TLAMACHTIJLI 42
¿Kenon uelis tikpaleuiskej akin tikmachtiaj manoapolakti? (parte 2)
“Kuajli xkita ken timouikas niman kuajli xkita on tlen tiktemachtia” (1 TIM. 4:16).
TLAKUIKAJLI 77 Se tlauijli kampa tlayouatikak
TLEN TIKITASKEJ *
1. ¿Tleka tikijtouaj ika melak kuajli ika titemachtiaj?
TEJUAMEJ tikpiyaj se kualtsin tekitl: tikinmachtiskej oksekimej niman ijkon noijki manochiuakan inomachtijkauan Cristo. Yejuin tekitl uelis kichiuas miyekej mamakisakan. ¿Tleka ijkon tikijtouaj? Matikilnamikikan ika ipan Mateo 28:19, 20 itech Traducción del Nuevo Mundo, Jesús okijto “xuiyan”, “xkinmachtikan tlaltikpakchanejkej” niman “xkinapolaktikan”. Kuajli tikmatstokej ika melak noneki manoapolaktikan akin kinekij kiseliskej nemilistli tlen xkeman tlamis. Akin kinekij noapolaktiskej noneki kineltokaskej ika san uelis makisaskej pampa Jesús okitemakak inemilis niman oksejpa oyoliuj. Ika yejon, apóstol Pedro okimijli tokniuan akin nemiyaj ipan kachtopa siglo: “Apolaktilistli, [...] aman noijki mechmakixtijtika [...] itechkopa iyoliuilis Jesucristo” (1 Ped. 3:21, TNM). Kema, ijkuak yakaj noapolaktia, toTajtsin uelis kimakas on nemilistli tlen xkeman tlamis.
2. Ijkon ken kijtoua 2 Timoteo 4:1, 2, ¿kenon kipiya ika titemachtiskej?
2 Tla tiknekij tikinpaleuiskej tonomachtijkauan manoapolaktikan, noneki kuajli tikinmachtiskej (xpoua 2 Timoteo 4:1, 2). ¿Tleka noneki ijkon tikchiuaskej? Pampa Jesús otechnauati “xuiyan” niman “xkinmachtikan tlaltikpakchanejkej”. Apóstol Pablo okijli Timoteo manokojtilijto más kuajli kichiuas itekiyo, niman noijki okijli: “Tla ijkin tikchiuas, timomakixtis niman no tikinmakixtis on yejuan mitskakiskej”. Ika yejon, xtechmojkatlachialtia ijkuak okijli: “Kuajli xkita [...] on tlen tiktemachtia” (1 Tim. 4:16). Tla tiknekij ika miyekej manochiuakan inomachtijkauan Cristo, noneki tokojtiliskej más kuajli titemachtiskej.
3. ¿Tlenon tikitaskej ipan yejuin tlamachtijli?
3 Nochi semanas, melak miyekej tikinmachtiaj tlen melauak itech Biblia. San ika, ijkon ken otikitakej ipan tlamachtijli tlen yotiuajpanokej, tiknekij tikmatiskej kenon uelis tikinpaleuiskej tonomachtijkauan niman ijkon manoapolaktikan. Ipan yejuin tlamachtijli, tikitaskej makuijli tlemach tlen noneki kichiuas akin temachtia niman ijkon kipaleuis inomachtijkauj manoapolakti.
NONEKI KIKUIS BIBLIA IJKUAK TEMACHTIS
Matiktlajtlanilikan se tokniuj akin más youel temachtia matechijli tla nonekis más tijkuiskej Biblia. (Xkimita párrafos 4-6). *
4. ¿Tleka akin temachtia noneki nokojtilis xsajnoye tlajtos niman xnochi kiteijlis tlen kimatstika? (Noijki xkita nota).
4 Tinochimej techyolpaktia titemachtiskej iTlajtol toTajtsin. Kuakon, kanaj melak tiknekij tikteijliskej nochi tlen tikmatstokej itech itlaj tlen uajlauj ipan Biblia. Aman tej, xnoneki sajnoye miyek tikijtoskej ijkuak yakaj tikmachtiskej itech Biblia, ijkuak tikyekanaskej tlanechikojli kampa tomachtiaj Amatl Tekakistilijketl noso ijkuak tikpanoltiskej Tlamachtijli itech Biblia iuan tlanechikojli. Matijkuikan Biblia ijkuak titemachtiskej. Yejua ika, akin temachtia noneki nokojtilis xsajnoye tlajtos niman xnochi kiteijlis tlen yejua kimatstika itech se tlaxelojli noso itech se tlamachtijli (Juan 16:12). * San xkonnemili, achto timoapolaktis, tejua kanaj xmiyek tikmatiya itech Biblia (Heb. 6:1). Kanaj ononek panos miyek xiuitl niman ijkon tiuelis nochi tlen aman itikmati. Ika yejon, maka san sejpatipan xkititi akin tikmachtia nochi tlen tikmatstika.
5. a) Ijkon ken kijtoua 1 Tesalonicenses 2:13, ¿tlenon tiknekij makasikamati akin tikmachtijtokej? b) ¿Tlenon uelis tikchiuaskej niman ijkon tonomachtijkauj matechijli tlenon kinemilia itech tlen tikmachtijtokej?
5 Tiknekij ika akin tikmachtijtokej makasikamati ika tlen tikititiaj ualeua itech iTlajtol toTajtsin (xpoua 1 Tesalonicenses 2:13). Ika yejon, matikyolchikauakan matechijli tlenon kinemilia itech tlen tikmachtiaj. Maka nochipa san tejuamej matiktomilikan textos, noijki uelis tiktlajtlaniliskej seki yejua matechtomili. Matikpaleuikan makita kenon uelis kichiuas ipan inemilis tlen kijtoua Biblia. Matiktlajtoltikan tlenon kinemilia niman tlenon kasikamachiltia se tlaxelojli itech Biblia (Luc. 10:25-28). Uelis tiktlajtoltiskej: “¿Kenon yejuin tlaxelojli mitspaleuiya xkita tlen kualtsin kichiua Jehová?”, “¿Kenon mitspaleuiya yejuin tlaxelojli itech Biblia?”, “¿Kenon timomachilia pampa aman yotiuel yejuin?” (Prov. 20:5). Maka san miyek matikititikan akin tikmachtiaj, yej matikpaleuikan makipatiojkaita tlen ueltiuj niman makichiua ipan inemilis.
6. ¿Kenon uelis techpaleuiskej tokniuan akin melak youelkej temachtiaj?
6 ¿Tikintlajtlaniliaj tokniuan akin melak youelkej temachtiaj touan matemachtitij? Tla touan ontemachtia se tokniuj, uelis tiktlajtoltiskej tla kuajli ken otitemachtijkej niman tla nonekis más tijkuiskej Biblia. Tla tiknekij más kuajli titemachtiskej, noneki tiyolyemankej yeskej (uelis tikitas Hechos 18:24-26). Noijki uelis tiktlajtoltiskej tokniuj tla kita ika tonomachtijkauj kasikamatstiuj tlen tikititiaj. Tla tejuamej oksekan tiaskej niman tikitaj ika xuelis tikonmachtiskej ipan se semana noso ipan seki semanas, uelis tikijliskej tokniuj akin otikuikakej yejua makimachtiti. Ijkon ok nomachtijtos akin tikontlajpalouaj niman kitas ika melak ueyi kijtosneki manomachti itech Biblia. Maka keman matiknemilikan ika san tejuamej uelis tikmachtiskej. Matikilnamikikan ika tiknekij tikpaleuiskej akin tikmachtiaj niman ijkon más machikaui itlaneltokil.
NONEKI KITEITITIS IKA KUELITA NIMAN KINELTOKA TLEN TEMACHTIA
Matikijlikan tlenon yokinpaleui sekimej tokniuan niman ijkon yejua noijki uelis kasikamatis kenon kichiuas tlen kijtoua Biblia. (Xkimita párrafos 7-9). *
7. ¿Tlenon kipaleuis tonomachtijkauj más makuelita tlen nomachtijtika?
7 Melak noneki ika akin tikmachtiaj Biblia makita ika tikuelitaj niman tikneltokaj tlen tikititiaj (1 Tes. 1:5). Kanaj ijkon más kuelitas tlen nomachtijtika. Noijki, uelis tikijliskej kenon yotechpaleui Biblia ipan tonemilis. Tla ijkon tikchiuaj, kitas ika noijki uelis kipaleuis ipan inemilis.
8. ¿Tlenon uelis tikchiuaskej niman ijkon más kuajli titemachtiskej, niman tleka noneki ijkon matikchiuakan?
8 Ijkuak tomachtijtoskej, matikijlikan tlenon yokinpaleui sekimej tokniuan akin yokixnamijkej tlen yejua kixnamiktok. ¿Nemi ipan totlanechikol se tokniuj akin okixnamik tlen yejua aman kixnamiktika? Tla kema, uelis tikijliskej yejon tokniuj touan matemachtiti. Noijki uelis tikititiskej tonomachtijkauj seki videos tlen onka ipan serie tlen itoka “Tlen melauak kipatla innemilis tlaltikpakchanejkej” tlen onka ipan jw.org. * Yejuin videos kipaleuiskej makasikamati ika melak yolpakis tla kitlakamati tlen kijtoua Biblia.
9. ¿Kenon uelis tikpaleuiskej tonomachtijkauj makinnojnotsa ichanejkauan niman iamigos itech tlen youel?
9 Tla akin tikmachtijtokej yononamikti niman ixnamik xtouan nomachtia, uelis tiktlajtoltiskej tla kineki touan nomachtis. Noijki, uelis tikijliskej akin tikmachtiaj makinnojnotsa ichanejkauan niman iamigos itech tlen youel (Juan 1:40-45). Kanaj uelis tikijliskej: “¿Kenon ueliskia tikimijlis mochanejkauan yejuin tlen yotiuelkej?” noso “¿Tlen texto tijkuiskia niman ijkon tikintomilis moamigos tlen kemach yotomachtijkej?”. Tla ijkon tikchiuaj, yejua noijki kimatis kenon uelis temachtis. Niman ijkuak tlayekankej kitaskej ika iuelis tenojnotsas, uelis kisas iuan tlanechikojli. Uelis tiktlajtoltiskej tla kixmati yakaj akin kuelitaskia nomachtis Biblia. Tla techijlia ika kema, matiktlajtoltikan tla uelis kijlis ika tiknekij tikititiskej se video tlen itoka ¿Kenon nochiua se tlamachtijli itech Biblia? *
NONEKI KIPALEUIS INOMACHTIJKAUJ MAKINPIYA AMIGOS IPAN TLANECHIKOJLI
Matikpaleuikan tonomachtijkauj makinnexti amigos ipan tlanechikojli. (Xkimita párrafos 10 niman 11). *
10. Itech tlen kijtoua 1 Tesalonicenses 2:7, 8, ¿kenon uelis tikchiuaskej ijkon ken Pablo?
10 Akin temachtiaj noneki kiteititiskej ika melauak kinekij kinpaleuiskej innomachtijkauan niman kilnamikiskej ika yejuamej noijki uelis nochiuaskej iteixpantijkauan Jehová (xpoua 1 Tesalonicenses 2:7, 8). Kanaj yejuamej ouijtika kitaj kinkauaskej iminamigos akin xkitekichiuiliaj Jehová niman kichiuaskej tlen noneki niman ijkon kitekichiuiliskej toTajtsin. Ika yejon, matikinpaleuikan makinnextikan iminamigos ipan tlanechikojli. Maka san matikimitatij ijkuak tikominmachtiskej, noijki matikimitatij okseki tonaltin niman ijkon kitaskej ika uelis touan nouikaskej. Tla tikominnotsaj, tla tikomintitlaniliaj se mensaje noso tla tikomintlajpalouaj maski san achijtsin, yejuamej kitaskej ika tajmanaj inpampa.
11. ¿Kenon tiknekij manomachilikan tonomachtijkauan ipan tlanechikojli, niman tleka?
11 Miyekej akin chantij África kixmatstokej yejuin tlajtoltin: “Nochimej akin nemij ipan se kalpan kipaleuiyaj se konetl kuajli manoskalti”. Kuakon, tejuamej noijki ueliskia tikijtoskej: “Nochimej akin nemij ipan tlanechikojli kipaleuiyaj akin nomachtijtika Biblia makitekichiuili Jehová”. Ika yejon, akin kuajli temachtiaj kinpaleuiyaj innomachtijkauan makimixmatikan tokniuan ipan tlanechikojli akin uelis kinpaleuiskej machikaui intlaneltokil niman akin uelis kinyolchikauaskej ijkuak kixnamikiskej tlaueltin. Tiknekij ika nochimej akin tikinmachtiaj kuajli manomachilikan ipan tlanechikojli niman makimatikan ika tikintlasojtlaj. Tla yejuamej kitaj ika akin nemij ipan ikalpan Jehová kintlasojtlaj, xok ouijtika kitaskej kinkauaskej iminamigos akin xkinyolchikauaj makitekichiuilikan Jehová (Prov. 13:20). Tla iminamigos akin xkitekichiuiliaj Jehová kintlalkauiyaj, yejuamej kimatstoskej ika uelis kinnextiskej oksekimej amigos ipan ikalpan Jehová (Mar. 10:29, 30; 1 Ped. 4:4).
NONEKI KIYOLCHIKAUAS INOMACHTIJKAUJ MANOSENTEMAKA ITECH JEHOVÁ NIMAN MANOAPOLAKTI
Akin yemelak kineki nomachtis Biblia kichiua seki tlemach niman ijkon uelis noapolaktis. (Xkimita párrafos 12 niman 13).
12. ¿Tleka noneki tikijliskej akin tikmachtiaj ika melak ueyi kijtosneki ijkuak se nosentemaka itech Jehová niman noapolaktia?
12 Matikijlikan akin tikmachtiaj ika melak ueyi kijtosneki ijkuak se nosentemaka itech Jehová niman noapolaktia. Tejuamej tiknekij tikpaleuiskej manoapolakti niman makitekichiuili Jehová. Tla youejkauj ika tikonmachtijtokej niman nochipa yauj tlanechikoltin, kuajli tikmatstokej ika yokasikamat ika tikonmachtiaj pampa tiknekij tikpaleuiskej manochiua se iteixpantijkauj Jehová.
13. ¿Tlenon kichiua akin kineki noapolaktis?
13 Akin yemelak kineki nomachtis Biblia kichiua seki tlemach niman ijkon uelis noapolaktis. Kachtopa, kixmati Jehová niman kitlasojtla, niman itech tlaneltoka (Juan 3:16; 17:3). Sakin, nouika iuan Jehová niman imiuan tokniuan akin nemij ipan tlanechikojli (Heb. 10:24, 25; Sant. 4:8). Ika yolik, peua kikajkaua tlen xkuelita toTajtsin niman noyolkuepa itech tlen xkuajli kichiuaya (Hech. 3:19). Noijki, peua kinnojnotsa oksekimej itech tlen aman kineltoka (2 Cor. 4:13). Niman sakin, ajsi se tonajli ijkuak nosentemaka itech Jehová niman noapolaktia (1 Ped. 3:21, TNM; 1 Ped. 4:2). Ijkuak ajsi yejon tonajli, tinochimej melak tiyolpakij. Kuakon, tla tikitaj ika akin tikmachtiaj kichiujtika tlen noneki niman ijkon noapolaktis, matikijlikan ika melak kuajli tlen kichiujtika niman maka makikajkaua ika ijkon kichiua.
NONEKI KITAS TLA INOMACHTIJKAUJ KICHIUA TLEN UELTIUJ
14. ¿Tlenon noneki kichiuas akin temachtia niman ijkon kitas tla inomachtijkauj yemelak kineki kitekichiuilis Jehová?
14 Tla tiknekij tikpaleuiskej akin tikmachtiaj manosentemaka itech Jehová niman manoapolakti, xnoneki nimantsin tosiaujkauaskej. San ika, noneki tikitaskej tla yemelak kineki kitekichiuilis Jehová noso ka. ¿Nokojtilijtika kitlakamatis itlanauatiluan Jesús? ¿Noso san nomachtia pampa kuelita uelis itech Biblia?
15. ¿Kenon uelis tikmatiskej tla akin tikmachtiaj nokojtilia kichiuas tlen ueltiuj?
15 Matikitakan tla akin tikmachtiaj nokojtilia kichiuas tlen ueltiuj. Matotlajtoltikan, ¿kijtoua tlenon kimachilia ipampa Jehová? ¿Kichiuilia teoyotl? (Sal. 116:1, 2). ¿Kuelita kipouas Biblia? (Sal. 119:97). ¿Kiyejyekoua yas ipan nochi tlanechikoltin? (Sal. 22:22). ¿Kichiujtika ipan inemilis tlen youel ipan Biblia? (Sal. 119:112). ¿Kinnojnotsa ichanejkauan niman iamigos itech tlen youel ipan Biblia? (Sal. 9:1). Niman tlen más ueyi kijtosneki, ¿yemelak kineki nochiuas iteixpantijkauj Jehová? (Sal. 40:8). Tla tonomachtijkauj xkichiujtika tlen yotikteneujkej, matikitakan tleka xkichiua niman, sakin, ika tlakaitalistli iuan matitlajtokan niman matikijlikan tlen uelis kichiuas. *
16. ¿Kemanon nonekis xok tikmachtiskej se tonomachtijkauj?
16 Noijki, matikitakan tla ok nonekis tikmachtijtoskej se tonomachtijkauj noso ka. Matotlajtoltikan: “¿Noyektlalia ipan tlamachtijli kampa tikmachtiskej? ¿Kinektika yas tlanechikoltin? ¿Yokikajkauj ika kichiua tlen xkuajli? ¿Yokitlalkaui on tlaneltokijli tlen xmelauak?”. Tla tikitaj ika xijkon kichiua, kanaj san nenka tikmachtijtokej, kentla tiknekiskiaj tikmajmachtiskej maapano yakaj akin nion xkineki nopajpatsos. Tla akin tikmachtijtokej xkipatiojkaita tlen ueltiuj niman xkineki kipatlas inemilis, ¿tleka ok tikmachtijtoskej?
17. Ijkon ken kijtoua 1 Timoteo 4:16, ¿tlenon noneki kichiuas akin temachtia Biblia?
17 Tejuamej xsan tikauilmatij ijkuak titemachtiaj. Tiknekij tikinpaleuiskej tonomachtijkauan manoapolaktikan. Ika yejon, tijkuiskej Biblia ijkuak titemachtiskej niman tikteititiskej ika tikuelitaj niman tikneltokaj tlen titemachtiaj. Tikpaleuiskej akin tikmachtiaj makinpiya amigos ipan tlanechikojli, tikijliskej ika melak kuajli tla nosentemaka itech Jehová niman tla noapolaktia, niman tikitaskej tla nokojtilia kichiuas tlen ueltiuj (xkita recuadro “ Tlen noneki kichiuas akin temachtia”, tlen onka ipan página 13). ¡Melak techyolpaktia titlapaleuiskej ipan yejuin tekitl tlen uelis kichiuas miyekej mamakisakan! Ika yejon, matokojtilikan tikinpaleuiskej tonomachtijkauan manoapolaktikan.
TLAKUIKAJLI 79 Xkinmachti mayolmelajkej itech intlaneltokil
^ párr. 5 Melak kualtsin ijkuak yakaj tikmachtiaj itech Biblia. Tikpaleuiyaj matlanemili ken Jehová kineki niman makitlakamati. Ipan yejuin tlamachtijli, tikitaskej tlenon techpaleuis más kuajli matitemachtikan.
^ párr. 4 Xkita tlamachtijli “Maka ijkin xchiua ijkuak tiktemaka se tlamachtijli itech Biblia” ipan amatlajkuilojli Tlen tomachtiskej niman tlen notekitiltis de septiembre de 2016.
^ párr. 8 Xuiya kampa kijtoua AMATLAJKUILOLTIN > VIDEOS > KINTLAJTOLTIAJ NIMAN TLEN INPAN YOPANOK.
^ párr. 9 Ipan JW Library®, xuiya kampa kijtoua MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
^ párr. 15 Xkimita tlamachtiltin “Tiknekiskej toapolaktiskej tla tiktlasojtlaj Jehová” niman “¿Iuelis timoapolaktis?” itech Amatl Tekakistilijketl de marzo de 2020.
^ párr. 77 TLEN NESI IPAN TLAIXKOPINAJLI: Sakin ika yotemachtitoj, se tokniuj lamajtsin akin melak youel temachtia kijlia on okse tokniuj ika xnoneki sajnoye tlajtos ijkuak temachtis.
^ párr. 79 TLEN NESI IPAN TLAIXKOPINAJLI: On siuatsintli akin kimachtiaj itech Biblia kasikamati kenon uelis yes se kuajli tesiuauj. Sakin, kijlia iueuentsin tlen youel ipan Biblia.
^ párr. 81 TLEN NESI IPAN TLAIXKOPINAJLI: On siuatsintli akin kimachtiaj niman iueuentsin nemij ichan se tokniuj siuatl akin okixmat ipan tlanechikojli.
