TLAMACHTIJLI 41
Matimelajkanemikan ipan “on temojtij tlajyouilistli”
“Xtlajsojtlakan toTEKO, nochimej yejuan nenkineltokaj. ToTEKO kincuidaroua yejuan xkaman kitlalkauiyaj” (SAL. 31:23).
TLAKUIKAJLI 129 Maka matosiaujkauakan
TLEN TIKITASKEJ *
1, 2. a) ¿Tlenon ikijtoskej tekiuajkej? b) ¿Tlenon tiknankilijtoskej?
MATIKONNEMILIKAN ika tekiuajkej kemach yokonijtokej: “Onkaj yolseuilistli niman xakaj nion itlaj uelis techmiktis”. Kanaj yejon tekiuajkej melak noueyimatiskej pampa kinemiliskej ika xok nochiua tlen xkuajli ipan tlaltikpaktli. Kinekiskej techtlaneltokiltiskej ika yejuamej kimatij tlen kichiujtokej. San ika, xueliskej kiteltiskej tlen sakin nochiuas. ¿Tleka? Pampa Biblia kijtoua ika nimantsin “uajlas tlaxoxotonilistli impan yejuamej niman xuelis yejteuaskej [noso xuelis makisaskej]” (1 Tes. 5:3).
2 Yejua ika, melak noneki matikinnankilikan seki tlajtoltilistin: ¿Tlenon panos ipan “on temojtij tlajyouilistli” noso ueyi tlajyouilistli? ¿Tlenon kineki Jehová matikchiujtokan? Niman ¿kenon uelis toyektlalijtiaskej niman ijkon uelis timelajkanemiskej? (Mat. 24:21).
¿TLENON PANOS IPAN “ON TEMOJTIJ TLAJYOUILISTLI”?
3. Ken kijtoua Apocalipsis 17:5, 15-18, ¿kenon Jehová kipopolos “on ueyixtikaj Babilonia”?
3 (Xpoua Apocalipsis 17:5, 15-18). “On ueyixtikaj Babilonia” kipopoloskej. Ken yotikijtokej, tekiuajkej xueliskej kiteltiskej ijkuak panotos yejon. ¿Tleka xueliskej? Pampa “Dios sano yejua kintlalilis ipan inyojlo para kichiuaskej on tlen yejua kineki”. ¿Tlenon kineki toTajtsin? Yejua kineki kinpopolos nochi religiones tlen xmelajkej. ToTajtsin kitlalis yejuin tlanemilijli ipan inyojlo yejon “majtlaktli ikuakuauuan” tlen kipiya “on xkuajli yolki [...] chichiltik”. Yejuin “majtlaktli kuakuautli” kijtosnekij nochi yejon tekiuajkej akin kipaleuiyaj “on xkuajli yolki”, tikteneujtokej Naciones Unidas (Apoc. 17:3, 11-13; 18:8). Ijkuak yejuin tekiuajkej peuaskej kimixnamikiskej religiones tlen xmelajkej, kuakon, kijtosnekis ika ipeuas “on temojtij tlajyouilistli” noso ueyi tlajyouilistli. Yejuin nochijtiuetsis ipan nochi tlaltikpaktli niman melak temojmojti yes.
4. a) ¿Kanaj tlenon kijtoskej tekiuajkej ijkuak kimixnamikiskej religiones tlen xmelajkej? b) ¿Kanaj tlenon kichiuaskej akin nemiyaj ipan yejon religiones?
4 Xtikmatij tlenon kijtoskej tekiuajkej ijkuak kimixnamikiskej religiones tlen xmelajkej. Kanaj kijtoskej ika religiones melak nokalaktiaj ipan política niman kichiuaj ika maonia tlauejli ipan tlaltikpaktli. Noso kanaj kijtoskej ika religiones melak yonotomintijkej niman ika melak miyek tlemach kipiyaj (Apoc. 18:3, 7). Noijki, uelis tikijtoskej ika ijkuak tekiuajkej kimixnamikiskej religiones, xkijtosneki tla kinmiktiskej akin ompa nemij. Nesi ika tekiuajkej kinpopoloskej religiones. Ijkuak yejon religiones yopopoliujkej, akin ompa nemiyaj kasikamatiskej ika intlayekankauan san okinkajkayaujkej niman kanaj kijtoskej ika yejuamej xompa teuan nemiyaj.
5. ¿Tlenon yokijto kichiuas Jehová ipan “on temojtij tlajyouilistli”, niman tleka?
5 Biblia xkijtoua kech uejkauis ijkuak kipopoloskej Ueyixtika Babilonia, san ika, kema tikmatstokej ika xmelak uejkauis (Apoc. 18:10, 21). Jehová yokijto ika kichiuas maka “miyek tonaltin” mauejkaui “on temojtij tlajyouilistli” pampa kineki mamakisakan “on yejuan yokintlapejpenij” niman xkineki mapopoliui religión tlen melauak (Mar. 13:19, 20). San ika ¿tlenon kineki Jehová matikchiuakan ijkuak peuas “on temojtij tlajyouilistli” hasta ijkuak yejkos guerra tlen itoka Armagedón?
MATIKTEKICHIUILIJTOKAN JEHOVÁ
6. ¿Tlenon kichia Jehová matikchiuakan akin tiitekipanojkauan?
6 Ken otikitakej ipan tlamachtijli tlen youajpanok, Jehová kichia ika akin tiitekipanojkauan kuajli matikisakan itech Ueyixtika Babilonia. San ika, xsan yejon noneki tikchiuaskej. Noneki nochipa tiktekichiuilijtoskej toTajtsin. Matikitakan kenon uelis tikchiuaskej yejuin.
Nochipa matosentlalijtokan, maski ijkuak tikixnamikiskej tlen ouijtika. (Xkita párrafo 7). *
7. a) ¿Kenon tikteititiaj ika yemelak tiktlakamatij itlanauatiluan Jehová? b) Ken kijtoua Hebreos 10:24, 25, ¿tleka melak noneki matosentlalikan ipan yejuin tonaltin?
7 Kachtopa, noneki yemelak tiktlakamatiskej itlanauatiluan Jehová. Xuelis tikchiuaskej noso tinemiskej ken tlaltikpakchanejkej. Tejuamej tiktlauelitaj nochi auilnemilistli, noijki ijkuak se tlakatl nonamiktia iuan se tlakatl noso ijkuak se siuatl nonamiktia iuan se siuatl niman okseki tlemach tlen kichiuaj (Mat. 19:4, 5; Rom. 1:26, 27). Ika ome, noneki tikueyichiujtoskej Jehová imiuan tokniuan. Tikueyichiuaj toTajtsin maski san kanon, ipan Kaltin kampa tosentlaliaj, niman tla noneki, tosentlaliaj inchan tokniuan noso hasta san ichtaka tosentlaliaj. Maski san tlenon panos, nochipa tosentlaliskej niman ijkon tikueyichiuaskej toTajtsin. Niman melak noneki matosentlalikan ipan yejuin tonaltin “pampa tikmatij ika ye nisiu uajlas toTEKO” (xpoua Hebreos 10:24, 25).
8. ¿Kanaj tlenon tikteijliskej ijkuak tontenojnotsaskej?
8 Ipan “on temojtij tlajyouilistli” kanaj nopatlas tlen tikteijliskej. Ipan yejuin tonaltin, tikteijliaj tlen kichiuas iTekiuajyo toTajtsin niman tokojtiliaj tikinmachtiskej oksekimej. San ika, ipan “on temojtij tlajyouilistli” kanaj tikteijliskej tlen miyekej xkuelkakiskej. Tlen tikijtoskej yes kentla “uejueyi tesiutli” (Apoc. 16:21). Kanaj tikteijliskej ika nochi tlen kiyekana Satanás ipopoliuis. Ika yolik, tikmatiskej tlenon tikteijliskej niman kenon tikchiuaskej. ¿Nopatlas ken titemachtiskej niman ken titenojnotsaskej? Noneki titlamachiaskej niman ijkon tikmatiskej. Maski san kenon nochiuas, nesi ika toTajtsin techmakas yejuin ueyi tekitl niman ijkon miyekej makimatikan tlen kichiuas (Ezeq. 2:3-5).
9. ¿Kanaj tlenon kichiuaskej tekiuajkej ijkuak kikakiskej tlen tikteijliskej, san ika, tlenon uelis kuajli tikmatstoskej?
9 Ijkuak tekiuajkej kikakiskej tlen tikteijliskej, kanaj kinekiskej techkamatsakuaskej. Ijkon ken aman tikneltokaj ika Jehová techpaleuiya ijkuak tontenojnotsaj, ipan yejon tonaltin noijki nonekis titlaneltokaskej itech Jehová. Uelis kuajli tikmatstoskej ika toTajtsin techmakas kojtilistli niman ijkon tikchiuaskej tlen yejua kineki (Miq. 3:8).
MATIKMATSTOKAN TLENON TIKCHIUASKEJ IJKUAK TECHIXNAMIKISKEJ
10. Ken nestika ipan Lucas 21:25-28, ¿kenon nomachiliskej miyekej tlaltikpakchanejkej ijkuak kitaskej tlenon nochiua ipan “on temojtij tlajyouilistli”?
10 (Xpoua Lucas 21:25-28). Ipan “on temojtij tlajyouilistli”, miyekej nomojtiskej ijkuak kitaskej ika peua popoliui nochi yejon tlemach tlen kinemiliayaj xkeman popoliuiskiaj. Yejuamej “xkimatiskej tlinon kichiuaskej” niman mojkamikiskej pampa kitaskej ika uelis mikiskej ipan yejon tonaltin (Sof. 1:14, 15). Kanaj ijkuakon, tinochimej tikixnamikiskej tlen ouijtika, kema, hasta akin tiktekichiuiliaj Jehová. Kanaj titlajyouiskej pampa xtikchiuaj ken miyekej tlaltikpakchanejkej. Kanaj xtikpiyaskej seki tlen mojmostla tijkuij niman tlen melak techpoloua.
11. a) ¿Tleka tikijtouaj ika ajsis tonajli ijkuak miyekej san totech tlajtoskej? b) ¿Tleka xkipiya ika tikmakasiskej “on temojtij tlajyouilistli”?
11 Ajsis tonajli ijkuak yejon tlaltikpakchanejkej akin okitakej kenon okipopolojkej inreligión melak kualaniskej ijkuak kitaskej ika iteixpantijkauan Jehová xpopoliui inreligión. Kuajli tikmatstokej ika yejuin nochiuiyan nomatis, hasta ipan redes sociales kisas yejon. Satanás niman tekiuajkej, akin yejua kinyekana, techtlauelitaskej pampa san toreligión ok onias ipan yejon tonaltin. Kitaskej ika xouelkej okipopolojkej nochi religiones itech yejuin tlaltikpaktli. Ika yejon, nochimej san totech tlajtoskej. Ijkuakon, tekiuajkej nokuepaskej Gog de Magog. * Nosentlaliskej niman ijkon kixnamikiskej ikalpan Jehová (Ezeq. 38:2, 14-16). Pampa xtikmatij nochi tlen panos, kanaj tomojtiaj. San ika, onka itlaj tlen kuajli tikmatstokej: xkipiya ika tikmakasiskej “on temojtij tlajyouilistli”, pampa Jehová techijlis kenon timakisaskej (Sal. 34:19). Tomelajkatelketsaskej niman tajkotlachiaskej pampa tikmatstoskej ika techmakixtiskej. *
12. ¿Kenon “tekitketl” yolmelauak niman tlamachilise techyektlalijtika niman ijkon matimelajkanemikan ipan “on temojtij tlajyouilistli”?
12 “Tekitketl” yolmelauak niman tlamachilise techyektlalijtika niman ijkon matimelajkanemikan ipan “on temojtij tlajyouilistli” (Mat. 24:45). Melak miyek ken yotechpaleui, san ika, san se matikonteneuakan: toueyitlanechikoluan tlen otikinpixkej ipan 2016 a 2018. Yejuin uejueyimej tlanechikoltin yotechpaleuijkej matikimiskaltikan kualneskayomej tlen noneki tikinpiyaskej aman ika sa achijtsin poliui ijkuak yejkos itonal Jehová. Matikimilnamikikan seki kualneskayomej.
MAKA MATIJKAUAKAN JEHOVÁ, MATITLAXIKOJTOKAN NIMAN MATIYOLCHIKAUJKEJ
Matikchiuakan aman tlen noneki niman ijkon timakisaskej itech “on temojtij tlajyouilistli”. (Xkimita párrafos 13-16). *
13. ¿Tlenon techpaleuis maka keman matijkauakan Jehová, niman tleka noneki ijkon matikchiuakan ipan yejuin tonaltin?
13 Maka keman matijkauakan Jehová. Ueyi tlanechikojli tlen otikpixkej ipan 2016 itoka katka “Maka matijkauakan Jehová”. Ompa otiuelkej ika xkeman tijkauaskej Jehová tla melak kuajli iuan touikaj. Otechilnamiktijkej ika uelis tonisiuiskej itech Jehová tla tikchiuiliaj teoyotl niman tla kuajli tomachtiaj iTlajtoltsin. Tla tikchiuaj yejuin, tikpiyaskej kojtilistli niman uelis tikinxikoskej tlaueltin, maski melak mauejueyimej. Pampa más inonisiuijtiuj tonajli ijkuak kipopoloskej tlen kiyekana Satanás, miyekej kinekiskej matijkauakan Jehová niman maka sa matikpaleuikan iTekiuajyo. Kanaj miyekej techpijpinaujtiskej (2 Ped. 3:3, 4). Ijkon texchiuiliskej pampa kitaskej ika xtikpaleuiyaj nion se tekiuaj. Maka keman matijkauakan Jehová, matikchiujtokan yejuin pampa ijkon uelis timelajkanemiskej ipan “on temojtij tlajyouilistli”.
14. a) ¿Tlenon inpan nochiuas tokniuan akin aman kiyekanaj tenojnotsalistli ipan tlaltikpaktli? b) ¿Tleka nonekis timelajkanemiskej?
14 Ipan “on temojtij tlajyouilistli”, itlaj inpan nochiuas tokniuan akin aman kiyekanaj tenojnotsalistli ipan tlaltikpaktli. Ajsis tonajli ijkuak nochimej tlapejpeniltin akin ok nikan nemiskej ipan tlaltikpaktli yaskej ne iluikak niman ijkon teuan tlauisokiskej ipan Armagedón (Mat. 24:31; Apoc. 2:26, 27). Yejuin kijtosneki ika tokniuan itech Grupo akin Tlayekana ipan nochi tlanechikoltin xok nikan nemiskej ipan tlaltikpaktli. Maski ijkon, kintlapejpeniskej tokniuan niman ijkon makinyekanakan itekipanojkauan Jehová akin chantiskej ipan tlaltikpaktli. Tla tiknekij timelajkanemiskej itech Jehová, nonekis tikinpaleuiskej yejuin tokniuan niman tikchiuaskej tlen techijliskej. Tla tikintlakamatij, kuakon, timakisaskej.
15. ¿Tlenon techpaleuis matitlaxikojtokan, niman tleka noneki ijkon matikchiuakan ipan yejuin tonaltin?
15 Matitlaxikojtokan. Ueyi tlanechikojli tlen otikpixkej ipan 2017 itoka katka ¡Xtlaxiko! Yejuin ueyi tlanechikojli otechpaleui matitlaxikojtokan ijkuak tikixnamikiskej tlauejli. Otiuelkej ika uelis titlaxikojtoskej tla titlaneltokaj itech Jehová, xkipiya ika tiknemiliskej ika san uelis titlaxikoskej ijkuak tikitaskej ika tlen tikixnamiktokej uelis noyektlalis (Rom. 12:12). Maka keman matikilkauakan tlen Jesús okijto: “On yejuan noyolchikauas [...] hasta ijkuak nochi tlamis, on yejua makisas” (Mat. 24:13). Yejuin tlen okijto Jesús kijtosneki ika noneki timelajkanentoskej maski tikixnamikiskej san katlejua tlauejli. Tla aman titlaxikouaj, totlaneltokil chikauis achto ika yejkos “on temojtij tlajyouilistli”.
16. ¿Kenon uelis tiyolchikaujkej yeskej, niman tlenon techpaleuis más matitlaneltokakan itech toTajtsin?
16 Matiyolchikaujkej. Ueyi tlanechikojli tlen otikpixkej ipan 2018 itoka katka ¡Xmoyolchikaua! Ompa otechilnamiktijkej ika maka matiknemilikan ika san uelis tiyolchikaujkej yeskej tla melak miyek tlemach tiuelij tikchiuaj. Otechijlikej ika san uelis tiyolchikaujkej yeskej niman titlaxikoskej tla titlaneltokaj itech toTajtsin. ¿Tlenon techpaleuis más matitlaneltokakan itech toTajtsin? Tla mojmostla tikpouaj Biblia niman tla titlanemiliaj itech kenon Jehová okinmakixti itekipanojkauan akin yeuejkaui onenkej (Sal. 68:20; 2 Ped. 2:9). Ijkuak tekiuajkej techixnamikiskej ipan “on temojtij tlajyouilistli”, melak nonekis tiyolchikaujkej yeskej niman más titlaneltokaskej itech Jehová (Sal. 112:7, 8; Heb. 13:6). Tla aman itech titlaneltokaj, xtechpolos yolchikaualistli ijkuak techixnamikis Gog. *
MATIKCHIATOKAN TONAJLI IJKUAK TECHMAKIXTISKEJ
Sa achijtsin poliui, Jesús niman akin iuan tlauisokiskej kinpopoloskej ipan Armagedón nochimej akin kixnamikij toTajtsin. (Xkita párrafo 17).
17. ¿Tleka xkipiya ika tikmakasiskej guerra tlen itoka Armagedón? (Xkita tlaixkopinajli tlen onka ixpan yejuin revista).
17 Ken otikitakej ipan tlamachtijli tlen youajpanok, timiyekej yotinenkej nochi tonemilis ipan “itlamiyan tonaltin”. San ika, noijki tikchiaj timakisaskej itech “on temojtij tlajyouilistli”. Guerra tlen itoka Armagedón kichiuas mapopoliui tlen kiyekana Satanás. San ika, tejuamej xkipiya ika tikmakasiskej yejuin guerra. ¿Tleka? Pampa yejuin iguerra toTajtsin (Prov. 1:33; Ezeq. 38:18-20; Zac. 14:3). Ijkuak Jehová kijtos, Jesucristo kiyekanas yejuin guerra. Tlapejpeniltin akin kinyolitiskej niman miyekej iluikaktekitkej tlauijsokiskej iuan Jesucristo. San sekan kixnamikiskej Satanás, idemonios niman akin imiuan nokalaktiskej (Dan. 12:1; Apoc. 6:2; 17:14).
18. a) ¿Tlenon yotechmelajkaijli Jehová? b) ¿Kenon techpaleuiya Apocalipsis 7:9, 13-17 matikneltokakan ika Jehová techmakixtis?
18 Jehová yotechmelajkaijli: “Xakaj kichijchiua on arma yejuan uelis mitsmiktis” (Is. 54:17). Miyekej itekipanojkauan Jehová makisaskej itech “on temojtij tlajyouilistli”. Yejuamej ok kiueyichiujtoskej toTajtsin (xpoua Apocalipsis 7:9, 13-17). ¿Xmelak ika Jehová kuajli techititia ika techmakixtis? Tikmatstokej ika Jehová kintlajpiya “yejuan xkaman kitlalkauiyaj” (Sal. 31:23). Tinochimej akin tiktlasojtlaj Jehová niman tikueyichiuaj melak tiyolpakiskej ijkuak kichipauas itoka (Ezeq. 38:23).
19. ¿Kenon yeskej tlaltikpakchanejkej ika tlayekapan?
19 Matiknemilikan kenon ijkuiliujtoskia 2 Timoteo 3:2-5 tla tlajtoskia intech yejon tlaltikpakchanejkej akin nemiskej ipan yejuin tlaltikpaktli kampa xok tlayekanas Satanás (xkita recuadro “ Tlen miyekej kichiuaskej ika tlayekapan”). Tokniuj George Gangas, * akin teuan katka ipan Grupo akin Tlayekana ipan nochi tlanechikoltin, okijto yejuin: “¡Melak kualtsin yes ijkuak tinochimej tikniujtin yeskej! Sa achijtsin poliui, toTajtsin mechkauilis xnemikan ipan se yenkuik tlaltikpaktli. Uejkaujtipan ninnemiskej ken Jehová. Tikpiyaskej se nemilistli tlen xkeman tlamis”. ¡Melak kualtsin tlen tikchiaj ika tlayekapan!
TLAKUIKAJLI 122 Nochipa matikojtitokan
^ párr. 5 Tikmatstokej ika sa achijtsin poliui ijkuak tinochimej tikitaskej “on temojtij tlajyouilistli” noso ueyi tlajyouilistli. ¿Tlenon topan nochiuas akin tiktekichiuiliaj Jehová? ¿Tlenon kineki Jehová matikchiujtokan? ¿Katlejua kualneskayomej techpaleuiskej niman ijkon uelis timelajkanemiskej? Ipan yejuin tlamachtijli, tiknankiliskej yejuin.
^ párr. 11 TLEN NONEKI MATIKMATIKAN: Gog de Magog noso Gog, kijtosneki yejon tekiuajkej akin nosentlaliskej niman ijkon kimixnamikiskej itekipanojkauan Jehová ipan “on temojtij tlajyouilistli”.
^ párr. 11 Ipan capítulo 21 itech amoxtli El Reino de Dios ya está gobernando ijkuiliujtika okseki tlen nochiuas achto ika peuas guerra tlen itoka Armagedón. Ipan revista La Atalaya del 15 de julio de 2015, páginas 14-19 niman ipan capítulos 17 niman 18 itech amoxtli Pure Worship of Jehovah—Restored At Last!, yonotlali okseki tlen nochiuas ijkuak teixnamikis Gog de Magog niman noijki kenon Jehová kipaleuis ikalpan ipan Armagedón.
^ párr. 16 Ueyi tlanechikojli tlen otikpixkej ipan 2019 tlen itoka katka ¡Tlasojtlalistli xkeman tlamis!, otechasikamachilti ika timakisaskej pampa Jehová techpaleuis (1 Cor. 13:8).
^ párr. 19 Xkita tlamachtijli “Sus obras lo siguen”, itech La Atalaya del 1 de diciembre de 1994.
^ párr. 64 TLEN NESI IPAN TLAIXKOPINAJLI: Ijkuak panotika “on temojtij tlajyouilistli”, sekimej tokniuan akin yolchikaujkej nosentlaliaj kampa kojyo.
^ párr. 66 TLEN NESI IPAN TLAIXKOPINAJLI: Miyekej itekipanojkauan Jehová akin melajkanemij makisaskej itech “on temojtij tlajyouilistli” niman yolpakiskej.
