayekanketl? Nokojtilia nochipa ontenojnotsas iuan tlanechikojli, kintlajpiya niman kinmachtia tokniuan, kinchikauilia intlaneltok tokniuan ika tlen kijtoua niman ika tlen kichiua. Ika yejon, Biblia kijtoua ika yejuin tekitkej tlayekankej yeskiaj ken “tetlayokoliltin” (Efes. 4:8).

3. ¿Tlenon noneki kichiuas se tokniuj niman ijkon tlayekanketl yes? (1 Timoteo 3:​1-7; Tito 1:​5-9).

³ Ijkuak yakaj kitejtemoua se tekitl, akin tetlakeua san kita tlenon ueli kuajli kichiua akin kitlakeuas. San ika, ipan tlanechikojli xijkon panoua, ijkuak yakaj kineki yes tlayekanketl, xsan kitaj tlen ueli kuajli kichiua. Xsan kitlajtlaniliaj kuajli matenojnotsa niman matemachti, noijki noneki kichiuas nochi tlen kijtoua ipan 1 Timoteo 3:​1-7 niman Tito 1:​5-9 (xpoua).  Ipan yejuin tlamachtijli tikitaskej yeyi tlemach tlen kintlajtlaniliaj tlayekankej: noneki kuajli kimitaskej, kuajli kinyekanaskej inchanejkauan niman kinektoskej tlapaleuiskej ipan tlanechikojli.

KUAJLI MAMITSITAKAN

4. ¿Tlenon kijtosneki “kuajli nouikas”?

⁴ Se tlayekanketl noneki “kuajli nouikas”. Yejuin kijtosneki ika tokniuan ipan tlanechikojli noneki kuajli kitaskej. Noijki, “noneki kuajli ma nouika para on yejuan xtlaneltokaj kitlakaitaskej”. Tlaltikpakchanejkej ueliskia xkuajli kitejteneuaskej ipampa tlen kineltoka, san ika, xnoneki kichiuas itlaj tlen makichiua makijtokan ika yejua tekajkayaua niman xyolkuajli (Dan. 6:​4, 5). Xmotlajtolti: “¿Tokniuan niman akin xnomachtiaj kuajli nechitaj?”.

5. ¿Tlenon kijtosneki ika se tlayekanketl noneki “kuelitas nochi tlen kuajli”?

⁵ “Kuelitas nochi tlen kuajli” kijtosneki kitas tlen kuajli kichiuaj oksekimej niman kimijlis ika melak kuajli pampa kinpiyaj kualtsitsintin kualneskayomej. Noijki kijtosneki yolpakis ijkuak tepaleuis niman ijkuak kichiuas tlen nion xok kitlajtlaniliaj (1 Tes. 2:8). ¿Tleka melak noneki ika tlayekankej makuelitakan nochi tlen kuajli? Pampa noneki kitekitiltiskej intiempo niman ijkon kintlajpiyaskej tokniuan niman kichiuaskej intekiyo (1 Ped. 5:​1-3). Maski melak miyek noneki kichiuaskej, yejuamej melak yolpakij pampa tepaleuiyaj (Hech. 20:35).

6. ¿Kenon yakaj kiteititia ika kuajli teselia? (Hebreos 13:​2, 16; noijki xkita tlaixkopinajli).

⁶ Noijki noneki “kuajli kinselis itenotskauan ipan ichan”, san ika, xsan noneki kuajli kinselis akin imiuan nouika (1 Ped. 4:9). Se nota ipan se Biblia kijtoua ika ichan niman iyoltsin noneki tlapojtoskej niman ijkon kuajli kinselis akin xkimixmati. Xmotlajtolti: “¿Nechixmatij ken yakaj akin kuajli teselia?” (xpoua Hebreos 13:​2, 16). Se tlakatl akin kuajli teselia, kinmaka tlen ueli akin kontlajpalouaj, ken akin xmiyek kinopiliaj niman akin chikauak kitekichiuiliaj Jehová, ken tlayekankej ipan circuito niman akin konpanoltiaj se tlamachtijli ipan tlanechikojli (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Kenon kiteititia se tlayekanketl ika xsajnoye kileuiya tomin?

⁷ Xnoneki “sanoyej keleuis tomin”. Yejuin  kijtosneki ika xnoneki san kitejtemojtos kenon kipiyas miyek tlemach. Maski tla kipiya tomin noso xkipiya tomin, noneki kitas kenon kachtopa kitekichiuilis Jehová (Mat. 6:33). Noneki kitekitiltis itiempo, ichikaualis niman tlen kipiya para kiueyichiuas Jehová, kintlajpiyas ichanejkauan niman tlapaleuis ipan tlanechikojli (Mat. 6:24; 1 Juan 2:​15-17). Xmotlajtolti: “¿Kenon nikita tomin? ¿Niyolpaki sa ika tlen nikpiya? ¿Noso san niknemilijtok kenon más nikpiyas tomin niman okseki tlemach?” (1 Tim. 6:​6, 17-19).

8. ¿Kenon yakaj kiteititia ika kuajli nouika niman ika kuajli kiyekana inemilis?

⁸ Se tlayekanketl noijki melak noneki “kuajli ma nouika” niman “kiyekanas kuajli inemilis”. Yejuin kijtosneki ika xnoneki sajnoye tlakuas nion sajnoye tlaonis. Noijki noneki notlakentis niman noyekchiuas san ken kinamiki niman kuajli kitekitiltis itiempo. Xnoneki kichiuas tlen kichiuaj akin xnomachtiaj (Luc. 21:34; Sant. 4:4). Noijki noneki yolseujtos maski kemantika san kikuakualaniskej. “Nion xtlauantinemis” nion xnoneki makixmatikan ken yakaj akin melak konini. Xmotlajtolti: “¿Ika tlen nikchiua nikteititia ika kuajli niknemilia tlen nikchiua niman ika ueli ninoteltia?”.

9. ¿Tlenon kijtosneki ika se tlayekanketl noneki kuajli noyekanas niman kuajli kitas ken kichiuas itekiyo?

⁹ Se tlayekanketl noneki “kuajli noyekanas”. Yejuin kijtosneki ika noneki kuajli kitas tlen kijtoua Biblia ijkuak itlaj kitlapejpenis. Ijkuak tlanemilia itech tlen kijtoua Biblia, kuajli kajsikamati nochi tlen panoua niman, pampa ijkon kichiua, más kuajli tlen kitlapejpenia. Xsan totoka kinemilijtiuetsi itlaj, yej kachtopa kuajli kita nochi tlen opanok (Prov. 18:13). Niman pampa ijkon kichiua, tlen kitlapejpenia kiteititia ika tlanemilia ken Jehová. Noijki kuajli kita tlen kichiuas. Yejuin kijtosneki ika kuajli kiyekchiua tlen kichiuas niman saniman ajsi kampa noneki yas. Nochimej kimatij ika uelis itech tlaneltokaskej. Niman ijkuak kinauatiaj se tekitl, kichiua ijkon ken ikalpan toTajtsin kijtoua. Niman pampa kichiua nochi yejuin, oksekimej kuajli kitaj. Aman matikitakan tlenon noneki kichiuas niman ijkon kuajli kinyekanas ichanejkauan ijkon ken kijtoua Biblia.

KUAJLI XKINYEKANA MOCHANEJKAUAN

10. ¿Tlenon kijtosneki ika se tlakatl noneki kuajli “kiyekanas ifamilia”?

¹⁰ Tla se tokniuj tlakatl kineki tlayekanketl yes, noneki ika ichanejkauan noijki kuajli makinmitakan. Ika yejon, noneki kuajli “kiyekanas ifamilia”. Noneki ika yejuin tokniuj makixmatikan ika kintlasojtla ichanejkauan niman ika kuajli kintlajpiya. Noijki, noneki kitas ika ichanejkauan kuajli makitekichiuilikan Jehová, noneki kinuikas tlanechikojli niman kitas ika kuajli matenojnotsakan. ¿Tleka melak noneki ijkon makichiuakan? Pampa ijkon ken okijto apóstol Pablo, “tla sen tlayekanki xkimati kenijki kiyekanas ifamilia, ¿kenijki uelis kinyekanas ikoneuan Dios?” (1 Tim. 3:5).

11, 12. ¿Tlenon noneki kichiuaskej ichanejkauan se tokniuj niman ijkon uelis yes tlayekanketl? (Noijki xkita tlaixkopinajli).

¹¹ Tla tokniuj kinpiya ikoneuan akin xekajxiltiaj 18 xiuitl, noneki kichiuas ika “ikoneuan ma kitlakamatikan niman ma kitlakaitakan”. Noneki kinmachtis ika tetlasojtlalistli. Tikmatstokej ika kineki ika ikoneuan mayolpakikan, mauetskakan niman manauiltikan ijkon ken nochimej kokonej. San ika, tla kuajli kinmachtia, tetlakamatiskej, tetlakaitaskej niman xsan tlayeltikej yeskej noso xsan nauiltijtoskej. Noijki noneki kinpaleuis ikoneuan kuajli manouikakan iuan Jehová, makitlakamatikan  tlen kijtoua Biblia niman makichikaujtiakan intlaneltok niman ijkon uelis noapolaktiskej.

¹² “Ikoneuan ika onkaj tlaneltokakej yeskej, niman tetlakamatiskej niman maka kinteixpanuiskej itlaj ika tlen xkuajli kichiuaj”. San ika ¿tlenon panoua tla se ikoneuj akin yonoapolakti noso akin kemach noapolaktiskia niman iuan chanti kichiua se ueyi tlajtlakojli? Tla tajtli xkuajli okimachti niman xkuajli okiyektlali ikoneuj, kijtosneki ika kanaj xok uelis yes tlayekanketl (xkita revista La Atalaya del 15 de octubre de 1996, página 21, párrafos 6, 7).

XTLAPALEUI IPAN TLANECHIKOJLI

13. ¿Kenon yakaj kiteititia ika “tenotski” niman ika xnimantsin kualani?

¹³ Tokniuan akin kinpiyaj kualtsitsintin kualneskayomej melak tepaleuiyaj ipan tlanechikojli. Tla se tokniuj “tenotski”, kichiua ika oksekimej mayolseujtokan. Tla tejua tikneki mamitsixmatikan ken yakaj akin tenotski, noneki kuajli titekakis niman tiknektos tijkakis tlen kinemiliaj oksekimej. Tla tinemiskia ipan se tlanechikojli tlen kipiyaj tlayekankej, ¿tiknektoskia tikchiuas tlen nochimej kitlapejpeniaj tla xkiyekapanauiya tlen kijtoua Biblia? Noijki, se tlayekanketl “xkitocaroua noueyimatis”. Yejuin kijtosneki ika xnoneki kitechiualtis manochiua itlaj ken yejua kineki. Yej kimatstok ika melak kuajli tlen oksekimej kijtouaj (Gén. 13:​8, 9; Prov. 15:22). Noijki noneki “yolyemanki” yes niman xnoneki “nimantsin kualanis”. Yejua xtetlauelnotsa, yej tetlakaita niman kualtsin tenotsa niman pampa yolseujki, tepaleuiya ika nochimej mayolseujtokan, hasta ijkuak melak ouijtika (Sant. 3:​17, 18). Yejua yemankatlajtoua para maka maueyiya tlauejli. Niman hasta kinyemankanotsa akin techtlaueltokaj (Juec. 8:​1-3; Prov. 20:3; 25:15; Mat. 5:​23, 24).

14. ¿Tleka xnoneki yes tlayekanketl “on yejuan kemach tlaneltoka”, niman kenon kiteititia ika “yolchipauak”?

¹⁴ Xnoneki yes tlayekanketl “on yejuan kemach tlaneltoka”. Maski xmiyek xiuitl kipiya ika yonoapolakti, noneki panos seki tiempo niman ijkon makichikaua itlaneltok. Achto yes tlayekanketl noneki kiteititis ika  yolyemanki ijkon ken Jesús, niman kinektos kitekichiuilis Jehová ijkon ken Jehová kineki niman ijkuak yejua kinekis (Mat. 20:23; Filip. 2:​5-8). Noijki noneki kiteititis ika “yolchipauak”. Yejuin kijtosneki ika noneki melajkanemis itech Jehová niman kintlakamatis itlanauatiluan, noijki noneki kitlakamatis tlen technauatia ikalpan (1 Tim. 4:15).

15. ¿Melak noneki ika se tlayekanketl kualtsin makinpanolti itlamachtiluan ipan tlanechikojli?

¹⁵ ITlajtol toTajtsin kijtoua ika se tlayekanketl melak noneki “ma kuajli temachti”. ¿Yejuin kijtosneki ika noneki kualtsin makinpanolti itlamachtiluan ipan tlanechikojli? Ka, xyejon kijtosneki. Sekimej tlayekankej xkimixmatij tla pampa melak kualtsin kinpanoltiaj intlamachtiluan. San ika, ijkuak yejuamej tenojnotsaj niman ijkuak kinyolchikauaj tokniuan, melak noneki kuajli makitekitiltikan Biblia (uelis tikitas 1 Corintios 12:​28, 29 niman Efesios 4:11). San ika, se tokniuj akin kineki yes tlayekanketl noneki nokojtilijtias para más kuajli temachtis. ¿Kenon uelis kichiuas yejuin?

16. ¿Kenon se tokniuj uelis más kuajli temachtis? (Noijki xkita tlaixkopinajli).

¹⁶ “Ika onkaj kejeuas on melajki temachtilistli”. Tla se tlayekanketl kineki kuajli temachtis, noneki kitekitiltis iTlajtol toTajtsin ijkuak temachtis teixpan noso ijkuak san se kitlajtolpaleuis. Noijki kuajli nomachtia Biblia niman toamatlajkuiloluan (Prov. 15:28; 16:23). Ijkuak nomachtia, kuajli kita kenon uelis nochiuas tlen kijtouaj tlaxeloltin. Niman, ijkuak temachtia, nokojtilia ajsis ipan inyojlo akin kinmachtia. Melak kipaleuis tla kintlajtoltia tlayekankej akin melak ueltokej temachtiaj tlenon kinpaleuiya para kuajli temachtiskej niman tla kichiua tlen kijliaj (1 Tim. 5:17). Se tlayekanketl noijki noneki “kinyoleuas”, noso, kinyolchikauas tokniuan maski kemantika nonekis kimijlis tlenon noneki kichiuaskej noso hasta kinmelajkatlalis. San ika, nochipa noneki kuajli kinnotsaskej. Tla yejuamej kuajli tenotsaj, yemankatlajtouaj niman tlen temachtiaj kikixtiaj ipan iTlajtol toTajtsin, melak kuajli temachtiskej pampa kichiujtoskej ken toUeyi Tlamachtijkauj, Jesús (Mat. 11:​28-30; 2 Tim. 2:24).

 OK XMOKOJTILIJTO

17. a) ¿Tlenon uelis kinyolchikauas tlapaleuijkej para manokojtilijtokan yeskej tlayekankej? b) ¿Tlenon noneki kilnamikiskej tlayekankej ijkuak kitaskej tla yakaj yeuelis tlayekanketl yes? (Xkita recuadro “ Tlayekankej, xteajsikamatikan ijkuak nenkitaskej tla yakaj yeuelis tlayekanketl yes”).

¹⁷ Aman ika yotikitakej nochi tlen kintlajtlaniliaj tlayekankej, kanaj sekimej tlapaleuijkej kinemiliskej ika xkeman uelis tlayekankej yeskej. San ika, noneki kilnamikiskej ika Jehová niman ikalpan xkichiaj maka manopopolokan (1 Ped. 2:21). Noijki, iespíritu Jehová kinpaleuis niman ijkon uelis yeskej tlayekankej (Filip. 2:13). ¿Niman tejua? ¿Tikuelitaskia más kuajli tikchiuas tlen aman otikitakej? Kuakon, xnotsa Jehová, más kuajli xmomachti yejuin niman xkintlajtlanili tlayekankej mamitsijlikan kenon uelis más kuajli titlapaleuis.

18. ¿Tlenon noneki kichiuaskej nochimej tlapaleuijkej?

¹⁸ Nochimej tokniuan, hasta akin yetlayekankej, melak kuajli tla nokojtiliaj más kuajli kinteititiskej kualneskayomej tlen otikimitakej ipan yejuin tlamachtijli (Filip. 3:16). Tla tejua yetitlapaleuijketl, xmokojtilijto niman ijkon uelis titlayekanketl yes. Tla tikneki más tikpaleuis Jehová niman más titlapaleuis ipan tlanechikojli, xtlajtlanili mamitsmachti niman mamitsyektlali (Is. 64:8). Jehová kiteochiuas nochi kech timokojtilijtika para uelis titlayekanketl yes.