1, 2. a) ¿Ipan tlen tekitl onosentemakak Jesús, niman tleka? b) ¿Tlenon techpaleuis kuajli matikchiuakan totekiyo ken itekipanojkauan toTajtsin?

JESUCRISTO katka se kojxinketl niman noijki se temachtijketl akin kiteijliaya kuajli tlajtoltin (Mar. 6:3; Juan 13:13). Yejua melak kuajli kichiuaya yejon ome tekitl. Kimatstoya kenon kitekitiltis yejon tlen ika kojximaya niman ijkon kichijchiuas tlen oksekimej ueliskiaj kitekitiltiskej. Noijki melak miyek kimatstoya itech iTlajtol toTajtsin, niman kitekitiltiaya yejon niman ijkon kinpaleuis tlaltikpakchanejkej makasikamatikan tlen melauak itech toTajtsin (Mat. 7:28; Luc. 24:32, 45). Ijkuak okajxilti 30 xiuitl, okikajkauj ika tekiti ken kojxinketl niman opeuj temachtia itech itekiuajyo toTajtsin. Kimatstoya ika yejon tlen nonekiya kichiuas, pampa okijto ika yejon tlen ika toTajtsin okuajtitlanka ipan tlaltikpaktli (Mat. 20:28; Luc. 3:23; 4:43). Jesús nochipa otenojnots, niman yejua kinekiya ika oksekimej noijki ijkon makichiuakan (Mat. 9:35-38).

² Timiyekej xtikojxinkej, san ika, tinochimej titenojnotsaj niman titemachtiaj kuajli tlajtoltin. ToTajtsin noijki kichiua yejuin tekitl pampa melak ueyi kijtosneki. Niman, Biblia kijtoua ika tejuamej “tiitekipanojkauan toTajtsin” (1 Cor. 3:9, TNM; 2 Cor. 6:4). Tikmatstokej ika yemelak tlen okijto salmista ijkuak okijto: “Tlen kipiya motlajtol melauak” (Sal. 119:159, 160). Ika yejon, tiknekij melak kuajli tiktekitiltiskej iTlajtol toTajtsin ijkuak tontenojnotsaskej (xpoua 2 Timoteo 2:15). Kuakon, noneki matokojtilikan niman kuajli matiktekitiltikan Biblia, pampa yejuin tlen melak tiktekitiltiaj ijkuak titemachtiaj tlen melauak itech Jesús, Jehová niman iTekiuajyo. Ikalpan toTajtsin  yotechmakak tlen ika titemachtiaj. Niman tejuamej noneki kuajli matikmatikan kenon tikintekitiltiskej.

3. a) ¿Tlenon noneki tikchiuaskej ijkuak tontenojnotsaskej? b) Itech tlen kijtoua Hechos 13:48, ¿akinomej noneki tikintejtemoskej?

³ Kanaj timotlajtoltia tleka yejon tlen techmaka ikalpan toTajtsin itoka tlen ika titemachtiaj niman xitoka tlen ika titenojnotsaj. Ijkon itoka pampa “titenojnotsas” kijtosneki tikteijlis kuajli tlajtoltin. San ika, “titemachtis” kijtosneki tiktetomilis niman ijkon yejon tlaltikpakchane makasikamati tlen kikaki niman makichiua tlen nomachtia. Yejuin tlaltikpaktli tlen xkuajli xok uejkauis, ika yejon, noneki tokojtiliskej tikinmachtiskej tlaltikpakchanejkej niman tikimititiskej tlen melauak. Yejuin kijtosneki ika noneki tikintejtemoskej akin melauak kinekij “kipiyaskej nemilistli tlen xkeman tlamis” niman noneki tikinpaleuiskej makitekichiuilikan Jehová (xpoua Hechos 13:44-47; Hechos 13:48, TNM). *

4. ¿Kenon uelis tikiminextiskej akin melauak kinekij “kipiyaskej nemilistli tlen xkeman tlamis”?

⁴ ¿Kenon uelis tikiminextiskej akin melauak kinekij “kipiyaskej nemilistli tlen xkeman tlamis”? Ijkon ken ipan kachtopa siglo, san uelis tikiminextiskej tla titenojnotsaj. Ika yejon, noneki tikintejtemoskej ipan nochi uejueyimej kalpamej ijkon ken Jesús otechnauati (Mat. 10:11, TNM). Tikmatstokej ika xtechkakiskej akin xyolyemankej, akin noueyimatij noso akin xkinekij kixmatiskej toTajtsin. Tikintejtemouaj akin kipiyaj kuajli inyojlo, akin yolyemankej niman akin kinekij kixmatiskej tlen melauak. Noijki tikchiuaj ken yeuejkaui kichiuaya Jesús ijkuak kojxinketl katka. Yejua kachtopa kitaya katlejua kojtli kitekitiltis niman ijkon kichijchiuas se puerta, se yugo noso okse itlaj. Ijkuak kinextiaya, aman yejua kuajli kitekitiltiaya yejon tlen ika kojximaya. Ijkon tej, tejuamej kachtopa tikintejtemouaj tlaltikpakchanejkej akin kipiyaj kuajli inyojlo, niman sakin kuajli tiktekitiltiaj tlen tikpiyaj niman ijkon tikinpaleuiyaj manochiuakan inomachtijkauan Jesús (Mat. 28:19, 20, TNM).

5. Xkijto ika se neskayotl tleka noneki tikmatiskej kenon tiktekitiltiskej nochi tlen ika titemachtiaj. (Xkita tlaixkopinaltin kampa peua tlen tomachtijtokej).

⁵ Ijkuak itlaj tiknekij tikchiuaskej tikitaj katlejua tlemach tiktekitiltiskej. Matiknemilikan yejuin, Jesús kitaya tlenon kitekitiltis ijkuak kojximaya. * Seki tlemach ika kitemachiuaya noso ika kineskayotiaya madera, okseki ika kitekiya, ika kikoyoniaya noso ika kikualtsintiliaya. Okseki ika kinmelajkatelketsaya, kinyektlaliaya noso ika kinpepechouaya. Noijki ijkon, nochi yejon tlen ika titemachtiaj noijki kipiya kemanon tiktekitiltiskej. Kuakon, matikitakan kenon tikinkuiskej.

6, 7. a) ¿Kenon yotikintekitilti amatsitsintin tlen tetitlanij jw.org? b) ¿Tlenon ika tikintekitiltiaj tenotsalistin itech tlanechikoltin?

⁶ Amatsitsintin tlen tetitlanij jw.org. Maski melak pitentsitsintin, melak techpaleuiyaj ika tlaltikpakchanejkej matechixmatikan niman noijki kintitlani ipan jw.org. Ompa yejuamej uelis okseki kitaskej totechkopa niman hasta uelis kitlajtlaniskej makinmachtikan itech Biblia. Hasta aman, ipantsin 400,000 tlaltikpakchanejkej yokitlajtlankej ipan jw.org makinmachtikan itech Biblia. ¡Mojmostla miyekej kitlajtlantokej! Nochipa matikimitkitinemikan yejuin amatsitsintin niman ijkon tikintemakaskej ijkuak tonojnotsaskej imiuan oksekimej tlaltikpakchanejkej.

⁷ Tenotsalistin. Yejuin amatsitsintin kinnotsaj tlaltikpakchanejkej mauiyan totlanechikoluan. Ompa kijtoua: “Timitsnotsaj xmomachti Biblia iuan iteixpantijkauan Jehová”. Sakin, kijtoua ika uelis nomachtis ipan totlanechikoluan noso ika yakaj uelis kimachtis. Kuakon, yejuin tenotsalistli kichiua ika tlaltikpakchanejkej  matechixmatikan, niman kinyolchikaua akin kinekij nomachtiskej, touan manomachtikan Biblia (Mat. 5:3, TNM). Melauak ika tlaltikpakchanejkej uelis uajlaskej ipan totlanechikoluan maski tla xtouan nomachtiaj. Tla yejuamej uajlauej, kitaskej ika melak miyek ueliskej itech Biblia.

8. ¿Tleka melak noneki ika tlaltikpakchanejkej mauajlakan maski san sejpa ipan totlanechikoluan? Xkijto se neskayotl.

⁸ Melak noneki ika nochipa matikimijlikan tlaltikpakchanejkej mauajlakan maski san sejpa ipan totlanechikoluan. ¿Tleka? Pampa tla uajlauej, kitaskej ika akin tiiteixpantijkauan Jehová titemachtiaj tlen melauak itech Biblia niman ika tikinpaleuiyaj tlaltikpakchanejkej makixmatikan toTajtsin. Kema, kitaskej ika tejuamej xtikchiuaj ken tlaneltokiltin tlen xmelajkej (Is. 65:13). Yejon tlen inpan onochiuj Ray niman isiuauj Linda, akin ualeuaj Estados Unidos. Yejuamej tlaneltokayaj itech toTajtsin niman kinekiyaj kuajli kixmatiskej. Kuakon, opeujkej yauej ipan nochi teopantin tlen onkatkaj kampa chantij. Onkatkaj miyek teopantin niman tlaneltokiltin. Achtopa yotlajtokaj ika nonekiya kitaskej ome tlemach ipan teopantin niman ijkon uelis kitlapejpeniskej kanon nokauaskej. Kachtopa, nonekiya ueliskej itlaj ijkuak kinmachtijtoskej. Niman ika ome, akin ompa nosentlaliskej, nonekiya notlakentiskej ijkon ken akin kiueyichiuaj toTajtsin. Opanok seki xiujtin, yoyajkaj ipan nochi teopantin tlen onkatkaj kampa chantij. Yejuamej xkuajli nomachiliayaj pampa xitlaj ouelkaj niman pampa akin ompa nosentlaliayaj xnotlakentiayaj ken akin kiueyichiuaj toTajtsin. Ijkuak ouajkiskej ipan teopan kampa sa ika tlami oyajkaj, Linda otekipanoto niman Ray oyaj ichan. San ika, kampa opanok Ray onkatka se Kajli Kampa nosentlaliaj iTeixpantijkauan Jehová niman okinemili: “¿Tleka xnikalaki niman nikita tlenon kichiuaj?”. Kuakon, okalak niman melak okuelitak. Nochimej akin ompa nemiyaj melak kuajli okiselijkej niman okitak ika ken notlakentiayaj kiteititiaya ika kiueyichiuayaj toTajtsin. Ray onotlali tlayekapan niman melak okuelkak tlen okikak. Ray ipan onochiuj ijkon ken okijto Pablo, itlatitlankauj Cristo, itech kenon kuajli nomachilia akin kachtopa yauj ipan se tlanechikojli niman kijtoua: “Dios melauak nemotsajlan nemi” (1 Cor. 14:23-25). Ipan yejon tonajli ika tlayekapan, Ray opeuj yauj nochi domingos ipan tlanechikojli. Niman sakin opeuj yauj ipan nochi tlanechikoltin tlen nochiua itlajkotian semana. Linda noijki opeuj iuan yauj. Niman maski ikipiayaj ipantsin 70 xiuitl, opeujkej kinmachtiaj niman onoapolaktijkej.

9, 10. a) ¿Tleka xouijtika tikintekitiltis amatlajkuiloltin pitentsitsintin? b) Xkijto kenon uelis tiktekitiltiskej amatlajkuilojli pitentsin ¿Tlenon kijtosneki iTekiuajyo toTajtsin?

⁹ Amatlajkuiloltin pitentsitsintin. Tikpiyaj chikueyi amatlajkuiloltin pitentsitsintin. Xouijtika tikintekitiltis, niman melak techpaleuiyaj ika matipeuakan matikinnojnotsakan tlaltikpakchanejkej. Yejuin amatlajkuiloltin okiskej ipan 2013 niman yonochijchiujkej kanaj 5 mil millones. Yejuin amatlajkuiloltin nochi san noijki ken notekitiltiaj. Kuakon, ijkuak tiuelij tiktekitiltiaj se, xtechtekiyomaka tikintekitiltiskej yejon okseki. ¿Kenon uelis tikintekitiltis niman ijkon tipeuas tiknojnotsas se tlaltikpakchane?

¹⁰ Matiknemilikan ika tiknekij tiktemakaskej amatlajkuilojli pitentsin tlen itoka ¿Tlenon kijtosneki iTekiuajyo toTajtsin? Uelis tikititiskej tlaltikpakchane tlen ixpan uajnestiuj niman tikijliskej: “¿Kemantika yotimotlajtoltijka tlenon kijtosneki iTekiuajyo toTajtsin? Itech yejuin yeyi tlanankilistin tlen nikan uajnestiuej, ¿katlejua tiknemilia kijtosneki iTekiuajyo toTajtsin?”. Maka matikijlikan tla kuajli noso xkuajli ken otlanankili, matiktlapokan yejon amatlajkuilojli niman matikititikan kampa kijtoua “Tlen Biblia kijtoua” niman matikpouakan Daniel 2:44 niman Apocalipsis 11:15, tlen ompa ijkuiliujtokej. Tla tiuelij, iuan matonojnotstokan. Tla yotitlankej, matikititikan tlajtoltilistli tlen uajnestiuj ikuitlapan yejon amatlajkuilojli pitentsin, kampa kijtoua “Xmotlajtolti”: “¿Kenon tinemiskej ijkuak  tlayekanas iTekiuajyo toTajtsin?”. Tla ijkon tikchiuaj, okse tonajli uelis iuan tonojnotsaskej. Ijkuak oksejpa iuan titlajtoskej, uelis iuan tikitaskej tlamachtijli 7 itech amatlajkuilojli ¡ToTajtsin techijlia tlen kualtsin!, yejuin amatlajkuilojli techpaleuiya matipeuakan matitemachtikan.

11. ¿Tleka ikalpan toTajtsin kinchijchiua revistas, niman tlenon noneki tikmatiskej itech yejon revistas?

¹¹ Revistas. Amatl Tekakistilijketl niman ¡Despertad! miyekan notemakaj ipan tlaltikpaktli niman notlajtolkuepaj ika miyek tlajtoltin. Melak miyekej kinpouaj yejuin revistas, ika yejon, ikalpan toTajtsin kuajli kita tlenon uajnesis ixpan revista pampa kineki ika tlaltikpakchanejkej makinyoltilana tlen ompa ijkuiliujtika. Noneki kuajli tikintekitiltiskej yejuin revistas niman ika yejuin tikinpaleuiskej tlaltikpakchanejkej makitejtemokan tlen ueyi kijtosneki ipan yejuin tonaltin. San ika, kachtopa noneki tikmatiskej katlejua revista noneki tijkauiliskej se tlaltikpakchane.

12. a) ¿Akinomej okinchijchiuilijkej revista ¡Despertad!, niman tleka? b) Xkijto seki tlen kualtsin mopan yonochiuj ijkuak otiktemakak yejuin revista.

¹² Revista ¡Despertad! okinchijchiuilijkej tlaltikpakchanejkej akin achijtsin noso xtlaj kimatij itech Biblia. Kanaj xkimatij tlen titemachtiaj akin tikchiuaj ken Cristo, kanaj xkinekij nemiskej ipan se tlaneltokijli, noso kanaj xkimatij ika Biblia uelis kinpaleuis ipan innemilis. Ika yejuin revista, ikalpan Jehová kineki kimititis ika toTajtsin yemelak nemi (Rom. 1:20; Heb. 11:6). Yejuin revista, noijki kinpaleuiya makineltokakan ika Biblia yejua iTlajtol toTajtsin (1 Tes. 2:13). Revistas ¡Despertad! itech xiuitl 2018 intoka: “El camino de la felicidad”, “12 claves para una familia feliz” niman “Ayuda para quienes están de duelo”.

13. a) ¿Akinon okinchijchiuilijkej revista Amatl Tekakistilijketl tlen tiktemakaj? b) Xkijto seki tlen kualtsin mopan yonochiuj ijkuak otiktemakak yejuin revista.

¹³ Revista Amatl Tekakistilijketl tlen tiktemakaj okinchijchiuilijkej tlaltikpakchanejkej akin kitlakaitaj toTajtsin niman kitlakaitaj iTlajtol, niman kintomilia itech tlen temachtia Biblia. Kanaj yejuamej seki kimatstokej itech Biblia, san ika, xkuajli kasikamatij tlenon temachtia (Rom. 10:2; 1 Tim. 2:3, 4). Revistas Amatl Tekakistilijketl itech xiuitl 2018 intoka: “¿Ok tepaleuiya tlen kijtoua Biblia?”, “¿Tlenon panos ika tlayekapan?” niman “¿Najmana toTajtsin mopampa?”.

14. a) ¿Kenon techpaleuiya yejon naui videos tlen tiknextiaj ipan tlen ika titemachtiaj? b) Xkijto seki tlen kualtsin mopan yonochiuj ijkuak otikinteititi yejuin videos.

¹⁴ Videos. Ijkuak Jesús nemiya ipan tlaltikpaktli, kojxinkej xkikuiyaj tlemach tlen kitekitiltiaya electricidad. Ipan yejuin tonaltin, kojxinkej kitekitiltiaj sierra mecánica, taladro, lijadora niman clavadora. Noijki ijkon, tejuamej xsan tikinpiyaj amatlajkuiloltin, noijki tikinpiyaj kualtsitsintin videos. Itech tlen ika titemachtiaj, tikpiyaj yejuin naui videos: ¿Tleka noneki timomachtis Biblia?, ¿Kenon nochiua se tlamachtijli itech Biblia?, ¿Tlenon nochiua kampa tosentlaliaj? niman ¿Akinomej tiiteixpantijkauan Jehová? Videos tlen xpanoua ome minutos ika uejkauij uelis tikinteititiskej ijkuak kachtopa imiuan tonojnotsaskej tlaltikpakchanejkej. Videos tlen uejkauij uelis tikinteititiskej ijkuak oksejpa tikomintlajpaloskej tlaltikpakchanejkej, niman noijki uelis tikimititiskej akin kipiyaj tiempo. Yejuin videos melak kualtsitsintin pampa kinyolchikaua manomachtikan Biblia niman mauiyan tlanechikoltin.

15. Xkijto tlenon kualtsin panoua ijkuak tlaltikpakchanejkej kitaj videos ika intlajtol.

¹⁵ Matikitakan tlenon kualtsin panoua ijkuak tlaltikpakchanejkej kitaj videos ika intlajtol. Se tokniuj okinexti se siuatl akin ualeuaya Micronesia niman akin tlajtouaya yapés. Tokniuj siuatl okititi video ¿Tleka noneki timomachtis Biblia? ika tlajtojli yapés. Ijkuak yejuin video opeuj, yejon siuatl otsajtsik: “¡Xueli nikneltoka, onka ika notlajtol! Yejon tlakatl akin tlajtotika kakisti ika ualeua kampa nejua niualeua.  ¡Tlajtoua notlajtol!”. Sakin ijkuak otlan video, yejua okijto ika kipouaskia niman kitaskia nochi tlen onka ipan jw.org ika yapés (uelis tikitas Hechos 2:8, 11). Matikitakan tlenon ipan onochiuj se tokniuj siuatl akin ualeua Estados Unidos. Yejua okitlajkuilouili isobrino akin chanti okse país niman okijkuilouili kampa uelis kitas yejon video ika itlajtol. Isobrino okitak video niman okititlanili se correo kampa kijliaya: “Melak onechmojkatlachialti ijkuak ipan video onoijto ika se espíritu tlen xueli tikitaj, tlen kipiya kojtilistli niman xyolkuajli, yejua akin kiyekana yejuin tlaltikpaktli. Yoniktlajtlan manechmachtikij itech Biblia”. Yejuin tlakatl chanti ipan se país kampa xtechkauiliaj matitenojnotsakan.

16. Xkijto kenon techpaleuiyaj yejuin amatlajkuiloltin: a) Xkaki toTajtsin niman tinemis nochipa. b) ¡ToTajtsin techijlia tlen kualtsin! c) ¿Akinomej kichiuaj tlen kineki Jehová ipan yejuin tonajli?

¹⁶ Amatlajkuiloltin. Tla yakaj xueli amapoua noso xkipiya amatlajkuiloltin ika itlajtol, ¿kenon uelis tikmachtiskej tlen melauak? Tikpiyaj se amatlajkuilojli tlen melak kuajli techpaleuiya, itoka: Xkaki toTajtsin niman tinemis nochipa. * Amatlajkuilojli ¡ToTajtsin techijlia tlen kualtsin! noijki techpaleuiya matipeuakan matikinmachtikan tlaltikpakchanejkej. Uelis tikimititiskej yejon 14 tlamachtiltin tlen uajnesij ikuitlapan, niman uelis tikintlajtoltiskej katlejua kuelitaskiaj kimatiskej. Kuakon, uelis tikinmachtiskej ipan yejon tlamachtijli. ¿Yotikyejyeko tikchiuas yejuin ijkuak oksejpa tikomintlajpaloua tlaltikpakchanejkej? Tikpiyaj okse amatlajkuilojli tlen itoka ¿Akinomej kichiuaj tlen kineki Jehová ipan yejuin tonajli? Yejuin amatlajkuilojli techpaleuis matikinmachtikan tlaltikpakchanejkej makixmatikan kenon tekiti ikalpan toTajtsin. Tla tiknekij tikmatiskej kenon tiktekitiltiskej, uelis tikitaskej amatlajkuilojli Tlen tomachtiskej niman tlen notekitiltis itech marzo 2017, tlen otikitakej ipan tlanechikojli Nemilistli niman Tekitl ken Cristo.

17. a) ¿Kenon techpaleuiyaj amoxtin tlen ika titemachtiaj? b) ¿Tlenon noneki kichiuaskej akin noapolaktiaj, niman tleka?

¹⁷ Amoxtin. Tla yakaj yopeuj tikmachtiaj ika se amatlajkuilojli, san kemanon uelis tipanoskej ipan amoxtli ¿Tlenon melauak temachtia Biblia? Yejuin amoxtli kipaleuis makasikamati tlen Biblia temachtia. Tla yotlan nomachtia yejon amoxtli niman nokojtilia kichiuas tlen nomachtijtok, kuakon, uelis iuan tomachtiskej amoxtli Nochipa xnemikan itech itlasojtlalis toTajtsin. Yejuin amoxtli kimachtis makintlakamati itlajtolyekanalisuan Biblia. * Maka matikilkauakan ika maski tla yejua noapolaktia, ok nonekis manomachti yejuin ome amoxtli hasta tlamis. Yejuin kipaleuis matlaneltoka itech Jehová niman maka keman makikaua (xpoua Colosenses 2:6, 7).

18. a) Itech tlen kijtoua 1 Timoteo 4:16, ¿tlenon kipiya ika tikchiuaskej, niman tlenon uelis panos? b) ¿Tlenon noneki tikilnamikiskej ijkuak tiktekitiltiskej yejon tlen ika titemachtiaj?

¹⁸ Akin tiiteixpantijkauan Jehová, kipiya ika tikimititiskej tlaltikpakchanejkej “on melauak kuajli tlajtojli”. Yejuin uelis kichiuas ika yejuamej makipiyakan se nemilistli tlen xkeman tlamis (Col. 1:5; xpoua 1 Timoteo 4:16). Ikalpan toTajtsin, yotechmakak tlen ika titemachtiaj niman ijkon tikchiuaskej yejuin tekitl (xkita recuadro tlen itoka “ Tlen ika titemachtiaj”). Melak kuajli matikintekitiltikan yejuin tlen yotechmakakej. Toseselti akin titenojnotsaj, uelis tikijtoskej katlejua tiktekitiltiskej niman kemanon tiktekitiltiskej. Matikilnamikikan ika tejuamej xsan tikinxejxelouaj amatlajkuiloltin. Noijki xkipiya ika tikinmakaskej tlaltikpakchanejkej akin xkinekij techkakiskej. Matikilnamikikan ika tiknekij tikinmachtiskej akin kipiyaj kuajli inyojlo, akin yolyemankej niman akin kinekij kixmatiskej tlen melauak. Kema, akin melauak kinekij “kipiyaskej nemilistli tlen xkeman tlamis” (Hech. 13:48; Mat. 28:19, 20, TNM).