JOSÉ AKIN UALEUA ARIMATEA nion xkimatiya kenon onoyolchikauj niman ijkon tlajtos iuan Poncio Pilato, pampa yejuin tlanauatijketl romano kixmatiyaj ika katka se tlakatl tenkojtik. San ika, yakaj kipiaya kitlajtlanilis itlalnakayo Jesús niman ijkon uelis kitokaskej ken kinamiki. Ken otlamito ijkuak ixpan oyaj, kuajli okisato ken nion xkichiaya. Sakin ika se tlayekanketl itech soldados romanos okijli ika Jesús yomijka, Pilato okikauili makichiua tlen okitlajtlanili. Kuakon, maski ok noyolkokouaya, José totoka onokuep kampa okimiktijkej Jesús (Mar. 15:42-45).

• ¿Akinon katka yejuin José akin ualeua Arimatea?

• ¿Tleka kixmatstoya Jesús?

• ¿Tleka kinamiki matomachtikan inemilis?

Ipan Evangelio tlen okijkuilo Marcos kijtoua ika José akin ualeua Arimatea “teuan katka intech on tetlakanonotskej” niman “nochimej kitlakaitayaj”. Kuakon, uelis tikijtoskej ika “on tetlakanonotskej ne ipan on ueyi tiopan”, kijtosnekiya Sanedrín, kampa nemiyaj akin uejueyixtoyaj intech judíos akin tlayekanayaj niman teyolkuitiayaj (Mar. 15:1, 43). José katka se intech akin kiyekanayaj kalpan, yejuin techasikamachiltia tleka ouel okitlajtlan iuan nonotsas tlanauatijketl romano. Noijki xtechmojkatlachialtia ika “rico” katka (Mat. 27:57).

Miyekej itech Sanedrín kitlauelitayaj Jesús; hasta okitejtemojkej kenon kimiktiskej. San ika, José katka se “kuajli tlakatl” niman akin nochipa kuajli onouikak (Luc. 23:50). Yejua sejneka katka, melajki noyekanaya, kuajli nemiya niman nochikauaya kitlakamatis itlanauatiluan toTajtsin. Noijki “kichaya kemanon peuas tlamandaros Dios”, ika yejon, tikasikamatij tleka ouel onochiuj inomachtijkauj Jesús (Mar. 15:43; Mat. 27:57). Uelis tikijtoskej ika kitlasojtlaya tlen melauak niman tlen melajki, yejua ika, okiyoltilan tlen Jesús temachtiaya.

Juan 19:38 kijtoua ika “José san ichtaka inomachtijkauj katka Jesús, pampa kinmakasiya on hebreos”. ¿Tleka kinmakasiya? Pampa yejuamej kitlauelitayaj Jesús, niman kimatstoya ika xokpa kinemiliskej kikixtiskej itech sinagoga akin kiteijliskia ika tlaneltokaya itech Jesús (Juan 7:45-49; 9:22). Akin kikixtiayaj itech sinagoga kijtosnekiya kipinajkaitaskiaj, xok kiseliskiaj niman kitlaueltotokaskiaj intech okseki judíos. José xnoyolchikauaya kiteijlis teixpan ika tlaneltokaya itech Jesús, pampa tla kichiuaskia kijtosnekiskia ika xok ueyixtoskia niman xok kitlakaitaskiaj.

Xsan José okixnamik yejuin. Juan 12:42 kijtoua ika “miyekej on hebreos okineltokakej Jesús, hasta on yejuan tekiuajkej. Pero xkipantlantiayaj intlaneltok pampa kinmakajsiyaj  ika on fariseos kinuajkixtiskej ipan on tiopan”. Se intech yejuamej katka Nicodemo, akin noijki teuan katka ipan Sanedrín (Juan 3:1-10, TNM; 7:50-52).

José kema katka se inomachtijkauj Jesús, san ika, xkinekiya kiteijlis. Yejon melak xkuajli katka tla tikitaj tlen okijto Jesús: “Nochimej on yejuan imixpan on tlakamej kijtoskej ika nechseliaj ken intemakixtijkau, nejua no nikijtos ixpan noTajtsin iluikak chanej ika nikinselia. Pero on yejuan nonenekiskej nopampa imixpan on tlakamej, nejua no ninonenekis impampa ixpan noTajtsin iluikak chanej” (Mat. 10:32, 33). Yejuin xkijtosneki tla José kimapeuaya Jesús, yejua san xkipiaya yolchikaualistli tlen nonekiya niman ijkon nokuitis ika inomachtijkauj katka. Niman, ¿tlenon uelis tikijtoskej tejuamej?

Noijki onka tlen kuajli okichiuj José akin ualeua Arimatea, Biblia kijtoua ika  yejua xokipaleui tlen Sanedrín okinemili kichiuilis Jesús (Luc. 23:51). Noneltoka ika xonen kampa okiyolkuitijkej Jesús. Maski san kenon, José kanaj melak okiyolkoko pampa okichiuilijkej tlen xkuajli niman melak xkinamikiya, san ika, xtlaj ueliskia kichiuas.

Kuajli nesi ika sakin ijkuak Jesús omik, José xok nomojtiaya niman kuajli yokijtoka ika kiteititis ika kitokaya Jesús. Tikmatstokej yejuin ipampa tlen kijtoua Marcos 15:43: “Yejua onoyolchikau, niman oyaj itech Pilato para okitlajtlanilij itlalnakayo Jesús”.

Nesi ika José okitak kenon okimiktijkej Jesús, pampa kachtopa yejua okimat xken Pilato. Yejuin techajsikamachiltia tleka ijkuak okitlajtlan makimakakan itlalnakayo Jesús, tlanauatijketl “omojkatlachix ika yomik Jesús” (Mar. 15:44). Tla José okitak kenon otlajyoui Jesús ipan yejon kojtli melaktik, ¿okichiuj yejon kuajli matlanemili niman manoyolchikaua kiteijlis ika katka inomachtijkauj Cristo? Kanaj kema. Maski san kenon, yejon okichiuj itlaj makichiua. Xok san ichtaka inomachtijkauj yeskia.

Intlanauatiluan judíos kijtouaya ika akin kiminmiktiayaj nonekiya kintokaskej achto kalakis tonajli (Deut. 21:22, 23). San ika, romanos kinkauayaj tlakamej akin okitechiuilijkej tlen xkuajli mapilkatokan ipan kojtli melaktik hasta ijkuak nakayopalaniyaj noso san kominxiniayaj ipan  tlalkontli. San ika, José xkinekiya ijkon makichiuilikan Jesús. Nisiuj kampa okimiktijkej, José kipiaya se tlalkontli ipan tetl. Ompa ok xiyakaj kitokayaj, niman yejuin techititia ika José ok xuejkauiya ika onochantito Jerusalén pampa yejua ualeuaya Arimatea * niman kinekiya ika ompa makintokakan inchanejkauan (Luc. 23:53, TNM; Juan 19:41, TNM). Kitokas Jesús kampa yejua kichiaya makitokakan, melak ueyi okijtosnek niman noijki okichiuj teotlajtojli kampa kijtouaya ika Mesías kitokaskiaj “inuan akin kipiyaj tomin” (Is. 53:5, 8, 9).

Nochi naui Evangelios kijtouaj ika ijkuak okitemoltijkej itlalnakayo Jesús itech kojtli melaktik, José akin ualeua Arimatea okitejkuix ika se tlakentli tlachijchiujtli ika lino melak patioj niman okitlali ipan itlalkon (Mat. 27:59-61; Mar. 15:46, 47; Luc. 23:53, 55, TNM; Juan 19:38-40). San se tlakatl noteneua ika okipaleui, niman yejuin katka Nicodemo akin okuajkuik ajuiyalistli tlen kitlaliliskiaj itlalnakayo Jesús. Pampa tikmatstokej ika yejuin omemej tlakamej uejueyixtoyaj, uelis tiknemiliskej ika xyejuamej okejkuanijkej itlalnakayo Jesús. Uelis okichiujkej ika seki intekitkauan makejkuanikan niman makitokakan. Maski san kenon, okichiujkej se ueyi tekitl. Akin kikitskiaya se mijkatsintli notsokuilouaya niman xok ueliskia kiueyichiuas toTajtsin chikome tonajli, niman nochi tlen yejua kikitskiskia nochiuaskia tsokuiltik (Núm. 19:11; Ageo 2:13). Tla ijkon nemiskiaj, xkipiaya ika nonisiuiskiaj yejon semana ijkuak nochiuaskia Pascua niman kinopolouiliskiaj nochi iluitl (Núm. 9:6). Pampa okitokak Jesús, oksekimej noijki ueliskiaj kipijpinaujtiskej José. San ika, aman, yejua okinek kiselis tlen xkuajli kichiuiliskiaj pampa okitokak Jesús ken kinamiki niman pampa okiteititi ika yejua inomachtijkauj katka.

Sakin ika okitokakej Jesús, Biblia xok oksejpa kiteneua José akin ualeua Arimatea, yejuin kichiua matotlajtoltikan: “¿Kenon otlamito inemilis?”. Tlen yemelak, xtikmatij. San ika, itech nochi tlen nikan yonoitak, uelis tikneltokaskej ika okiteijli ika yejua kichiuaya ken Cristo. Kuajli tikmatij pampa ijkuak panotoya tlen ouijtika niman okitlatlatakej, itlaneltokil niman iyolchikaualis xtemouaya, yej ueyixtiaya. Yejuin techtlanemiltia tlen kuajli itech yejua.

Inemilis José kichiua matotlajtoltikan: ¿Onka itlaj, itech ken techtlakaitaj, totekiyo, tlen tikpiyaj, tochanejkauan, noso hasta ika xtiknekij matechtsakuakan, tlen melak matiktlasojtlakan xijkon ken touikaskej iuan Jehová?