TLAMACHTIJLI 42
Kuajli matikneltokakan ika tinemij ipan tlen melauak
“Xkixtlalokan nochi, niman xkejeuakan nochi tlen kuajli” (1 TES. 5:21).
TLAKUIKAJLI 142 Maka matikmakauakan totlamachialis
TLEN TIKITASKEJ *
1. ¿Tleka miyekej xkimatij katlejua religión tlen melauak?
AMAN miyekej religiones kijtouaj ika kichiuaj ijkon ken Cristo niman ika kiueyichiuaj toTajtsin ijkon ken yejua kineki. Yejua ika, miyekej xkimatij katlejua religión tlen melauak niman notlajtoltiaj: “¿Onka san se religión tlen melauak, noso toTajtsin kinselia nochi religiones?”. Niman tejuamej, ¿kuajli tikneltokaj ika san akin tiiteixpantijkauan Jehová titemachtiaj tlen melauak niman ika san tejuamej tikueyichiuaj toTajtsin ijkon ken yejua kineki? ¿Uelis kuajli tikmatstoskej ika tlen tikneltokaj yejon tlen melauak? Matikitakan.
2. ¿Tleka apóstol Pablo kuajli kimatstoya ika tlen kineltokaya yejon tlen melauak? (1 Tesalonicenses 1:5).
2 Apóstol Pablo kuajli kimatstoya ika tlen kineltokaya yejon tlen melauak (xpoua 1 Tesalonicenses 1:5). Yejua ijkon tlaneltokaya pampa kuajli nomachtiaya iTlajtol toTajtsin. Yejua kineltokaya ika “nochi Yektlajkuilojli itech Dios ualejtikaj” (2 Tim. 3:16). Ijkuak Pablo nomachtiaya, okitak ika Jesús yejua akin toTajtsin yokijtojka ika kuajtitlaniskia. San ika, tlayekankej judíos xokinejkej kasikamatiskej ika Jesús yejua akin Mesías katka. Yejuin omexayakyejkej tlakamej kijtouayaj ika kitekichiuiliayaj toTajtsin, san ika, ika tlen kichiuayaj kiteititiayaj ika xmelauak (Tito 1:16). San ika, Pablo xsan kitlapejpeniaya tlenon kinekiya kineltokas niman tlenon ka. Yejua kinektoya temachtis niman kichiuas nochi tlen kitlajtlani toTajtsin (Hech. 20:27).
3. ¿Noneki tiknankiliskej nochi tlen totlajtoltiaj para tikneltokaskej ika tinemij ipan tlen melauak? (Xkita recuadro “‘ Sanoyej miyek’ tlen Jehová yokichijchiuj niman tlen kinemilia”).
3 Sekimej kinemiliaj ika on religión tlen melauak noneki kinankilis nochi tlen totlajtoltiaj, hasta tlen Biblia xkinankilia. ¿Kuajli tla ijkon titlanemiliaj? Matikitakan tlenon okichiuj apóstol Pablo. Maski yejua okimijli tokniuan “xkixtlalokan nochi”, noijki okijto ika yejua xnochi kasikamatiya (1 Tes. 5:21). Yejua okijto ika “aman totlaixmatkilis xajsitikaj” noso ika xnochi tikasikamatij, niman ika tlen tikitaj kentla “tikitaskiaj ipan sen espejo yejuan xchipauak” (1 Cor. 13:9, 12). Pablo xnochi kimatiya, niman tejuamej noijki xnochi tikmatij. San ika, nochi tlen youelka itech Jehová okipaleui makineltoka ika nemiya ipan tlen melauak.
4. ¿Tlenon techpaleuis kuajli matikneltokakan ika tinemij ipan tlen melauak, niman tlenon tikitaskej ipan yejuin tlamachtijli?
4 ¿Tlenon techpaleuis kuajli matikneltokakan ika tinemij ipan tlen melauak? Tla tikitaj kenon Jesús okijto ika nonekiya tikueyichiuaskej toTajtsin niman kenon aman iteixpantijkauan Jehová kiueyichiujtokej. Ipan yejuin tlamachtijli, tikitaskej ika akin yemelak kichiuaj ken Cristo 1) xkinueyichiuaj tajtsitsintin, 2) kitlakaitaj itoka Jehová, 3) kitlasojtlaj tlen melauak niman 4) noititiaj ika melauak notlasojtlaj.
XTIKINUEYICHIUAJ TAJTSITSINTIN
5. ¿Kenon Jesús okiueyichiuj toTajtsin, niman kenon uelis tikchiuaskej ijkon ken yejua?
5 Pampa Jesús melak kitlasojtla Jehová, san yejua okiueyichiuj. Ijkon okichiuj ijkuak nemiya ne iluikak niman nikan ipan tlaltikpaktli (Luc. 4:8). Niman okimijli inomachtijkauan noijki ijkon makichiuakan. Jesús niman inomachtijkauan xkeman okintekitiltijkej tajtsitsintin para kiueyichiuaskej toTajtsin. Pampa toTajtsin se espíritu, xakaj kimati kenon tlachia (Is. 46:5). San ika ¿kuajli yeskia tla tikintekitiltiaj santos niman tikinchiuiliaj teoyotl? Ipan tlanauatijli tlen okimakakej Moisés, Jehová okijto: “Maka tikchijchiuas itlaj ídolo yejuan tlacha ken itlaj yejuan onkaj ipan cielo, nion itlaj yejuan onkaj ipan tlaltikpaktli, nion itlaj yejuan onkaj ijtik atl. Maka timotlakuantelketsas imixpan on ídolos” (Éx. 20:4, 5). Akin yemelak tiknekij tikyolpaktiskej toTajtsin, kuajli tikasikamatij ika xnoneki tikintekitiltiskej tlamachijchiualtin noso tajtsitsintin.
6. ¿Ken akinon kichiuaj iteixpantijkauan Jehová?
6 Ixtlamatkej yokitakej ika tokniuan akin onenkej ipan kachtopa siglo, san kiueyichiuayaj toTajtsin. Libro History of the Christian Church, kijtoua ika tokniuan akin onenkej ipan kachtopa siglo, xkeman kinemiliskiaj kintekitiltiskiaj tlamachijchiualtin noso tajtsitsintin para kiueyichiuaskej toTajtsin. Aman, akin tiiteixpantijkauan Jehová noijki tikchiuaj ijkon ken tokniuan akin onenkej ipan kachtopa siglo. Xtikinchiuiliaj teoyotl santos, ángeles nion Jesús. Nion xtiktlajpalouaj bandera noso itlaj okse tlen ika kiueyiteneuaj se país. Tejuamej kuajli yotikijtokej ika nochipa tiktlakamatiskej tlen Jesús otechnauati ipan Mateo 4:10, kampa okijto: “Xmauistili moTEKO Dios [Jehová], niman san yejua xtekipano”.
7. ¿Tlenon xkichiuaj iteixpantijkauan Jehová?
7 Aman, miyekej kuelkakij tlen kimijliaj tlayekankej akin melak kimixmatij niman hasta kinueyichiuasnekij. Yauej ipan inteopan, kinkouiliaj inlibros niman kinmakaj miyek tomin para kinpaleuiskej. Sekimej kinneltokiliaj nochi tlen kiteijliaj. ¡Yejuamej más yolpakij ijkuak kimitaj yejuin tlayekankej xijkon ken pakiskiaj tla kitaskiaj Jesús! San ika, akin yemelak tikueyichiuaj Jehová ijkon ken yejua kineki, xtikinueyichiuaj akin tlayekanaj. Maski tikintlakaitaj akin techyekanaj, tinochimej toitaj ijkon ken Jesús otechmachti: “Nochimej nemejuamej nemiknijtin” (Mat. 23:8-10). Xtikinueyichiuaj tlakamej, akin tlayekanaj ipan se religión nion tekiuajkej. Xtikinpaleuiyaj ika tlen kichiuaj, xtokalaktiaj ipan política niman xtikchiuaj ijkon ken akin xkitekichiuiliaj toTajtsin. Nochi yejuin, kuajli kiteititia ika tejuamej xtikchiuaj ijkon ken okseki religiones akin kijtouaj ika kichiuaj ken Cristo (Juan 18:36).
TIKTLAKAITAJ ITOKA JEHOVÁ
Akin melauak kichiuaj ken Cristo ika inyojlo kiteijliaj tlen melauak itech Jehová. (Xkimita párrafos 8-10). *
8. ¿Kenon tikmatij ika Jehová kineki matikueyiteneuakan itoka niman matikimijlikan oksekimej?
8 Sejpatipan, Jesús yejuin okijli Jehová ipan iteoyouj: “NoTajtsin, xchiua para ma mitsueyilikan”. Jehová okinankili: “Yonikchiu para ma nechueyilikan, niman oksejpa nikchiuas para ma nechueyilikan” (Juan 12:28). Ijkuak Jesús nemiya ipan tlaltikpaktli, okichiuj makiueyiteneuakan itoka iTajtsin (Juan 17:26). Yejua ika, akin yemelak kichiuaj ken Cristo ika inyojlo kitekitiltiaj itoka toTajtsin niman kimijliaj oksekimej.
9. ¿Kenon okiteititijkej tokniuan akin onenkej ipan kachtopa siglo ika kitlakaitayaj itoka toTajtsin?
9 Ipan kachtopa siglo, sakin ika yonotlalijka kachtopa tlanechikojli, Jehová “opeuj kintlapejpenia miyekej akin xjudíos niman ijkon manochiuakan ikalpan niman makiueyilikan itoka” (Hech. 15:14, TNM). Yejuin tokniuan ika inyojlo kitekitiltiayaj itoka toTajtsin niman kiteijliayaj. Yejuamej okitekitiltijkej itoka toTajtsin ijkuak tenojnotsayaj niman ijkuak okijkuilojkej Biblia. * Ijkon okiteititijkej ika yejuamej kema kiueyiliayaj itoka toTajtsin (Hech. 2:14, 21).
10. ¿Tlenon kiteititia ika san iteixpantijkauan Jehová kiueyiteneuaj itoka toTajtsin?
10 ¿Iteixpantijkauan Jehová kiueyiteneuaj itoka toTajtsin? Kema. Matikitakan tleka ijkon tikijtouaj. Aman, miyekej tlayekankej itech tlaneltokiltin xkinekij makimatikan ika toTajtsin kipiya se itoka. Yokipopolojkej itoka toTajtsin ipan Biblias tlen yejuamej kinchijchiuaj niman hasta kiteijliaj ika xnoneki kitekitiltiskej itoka toTajtsin. * San ika, nochimej kimatij ika san iteixpantijkauan Jehová kiueyiteneuaj itoka toTajtsin niman kitlakaitaj. Nion se religión xkiueyiteneua itoka toTajtsin ijkon ken tejuamej. Tokojtiliaj tikteititiskej ika tejuamej yemelak tiiteixpantijkauan Jehová (Is. 43:10-12). Yotikinkixtijkej ipantsin 240 millones de Biblias itech Traducción del Nuevo Mundo, tlen kipiya itoka Jehová kampa miyekej yokipopolojkej. Niman ipantsin 1,000 tlajtoltin tikinkixtiaj amatlajkuiloltin kampa notekitiltia itoka toTajtsin, Jehová.
TIKTLASOJTLAJ TLEN MELAUAK
11. ¿Kenon tokniuan akin onenkej ipan kachtopa siglo okiteititijkej ika kitlasojtlayaj tlen melauak?
11 Jesús okiteititi ika kitlasojtlaya tlen melauak pampa okiteijli tlen toTajtsin kichiuas ika tlayekapan. Okichiuj ijkon ken toTajtsin kinekiya niman okinyolchikauj oksekimej noijki ijkon makichiuakan (Juan 18:37). Akin yemelak kichiuayaj ijkon ken Cristo, noijki kitlasojtlayaj tlen melauak (Juan 4:23, 24). Apóstol Pedro okijto ika akin yemelak kichiuaj ijkon ken Cristo yauej ipan ojtli “yejuan melauak” (2 Ped. 2:2). Tokniuan akin onenkej ipan kachtopa siglo, noijki kitlasojtlayaj tlen melauak pampa xokichiujkej ijkon ken kichiuayaj okseki religiones. Xokichiujkej “incostumbre on tlaltikpaktlakamej” nion xokiselijkej “on temachtilistli [tlen] xkisa itech Cristo” (Col. 2:8). Noijki ijkon, akin yemelak tikchiuaj ijkon ken Cristo, tokojtiliaj tiktlakamatiskej “on tlen melauak” (3 Juan 3, 4). ¿Kenon tikchiuaj yejon? Tikitaj tla tlen tikneltokaj yejon tlen melauak niman tokojtiliaj tikchiuaskej ijkon ken Jehová technauatia ipan iTlajtol.
12. ¿Tlenon kichiua Grupo akin tlayekana ijkuak kita ika noneki itlaj tikpatlaskej, niman tleka kichiua?
12 Iteixpantijkauan Jehová, xkijtouaj tla nochipa kuajli yokasikamatkej tlen kijtoua Biblia. Kemantika, noijki xkuajli yokasikamatkaj tlen kijtoua Biblia niman ken noneki noyekanas tlanechikojli. San ika, yejuin xtechmojkatlachialtia, pampa Biblia kuajli yokijtojka ika ikalpan toTajtsin ika yolik kasikamatstiaskia tlen melauak (Col. 1:9, 10). Jehová ika yolik techasikamachiltijtiuj tlen melauak, yejua ika, noneki titlamachiaskej hasta ijkuak yejua techajsikamachiltis tlen melauak (Prov. 4:18). Ijkuak Grupo akin tlayekana ipan nochi tlanechikoltin kita ika noneki nopatlas ken tikasikamatij se tlaxelojli noso ken tikchiuaj se tekitl, yejua nimantsin kipatla. Miyekej religiones kipatlaj itlaj san pampa kinekij kinyolpaktiskej akin ontlakakij inteopan niman pampa kinekij makinueyiteneuakan. San ika, iteixpantijkauan Jehová kipatlaj itlaj pampa kinekij más kinisiuiskej toTajtsin niman kiueyichiuaskej ijkon ken Jesús otemachti (Sant. 4:4). Ijkuak itlaj tikpatlaj, xtikchiuaj pampa tiknekij tikinyolpaktiskej oksekimej, yej pampa más kuajli yotikasikamatkej Biblia. ¡Tiktlasojtlaj tlen melauak! (1 Tes. 2:3, 4).
MELAUAK TOTLASOJTLAJ
13. ¿Kenon okijto Jesús ika kimixmatiskiaj akin melauak inomachtijkauan, niman kenon kiteititiaj iteixpantijkauan Jehová ika ijkon kichiuaj?
13 Tokniuan akin onenkej ipan kachtopa siglo, kimixmatiyaj ipampa tlen kuajli kichiuayaj. San ika, más kimixmatiyaj pampa notlasojtlayaj. Jesús okijto: “Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:34, 35). Aman, iteixpantijkauan Jehová akin nemij ipan nochi tlaltikpaktli, noititiaj ika melak notlasojtlaj niman kuajli nouikaj. Tejuamej melauak totlasojtlaj maski tiualeuaj ipan tlatlamantikej países niman sejneka ken otechiskaltijkej. Xtikchiuaj ijkon ken okseki religiones. Niman, ijkon tikitaj ijkuak tiauej ipan totlanechikoluan niman toueyitlanechikoluan. Yejuin techpaleuiya más kuajli matikasikamatikan ika san tejuamej akin tikueyichiuaj Jehová ijkon ken yejua kineki.
14. Itech tlen kijtoua Colosenses 3:12-14, ¿kenon uelis tikteititiskej ika yemelak titetlasojtlaj?
14 Biblia kijtoua: “Sanoyej xmotlajsojtlakan iuan oksekimej” (1 Ped. 4:8). Tikteititiaj ika totlasojtlaj ijkuak totlapopoluiyaj niman toijyouiyaj ijkuak topopolouaj. Noijki, tokojtiliaj kuajli tikinseliskej niman tikinmakaskej tlen tikpiyaj nochimej tokniuan, hasta kanaj akin yotechyolkokojkej (xpoua Colosenses 3:12-14, TNM). * Ijkuak tokojtiliaj titetlasojtlaskej, tikteititiaj ika yemelak tikchiuaj ijkon ken Cristo.
“SAN SE TLANELTOKIJLI”
15. ¿Tlenon más kiteititia ika tikchiuaj ijkon ken tokniuan akin onenkej ipan kachtopa siglo?
15 Onka okseki tlemach tlen tikchiuaj ijkon ken okichiujkej tokniuan akin onenkej ipan kachtopa siglo. Aman, tlanechikojli noijki noyekana ijkon ken yeuejkaui, nemij tokniuan akin kintlajpalouaj tlanechikoltin, tlayekankej niman tlapaleuijkej (Filip. 1:1; Tito 1:5). Ijkon ken yejuamej, tejuamej noijki tiktlakamatij Jehová ijkuak techijlia ika xnoneki tiauilnemiskej, ijkuak techijlia kenon noneki touikaskej iuan toixnamik, ika noneki tikpatiojkaitaskej yestli niman ijkuak techijlia ika noneki tiktlajpiyaskej tlanechikojli intech akin kichiuaj se ueyi tlajtlakojli niman xkinekij noyolkuepaskej (Hech. 15:28, 29; 1 Cor. 5:11-13; 6:9, 10; Heb. 13:4).
16. ¿Tlenon techmachtia Efesios 4:4-6?
16 Jesús okijto ika miyekej kijtoskiaj ika inomachtijkauan, maski yejuamej xkichiuaj ijkon ken yejua (Mat. 7:21-23). ITlajtol toTajtsin noijki yokijtojka ika ipan yejuin itlamiyan tonaltin miyekej kijtoskiaj ika “kineltokaj Dios, pero ika on tlen kichiuaj nesi ika xnejli kineltokaj” (2 Tim. 3:1, 5). San ika, Biblia kuajli kijtoua ika onka “san se tlaneltokijli” tlen toTajtsin kiselia (xpoua Efesios 4:4-6, TNM). *
17. ¿Akinomej kichiuaj ijkon ken Jesús niman nemij ipan religión tlen melauak?
17 Kuakon, ¿katlejua religión tlen melauak? Yotikitakej tlenon okichiuj Jesús niman tlenon okichiujkej tokniuan akin onenkej ipan kachtopa siglo. Kuajli nesi ika san iteixpantijkauan Jehová kichiuaj ijkon ken toTajtsin technauatia. Melak tiyolpakij pampa tinemij ipan ikalpan toTajtsin, tikmatij tlen melauak itech Jehová niman tlen yejua kichiuas ika tlayekapan. Kuakon, nochipa kuajli matikneltokakan ika tinemij ipan tlen melauak.
TLAKUIKAJLI 3 Titokojtilis niman titotlamachialis
^ párr. 5 Ipan yejuin tlamachtijli, tikitaskej kenon Jesús okiueyichiuj toTajtsin niman kenon inomachtijkauan, akin onenkej ipan kachtopa siglo, noijki ijkon okichiujkej. Noijki, tikitaskej kenon iteixpantijkauan Jehová kichiujtokej ijkon ken Jesús okichiuj.
^ párr. 9 Xkita recuadro “¿Empleaban los primeros cristianos el nombre de Dios?”, tlen onka ipan La Atalaya del 1 de julio de 2010, página 6.
^ párr. 10 Ipan 2008, papa Benedicto XVI okimijli católicos ika xnonekiya kitekitiltiskej itoka toTajtsin ijkuak kiueyichiuaskej, ijkuak nokuikatiskej niman ijkuak kichiuiliskej teoyotl.
^ párr. 14 Colosenses 3:12-14: “12 Kuakon, pampa toTajtsin yomechtlapejpeni, pampa nenyolchipaujkej niman mechtlasojtla, xteiknelikan, xpiyakan kuajli nemoyojlo, xyolyemankej, xyolseujkej niman xteijyouikan. 13 Xmoijyouijtokan se iuan okse niman xmotlapopoluijtokan ika kuajli nemoyojlo se iuan okse maski tla yakaj kipiya itlaj tlen xkuajli itech okse. Ijkon ken Jehová omechtlapopolui ika kuajli iyojlo, nemejuamej noijki noneki ijkon nenkichiuaskej. 14 San ika, xsan yejon, noijki xmotlakentikan ika tlasojtlalistli, pampa yejuin kichiua san sekan xnemikan”.
^ párr. 16 Efesios 4:4-6: “4 Onka san se tlalnakayotl niman san se espíritu, ijkon ken toTajtsin noijki yomechmakak san se tlamachialistli. 5 San se toTeko nemi, san se tlaneltokijli onka niman san se apolaktilistli onka. 6 San se toTajtsin nemi niman nochimej inTaj, akin nochimej kinyekana niman nochimej ueli kintekitiltia niman kinpaleuiya”.
^ párr. 65 TLEN NESI IPAN TLAIXKOPINAJLI: Ikalpan Jehová yokikixti Traducción del Nuevo Mundo ika ipantsin 200 tlajtoltin para nochimej mauelikan makipouakan se Biblia tlen kipiya itoka toTajtsin.
