1. ¿Kenon tikmatstokej ika tinemij ipan sa ika tlami “itlamiyan tonaltin”?

¿OTITLAKAT ijkuak yopanoka xiuitl 1914? Tla kema, kuakon yotinen nochi monemilis ipan “itlamiyan tonaltin” (2 Tim. 3:1, TNM). Tinochimej yotijkakej ipan noticias kenon nochiujtika tlen Jesús okijtoka nochiuas: onka guerra, apistli, miyek kokolistli, miyekan tlalolini, yomiyekiyak tlen xkuajli niman kintlaueltokaj tokniuan (Mat. 24:3, 7-9, 12; Luc. 21:10-12). Noijki yotikitakej tlenon kichiuaj miyekej tlaltikpakchanejkej ipan yejuin tonaltin, yejuamej kichiuaj ken okijto apóstol Pablo (xkita recuadro “ Tlen aman miyekej kichiuaj”). Tejuamej akin tiitekipanojkauan Jehová kuajli tikmatstokej ika tinemij ipan sa ika tlami “itlamiyan tonaltin” (Miq. 4:1, TNM).

2. ¿Tlenon noneki tiknankiliskej?

² Pampa desde 1914 hasta aman yopanok miyek tiempo, uelis tikijtoskej ika tinemij ipan sa ika tlami “itlamiyan tonaltin”. Sa achijtsin poliui ijkuak kipopoloskej nochi tlen xkuajli tlen onka ipan yejuin tlaltikpaktli, ika yejon, noneki tiknankiliskej yejuin: ¿Tlenon nochiuas ipan sa ika tlami “itlamiyan tonaltin”? Niman ¿tlenon kineki Jehová matikchiujtokan?

3. Ken kijtoua 1 Tesalonicenses 5:1-3, ¿tlenon kijtoskej tekiuajkej?

³ (Xpoua 1 Tesalonicenses 5:1-3). Pablo kiteneua “on tonajli ijkuak uajlas toTEKO [noso ika yejkos ‘itonal Jehová’, TNM]”. “Itonal Jehová” peuas ijkuak kixnamikiskej “on ueyixtikaj  Babilonia”, tikinteneujtokej nochi religiones tlen xmelajkej, niman tlamis ijkuak peuas Armagedón (Apoc. 16:14, 16; 17:5). Achto ika peuas yejon “tonajli”, tekiuajkej kijtoskej: “Onkaj yolseuilistli niman xakaj nion itlaj uelis techmiktis”. Sekimej tekiuajkej kemantika kiteneuaj yejuin ijkuak kijtouaj kenon países ueliskej más kuajli nouikaskej. * San ika, yejon tlajtoltin tlen kijtoua Biblia niman tlen kijtoskej tekiuajkej melak tlamantik yes. ¿Tleka? Ijkuak tekiuajkej kijtoskej yejon tlajtoltin, miyekej kineltokaskej ika tekiuajkej yemelak yokichiujkej maonia yolseuilistli ipan tlaltikpaktli. San ika, “nimantsin uajlas tlaxoxotonilistli” pampa peuas ueyi tlajyouilistli (Mat. 24:21).

4. a) ¿Tlenon xtikmatij ijkuak noijtos “onkaj yolseuilistli niman xakaj nion itlaj uelis techmiktis”? b) ¿Tlenon kema tikmatstokej itech yejon?

⁴ Tikmatstokej seki tlen nochiuas ijkuak tekiuajkej kijtoskej: “Onkaj yolseuilistli niman xakaj nion itlaj uelis techmiktis”. San ika, seki tlemach xtikmatij. Xtikmatij tlenon kichiuas ika tekiuajkej makijtokan yejuin tlajtoltin niman xtikmatij kenon kichiuaskej. Noijki xtikmatij tla tekiuajkej san sejpa kijtoskej yejuin tlajtoltin noso tla miyekpa kijtoskej. Maski san kenon, onka itlaj tlen kema tikmatstokej: ika xtokauiliskej matechkajkayauakan niman ika xtikneltokaskej tla tekiuajkej kichiuaskej maonia yolseuilistli ipan nochi tlaltikpaktli. Tikasikamatiskej ika yejon tlen Biblia yokijtoka panoskia. Yejon techititis ika ipeuas “itonal Jehová”.

5. ¿Kenon techpaleuiya 1 Tesalonicenses 5:4-6 matitlatlachixtokan ijkuak yejkos “itonal Jehová”?

⁵ (Xpoua 1 Tesalonicenses 5:4-6). Pablo techijlia tlenon noneki tikchiuaskej niman ijkon titlatlachixtoskej ijkuak yejkos “itonal Jehová”. Xkipiya ika tikochiskej “ken oksekimej”, yej noneki titlatlachixtoskej. Se neskayotl, noneki totlajpiyaskej maka tokalaktiskej ipan política pampa ijkon xok timelajkanentoskiaj itech Jehová. Tla tokalaktiaj ipan política, kuakon, tikchiujtoskiaj “ken on tlaltikpaktlakamej” akin xtlaneltokaj itech toTajtsin (Juan 15:19). Tikmatstokej ika san iTekiuajyo toTajtsin uelis kichiuas maonia yolseuilistli ipan tlaltikpaktli.

6. ¿Tlenon tiknekij tikchiuaskej inpampa tlaltikpakchanejkej, niman tleka?

⁶ Xsan tejuamej tiknekij titlatlachixtoskej, noijki tiknekij tikinpaleuiskej oksekimej tlaltikpakchanejkej “matlatlachiakan”, kijtosneki, tikinpaleuiskej makimatikan tlenon kijtoua Biblia ika ipan nochiuas yejuin tlaltikpaktli. Matikilnamikikan ika, tla yopeuj “on temojtij tlajyouilistli” noso ueyi tlajyouilistli, tlaltikpakchanejkej xok ueliskej nonisiuiskej itech Jehová. Yejua ika, melak noneki matitenojnotsakan. *

7. ¿Tlenon kichia Jehová matikchiujtokan?

⁷ Aman ika sa achijtsin poliui ika yejkos “itonal Jehová”, yejua kichia matitenojnotstokan. Noneki tikitaskej tla nochipa tikchiujtokej “itekiu toTEKO” (1 Cor. 15:58). Ijkuak Jesús okijto tlenon panotoskia ipan itlamiyan tonaltin, noijki okijto tlenon tikchiujtoskiaj akin tiktekichiuiliaj toTajtsin. Okijto: “On kuajli tlajtojli yejuan kiteijlia ken Dios temakixtia achtoj noteijlis nochiuiyan ipan nochi naciones” (Mar. 13:4, 8, 10; Mat. 24:14, TNM). San xkonnemili: ijkuak tontenojnotsaj, titlapaleuijtokej ika manochiua yejuin teotlajtojli.

8. ¿Tleka tikijtouaj ika yotimiyekiyakej akin titenojnotsaj?

⁸ Nochi xiujtin melak miyekej tlaltikpakchanejkej kikakij tlen kichiuas iTekiuajyo toTajtsin. Matikitakan kenon yotimiyekiyakej akin titenojnotsaj ipan yejuin “itlamiyan tonaltin”. Ipan 1914, nemiyaj 5,155 tokniuan akin tenojnotsayaj ipan 43 países. Niman aman, tinemij kanaj 8,500,000 akin titenojnotsaj ipan 240 países. Maski ijkon, totekiyo xitlami. Ok noneki matikteijlitokan ika san iTekiuajyo toTajtsin uelis kipopolos nochi tlen xkuajli tikixnamikij (Sal. 145:11-13).

9. ¿Tleka noneki ok matitenojnotstokan itech iTekiuajyo toTajtsin?

⁹ Ok titenojnotstoskej hasta ijkuak Jehová kijtos ika xok tikchiuaskej yejuin tekitl. ¿Kech tiempo kipiyaj tlaltikpakchanejkej niman ijkon ueliskej kixmatiskej Jehová niman Jesucristo? (Juan 17:3). Yejon xtikmatij. San ika, kema tikmatstokej ika aman ika xipeua “on temojtij tlajyouilistli”, nochimej akin kinekij kipiyaskej nemilistli tlen xkeman tlamis uelis kikakiskej tlen tikteijliaj (Hech. 13:48). ¿Kenon uelis tikinpaleuiskej yejuin tlaltikpakchanejkej aman ika ok ueli?

10. ¿Kenon techpaleuiya Jehová niman ijkon matitemachtikan tlen melauak?

¹⁰ Itechkopa ikalpan, Jehová techmakatika nochi tlen noneki niman ijkon matitemachtikan tlen melauak. San matikonnemilikan yejuin, ipan tlanechikojli tlen tikpiyaj ipan semana, Jehová techmachtia kenon titemachtiskej. Ompa tiuelij tlenon tikijtoskej ijkuak tipeuaskej tonojnotsaskej iuan yakaj niman ijkuak oksejpa tontetlajpaloskej. Ompa noijki tiuelij kenon titemachtiskej. Ikalpan Jehová noijki yotechmakak tlen ika titemachtiaj. Yejuin techpaleuiya:

• matipeuakan matonojnotsakan iuan yakaj,

• makinekikan oksejpa techkakiskej akin tikinnojnotsaj,

•   makinekikan okseki tlemach kimatiskej,

• matikteititikan tlen melauak ijkuak tontemachtiaj niman

• matikimijlikan akin kuajli techkakij ika makitakan página tlen tikpiyaj ipan Internet niman mauiyan kampa tosentlaliaj.

Yemelak, aman noneki tiktekitiltiskej nochi tlen techmakatika ikalpan Jehová. * Matiknemilikan yejuin, tla tijkauiliaj se tratado noso se revista akin kuajli iuan yotonojnotskej, yejua kipiyas tlen uelis kipoujtias hasta ijkuak oksejpa uelis iuan toitaskej. Toseselti noneki tikitaskej tla titenojnotstokej nochi metstin.

11. ¿Tleka ikalpan toTajtsin yokitlali ipan Internet kampa tlaltikpakchanejkej ueliskej nomachtiskej Biblia?

¹¹ Jehová noijki kikuitok okse itlaj niman ijkon kinpaleuis tlaltikpakchanejkej makixmatikan tlen melauak. Ipan jw.org, ikalpan toTajtsin yokitlali kampa uelis Timomachtis Biblia ipan Internet. * ¿Tleka onochijchiuj yejuin? Nochi metstin, miyekej kitejtemouaj ipan Internet kenon nomachtiskej Biblia. Tlamachtiltin tlen yotiktlejkoltijkej ipan Internet uelis kinpaleuis makixmatikan tlen melauak itech iTlajtol toTajtsin. Sekimej akin tikinnojnotsaj kanaj xsajnoye kinekij ika yakaj makinmachti Biblia. Kuakon, uelis tikimititiskej yejuin tlamachtiltin tlen tikpiyaj ipan Internet noso uelis tikimintitlaniliskej kampa uelis kitlaposkej yejuin página.

12. ¿Tlenon tiuelis ijkuak Timomachtis Biblia ipan Internet?

¹² Yejuin yenkuik tlen onka ipan Internet tlajtoua itech Biblia niman itech akin okichijchiuj. Noijki kinteneua tlakamej niman siuamej akin yeuejkaui onenkej niman kiteititia tlen kualtsin nochiuas ika tlayekapan. Ijkuak se nomachtia Biblia ipan Internet, ueli:

• kenon techpaleuiya Biblia,

• akinomej Jehová, Jesús niman iluikaktekitkej,

• tleka otexchijchiuj toTajtsin niman

• tleka titlajyouiyaj niman tleka onka tlen xkuajli.

Noijki se uelis nomachtis:

• tlenon kichiuas Jehová niman ijkon kipopolos nochi tlajyouilistli iuan mikilistli,

• kenon oksejpa kinkuiteuas akin yomijkej niman

• kenon toTajtsin ika iTekiuajyo kinkixtis tekiuajkej akin xtepaleuiyaj.

13. Tla yakaj tlami nomachtia tlen yotiktlejkoltijkej ipan Internet, ¿ok noneki yakaj makimachti?

¹³ Tla yakaj tlami nomachtia tlen yokitlejkoltijkej ipan Internet, xkijtosneki tla xok noneki yakaj makimachti. Jesús yotechnauatij matikinpaleuikan tlaltikpakchanejkej manochiuakan inomachtijkauan. Tiknekij ika miyekej manomachtikan tlen yotiktlejkoltijkej ipan Internet, makipatiojkaitakan tlen nomachtijtiuej niman makinekikan okseki kimatiskej. Tla ijkon panoua, kanaj kinekiskej ika yakaj makinmachti itech Biblia. Ijkuak yakaj tlami se tlamachtijli itech tlen yotiktlejkoltijkej ipan jw.org, uajnesi ipan página kampa yejua uelis kitlajtlanis yakaj makimachtiti. Mojmostla, 230 tlaltikpakchanejkej kitlajtlanij makinmachtikan itech Biblia. Melak noneki ika yakaj makinmachtiti tlaltikpakchanejkej.

14. Itech tlen okijto Jesús ipan Mateo 28:19, 20, ¿tlenon tokojtiliaj tikchiuaskej, niman tleka?

¹⁴ (Xpoua Mateo 28:19, 20, TNM). * Ijkuak tikinmachtijtoskej tlaltikpakchanejkej,  noneki tokojtiliskej tikinpaleuiskej manochiuakan inomachtijkauan Jesús niman makitlakamatikan nochi tlen yejua otechnauati. Kipiya ika tikinpaleuiskej makasikamatikan ika melak noneki makitekichiuilikan Jehová. Yejuin kijtosneki ika noneki tikinyolchikauaskej makichiuakan ipan innemilis tlen nomachtijtiuej, manosentemakakan itech Jehová niman manoapolaktikan. San ijkon ueliskej makisaskej itech itonal Jehová (1 Ped. 3:21).

15. ¿Itech tlenon xtikpiyaj tiempo, niman tleka?

¹⁵ Ken yotikitakej, iajsitika tonajli ijkuak kipopoloskej nochi tlen xkuajli nochiua ipan tlaltikpaktli. Ika yejon, xtikpiyaj tiempo niman ijkon tikinmachtijtoskej akin xkinekij nochiuaskej inomachtijkauan Cristo (1 Cor. 9:26). Melak noneki matikchiuakan yejuin tekitl, pampa miyekej nemij akin noneki kikakiskej tlen kichiuas iTekiuajyo toTajtsin aman ika xiyejko itonal Jehová.

16. Ken kijtoua Apocalipsis 18:2, 4, 5, 8, ¿tlenon noneki tikchiuaskej tinochimej? (Noijki xkita nota).

¹⁶ (Xpoua Apocalipsis 18:2, 4, 5, 8). Yejuin tlaxeloltin techititiaj ika Jehová kineki okse itlaj matikchiuakan. Tinochimej akin tikchiuaj ken Cristo noneki kuajli tikisaskej itech Ueyixtika Babilonia. Kanaj miyekej akin nomachtijtokej Biblia nemiyaj ipan se religión tlen xmelauak. Kanaj yayaj ijkuak inreligión itlaj kichiuaya, kanaj ontlapaleuiayaj noso kitemakayaj tomin. Tla yakaj akin touan nomachtijtika Biblia kineki tenojnotsas, kachtopa noneki kuajli kisas itech religión tlen xmelauak. Noneki kijkuilos se carta kampa makijto ika xok teuan yes itech yejon religión tlen xmelauak noso grupo kampa nemiya. *

17. ¿Kanon xkipiya ika titekitiskej akin tikchiuaj ken Cristo, niman tleka?

¹⁷ Tinochimej akin melauak tikchiuaj ken Cristo, noneki kuajli tikitaskej ika maka tikchiujtoskej tlen kineki Ueyixtika Babilonia (2 Cor. 6:14-17). Se neskayotl, xtitekitiskej ipan se teopantli. Tla titekitij itech se patrón, xtiknekiskej titlapaleuiskej ijkuak nochiuas se ueyi tekitl ipan se teopantli noso ipan se kajli tlen itlatki se religión. Niman tla xtitekitij itech yakaj, xtiaskej intech yejuin religiones niman tikimijliskej matechtlakeuakan. Noijki xtiknekiskej imiuan titekitiskej tla kemantika techtlakeuasnekiskej. ¿Tleka melak xtiknekij imiuan titekitiskej? Pampa xtiknekij imiuan  tikchiujtoskej tlen xkuajli nion imiuan titlajtlakojtoskej. Ixpan toTajtsin, yejuamej kichiuaj tlen xchipauak (Is. 52:11). *

18. ¿Tlenon okichiuj se tokniuj ijkuak okitlajtlanilijkej matekiti ipan se teopantli?

¹⁸ Ikipiya seki xiuitl, okitlajtlanilijkej se tokniuj akin kojxinketl matekiti ipan se teopantli tlen onkatka ipan ikalpan. Akin kitlakeujtoya kimatstoya ika tokniuj miyekpa yokijlika ika xkeman tekitiskia ipan se teopantli. San ika, aman yejon tlakatl melak kinekiya ika yakaj makonchijtiuetsi yejon tekitl. Maski ijkon, tokniuj okichiuj tlen kijtoua Biblia niman xokiseli yejon tekitl. Ijkuak ouajchikueyit, se periódico okitlali se tlaixkopinajli kampa uajnesiya se kojxinketl akin kitlalijtoya se kojnepanojli ipan yejon teopantli. Tla tokniuj kiseliskia yejon tekitl, kanaj yejua akin uajnesiskia ipan periódico. San xkonnemili kenon tokniuan ipan tlanechikojli kitaskiaj yejuin tokniuj niman kenon nomachiliskia Jehová.

19, 20. a) ¿Tlenon yotiuelkej ipan yejuin tlamachtijli? b) ¿Tlenon okseki noneki matikmatikan?

¹⁹ Ken kijtouaj teotlajtoltin itech Biblia, sa achijtsin poliui ijkuak tekiuajkej kijtoskej: “Onkaj yolseuilistli niman xakaj nion itlaj uelis techmiktis”. San ika, Jehová yotechmachti ika tekiuajkej xkeman kichiuaskej maonia yolseuilistli. ¿Tlenon noneki tikchiuaskej achto ika tekiuajkej kijtoskej yejuin niman achto ika yejkotiuetsis “tlaxoxotonilistli”? Jehová kichia matitenojnotstokan itech iTekiuajyo niman matitemachtijtokan. Noijki, noneki kuajli tikisaskej itech tlaneltokijli tlen xmelauak. Yejuin kijtosneki xok titeuan yeskej itech religiones tlen xmelajkej noso grupos. Noijki xtikchiuaskej se tekitl ipampa Ueyixtika Babilonia.

²⁰ Onka okseki tlemach tlen nochiuas ipan sa ika tlami “itlamiyan tonaltin” niman noijki onka okseki tlemach tlen kichia Jehová matikchiuakan. ¿Itech tlenon titlajtotokej? Niman ¿kenon uelis toyektlalijtiaskej achto ika yejkos nochi tlen nochiuas ika tlayekapan? Tiknankiliskej yejuin ipan okse tlamachtijli.