1. ¿Tlenon kichiuas melak matiyolpakikan?

MIYEKPA, tlen tajtin kitlapejpeniaj kichiuaskej uelis kinpaleuis noso kimijtlakos inkoneuan. Tla xkuajli tlen kitlapejpeniaj, kimijtlakos inkoneuan. San ika, tla kuajli tlen kitlapejpeniaj, kichiuas ika inkoneuan manemikan ika inyojlo. Yemelak, tekoneuan noijki noneki kuajli makitlapejpenikan tlen kichiuaskej. Tla tejuamej tiktlapejpeniaj tiktekichiuiliskej toTajtsin Jehová, melak tiyolpakiskej (Sal. 73:28).

2. ¿Tlenon kuajli okitlapejpeni kichiuas Jesús niman noijki itajuan?

² Itajuan Jesús melak kinekiyaj kinpaleuiskej inkoneuan makitekichiuilikan toTajtsin. Ijkuak tikitaj tlen okitlapejpenijkej, tikasikamatij ika yejon tlen melak kinekiyaj kichiuaskej (Luc. 2:40, 41, 52). Jesús noijki okitlapejpeni kichiuas tlen kipaleuiskia nochipa makitlakamati Jehová (Mat. 4:1-10). Yejua katka se kuajli tekoneuj. Miyekej okixmatkej ika katka se tlakatl akin yolmelauak niman yolchikauak. Nochimej tajtin akin kitlasojtlaj Jehová kinekiskiaj ika inkoneuan noijki makichiuakan ken Jesús.

3. ¿Tlenon tiknankiliskej ipan yejuin tlamachtijli?

³ Ipan yejuin tlamachtijli, tiknankiliskej yejuin: ¿Tlenon okichiuj Jehová ipampa Jesús? ¿Kenon tajtin noijki uelis kichiuaskej ijkon ken José niman María? ¿Niman kenon telpokamej akin kitekichiuiliaj Jehová uelis kichiuaskej ijkon ken Jesús?

4. ¿Tlenon okichiuj Jehová ipampa Jesús?

⁴ Jehová melak kuajli okitak akinomej nochiuaskiaj itajuan  Jesús (Mat. 1:18-23; Luc. 1:26-38). Itlajtoluan María, tlen tikinpouaj ipan Biblia, techititiaj ika yejua melak kitlasojtlaya Jehová niman iTlajtoltsin (Luc. 1:46-55). Niman ijkuak tikitaj kenon José okitlakamat Jehová, techititia ika yejua kitlasojtlaya toTajtsin niman ika kinekiya kiyolpaktis (Mat. 1:24).

5, 6. ¿Tlenon okixnamik Jesús?

⁵ Jehová okitak akinomej nochiuaskiaj itajuan Jesús. Yejua xokintlapejpeni akin kipiayaj miyek tomin. Sakin ika onemiko Jesús, itajuan, José niman María, otlauentlalitoj niman, tlen yejuamej okitemakakej ken uentli techititia ika xkipiayaj miyek tomin (Luc. 2:24). Kanaj José tekitiya ken kojxinketl ipan se kajli tlen onkatka inakastlan ichan tlen kipiaya ne Nazaret. Uelis tikijtoskej ika yejuamej nemiyaj san ika achijtsin pampa nesi ika okinpixkej chikome inkoneuan noso más (Mat. 13:55, 56).

⁶ Jehová okipaleui iKoneuj ijkuak kixnamikiya seki tlemach tlen xkuajli, san ika, kemantika noijki okikauili makixnamiki tlen ouijtika (Mat. 2:13-15). Jesús kinpiaya sekimej ichanejkauan akin xtlaneltokayaj itech. San matikonnemilikan kenon melak xkuajli onomachili pampa sekimej ichanejkauan xkineltokayaj ika yejua katka Mesías (Mar. 3:21; Juan 7:5). Kanaj noijki melak onajman ijkuak omik itlakpataj, José. Niman pampa Jesús akin más iueyi katka, kanaj ononek kichiuas on tekitl tlen kichiuaya José (Mar. 6:3). Sakin, ijkuak más onoskalti, kanaj ononek chikauak tekitis niman ijkon uelis kinmakas ichanejkauan tlen kinpolouaya. Kuakon, kuajli kimatstoya tlenon kijtosneki tisiauis niman titekitis se tonajli.

7. a) ¿Tlenon uelis notlajtoltiskej akin kinpiyaj inkoneuan? b) ¿Kenon Proverbios 2:1-6 uelis kinpaleuis tajtin makinmachtikan inkoneuan?

⁷ Tla tejua niman moixnamik nenkinekij nenkinpiyaskej nemokoneuan, xmotlajtoltikan: “¿Tiyolyemankej niman tiktlasojtlaj Jehová niman iTlajtol? ¿Techtlapejpeniskia Jehová niman ijkon matikiskaltikan se konetsintli?” (Sal. 127:3, 4). Niman tla tejua itikinpiya mokoneuan, xmotlajtolti: “¿Nikimititia nokoneuan ika melak kuajli tla se tekitki?” (Ecl. 3:12, 13). “¿Ninokojtilia nikintlajpiyas niman ijkon maka inpan nochiuas itlaj tlen xkuajli nion maka tlanemiliskej ijkon ken yejuin tlaltikpaktli tlen kiyekana Satanás?”  (Prov. 22:3). Yemelak, xuelis tikintlajpiyaskej itech nochi tlen kixnamikiskej ipan innemilis. Yejon xueli nochiua. San ika, kema uelis tikimititiskej kenon uelis kixnamikiskej tlen ouijtika. ¿Kenon uelis tikchiuaskej? Tla tikinpaleuiyaj manoyekanakan ika Biblia (xpoua Proverbios 2:1-6). Se neskayotl, tla se nemochanejkauj kikaua tlen melauak, xtekitilti Biblia niman xkimititi mokoneuan tleka melak noneki mamelajkanemikan itech Jehová (Sal. 31:23). Noso, tla miki yakaj akin nenkitlasojtlaj, xkimititi seki tlaxeloltin itech Biblia tlen uelis kinpaleuis mayolseuikan niman maka melak manoyolkokokan (2 Cor. 1:3, 4; 2 Tim. 3:16).

8. ¿Kenon José niman María okichiujkej tlen kijtoua Deuteronomio 6:6, 7?

⁸ José niman María ouel okipaleuijkej Jesús makiyolpakti toTajtsin pampa okichiujkej tlen Jehová kintlajtlanilia tajtin (xpoua Deuteronomio 6:6, 7). Yejuamej melak kitlasojtlayaj Jehová niman onokojtilijkej kimititiskej inkoneuan noijki ijkon makichiuakan.

9. ¿Tlenon kichiuayaj José niman María?

⁹ José niman María nochipa nokojtiliayaj kiueyichiuaskej Jehová imiuan inkoneuan. Nochi semanas yayaj ipan sinagoga tlen onkatka ne Nazaret niman nochi xiujtin konpanoltiayaj Pascua ne Jerusalén (Luc. 2:41; 4:16). Kanaj ijkuak yayaj Jerusalén, yejuamej kinojnotstiayaj Jesús niman oksekimej inkoneuan itech tlen ipan yonochiujka ikalpan Jehová. Kanaj noijki panouayaj ipan seki tlaltin tlen Biblia kinteneua. Ijkuak más miyekixtiayaj, kanaj José niman María más ouijtika kitayaj kinchikauiliskej intlaneltokil inkoneuan. San ika, melak kuajli ika onokojtilijkej nochipa kiueyichiuaskej Jehová, pampa yejon okichiuj ika nochi infamilia makipiyakan chikauak intlaneltokil.

10. ¿Kenon tajtin akin kitekichiuiliaj Jehová uelis kichiuaskej ijkon ken José niman María?

¹⁰ ¿Kenon tajtin akin kitekichiuiliaj Jehová uelis kichiuaskej ijkon ken José niman María? Tajtin, xkimititikan nemokoneuan ika yemelak nenkitlasojtlaj Jehová ika tlen nenkijtouaj niman ika tlen nenkichiuaj. Tla nenkinpaleuiyaj makitlasojtlakan Jehová, kentla nenkinmakatoskiaj se ueyi tetlayokolijli. Niman melak  nenkinpaleuiskej tla nenkimititiaj inselti manomachtikan Biblia, makinotsakan Jehová, mauiyan tlanechikojli niman matenojnotsakan (1 Tim. 6:6). Yemelak, noijki noneki nenkinmakaskej tlen kinpoloua (1 Tim. 5:8). San ika, maka xkilkauakan yejuin: nemokoneuan xuelis makisaskej tla kipiyaj miyek tlemach, san uelis makisaskej niman nemiskej ipan xochitlalpan tla kuajli nouikaj iuan toTajtsin (Ezeq. 7:19; 1 Tim. 4:8). *

11. a) ¿Kenon 1 Timoteo 6:17-19 uelis kinpaleuis tajtin kuajli makimiskaltikan inkoneuan? b) ¿Tlenon uelis kichiuaskej familias, niman kenon kinpaleuis yejon? (Xkita recuadro “ ¿Tlenon uelis nenkichiuaskej ken familia?”).

¹¹ Melak techyolpaktia ika miyekej tajtin akin kitekichiuiliaj Jehová kitlapejpeniaj kichiuaskej tlen kinpaleuis infamilia machikaujto intlaneltokil. Nokojtiliaj san sekan kiueyichiuaskej Jehová, yauej tlanechikoltin, uejueyimej tlanechikoltin niman san sekan ontenojnotsaj. Sekimej familias ontlapaleuiyaj kampa xmás ontenojnotsalo. Oksekimej konixmatij Betel noso ontlapaleuiyaj kampa kinchijchiuaj Kaltin kampa tosentlaliaj. Melauak, tajtin kipopolouaj tomintsin ijkuak ijkon kichiuaj niman kixnamikij tlen ouijtika, san ika, Jehová melak kinteochiua (xpoua 1 Timoteo 6:17-19). Akin noskaltiaj ipan se familia akin ijkon kichiuaj xkeman kilkauaj tlen kimititiaj niman melak kitlasojkamatij pampa ijkon okinmiskaltijkej (Prov. 10:22). *

12. ¿Tlenon ononek kichiuas Jesús ijkuak opeuj noskaltia?

¹² ITajtsin Jesús nochipa kitlapejpenia tlen kuajli, niman itlakpatajuan noijki ijkon okichiujkej. San ika, ijkuak opeuj noskaltia, Jesús ononek iselti kitlapejpenis tlenon kichiuaskia (Gál. 6:5). Ijkon ken tejuamej, yejua noijki ueliya san iselti kitlapejpeniaya tlen kichiuas. Maski ueliskia kichiuas tlen yejua kinekiya, okitlapejpeni kuajli nouikas iuan Jehová (Juan 8:29). Tlen okichiuj uelis kinpaleuis telpokamej ipan yejuin tonaltin.

13. ¿Tlenon okinek kichiuas Jesús ijkuak ok telpochtli katka?

¹³ Maski san telpochtli katka, Jesús nochipa okinek kintlakamatis itajuan. Xkeman okimixnamik niman xkeman okinemili ika más tlamachilise katka xijkon ken José niman María. Yejua nochipa “kintlakamatiya” (Luc. 2:51). Pampa Jesús akin más iueyi katka, uelis tikijtoskej ika itajuan kinauatiayaj makichiua miyek tlemach, niman kuajli tikmatstokej ika yejua kintlakamatiya. Onokojtili nomachtis kichiuas itekiyo itlakpataj niman ijkon uelis kinmakas ichanejkauan tlen kinpolouaya.

14. ¿Kenon tikmatij ika Jesús nomachtiaya iTlajtol toTajtsin?

 ¹⁴ Kanaj José niman María okijlikej Jesús ika toTajtsin okichiujka se milagro niman ijkon manemiki ipan yejuin tlaltikpaktli, niman kanaj noijki okijlikej tlenon okijtokaj sekimej iluikaktekitkej itech yejua (Luc. 2:8-19, 25-38). San ika, Jesús noijki san iselti onomachti iTlajtol toTajtsin. ¿Kenon tikmatij ika yejua nomachtiaya iTlajtol toTajtsin? Pampa, maski san telpochtli katka, Jesús kiteititiaya ika kuajli kasikamatiya iTlajtol toTajtsin, hasta “on uejueyixtokej temachtijkej” kimojkaitayaj ken kinnankiliaya (Luc. 2:46, 47). Maski san kipiaya 12 xiuitl, Jesús kuajli kimatstoya ika Jehová yejua akin iTaj katka (Luc. 2:42, 43, 49).

15. ¿Kenon okiteititi Jesús ika kinekiya kichiuas tlen Jehová kineki?

¹⁵ Ijkuak Jesús okasikamat tleka Jehová okuajtitlanka ipan yejuin tlaltikpaktli, yejua ika iyojlo okinek kichiuas tlen kineki iTajtsin (Juan 6:38). Maski kimatstoya ika miyekej kitlauelitaskiaj, yejua okinek kitlakamatis Jehová. Ijkuak onoapolakti, ipan xiuitl 29, opeuj chikauak kichiua itekiyo Jehová (Heb. 10:5-7). Yejua nochipa ijkon okichiuj, hasta ijkuak okipilojkej ipan kojtli melaktik (Juan 19:30).

16. ¿Kenon tekoneuan uelis kichiuaskej ijkon ken Jesús?

¹⁶ Xkintlakamati motajuan. Ijkon ken José niman María, motajuan noijki tlajtlakolejkej. San ika, Jehová yokinnauati mamitstlajpiyakan, mamitsiskaltikan niman mamitsmachtikan. Noneki tijkakis tlen mitsijliaj niman tikintlakaitas. Tla ijkon tikchiua, “tikpiyas miyek tlatiochiualistli” (Efes. 6:1-4).

17. Itech tlen kijtoua Josué 24:15, ¿tlenon noneki inseselti kitlapejpeniskej telpokamej?

¹⁷ Xtlapejpeni akinon tiktekichiuilis. Kipiya ika tikchiuas tlen noneki niman ijkon san no tejua tikasikamatis akinon Jehová, tlenon kineki kichiuas niman kenon uelis tiktlakamatis (Rom. 12:2). Tla ijkon tikchiua, uelis tiktlapejpenis tlen más mitspaleuis ipan monemilis: tiktekichiuilis Jehová (xpoua Josué 24:15; Ecl. 12:1). Tla nochipa tikpoua niman timomachtia Biblia, más tiktlasojtlas Jehová niman más chikauis motlaneltokil.

18. ¿Tlenon noneki inseselti kitlapejpeniskej telpokamej, niman tlenon panos tla ijkon kichiuaj?

¹⁸ Xchiua tlen kineki Jehová. Ipan yejuin tlaltikpaktli  kampa tlayekana Satanás, miyekej mitsijliskej ika san uelis tiyolpakis tla tikchiua tlen tikneki. San ika, akin kitejtemouaj kipiyaskej miyek tlemach “kipiyaj miyek ajmantli ipan innemilis” (1 Tim. 6:9, 10). San ika, tla tijkaki Jehová niman tiktlapejpenia kachtopa tikchiuas tlen yejua kineki, “nochi tlen tikchiuas kuajli kisas” niman ika moyojlo tinemis (Jos. 1:8).

19. ¿Tlenon noneki kilnamikiskej tajtin?

¹⁹ Tajtin, xchiuakan nochi tlen noneki niman ijkon uelis nenkinpaleuiskej nemokoneuan makitekichiuilikan Jehová. Xtlaneltokakan itech toTajtsin niman yejua mechpaleuis xtlapejpenikan tlen kuajli (Prov. 3:5, 6). Xkilnamikikan, tlen nenkimijliaj nemokoneuan melak kinpaleuis, san ika, más kinpaleuis tlen nenkichiuaj. Ika yejon, xtlapejpenikan tlen uelis kinpaleuis makiyolpaktikan Jehová.

20. ¿Tlenon kualtsin kiseliskej telpokamej akin kitlapejpeniaj kitekichiuiliskej Jehová?

²⁰ Telpokamej niman ichpokamej, xkilnamikikan ika nemotajuan uelis mechpaleuiskej kuajli xtlapejpenikan tlen nenkichiuaskej. San ika, nemejuamej noneki nemokojtiliskej nenkiyolpaktiskej Jehová. Ika yejon, xchiuakan ijkon ken Jesús niman xtlapejpenikan nenkitekichiuiliskej nemoTajtsin iluikakchane. Ijkon, miyek tekitl nenkichiuaskej niman ika nemoyojlo nennemiskej (1 Tim. 4:16). Niman, ika tlayekapan, nenkiseliskej se kualtsin nemilistli.