TLAMACHTIJLI 41
¿Kenon uelis tikpaleuiskej akin tikmachtiaj manoapolakti? (parte 1)
“Kuajli nestikaj ika nemejuamej ken sen tlajkuilolamatl yejuan Cristo okititlan totechkopa” (2 COR. 3:3).
TLAKUIKAJLI 78 Matitemachtijtokan iTlajtol toTajtsin
TLEN TIKITASKEJ *
Melak tiyolpakij ijkuak yakaj ipan totlanechikol noapolaktia. (Xkita párrafo 1).
1. ¿Kenon 2 Corintios 3:1-3 techpaleuiya matikitakan ika teyolpakti ijkuak tikpaleuiyaj yakaj manoapolakti? (Xkita tlaixkopinajli tlen onka ixpan yejuin revista).
¿KENON tomachiliaj ijkuak yakaj ipan tlanechikojli noapolaktia? Melak tiyolpakij (Mat. 28:19, TNM). Niman más tiyolpakij tla tejuamej otikmachtijkej akin kemach onoapolakti (1 Tes. 2:19, 20). Uelis tikijtoskej ika akin noapolaktiaj yeskiaj “ken se tlajkuilolamatl” tlen kiteititia ika tejuamej niman tlanechikojli otikchiujkej se kuajli tekitl (xpoua 2 Corintios 3:1-3).
2. a) ¿Tlenon noneki totlajtoltiskej, niman tleka? b) ¿Tlenon kijtosneki yakaj tikmachtis? (Xkita nota).
2 Yonoitak ika, ipan yejuin naui xiuitl tlen youajpanokej, tikinmachtijtokej * nochi metstin ipantsin 10 millones tlaltikpakchanejkej ipan nochi tlaltikpaktli. Yejuin itlaj tlen melak techyolpaktia. Noijki yonoitak ika, san no ipan yejuin naui xiuitl, onoapolaktijkej sejse xiuitl ipantsin 280,000 tlaltikpakchanejkej. Ken tikitaj, ok nemij melak miyekej akin noneki matikinpaleuikan manoapolaktikan. ¿Kenon uelis tikinpaleuiskej? Jehová xnosiaujkaua niman kineki ika miyekej noijki manochiuakan inomachtijkauan Cristo. Xok tikpiyaj miyek tiempo, ika yejon, melak noneki matokojtilikan matikinpaleuikan akin tikinmachtiaj itech Biblia makichikauakan intlaneltokil niman manoapolaktikan (1 Cor. 7:29a; 1 Ped. 4:7).
3. ¿Tlenon tikitaskej ipan yejuin tlamachtijli?
3 Grupo akin Tlayekana ipan nochi tlanechikoltin okintlajtolti sucursales tlenon kichiuaj tokniuan niman ijkon kinpaleuiskej akin kinmachtiaj manoapolaktikan. Ipan yejuin tlamachtijli niman ipan okse, tikitaskej tlenon kichiuaj tlayekankej ipan circuito, misioneros niman precursores (Prov. 11:14; 15:22). * Tlen kijtouaj yejuin tokniuan uelis techpaleuis matikmatikan kenon más kuajli titemachtiskej. Noijki techpaleuis matikitakan tlenon noneki kichiuas akin tikmachtiaj. Ipan yejuin tlamachtijli, tikitaskej makuijli tlemach tlen noneki kichiuas tonomachtijkauj niman ijkon uelis noapolaktis niman noijki tikitaskej kenon uelis tikpaleuiskej.
NONEKI NOMACHTIS NOCHI SEMANAS
Matiktlajtoltikan akin tikmachtiaj tla uelis totlaliskej niman ijkon tomachtiskej Biblia. (Xkimita párrafos 4-6).
4. ¿Tlenon uelis panos tla nochipa san ipan puerta titemachtiaj?
4 Miyekej tokniuan kinmachtiaj innomachtijkauan ipan puerta. Maski yejuin uelis kichiuas ika akin tikontlajpalouaj más makineki kimatis itech Biblia, xkipaleuis machikaui itlaneltokil. Yonoitak ika, ijkuak san ipan puerta titemachtiaj, xtiuejkauij niman kanaj xnochi semanas tikonitaj. Ipampa yejon, miyekej tokniuan kintlajtoltiaj innomachtijkauan tla uelis kinpanoltiliskej innúmero de teléfono niman ijkon sakin uelis kominnotsaskej noso komintitlaniliskej se mensaje kampa kimijliskej itlaj tlen kijtoua Biblia. * Maka matikilkauakan ika, maski tiuejkauiskej miyek metstin ika ijkon tikomintlajpalojtiaskej, kanaj xchikauis intlaneltokil. Noneki tikasikamatiskej ika kanaj xnosentemakaskej itech Jehová niman xnoapolaktiskej tla san nochipa ijkon kinekij matikinmachtikan.
5. ¿Tlenon techititiaj yejon neskayomej tlen Jesús okinteneuj ipan Lucas 14:27-33?
5 Jesús okintekitilti seki neskayomej niman ijkon kiteititis tlenon kipiya ika kichiuas akin kineki nochiuas inomachtijkauj. Otlajto itech se tlakatl akin kineki kichijchiuas se torre niman itech se tekiuaj akin kineki konixnamikis okse tekiuaj. Okijto ika akin kineki kichijchiuas se torre “achtopa notlalia para kixtlaloua itomin tla kaxilis para tlamis on torre”, niman ika on tekiuaj “achtopa kixtlaloua” tla isoldados uelis kitlaniskej on okse tekiuaj (xpoua Lucas 14:27-33). Jesús okijto ika akin kineki nochiuas inomachtijkauj, noneki kuajli kitas kenon kichiuas nochi tlen notlajtlani. Tla tiknekij ika akin tikonmachtiaj makichiua tlen okijto Jesús, noneki tikyolchikauaskej manomachti Biblia nochi semanas. ¿Tlenon techpaleuis ijkon matikchiuakan?
6. ¿Tlenon uelis tikchiuaskej niman ijkon akin tikonmachtiaj machikaui itlaneltokil?
6 Kachtopa, noneki tokojtiliskej más tiuejkauiskej ijkuak titemachtiskej ipan puerta. Ijkuak tikontlajpaloskej akin tikmachtiaj, matikyejyekokan maka san se tlaxelojli matikititikan. Tla akin tikonmachtiaj yopeuj kuelita ika tokauaj más tiempo, matiktlajtoltikan tla uelis totlaliskej niman ijkon ok tonojnotstoskej. Tlen techijlis techititis tla yemelak kineki uelis itech Biblia. Sakin, hasta uelis tiktlajtoltiskej tla kineki okpa matikitatij ipan se semana. Yejon kipaleuis más totoka machikaui itlaneltokil. Matikitakan tlenon más noneki kichiuas akin tikmachtiaj.
NONEKI NOYEKTLALIS ACHTO TIKONMACHTISKEJ
Kuajli matoyektlalikan achto tontemachtiskej niman matikititikan akin tikmachtiaj kenon noneki noyektlalis. (Xkimita párrafos 7-9).
7. ¿Kenon noneki toyektlaliskej akin titemachtiaj itech Biblia?
7 Tinochimej akin titemachtiaj noneki kuajli toyektlaliskej achto tontemachtiskej. Kachtopa uelis tikpouaskej on amatlajkuilojli tlen ika titemachtiaj niman tlaxeloltin tlen ompa uajnestiuej. Kuajli matikitakan tlenon noneki kasikamatis akin tikmachtiaj. Matikitakan kenon itoka tlamachtijli kampa titemachtijtoskej, matikimitakan subtítulos, tlajtoltilistin, tlaxeloltin tlen noneki tikinpouaskej niman tlaixkopinaltin. Noijki matikitakan tla onka se video tlen uelis techpaleuis más kuajli matitemachtikan. Sakin, matiknemilikan tlenon kixnamiktika akin tikmachtijtokej niman kenon más kuajli tiktomiliskej tlen tikmachtiskej niman ijkon uelis kichiuas ipan inemilis (Neh. 8:8; Prov. 15:28a).
8. Itech tlen okijto apóstol Pablo ipan Colosenses 1:9, 10, ¿tlenon noneki tikchiuaskej ipampa akin tikmachtiaj?
8 Matikijlikan Jehová tlen kixnamiktika akin tikmachtiaj. Matiktlajtlanilikan matechpaleui kuajli matijkuikan Biblia niman ijkon tlen tikmachtiskej maajsi ipan iyojlo (xpoua Colosenses 1:9, 10). Matikitakan tla onias itlaj tlen xmás kasikamatis noso itlaj tlen xmás kineltokas. Maka matikilkauakan ika tiknekij tikpaleuiskej manoapolakti.
9. ¿Kenon uelis tikpaleuiskej akin tikmachtiaj kuajli manoyektlali achto tikonmachtiskej?
9 Tokojtiliaj nochipa tikonitaskej akin tikmachtiaj pampa tikuelitaskiaj makipatiojkaita tlen Jehová niman Jesús yokichiujkej, noijki pampa tiknekij más makineki nomachtis (Mat. 5:3, 6). Akin tikmachtiaj noneki tlanemilis itech tlen tikititiaj niman ijkon uelis kipaleuis. Ika yejon, matikijlikan ika kipaleuis tla kiamapoua tlen tomachtiskej niman tla kinemilia kenon kichiuas ipan inemilis. Kanaj uelis iuan tikitaskej se tlamachtijli noso se capítulo niman ijkon makimati kenon noyektlalis. * Matikititikan kenon kinextis ipan amatlajkuilojli kampa tikmachtijtokej tlen kinankilia on tlajtoltilistin tlen ompa uajnestiuej. Noijki matikijlikan ika, tla kintlapalyotia seki tlajtoltin, nimantsin kilnamikis tlenon technankilis. Sakin, matikijlikan matechtomili tlen yejua okasikamat. Ijkon, tikmatiskej tla kuajli kasikamatstiuj tlen tikmachtijtokej. Matikitakan tlenon más noneki kichiuas akin tikmachtiaj.
NONEKI KINOTSAS JEHOVÁ NIMAN KIKAKIS
Matikititikan tonomachtijkauj kenon kinotsas Jehová. (Xkimita párrafos 10 niman 11).
10. ¿Tleka tonomachtijkauj noneki mojmostla makiamapoua Biblia, niman tlenon más noneki kichiuas tla kineki makipaleui yejon?
10 Tla akin tikmachtiaj kineki kichikauas itlaneltokil, xsan noneki kixelos tiempo niman ijkon nomachtis ijkuak tikontlajpalouaj, yejua noijki noneki kichiuas itlaj okse. Noneki kinotsas Jehová niman kuajli kikakis. Yejua uelis kikakis Jehová tla mojmostla kipoua Biblia (Jos. 1:8; Sal. 1:1-3). Matikititikan kenon uelis kikuis on amatlajkuilojli tlen itoka Kenon tikamapouas Biblia, tlen onka ipan jw.org niman tlen uelis kikixtis ipan amatl. * Maka matikilkauakan ika noneki tikyolchikauaskej makinemili tlenon kititia itech Jehová tlen kiamapoujtiuj niman kenon uelis kichiuas ipan inemilis nochi tlen ueltiuj. Tla ijkon kichiua, melak kipaleuis tlen kipouas ipan Biblia (Hech. 17:11; Sant. 1:25).
11. ¿Tlenon kipaleuis tonomachtijkauj makimati kenon kinotsas Jehová, niman tleka melak noneki ijkon makichiua?
11 Matikyolchikauakan tonomachtijkauj mojmostla makinotsa Jehová. Matikchiuakan teoyotl ika nochi toyojlo ijkuak tipeuaskej titemachtiskej niman ijkuak titlamiskej, matikijlikan Jehová makipaleui akin tikmachtijtokej. Ijkon, yejua kimatis kenon kinotsas Jehová ika nochi iyojlo niman kitekitiltis itoka Jesucristo ijkuak kinotsas Jehová (Mat. 6:9; Juan 15:16). San matikonnemilikan kenon nonisiuis itech toTajtsin tla yejua mojmostla kipoua Biblia niman tla nochipa kinotsa (Sant. 4:8). Nochi yejuin kipaleuis manosentemaka itech Jehová niman manoapolakti.
NONEKI NOUIKAS IUAN JEHOVÁ
12. ¿Kenon uelis tikpaleuiskej akin tikmachtiaj manochiua iamigo Jehová?
12 Tlen tikititiaj akin tikmachtiaj xsan noneki kitlanemililtis, noijki noneki ajsis ipan iyojlo. ¿Tleka? Pampa tla ajsi ipan iyojlo, yejua kinekis kichiuas tlen ueltiuj. Jesús melak kuajli temachtiaya niman kintlanemililtiaya akin kikakiyaj. San ika, tlaltikpakchanejkej kinekiyaj kikakiskej pampa tlen kinmachtiaya noijki ajsiya ipan inyojlo (Luc. 24:15, 27, 32). Akin nomachtijtika Biblia noneki kuajli kasikamatis ika Jehová yemelak nemi, ika uelis kitas ken iTaj, iTajtsin niman iamigo (Sal. 25:4, 5). Ijkuak titemachtijtoskej, matikijtokan nochi tlen kualtsin kichiua toTajtsin (Éx. 34:5, 6; 1 Ped. 5:6, 7). Nochipa matikteititikan ika xnemi yakaj okse ijkon ken Jehová. Matiteasikamachiltikan kenon Jehová tetlasojtla, teiknelia niman yolkuajli. Jesús okijto katlejua on tlanauatijli “más ueyixtikaj” niman tlen “yakatstikaj de nochimej on tlanauatiltin”, yejua okijto: “Xtlajsojtla moTEKO Dios” (Mat. 22:37, 38). Kuakon, matokojtilikan tikpaleuiskej akin tikmachtijtokej makitlasojtla Jehová ika nochi iyojlo.
13. Xkijto kenon uelis tikpaleuiskej akin tikmachtiaj makita nochi tlen kualtsin kichiua Jehová.
13 Ijkuak tonojnotstoskej iuan akin tikmachtiaj Biblia, matikijlikan kenon melak tiktlasojtlaj Jehová. Yejuin kanaj kipaleuis makasikamati ika noneki nouikas iuan toTajtsin niman ijkon noijki uelis kitlasojtlas (Sal. 73:28). San matikonnemilikan ika tomachtijtokej se amatlajkuilojli noso se texto tlen melak tikuelitaj niman tlen ajsi ipan toyojlo. Kanaj ompa kijtoua kenon Jehová melak tetlasojtla, tlamachilise, melajki noso kojtik. Ijkuakon, uelis tikijliskej akin tikmachtijtokej ika yejon san seki ikualneskayouan Jehová tlen techpaleuiyaj melak matiktlasojtlakan. Matikitakan tlenon más noneki kichiuas akin tikmachtiaj niman ijkon uelis noapolaktis.
NONEKI YAS TLANECHIKOLTIN
Matikyolchikauakan akin tikmachtijtokej mauiya tlanechikoltin. (Xkimita párrafos 14 niman 15).
14. Itech tlen kijtoua Hebreos 10:24, 25, ¿tlenon kipaleuis akin tikmachtiaj nimantsin machikaui itlaneltokil?
14 Tinochimej tiknekij ika akin tikinmachtijtokej itech Biblia manoapolaktikan. Niman uelis noapolaktiskej tla tikinyolchikauaj mauiyan tlanechikoltin. Tokniuan akin melak ueltokej temachtiaj kijtouaj ika akin nimantsin peuaj yauej tlanechikoltin más totoka chikaui intlaneltokil (Sal. 111:1). Sekimej tokniuan kimijliaj innomachtijkauan ika, maski kominmachtiaj itech Biblia, onka seki tlemach tlen san ueliskej ipan tlanechikojli. Matikpouilikan akin tikmachtiaj tlen kijtoua Hebreos 10:24, 25 niman matiktomilikan kenon kipaleuis tla yauj tlanechikoltin (xpoua). Noijki uelis tikititiskej video ¿Tlenon nochiua kampa tosentlaliaj? * Matikyolchikauakan akin tikmachtiaj maka makinopolouili nion se tlanechikojli.
15. ¿Kenon uelis tikyolchikauaskej akin tikmachtiaj mauiya tlanechikoltin?
15 ¿Tlenon uelis tikchiuaskej tla akin tikmachtiaj xkeman yauj tlanechikojli noso tla san kemantika yauj? Matikijlikan tlen kemach yotiuelkej ipan se tlanechikojli. Yejuin más kiyolchikauas xijkon ken tla san tikijliskej mauiya tlanechikoltin. Matikmakakan se Amatl Tekakistilijketl tlen tomachtijtokej noso se amatlajkuilojli tlen tiktekitiltijtokej ipan tlanechikojli Nemilistli niman Tekitl. Matikititikan tlenon nopanoltis ipan tlanechikojli niman matiktlajtoltikan tlenon kuelitaskia kasikamatis. Kuajli tikmatstokej ika tlen ompa kitas niman kikakis más kuelitas xijkon ken tlen ipan okseki religiones yokititijkaj (1 Cor. 14:24, 25). Noijki, kimixmatis oksekimej tokniuan akin kipaleuiskej makichikaua itlaneltokil niman manoapolakti.
16. a) ¿Kenon uelis tikpaleuiskej akin tikmachtiaj manoapolakti? b) ¿Tlenon tikitaskej ipan okse tlamachtijli?
16 Kuakon, ¿kenon uelis tikpaleuiskej akin tikmachtiaj manoapolakti? Noneki tikasikamachiltiskej ika noneki kipatiojkaitas tlen nomachtia itech Biblia. Ika yejon, matikyolchikauakan manomachti nochi semanas niman manoyektlali achto tikonmachtiskej. Matikyolchikauakan mojmostla makinotsa Jehová niman manochiua iamigo. Niman matikyolchikauakan mauiya tlanechikoltin (xkita recuadro “Tlen noneki kichiuas akin nomachtijtika Biblia”, tlen onka ipan página 12). Ipan okse tlamachtijli, tikitaskej makuijli tlemach tlen noneki kichiuaskej nochimej akin temachtiaj niman ijkon innomachtijkauan manoapolaktikan.
TLAKUIKAJLI 76 ¿Kenon timomachilia?
^ párr. 5 “Titemachtis” kijtosneki tikpaleuis yakaj makipatla ken tlanemilia, tlen kimachilia niman tlen kichiua. Texto del año ipan 2020, Mateo 28:19, yotechilnamikti ika melak noneki matikinmachtikan oksekimej itech Biblia niman matikimititikan tlenon noneki kichiuaskej niman ijkon uelis noapolaktiskej. Ipan yejuin tlamachtijli niman ipan okse, tikitaskej tlenon techpaleuis más kuajli matikchiuakan yejuin tekitl.
^ párr. 2 TLEN NONEKI MATIKMATIKAN: Tla nemi yakaj akin nochipa tiknojnotsaj itech Biblia noso tikijliaj tlen uajnestiuj ipan toamatlajkuiloluan, yejon kijtosneki ika itikmachtijtokej. Uelis tiktlaliskej ipan toinforme tla okpa yotikmachtijkej, tla yotikijlikej kenon titemachtiaj itech Biblia niman tla tikitaj ika ok kinektos matikmachtikan.
^ párr. 3 Seki tlen noijtoua ipan yejuin ome tlamachtiltin onokixti itech serie tlen itoka “Dirijamos estudios bíblicos progresivos”, tlen okiskej ipan Nuestro Ministerio del Reino de julio de 2004 a mayo de 2005.
^ párr. 4 Tinochimej akin titenojnotsaj noneki tiktlakamatiskej tlen kijtouaj tlanauatiltin ipan topaís (leyes de protección de datos).
^ párr. 9 Xkita video tlen uejkaui naui minutos tlen itoka Xkinpaleui akin tikinmachtia makiyektlalikan ken nomachtiaj. Ipan JW Library®, xuiya kampa kijtoua MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ párr. 10 Xuiya kampa kijtoua TLAMACHTILTIN ITECH BIBLIA > TLEN IKA TIMOMACHTIS BIBLIA.
^ párr. 14 Ipan JW Library®, xuiya kampa kijtoua MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
